Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya

    ៩. និព្ពេធិកសុត្តំ

    9. Nibbedhikasuttaṃ

    ៦៣. ‘‘និព្ពេធិកបរិយាយំ វោ, ភិក្ខវេ, ធម្មបរិយាយំ ទេសេស្សាមិ។ តំ សុណាថ, សាធុកំ មនសិ ករោថ; ភាសិស្សាមី’’តិ។ ‘‘ឯវំ, ភន្តេ’’តិ ខោ តេ ភិក្ខូ ភគវតោ បច្ចស្សោសុំ។ ភគវា ឯតទវោច –

    63. ‘‘Nibbedhikapariyāyaṃ vo, bhikkhave, dhammapariyāyaṃ desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –

    ‘‘កតមោ ច សោ, ភិក្ខវេ, និព្ពេធិកបរិយាយោ ធម្មបរិយាយោ? កាមា, ភិក្ខវេ, វេទិតព្ពា, កាមានំ និទានសម្ភវោ វេទិតព្ពោ, កាមានំ វេមត្តតា វេទិតព្ពា, កាមានំ វិបាកោ វេទិតព្ពោ, កាមនិរោធោ 1 វេទិតព្ពោ, កាមនិរោធគាមិនី 2 បដិបទា វេទិតព្ពា។

    ‘‘Katamo ca so, bhikkhave, nibbedhikapariyāyo dhammapariyāyo? Kāmā, bhikkhave, veditabbā, kāmānaṃ nidānasambhavo veditabbo, kāmānaṃ vemattatā veditabbā, kāmānaṃ vipāko veditabbo, kāmanirodho 3 veditabbo, kāmanirodhagāminī 4 paṭipadā veditabbā.

    ‘‘វេទនា, ភិក្ខវេ, វេទិតព្ពា, វេទនានំ និទានសម្ភវោ វេទិតព្ពោ, វេទនានំ វេមត្តតា វេទិតព្ពា, វេទនានំ វិបាកោ វេទិតព្ពោ, វេទនានិរោធោ វេទិតព្ពោ, វេទនានិរោធគាមិនី បដិបទា វេទិតព្ពា។

    ‘‘Vedanā, bhikkhave, veditabbā, vedanānaṃ nidānasambhavo veditabbo, vedanānaṃ vemattatā veditabbā, vedanānaṃ vipāko veditabbo, vedanānirodho veditabbo, vedanānirodhagāminī paṭipadā veditabbā.

    ‘‘សញ្ញា, ភិក្ខវេ, វេទិតព្ពា, សញ្ញានំ និទានសម្ភវោ វេទិតព្ពោ, សញ្ញានំ វេមត្តតា វេទិតព្ពា , សញ្ញានំ វិបាកោ វេទិតព្ពោ, សញ្ញានិរោធោ វេទិតព្ពោ, សញ្ញានិរោធគាមិនី បដិបទា វេទិតព្ពា។

    ‘‘Saññā, bhikkhave, veditabbā, saññānaṃ nidānasambhavo veditabbo, saññānaṃ vemattatā veditabbā , saññānaṃ vipāko veditabbo, saññānirodho veditabbo, saññānirodhagāminī paṭipadā veditabbā.

    ‘‘អាសវា, ភិក្ខវេ, វេទិតព្ពា, អាសវានំ និទានសម្ភវោ វេទិតព្ពោ, អាសវានំ វេមត្តតា វេទិតព្ពា, អាសវានំ វិបាកោ វេទិតព្ពោ, អាសវនិរោធោ វេទិតព្ពោ, អាសវនិរោធគាមិនី បដិបទា វេទិតព្ពា។

    ‘‘Āsavā, bhikkhave, veditabbā, āsavānaṃ nidānasambhavo veditabbo, āsavānaṃ vemattatā veditabbā, āsavānaṃ vipāko veditabbo, āsavanirodho veditabbo, āsavanirodhagāminī paṭipadā veditabbā.

    ‘‘កម្មំ , ភិក្ខវេ, វេទិតព្ពំ, កម្មានំ និទានសម្ភវោ វេទិតព្ពោ, កម្មានំ វេមត្តតា វេទិតព្ពា, កម្មានំ វិបាកោ វេទិតព្ពោ, កម្មនិរោធោ វេទិតព្ពោ, កម្មនិរោធគាមិនី បដិបទា វេទិតព្ពា។

    ‘‘Kammaṃ , bhikkhave, veditabbaṃ, kammānaṃ nidānasambhavo veditabbo, kammānaṃ vemattatā veditabbā, kammānaṃ vipāko veditabbo, kammanirodho veditabbo, kammanirodhagāminī paṭipadā veditabbā.

    ‘‘ទុក្ខំ, ភិក្ខវេ, វេទិតព្ពំ, ទុក្ខស្ស និទានសម្ភវោ វេទិតព្ពោ, ទុក្ខស្ស វេមត្តតា វេទិតព្ពា, ទុក្ខស្ស វិបាកោ វេទិតព្ពោ, ទុក្ខនិរោធោ វេទិតព្ពោ, ទុក្ខនិរោធគាមិនី បដិបទា វេទិតព្ពា។

    ‘‘Dukkhaṃ, bhikkhave, veditabbaṃ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbā.

    ‘‘‘កាមា, ភិក្ខវេ, វេទិតព្ពា, កាមានំ និទានសម្ភវោ វេទិតព្ពោ, កាមានំ វេមត្តតា វេទិតព្ពា, កាមានំ វិបាកោ វេទិតព្ពោ, កាមនិរោធោ វេទិតព្ពោ, កាមនិរោធគាមិនី បដិបទា វេទិតព្ពា’តិ, ឥតិ ខោ បនេតំ វុត្តំ។ កិញ្ចេតំ បដិច្ច វុត្តំ 5? បញ្ចិមេ, ភិក្ខវេ, កាមគុណា – ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសំហិតា រជនីយា, សោតវិញ្ញេយ្យា សទ្ទា… ឃានវិញ្ញេយ្យា គន្ធា… ជិវ្ហាវិញ្ញេយ្យា រសា… កាយវិញ្ញេយ្យា ផោដ្ឋព្ពា ឥដ្ឋា កន្តា មនាបា បិយរូបា កាមូបសំហិតា រជនីយា។ អបិ ច ខោ, ភិក្ខវេ, នេតេ កាមា កាមគុណា នាមេតេ 6 អរិយស្ស វិនយេ វុច្ចន្តិ –

    ‘‘‘Kāmā, bhikkhave, veditabbā, kāmānaṃ nidānasambhavo veditabbo, kāmānaṃ vemattatā veditabbā, kāmānaṃ vipāko veditabbo, kāmanirodho veditabbo, kāmanirodhagāminī paṭipadā veditabbā’ti, iti kho panetaṃ vuttaṃ. Kiñcetaṃ paṭicca vuttaṃ 7? Pañcime, bhikkhave, kāmaguṇā – cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Api ca kho, bhikkhave, nete kāmā kāmaguṇā nāmete 8 ariyassa vinaye vuccanti –

    9 ‘‘សង្កប្បរាគោ បុរិសស្ស កាមោ,

    10 ‘‘Saṅkapparāgo purisassa kāmo,

    នេតេ 11 កាមា យានិ ចិត្រានិ លោកេ;

    Nete 12 kāmā yāni citrāni loke;

    សង្កប្បរាគោ បុរិសស្ស កាមោ,

    Saṅkapparāgo purisassa kāmo,

    តិដ្ឋន្តិ ចិត្រានិ តថេវ លោកេ;

    Tiṭṭhanti citrāni tatheva loke;

    អថេត្ថ ធីរា វិនយន្តិ ឆន្ទ’’ន្តិ។

    Athettha dhīrā vinayanti chanda’’nti.

    ‘‘កតមោ ច, ភិក្ខវេ, កាមានំ និទានសម្ភវោ? ផស្សោ, ភិក្ខវេ, កាមានំ និទានសម្ភវោ។

    ‘‘Katamo ca, bhikkhave, kāmānaṃ nidānasambhavo? Phasso, bhikkhave, kāmānaṃ nidānasambhavo.

    ‘‘កតមា ច, ភិក្ខវេ, កាមានំ វេមត្តតា? អញ្ញោ, ភិក្ខវេ, កាមោ រូបេសុ, អញ្ញោ កាមោ សទ្ទេសុ, អញ្ញោ កាមោ គន្ធេសុ, អញ្ញោ កាមោ រសេសុ, អញ្ញោ កាមោ ផោដ្ឋព្ពេសុ។ អយំ វុច្ចតិ, ភិក្ខវេ, កាមានំ វេមត្តតា។

    ‘‘Katamā ca, bhikkhave, kāmānaṃ vemattatā? Añño, bhikkhave, kāmo rūpesu, añño kāmo saddesu, añño kāmo gandhesu, añño kāmo rasesu, añño kāmo phoṭṭhabbesu. Ayaṃ vuccati, bhikkhave, kāmānaṃ vemattatā.

    ‘‘កតមោ ច, ភិក្ខវេ, កាមានំ វិបាកោ? យំ ខោ, ភិក្ខវេ, កាមយមានោ តជ្ជំ តជ្ជំ អត្តភាវំ អភិនិព្ពត្តេតិ បុញ្ញភាគិយំ វា អបុញ្ញភាគិយំ វា, អយំ វុច្ចតិ, ភិក្ខវេ, កាមានំ វិបាកោ។

    ‘‘Katamo ca, bhikkhave, kāmānaṃ vipāko? Yaṃ kho, bhikkhave, kāmayamāno tajjaṃ tajjaṃ attabhāvaṃ abhinibbatteti puññabhāgiyaṃ vā apuññabhāgiyaṃ vā, ayaṃ vuccati, bhikkhave, kāmānaṃ vipāko.

    ‘‘កតមោ ច, ភិក្ខវេ, កាមនិរោធោ? ផស្សនិរោធោ 13, ភិក្ខវេ, កាមនិរោធោ។ អយមេវ អរិយោ អដ្ឋង្គិកោ មគ្គោ កាមនិរោធគាមិនី បដិបទា, សេយ្យថិទំ – សម្មាទិដ្ឋិ, សម្មាសង្កប្បោ, សម្មាវាចា, សម្មាកម្មន្តោ , សម្មាអាជីវោ, សម្មាវាយាមោ, សម្មាសតិ, សម្មាសមាធិ។

    ‘‘Katamo ca, bhikkhave, kāmanirodho? Phassanirodho 14, bhikkhave, kāmanirodho. Ayameva ariyo aṭṭhaṅgiko maggo kāmanirodhagāminī paṭipadā, seyyathidaṃ – sammādiṭṭhi, sammāsaṅkappo, sammāvācā, sammākammanto , sammāājīvo, sammāvāyāmo, sammāsati, sammāsamādhi.

    ‘‘យតោ ខោ 15, ភិក្ខវេ, អរិយសាវកោ ឯវំ កាមេ បជានាតិ, ឯវំ កាមានំ និទានសម្ភវំ បជានាតិ, ឯវំ កាមានំ វេមត្តតំ បជានាតិ, ឯវំ កាមានំ វិបាកំ បជានាតិ, ឯវំ កាមនិរោធំ បជានាតិ, ឯវំ កាមនិរោធគាមិនិំ បដិបទំ បជានាតិ, សោ ឥមំ និព្ពេធិកំ ព្រហ្មចរិយំ បជានាតិ កាមនិរោធំ។ កាមា, ភិក្ខវេ, វេទិតព្ពា…បេ.… កាមនិរោធគាមិនី 16 បដិបទា វេទិតព្ពាតិ, ឥតិ យំ តំ វុត្តំ ឥទមេតំ បដិច្ច វុត្តំ។

    ‘‘Yato kho 17, bhikkhave, ariyasāvako evaṃ kāme pajānāti, evaṃ kāmānaṃ nidānasambhavaṃ pajānāti, evaṃ kāmānaṃ vemattataṃ pajānāti, evaṃ kāmānaṃ vipākaṃ pajānāti, evaṃ kāmanirodhaṃ pajānāti, evaṃ kāmanirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti kāmanirodhaṃ. Kāmā, bhikkhave, veditabbā…pe… kāmanirodhagāminī 18 paṭipadā veditabbāti, iti yaṃ taṃ vuttaṃ idametaṃ paṭicca vuttaṃ.

    ‘‘វេទនា, ភិក្ខវេ, វេទិតព្ពា…បេ.… វេទនានិរោធគាមិនី បដិបទា វេទិតព្ពាតិ, ឥតិ ខោ បនេតំ វុត្តំ។ កិញ្ចេតំ បដិច្ច វុត្តំ? តិស្សោ ឥមា, ភិក្ខវេ, វេទនា – សុខា វេទនា, ទុក្ខា វេទនា, អទុក្ខមសុខា វេទនា។

    ‘‘Vedanā, bhikkhave, veditabbā…pe… vedanānirodhagāminī paṭipadā veditabbāti, iti kho panetaṃ vuttaṃ. Kiñcetaṃ paṭicca vuttaṃ? Tisso imā, bhikkhave, vedanā – sukhā vedanā, dukkhā vedanā, adukkhamasukhā vedanā.

    ‘‘កតមោ ច, ភិក្ខវេ, វេទនានំ និទានសម្ភវោ? ផស្សោ, ភិក្ខវេ, វេទនានំ និទានសម្ភវោ។

    ‘‘Katamo ca, bhikkhave, vedanānaṃ nidānasambhavo? Phasso, bhikkhave, vedanānaṃ nidānasambhavo.

    ‘‘កតមា ច, ភិក្ខវេ, វេទនានំ វេមត្តតា? អត្ថិ, ភិក្ខវេ, សាមិសា សុខា វេទនា, អត្ថិ និរាមិសា សុខា វេទនា, អត្ថិ សាមិសា ទុក្ខា វេទនា, អត្ថិ និរាមិសា ទុក្ខា វេទនា, អត្ថិ សាមិសា អទុក្ខមសុខា វេទនា, អត្ថិ និរាមិសា អទុក្ខមសុខា វេទនា។ អយំ វុច្ចតិ, ភិក្ខវេ, វេទនានំ វេមត្តតា។

    ‘‘Katamā ca, bhikkhave, vedanānaṃ vemattatā? Atthi, bhikkhave, sāmisā sukhā vedanā, atthi nirāmisā sukhā vedanā, atthi sāmisā dukkhā vedanā, atthi nirāmisā dukkhā vedanā, atthi sāmisā adukkhamasukhā vedanā, atthi nirāmisā adukkhamasukhā vedanā. Ayaṃ vuccati, bhikkhave, vedanānaṃ vemattatā.

    ‘‘កតមោ ច, ភិក្ខវេ, វេទនានំ វិបាកោ ? យំ ខោ, ភិក្ខវេ, វេទិយមានោ 19 តជ្ជំ តជ្ជំ អត្តភាវំ អភិនិព្ពត្តេតិ បុញ្ញភាគិយំ វា អបុញ្ញភាគិយំ វា, អយំ វុច្ចតិ, ភិក្ខវេ, វេទនានំ វិបាកោ។

    ‘‘Katamo ca, bhikkhave, vedanānaṃ vipāko ? Yaṃ kho, bhikkhave, vediyamāno 20 tajjaṃ tajjaṃ attabhāvaṃ abhinibbatteti puññabhāgiyaṃ vā apuññabhāgiyaṃ vā, ayaṃ vuccati, bhikkhave, vedanānaṃ vipāko.

    ‘‘កតមោ ច, ភិក្ខវេ, វេទនានិរោធោ? ផស្សនិរោធោ 21, ភិក្ខវេ, វេទនានិរោធោ។ អយមេវ អរិយោ អដ្ឋង្គិកោ មគ្គោ វេទនានិរោធគាមិនី បដិបទា, សេយ្យថិទំ – សម្មាទិដ្ឋិ…បេ.… សម្មាសមាធិ។

    ‘‘Katamo ca, bhikkhave, vedanānirodho? Phassanirodho 22, bhikkhave, vedanānirodho. Ayameva ariyo aṭṭhaṅgiko maggo vedanānirodhagāminī paṭipadā, seyyathidaṃ – sammādiṭṭhi…pe… sammāsamādhi.

    ‘‘យតោ ខោ, ភិក្ខវេ, អរិយសាវកោ ឯវំ វេទនំ បជានាតិ, ឯវំ វេទនានំ និទានសម្ភវំ បជានាតិ, ឯវំ វេទនានំ វេមត្តតំ បជានាតិ, ឯវំ វេទនានំ វិបាកំ បជានាតិ, ឯវំ វេទនានិរោធំ បជានាតិ, ឯវំ វេទនានិរោធគាមិនិំ បដិបទំ បជានាតិ។ សោ ឥមំ និព្ពេធិកំ ព្រហ្មចរិយំ បជានាតិ វេទនានិរោធំ។ វេទនា, ភិក្ខវេ, វេទិតព្ពា…បេ.… វេទនានិរោធគាមិនី បដិបទា វេទិតព្ពាតិ, ឥតិ យំ តំ វុត្តំ ឥទមេតំ បដិច្ច វុត្តំ។

    ‘‘Yato kho, bhikkhave, ariyasāvako evaṃ vedanaṃ pajānāti, evaṃ vedanānaṃ nidānasambhavaṃ pajānāti, evaṃ vedanānaṃ vemattataṃ pajānāti, evaṃ vedanānaṃ vipākaṃ pajānāti, evaṃ vedanānirodhaṃ pajānāti, evaṃ vedanānirodhagāminiṃ paṭipadaṃ pajānāti. So imaṃ nibbedhikaṃ brahmacariyaṃ pajānāti vedanānirodhaṃ. Vedanā, bhikkhave, veditabbā…pe… vedanānirodhagāminī paṭipadā veditabbāti, iti yaṃ taṃ vuttaṃ idametaṃ paṭicca vuttaṃ.

    ‘‘សញ្ញា, ភិក្ខវេ, វេទិតព្ពា…បេ.… សញ្ញានិរោធគាមិនី បដិបទា វេទិតព្ពាតិ, ឥតិ ខោ បនេតំ វុត្តំ។ កិញ្ចេតំ បដិច្ច វុត្តំ? ឆយិមា, ភិក្ខវេ, សញ្ញា – រូបសញ្ញា, សទ្ទសញ្ញា, គន្ធសញ្ញា, រសសញ្ញា, ផោដ្ឋព្ពសញ្ញា, ធម្មសញ្ញា។

    ‘‘Saññā, bhikkhave, veditabbā…pe… saññānirodhagāminī paṭipadā veditabbāti, iti kho panetaṃ vuttaṃ. Kiñcetaṃ paṭicca vuttaṃ? Chayimā, bhikkhave, saññā – rūpasaññā, saddasaññā, gandhasaññā, rasasaññā, phoṭṭhabbasaññā, dhammasaññā.

    ‘‘កតមោ ច, ភិក្ខវេ, សញ្ញានំ និទានសម្ភវោ? ផស្សោ, ភិក្ខវេ, សញ្ញានំ និទានសម្ភវោ។

    ‘‘Katamo ca, bhikkhave, saññānaṃ nidānasambhavo? Phasso, bhikkhave, saññānaṃ nidānasambhavo.

    ‘‘កតមា ច, ភិក្ខវេ, សញ្ញានំ វេមត្តតា? អញ្ញា, ភិក្ខវេ, សញ្ញា រូបេសុ, អញ្ញា សញ្ញា សទ្ទេសុ 23, អញ្ញា សញ្ញា គន្ធេសុ, អញ្ញា សញ្ញា រសេសុ, អញ្ញា សញ្ញា ផោដ្ឋព្ពេសុ, អញ្ញា សញ្ញា ធម្មេសុ ។ អយំ វុច្ចតិ, ភិក្ខវេ, សញ្ញានំ វេមត្តតា។

    ‘‘Katamā ca, bhikkhave, saññānaṃ vemattatā? Aññā, bhikkhave, saññā rūpesu, aññā saññā saddesu 24, aññā saññā gandhesu, aññā saññā rasesu, aññā saññā phoṭṭhabbesu, aññā saññā dhammesu . Ayaṃ vuccati, bhikkhave, saññānaṃ vemattatā.

    ‘‘កតមោ ច, ភិក្ខវេ, សញ្ញានំ វិបាកោ? វោហារវេបក្កំ 25, ភិក្ខវេ, សញ្ញំ 26 វទាមិ។ យថា យថា នំ សញ្ជានាតិ តថា តថា វោហរតិ, ឯវំ សញ្ញី អហោសិន្តិ 27។ អយំ វុច្ចតិ, ភិក្ខវេ, សញ្ញានំ វិបាកោ។

    ‘‘Katamo ca, bhikkhave, saññānaṃ vipāko? Vohāravepakkaṃ 28, bhikkhave, saññaṃ 29 vadāmi. Yathā yathā naṃ sañjānāti tathā tathā voharati, evaṃ saññī ahosinti 30. Ayaṃ vuccati, bhikkhave, saññānaṃ vipāko.

    ‘‘កតមោ ច, ភិក្ខវេ, សញ្ញានិរោធោ? ផស្សនិរោធោ, 31 ភិក្ខវេ, សញ្ញានិរោធោ។ អយមេវ អរិយោ អដ្ឋង្គិកោ មគ្គោ សញ្ញានិរោធគាមិនី បដិបទា, សេយ្យថិទំ – សម្មាទិដ្ឋិ…បេ.… សម្មាសមាធិ។

    ‘‘Katamo ca, bhikkhave, saññānirodho? Phassanirodho, 32 bhikkhave, saññānirodho. Ayameva ariyo aṭṭhaṅgiko maggo saññānirodhagāminī paṭipadā, seyyathidaṃ – sammādiṭṭhi…pe… sammāsamādhi.

    ‘‘យតោ ខោ, ភិក្ខវេ, អរិយសាវកោ ឯវំ សញ្ញំ បជានាតិ, ឯវំ សញ្ញានំ និទានសម្ភវំ បជានាតិ, ឯវំ សញ្ញានំ វេមត្តតំ បជានាតិ, ឯវំ សញ្ញានំ វិបាកំ បជានាតិ, ឯវំ សញ្ញានិរោធំ បជានាតិ, ឯវំ សញ្ញានិរោធគាមិនិំ បដិបទំ បជានាតិ, សោ ឥមំ និព្ពេធិកំ ព្រហ្មចរិយំ បជានាតិ សញ្ញានិរោធំ។ សញ្ញា, ភិក្ខវេ, វេទិតព្ពា…បេ.… សញ្ញានិរោធគាមិនី បដិបទា វេទិតព្ពាតិ។ ឥតិ យំ តំ វុត្តំ ឥទមេតំ បដិច្ច វុត្តំ។

    ‘‘Yato kho, bhikkhave, ariyasāvako evaṃ saññaṃ pajānāti, evaṃ saññānaṃ nidānasambhavaṃ pajānāti, evaṃ saññānaṃ vemattataṃ pajānāti, evaṃ saññānaṃ vipākaṃ pajānāti, evaṃ saññānirodhaṃ pajānāti, evaṃ saññānirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti saññānirodhaṃ. Saññā, bhikkhave, veditabbā…pe… saññānirodhagāminī paṭipadā veditabbāti. Iti yaṃ taṃ vuttaṃ idametaṃ paṭicca vuttaṃ.

    ‘‘អាសវា, ភិក្ខវេ, វេទិតព្ពា…បេ.… អាសវនិរោធគាមិនី 33 បដិបទា វេទិតព្ពាតិ, ឥតិ ខោ បនេតំ វុត្តំ។ កិញ្ចេតំ បដិច្ច វុត្តំ? តយោមេ, ភិក្ខវេ, អាសវា – កាមាសវោ, ភវាសវោ, អវិជ្ជាសវោ។

    ‘‘Āsavā, bhikkhave, veditabbā…pe… āsavanirodhagāminī 34 paṭipadā veditabbāti, iti kho panetaṃ vuttaṃ. Kiñcetaṃ paṭicca vuttaṃ? Tayome, bhikkhave, āsavā – kāmāsavo, bhavāsavo, avijjāsavo.

    ‘‘កតមោ ច, ភិក្ខវេ, អាសវានំ និទានសម្ភវោ? អវិជ្ជា, ភិក្ខវេ, អាសវានំ និទានសម្ភវោ។

    ‘‘Katamo ca, bhikkhave, āsavānaṃ nidānasambhavo? Avijjā, bhikkhave, āsavānaṃ nidānasambhavo.

    ‘‘កតមា ច, ភិក្ខវេ, អាសវានំ វេមត្តតា? អត្ថិ, ភិក្ខវេ, អាសវា និរយគមនីយា 35, អត្ថិ អាសវា តិរច្ឆានយោនិគមនីយា, អត្ថិ អាសវា បេត្តិវិសយគមនីយា, អត្ថិ អាសវា មនុស្សលោកគមនីយា, អត្ថិ អាសវា ទេវលោកគមនីយា។ អយំ វុច្ចតិ, ភិក្ខវេ, អាសវានំ វេមត្តតា។

    ‘‘Katamā ca, bhikkhave, āsavānaṃ vemattatā? Atthi, bhikkhave, āsavā nirayagamanīyā 36, atthi āsavā tiracchānayonigamanīyā, atthi āsavā pettivisayagamanīyā, atthi āsavā manussalokagamanīyā, atthi āsavā devalokagamanīyā. Ayaṃ vuccati, bhikkhave, āsavānaṃ vemattatā.

    ‘‘កតមោ ច, ភិក្ខវេ, អាសវានំ វិបាកោ? យំ ខោ, ភិក្ខវេ, អវិជ្ជាគតោ តជ្ជំ តជ្ជំ អត្តភាវំ អភិនិព្ពត្តេតិ បុញ្ញភាគិយំ វា អបុញ្ញភាគិយំ វា, អយំ វុច្ចតិ, ភិក្ខវេ, អាសវានំ វិបាកោ។

    ‘‘Katamo ca, bhikkhave, āsavānaṃ vipāko? Yaṃ kho, bhikkhave, avijjāgato tajjaṃ tajjaṃ attabhāvaṃ abhinibbatteti puññabhāgiyaṃ vā apuññabhāgiyaṃ vā, ayaṃ vuccati, bhikkhave, āsavānaṃ vipāko.

    ‘‘កតមោ ច, ភិក្ខវេ, អាសវនិរោធោ? អវិជ្ជានិរោធោ, ភិក្ខវេ, អាសវនិរោធោ។ អយមេវ អរិយោ អដ្ឋង្គិកោ មគ្គោ អាសវនិរោធគាមិនី 37 បដិបទា, សេយ្យថិទំ – សម្មាទិដ្ឋិ…បេ.… សម្មាសមាធិ។

    ‘‘Katamo ca, bhikkhave, āsavanirodho? Avijjānirodho, bhikkhave, āsavanirodho. Ayameva ariyo aṭṭhaṅgiko maggo āsavanirodhagāminī 38 paṭipadā, seyyathidaṃ – sammādiṭṭhi…pe… sammāsamādhi.

    ‘‘យតោ ខោ, ភិក្ខវេ, អរិយសាវកោ ឯវំ អាសវេ បជានាតិ, ឯវំ អាសវានំ និទានសម្ភវំ បជានាតិ, ឯវំ អាសវានំ វេមត្តតំ បជានាតិ, ឯវំ អាសវានំ វិបាកំ បជានាតិ, ឯវំ អាសវានំ និរោធំ បជានាតិ, ឯវំ អាសវានំ និរោធគាមិនិំ បដិបទំ បជានាតិ, សោ ឥមំ និព្ពេធិកំ ព្រហ្មចរិយំ បជានាតិ អាសវនិរោធំ។ អាសវា , ភិក្ខវេ, វេទិតព្ពា…បេ.… អាសវនិរោធគាមិនី 39 បដិបទា វេទិតព្ពាតិ។ ឥតិ យំ តំ វុត្តំ ឥទមេតំ បដិច្ច វុត្តំ។

    ‘‘Yato kho, bhikkhave, ariyasāvako evaṃ āsave pajānāti, evaṃ āsavānaṃ nidānasambhavaṃ pajānāti, evaṃ āsavānaṃ vemattataṃ pajānāti, evaṃ āsavānaṃ vipākaṃ pajānāti, evaṃ āsavānaṃ nirodhaṃ pajānāti, evaṃ āsavānaṃ nirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti āsavanirodhaṃ. Āsavā , bhikkhave, veditabbā…pe… āsavanirodhagāminī 40 paṭipadā veditabbāti. Iti yaṃ taṃ vuttaṃ idametaṃ paṭicca vuttaṃ.

    ‘‘កម្មំ, ភិក្ខវេ, វេទិតព្ពំ…បេ.… កម្មនិរោធគាមិនី 41 បដិបទា វេទិតព្ពាតិ, ឥតិ ខោ បនេតំ វុត្តំ។ កិញ្ចេតំ បដិច្ច វុត្តំ? 42 ចេតនាហំ, ភិក្ខវេ, កម្មំ វទាមិ។ ចេតយិត្វា កម្មំ ករោតិ – កាយេន វាចាយ មនសា។

    ‘‘Kammaṃ, bhikkhave, veditabbaṃ…pe… kammanirodhagāminī 43 paṭipadā veditabbāti, iti kho panetaṃ vuttaṃ. Kiñcetaṃ paṭicca vuttaṃ? 44 Cetanāhaṃ, bhikkhave, kammaṃ vadāmi. Cetayitvā kammaṃ karoti – kāyena vācāya manasā.

    ‘‘កតមោ ច, ភិក្ខវេ, កម្មានំ និទានសម្ភវោ? ផស្សោ, ភិក្ខវេ, កម្មានំ និទានសម្ភវោ។

    ‘‘Katamo ca, bhikkhave, kammānaṃ nidānasambhavo? Phasso, bhikkhave, kammānaṃ nidānasambhavo.

    ‘‘កតមា ច, ភិក្ខវេ, កម្មានំ វេមត្តតា? អត្ថិ, ភិក្ខវេ, កម្មំ និរយវេទនីយំ, អត្ថិ កម្មំ តិរច្ឆានយោនិវេទនីយំ, អត្ថិ កម្មំ បេត្តិវិសយវេទនីយំ, អត្ថិ កម្មំ មនុស្សលោកវេទនីយំ, អត្ថិ កម្មំ ទេវលោកវេទនីយំ ។ អយំ វុច្ចតិ, ភិក្ខវេ, កម្មានំ វេមត្តតា។

    ‘‘Katamā ca, bhikkhave, kammānaṃ vemattatā? Atthi, bhikkhave, kammaṃ nirayavedanīyaṃ, atthi kammaṃ tiracchānayonivedanīyaṃ, atthi kammaṃ pettivisayavedanīyaṃ, atthi kammaṃ manussalokavedanīyaṃ, atthi kammaṃ devalokavedanīyaṃ . Ayaṃ vuccati, bhikkhave, kammānaṃ vemattatā.

    ‘‘កតមោ ច, ភិក្ខវេ, កម្មានំ វិបាកោ? តិវិធាហំ 45, ភិក្ខវេ, កម្មានំ វិបាកំ វទាមិ – ទិដ្ឋេវ 46 ធម្មេ, ឧបបជ្ជេ វា 47, អបរេ វា បរិយាយេ។ អយំ វុច្ចតិ, ភិក្ខវេ, កម្មានំ វិបាកោ។

    ‘‘Katamo ca, bhikkhave, kammānaṃ vipāko? Tividhāhaṃ 48, bhikkhave, kammānaṃ vipākaṃ vadāmi – diṭṭheva 49 dhamme, upapajje vā 50, apare vā pariyāye. Ayaṃ vuccati, bhikkhave, kammānaṃ vipāko.

    ‘‘កតមោ ច, ភិក្ខវេ, កម្មនិរោធោ? ផស្សនិរោធោ, 51 ភិក្ខវេ, កម្មនិរោធោ។ អយមេវ អរិយោ អដ្ឋង្គិកោ មគ្គោ កម្មនិរោធគាមិនី 52 បដិបទា, សេយ្យថិទំ – សម្មាទិដ្ឋិ…បេ.… សម្មាសមាធិ។

    ‘‘Katamo ca, bhikkhave, kammanirodho? Phassanirodho, 53 bhikkhave, kammanirodho. Ayameva ariyo aṭṭhaṅgiko maggo kammanirodhagāminī 54 paṭipadā, seyyathidaṃ – sammādiṭṭhi…pe… sammāsamādhi.

    ‘‘យតោ ខោ, ភិក្ខវេ, អរិយសាវកោ ឯវំ កម្មំ បជានាតិ, ឯវំ កម្មានំ និទានសម្ភវំ បជានាតិ, ឯវំ កម្មានំ វេមត្តតំ បជានាតិ, ឯវំ កម្មានំ វិបាកំ បជានាតិ, ឯវំ កម្មនិរោធំ បជានាតិ, ឯវំ កម្មនិរោធគាមិនិំ បដិបទំ បជានាតិ, សោ ឥមំ និព្ពេធិកំ ព្រហ្មចរិយំ បជានាតិ កម្មនិរោធំ។ កម្មំ, ភិក្ខវេ, វេទិតព្ពំ…បេ.… កម្មនិរោធគាមិនី បដិបទា វេទិតព្ពាតិ, ឥតិ យំ តំ វុត្តំ ឥទមេតំ បដិច្ច វុត្តំ។

    ‘‘Yato kho, bhikkhave, ariyasāvako evaṃ kammaṃ pajānāti, evaṃ kammānaṃ nidānasambhavaṃ pajānāti, evaṃ kammānaṃ vemattataṃ pajānāti, evaṃ kammānaṃ vipākaṃ pajānāti, evaṃ kammanirodhaṃ pajānāti, evaṃ kammanirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti kammanirodhaṃ. Kammaṃ, bhikkhave, veditabbaṃ…pe… kammanirodhagāminī paṭipadā veditabbāti, iti yaṃ taṃ vuttaṃ idametaṃ paṭicca vuttaṃ.

    ‘‘ទុក្ខំ, ភិក្ខវេ, វេទិតព្ពំ, ទុក្ខស្ស និទានសម្ភវោ វេទិតព្ពោ, ទុក្ខស្ស វេមត្តតា វេទិតព្ពា, ទុក្ខស្ស វិបាកោ វេទិតព្ពោ, ទុក្ខនិរោធោ វេទិតព្ពោ, ទុក្ខនិរោធគាមិនី បដិបទា វេទិតព្ពាតិ។ ឥតិ ខោ បនេតំ វុត្តំ , កិញ្ចេតំ បដិច្ច វុត្តំ? ជាតិបិ ទុក្ខា, ជរាបិ ទុក្ខា, ព្យាធិបិ ទុក្ខោ 55, មរណម្បិ ទុក្ខំ, សោកបរិទេវទុក្ខទោមនស្សុបាយាសាបិ ទុក្ខា, យម្បិច្ឆំ ន លភតិ តម្បិ ទុក្ខំ, សំខិត្តេន បញ្ចុបាទានក្ខន្ធា 56 ទុក្ខា។

    ‘‘Dukkhaṃ, bhikkhave, veditabbaṃ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbāti. Iti kho panetaṃ vuttaṃ , kiñcetaṃ paṭicca vuttaṃ? Jātipi dukkhā, jarāpi dukkhā, byādhipi dukkho 57, maraṇampi dukkhaṃ, sokaparidevadukkhadomanassupāyāsāpi dukkhā, yampicchaṃ na labhati tampi dukkhaṃ, saṃkhittena pañcupādānakkhandhā 58 dukkhā.

    ‘‘កតមោ ច, ភិក្ខវេ, ទុក្ខស្ស និទានសម្ភវោ? តណ្ហា, ភិក្ខវេ, ទុក្ខស្ស និទានសម្ភវោ ។

    ‘‘Katamo ca, bhikkhave, dukkhassa nidānasambhavo? Taṇhā, bhikkhave, dukkhassa nidānasambhavo .

    ‘‘កតមា ច, ភិក្ខវេ, ទុក្ខស្ស វេមត្តតា? អត្ថិ, ភិក្ខវេ, ទុក្ខំ អធិមត្តំ, អត្ថិ បរិត្តំ, អត្ថិ ទន្ធវិរាគិ, អត្ថិ ខិប្បវិរាគិ។ អយំ វុច្ចតិ, ភិក្ខវេ, ទុក្ខស្ស វេមត្តតា។

    ‘‘Katamā ca, bhikkhave, dukkhassa vemattatā? Atthi, bhikkhave, dukkhaṃ adhimattaṃ, atthi parittaṃ, atthi dandhavirāgi, atthi khippavirāgi. Ayaṃ vuccati, bhikkhave, dukkhassa vemattatā.

    ‘‘កតមោ ច, ភិក្ខវេ, ទុក្ខស្ស វិបាកោ? ឥធ, ភិក្ខវេ, ឯកច្ចោ យេន ទុក្ខេន អភិភូតោ បរិយាទិន្នចិត្តោ 59 សោចតិ កិលមតិ បរិទេវតិ, ឧរត្តាឡិំ កន្ទតិ, សម្មោហំ អាបជ្ជតិ , យេន វា បន ទុក្ខេន អភិភូតោ បរិយាទិន្នចិត្តោ ពហិទ្ធា បរិយេដ្ឋិំ អាបជ្ជតិ – ‘កោ 60 ឯកបទំ ទ្វិបទំ ជានាតិ 61 ឥមស្ស ទុក្ខស្ស និរោធាយា’តិ? សម្មោហវេបក្កំ វាហំ, ភិក្ខវេ, ទុក្ខំ វទាមិ បរិយេដ្ឋិវេបក្កំ វា។ អយំ វុច្ចតិ, ភិក្ខវេ, ទុក្ខស្ស វិបាកោ។

    ‘‘Katamo ca, bhikkhave, dukkhassa vipāko? Idha, bhikkhave, ekacco yena dukkhena abhibhūto pariyādinnacitto 62 socati kilamati paridevati, urattāḷiṃ kandati, sammohaṃ āpajjati , yena vā pana dukkhena abhibhūto pariyādinnacitto bahiddhā pariyeṭṭhiṃ āpajjati – ‘ko 63 ekapadaṃ dvipadaṃ jānāti 64 imassa dukkhassa nirodhāyā’ti? Sammohavepakkaṃ vāhaṃ, bhikkhave, dukkhaṃ vadāmi pariyeṭṭhivepakkaṃ vā. Ayaṃ vuccati, bhikkhave, dukkhassa vipāko.

    ‘‘កតមោ ច, ភិក្ខវេ, ទុក្ខនិរោធោ? តណ្ហានិរោធោ, 65 ភិក្ខវេ, ទុក្ខនិរោធោ។ អយមេវ អរិយោ អដ្ឋង្គិកោ មគ្គោ ទុក្ខស្ស និរោធគាមិនី បដិបទា, សេយ្យថិទំ – សម្មាទិដ្ឋិ…បេ.… សម្មាសមាធិ។

    ‘‘Katamo ca, bhikkhave, dukkhanirodho? Taṇhānirodho, 66 bhikkhave, dukkhanirodho. Ayameva ariyo aṭṭhaṅgiko maggo dukkhassa nirodhagāminī paṭipadā, seyyathidaṃ – sammādiṭṭhi…pe… sammāsamādhi.

    ‘‘យតោ ខោ, ភិក្ខវេ, អរិយសាវកោ ឯវំ ទុក្ខំ បជានាតិ, ឯវំ ទុក្ខស្ស និទានសម្ភវំ បជានាតិ, ឯវំ ទុក្ខស្ស វេមត្តតំ បជានាតិ, ឯវំ ទុក្ខស្ស វិបាកំ បជានាតិ, ឯវំ ទុក្ខនិរោធំ បជានាតិ, ឯវំ ទុក្ខនិរោធគាមិនិំ បដិបទំ បជានាតិ, សោ ឥមំ និព្ពេធិកំ ព្រហ្មចរិយំ បជានាតិ ទុក្ខនិរោធំ។ ទុក្ខំ, ភិក្ខវេ, វេទិតព្ពំ, ទុក្ខស្ស និទានសម្ភវោ វេទិតព្ពោ, ទុក្ខស្ស វេមត្តតា វេទិតព្ពា, ទុក្ខស្ស វិបាកោ វេទិតព្ពោ, ទុក្ខនិរោធោ វេទិតព្ពោ, ទុក្ខនិរោធគាមិនី បដិបទា វេទិតព្ពាតិ។ ឥតិ យំ តំ វុត្តំ ឥទមេតំ បដិច្ច វុត្តំ។

    ‘‘Yato kho, bhikkhave, ariyasāvako evaṃ dukkhaṃ pajānāti, evaṃ dukkhassa nidānasambhavaṃ pajānāti, evaṃ dukkhassa vemattataṃ pajānāti, evaṃ dukkhassa vipākaṃ pajānāti, evaṃ dukkhanirodhaṃ pajānāti, evaṃ dukkhanirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti dukkhanirodhaṃ. Dukkhaṃ, bhikkhave, veditabbaṃ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbāti. Iti yaṃ taṃ vuttaṃ idametaṃ paṭicca vuttaṃ.

    ‘‘អយំ ខោ សោ, ភិក្ខវេ, និព្ពេធិកបរិយាយោ ធម្មបរិយាយោ’’តិ។ នវមំ។

    ‘‘Ayaṃ kho so, bhikkhave, nibbedhikapariyāyo dhammapariyāyo’’ti. Navamaṃ.




    Next: ១០. សីហនាទសុត្តំ • 10. Sīhanādasuttaṃ




    Footnotes:
    1. កាមានំ និរោធោ (ក.) ឯវំ វេទនានិរោធោ-ឥច្ចាទីសុបិ
    2. កាមានំ និរោធគាមិនី (ក.) ឯវំ វេទនានិរោធគាមិនី-ឥច្ចាទីសុបិ
    3. kāmānaṃ nirodho (ka.) evaṃ vedanānirodho-iccādīsupi
    4. kāmānaṃ nirodhagāminī (ka.) evaṃ vedanānirodhagāminī-iccādīsupi
    5. ម. និ. ១.១៦៦; សំ. និ. ៤.២៦៨
    6. តេ កាមគុណា នាម នេតេ កាមា (ក.)
    7. ma. ni. 1.166; saṃ. ni. 4.268
    8. te kāmaguṇā nāma nete kāmā (ka.)
    9. កថា. ៥១៤
    10. kathā. 514
    11. ន តេ (ស្យា.)
    12. na te (syā.)
    13. ផស្សនិរោធា (ស្យា.)
    14. phassanirodhā (syā.)
    15. យតោ ច ខោ (ពហូសុ)
    16. សព្ពត្ថបិ ឯវមេវ ទិស្សតិ
    17. yato ca kho (bahūsu)
    18. sabbatthapi evameva dissati
    19. វេទយមានោ (ស្យា. កំ.) អ. និ. ៤.២៣៣
    20. vedayamāno (syā. kaṃ.) a. ni. 4.233
    21. ផស្សនិរោធា (ស្យា. កំ. ក.)
    22. phassanirodhā (syā. kaṃ. ka.)
    23. អញ្ញា ភិក្ខវេ រូបេសុ សញ្ញា អញ្ញា សទ្ទេសុ សញ្ញា (ក.) ឯវំ សេសេសុបិ
    24. aññā bhikkhave rūpesu saññā aññā saddesu saññā (ka.) evaṃ sesesupi
    25. វោហារវេបក្កាហំ (ស្យា. បី.), វោហារបក្កាហំ (សី.)
    26. សញ្ញា (ស្យា. បី.)
    27. អហោសីតិ (ក.)
    28. vohāravepakkāhaṃ (syā. pī.), vohārapakkāhaṃ (sī.)
    29. saññā (syā. pī.)
    30. ahosīti (ka.)
    31. ផស្សនិរោធា (ស្យា. ក.)
    32. phassanirodhā (syā. ka.)
    33. សព្ពត្ថបិ ឯវមេវ ទិស្សតិ
    34. sabbatthapi evameva dissati
    35. និរយគាមិនិយា (សី. ក.)
    36. nirayagāminiyā (sī. ka.)
    37. សព្ពត្ថបិ ឯវមេវ ទិស្សតិ
    38. sabbatthapi evameva dissati
    39. សព្ពត្ថបិ ឯវមេវ ទិស្សតិ
    40. sabbatthapi evameva dissati
    41. សព្ពត្ថបិ ឯវមេវ ទិស្សតិ
    42. កថា. ៥៣៩
    43. sabbatthapi evameva dissati
    44. kathā. 539
    45. ឥមាហំ (ក.)
    46. ទិដ្ឋេ វា (សី.)
    47. ឧបបជ្ជំ វា (ក. សី., អ. និ. ១០.២១៧), ឧបបជ្ជ វា (?), ម. និ. ៣.៣០៣ បាឡិយា តទត្ថវណ្ណនាយ ច សំសទ្ទេតព្ពំ
    48. imāhaṃ (ka.)
    49. diṭṭhe vā (sī.)
    50. upapajjaṃ vā (ka. sī., a. ni. 10.217), upapajja vā (?), ma. ni. 3.303 pāḷiyā tadatthavaṇṇanāya ca saṃsaddetabbaṃ
    51. ផស្សនិរោធា (ក. សី. ស្យា. ក.)
    52. សព្ពត្ថបិ ឯវមេវ ទិស្សតិ
    53. phassanirodhā (ka. sī. syā. ka.)
    54. sabbatthapi evameva dissati
    55. ព្យាធិបិ ទុក្ខា (ស្យា. បី. ក.)
    56. បញ្ចុបាទានក្ខន្ធាបិ (ក.)
    57. byādhipi dukkhā (syā. pī. ka.)
    58. pañcupādānakkhandhāpi (ka.)
    59. បរិយាទិណ្ណចិត្តោ (ក.)
    60. សោ ន (ក.)
    61. បជានាតិ (ក.)
    62. pariyādiṇṇacitto (ka.)
    63. so na (ka.)
    64. pajānāti (ka.)
    65. តណ្ហានិរោធា (ក. សី. ស្យា. ក.)
    66. taṇhānirodhā (ka. sī. syā. ka.)



    Related texts:



    អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៩. និព្ពេធិកសុត្តវណ្ណនា • 9. Nibbedhikasuttavaṇṇanā

    ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៩. និព្ពេធិកសុត្តវណ្ណនា • 9. Nibbedhikasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact