| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
9. ниб̣б̣аанасуд̇д̇аван̣н̣анаа
9. Nibbānasuttavaṇṇanā
179. навамз абхид̇хаммз вуд̇д̇анаязнаад̇и –
179. Navame abhidhamme vuttanayenāti –
‘‘гад̇амаа хаанабхааг̇иний бан̃н̃аа? батамасса жхаанасса лаабхим̣ гаамасахаг̇ад̇аа сан̃н̃ааманасигаараа самуд̣̇аажаранд̇и хаанабхааг̇иний бан̃н̃аа, д̇ад̣̇ануд̇хаммад̇аа сад̇и санд̇идтад̇и тид̇ибхааг̇иний бан̃н̃аа. авид̇аггасахаг̇ад̇аа сан̃н̃ааманасигаараа самуд̣̇аажаранд̇и висзсабхааг̇иний бан̃н̃аа. ниб̣б̣ид̣̇аасахаг̇ад̇аа сан̃н̃ааманасигаараа самуд̣̇аажаранд̇и вирааг̇уубасан̃хид̇аа ниб̣б̣зд̇хабхааг̇иний бан̃н̃аа’’д̇и (вибха. 799) –
‘‘Katamā hānabhāginī paññā? Paṭhamassa jhānassa lābhiṃ kāmasahagatā saññāmanasikārā samudācaranti hānabhāginī paññā, tadanudhammatā sati santiṭṭhati ṭhitibhāginī paññā. Avitakkasahagatā saññāmanasikārā samudācaranti visesabhāginī paññā. Nibbidāsahagatā saññāmanasikārā samudācaranti virāgūpasañhitā nibbedhabhāginī paññā’’ti (vibha. 799) –
аад̣̇инаа вибхан̇г̇з вуд̇д̇анаязна звамад̇т̇о взд̣̇ид̇аб̣б̣о.
Ādinā vibhaṅge vuttanayena evamattho veditabbo.
д̇ад̇т̇а батамасса жхаанасса лаабхинд̇и явааяам̣ аббаг̇ун̣асса батамасса жхаанасса лаабхий, д̇ам̣. гаамасахаг̇ад̇аа сан̃н̃ааманасигаараа самуд̣̇аажаранд̇ийд̇и д̇ад̇о вудтид̇ам̣ аарамман̣авасзна гаамасахаг̇ад̇аа худ̇ваа сан̃н̃ааманасигаараа самуд̣̇аажаранд̇и д̇уд̣̇анд̇и жод̣̇знд̇и. д̇асса гаамаанубагканд̣̇аанам̣ сан̃н̃ааманасигаараанам̣ васзна саа батамаж̇жхаанабан̃н̃аа хааяад̇и барихааяад̇и, д̇асмаа ‘‘хаанабхааг̇иний бан̃н̃аа’’д̇и вуд̇д̇аа. д̇ад̣̇ануд̇хаммад̇аад̇и д̇ад̣̇ануруубасабхааваа. сад̇и санд̇идтад̇ийд̇и ид̣̇ам̣ мижчаасад̇им̣ санд̇хааяа вуд̇д̇ам̣, на саммаасад̇им̣. яасса хи батамаж̇жхаанаануруубасабхааваа батамаж̇жхаанам̣ санд̇ад̇о бан̣ийд̇ад̇о д̣̇исваа ассаад̣̇аяамаанаа абхинанд̣̇амаанаа ниганд̇и уббаж̇ж̇ад̇и, д̇асса ниганд̇ивасзна батамаж̇жхаанабан̃н̃аа нзва хааяад̇и на вад̣дхад̇и, тид̇игодтаасигаа ход̇и. д̇зна вуд̇д̇ам̣ ‘‘тид̇ибхааг̇иний бан̃н̃аа’’д̇и. авид̇аггасахаг̇ад̇аад̇и авид̇аггам̣ д̣̇уд̇ияаж̇жхаанам̣ санд̇ад̇о бан̣ийд̇ад̇о манасигарод̇о аарамман̣авасзна авид̇аггасахаг̇ад̇аа сан̃н̃ааманасигаараа. самуд̣̇аажаранд̇ийд̇и баг̇ун̣ад̇о батамаж̇жхаанад̇о вудтид̇ам̣ д̣̇уд̇ияаж̇жхаанаад̇хиг̇амад̇т̇ааяа д̇уд̣̇анд̇и жод̣̇знд̇и, д̇асса убари д̣̇уд̇ияаж̇жхаанаанубагканд̣̇аанам̣ сан̃н̃ааманасигаараанам̣ васзна саа батамаж̇жхаанабан̃н̃аа висзсабхууд̇асса д̣̇уд̇ияаж̇жхаанасса уббад̇д̇ибад̣̇адтаанад̇ааяа ‘‘висзсабхааг̇иний’’д̇и вуд̇д̇аа.
Tattha paṭhamassa jhānassa lābhinti yvāyaṃ appaguṇassa paṭhamassa jhānassa lābhī, taṃ. Kāmasahagatāsaññāmanasikārā samudācarantīti tato vuṭṭhitaṃ ārammaṇavasena kāmasahagatā hutvā saññāmanasikārā samudācaranti tudanti codenti. Tassa kāmānupakkhandānaṃ saññāmanasikārānaṃ vasena sā paṭhamajjhānapaññā hāyati parihāyati, tasmā ‘‘hānabhāginī paññā’’ti vuttā. Tadanudhammatāti tadanurūpasabhāvā. Sati santiṭṭhatīti idaṃ micchāsatiṃ sandhāya vuttaṃ, na sammāsatiṃ. Yassa hi paṭhamajjhānānurūpasabhāvā paṭhamajjhānaṃ santato paṇītato disvā assādayamānā abhinandamānā nikanti uppajjati, tassa nikantivasena paṭhamajjhānapaññā neva hāyati na vaḍḍhati, ṭhitikoṭṭhāsikā hoti. Tena vuttaṃ ‘‘ṭhitibhāginī paññā’’ti. Avitakkasahagatāti avitakkaṃ dutiyajjhānaṃ santato paṇītato manasikaroto ārammaṇavasena avitakkasahagatā saññāmanasikārā. Samudācarantīti paguṇato paṭhamajjhānato vuṭṭhitaṃ dutiyajjhānādhigamatthāya tudanti codenti, tassa upari dutiyajjhānānupakkhandānaṃ saññāmanasikārānaṃ vasena sā paṭhamajjhānapaññā visesabhūtassa dutiyajjhānassa uppattipadaṭṭhānatāya ‘‘visesabhāginī’’ti vuttā.
ниб̣б̣ид̣̇аасахаг̇ад̇аад̇и д̇ам̣язва батамаж̇жхааналаабхим̣ жхаанад̇о вудтид̇ам̣ ниб̣б̣ид̣̇аасан̇каад̇зна вибассанаан̃аан̣зна сахаг̇ад̇аа. вибассанаан̃аан̣ан̃хи жхаанан̇г̇абхзд̣̇з вад̇д̇анд̇з ниб̣б̣инд̣̇ад̇и угган̣тад̇и, д̇асмаа ‘‘ниб̣б̣ид̣̇аа’’д̇и вужжад̇и. самуд̣̇аажаранд̇ийд̇и ниб̣б̣аанасажчигирияад̇т̇ааяа д̇уд̣̇анд̇и жод̣̇знд̇и. вирааг̇уубасан̃хид̇аад̇и вирааг̇асан̇каад̇зна ниб̣б̣аанзна убасам̣хид̇аа. вибассанаан̃аан̣ан̃хи саггаа иминаа маг̇г̇зна вирааг̇ам̣ ниб̣б̣аанам̣ сажчигаад̇унд̇и бавад̇д̇ид̇о ‘‘вирааг̇уубасам̣хид̇а’’нд̇и вужжад̇и. д̇ам̣самбаяуд̇д̇асан̃н̃ааманасигаарааби вирааг̇уубасам̣хид̇аа зва наама. д̇асса д̇зсам̣ сан̃н̃ааманасигаараанам̣ васзна саа батамаж̇жхаанабан̃н̃аа арияамаг̇г̇аббадивзд̇хасса бад̣̇адтаанад̇ааяа ‘‘ниб̣б̣зд̇хабхааг̇иний’’д̇и вуд̇д̇аад̇и.
Nibbidāsahagatāti taṃyeva paṭhamajjhānalābhiṃ jhānato vuṭṭhitaṃ nibbidāsaṅkhātena vipassanāñāṇena sahagatā. Vipassanāñāṇañhi jhānaṅgabhede vattante nibbindati ukkaṇṭhati, tasmā ‘‘nibbidā’’ti vuccati. Samudācarantīti nibbānasacchikiriyatthāya tudanti codenti. Virāgūpasañhitāti virāgasaṅkhātena nibbānena upasaṃhitā. Vipassanāñāṇañhi sakkā iminā maggena virāgaṃ nibbānaṃ sacchikātunti pavattito ‘‘virāgūpasaṃhita’’nti vuccati. Taṃsampayuttasaññāmanasikārāpi virāgūpasaṃhitā eva nāma. Tassa tesaṃ saññāmanasikārānaṃ vasena sā paṭhamajjhānapaññā ariyamaggappaṭivedhassa padaṭṭhānatāya ‘‘nibbedhabhāginī’’ti vuttāti.
ниб̣б̣аанасуд̇д̇аван̣н̣анаа нидтид̇аа.
Nibbānasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 9. ниб̣б̣аанасуд̇д̇ам̣ • 9. Nibbānasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 9. ниб̣б̣аанасуд̇д̇аван̣н̣анаа • 9. Nibbānasuttavaṇṇanā
