| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. நிப்³பே³தி⁴கஸுத்தவண்ணனா
9. Nibbedhikasuttavaṇṇanā
63. நவமே பரிஹாயதி அத்தனோ ப²லங் பரிக்³க³ஹெத்வா வத்ததி, தஸ்ஸ வா காரணபா⁴வங் உபக³ச்ச²தீதி பரியாயோதி இத⁴ காரணங் வுத்தந்தி ஆஹ ‘‘நிப்³பி³ஜ்ஜ²னகாரண’’ந்தி.
63. Navame parihāyati attano phalaṃ pariggahetvā vattati, tassa vā kāraṇabhāvaṃ upagacchatīti pariyāyoti idha kāraṇaṃ vuttanti āha ‘‘nibbijjhanakāraṇa’’nti.
‘‘அனுஜானாமி , பி⁴க்க²வே, அஹதானங் வத்தா²னங் தி³கு³ணங் ஸங்கா⁴டி’’ந்தி எத்த² ஹி படலட்டோ² கு³ணட்டோ². ‘‘அச்செந்தி காலா தரயந்தி ரத்தியோ, வயோகு³ணா அனுபுப்³ப³ங் ஜஹந்தீ’’தி (ஸங்॰ நி॰ 1.4) எத்த² ராஸட்டோ² கு³ணட்டோ². ‘‘ஸதகு³ணா த³க்கி²ணா பாடிகங்கி²தப்³பா³’’தி (ம॰ நி॰ 3.379) எத்த² ஆனிஸங்ஸட்டோ². ‘‘அந்தங் அந்தகு³ணங் (தீ³॰ நி॰ 2.377; ம॰ நி॰ 1.110; கு²॰ பா॰ 3.த்³வத்திங்ஸாகாரோ), கயிரா மாலாகு³ணே ப³ஹூ’’தி (த⁴॰ ப॰ 53) எத்த² ப³ந்த⁴னட்டோ² கு³ணட்டோ². இதா⁴பி ஏஸோவ அதி⁴ப்பேதோதி ஆஹ ‘‘ப³ந்த⁴னட்டே²ன கு³ணா’’தி. காமராக³ஸ்ஸ ஸங்யோஜனஸ்ஸ பச்சயபா⁴வேன வத்து²காமேஸுபி ப³ந்த⁴னட்டோ² ராஸட்டோ² வா கு³ணட்டோ² த³ட்ட²ப்³போ³. சக்கு²விஞ்ஞெய்யாதி வா சக்கு²விஞ்ஞாணதங்த்³வாரிகவிஞ்ஞாணேஹி ஜானிதப்³பா³. ஸோதவிஞ்ஞெய்யாதிஆதீ³ஸுபி ஏஸேவ நயோ. இட்டா²ரம்மணபூ⁴தாதி ஸபா⁴வேனேவ இட்டா²ரம்மணஜாதிகா, இட்டா²ரம்மணபா⁴வங் வா பத்தா. கமனீயாதி காமேதப்³பா³. மனவட்³ட⁴னகாதி மனோஹரா. ஏதேன பரிகப்பனதோபி இட்டா²ரம்மணபா⁴வங் ஸங்க³ண்ஹாதி. பியஜாதிகாதி பியாயிதப்³ப³ஸபா⁴வா. காமூபஸஞ்ஹிதாதி காமராகே³ன உபேச்ச ஸம்ப³ந்த⁴னீயா ஸம்ப³ந்தா⁴ காதப்³பா³. தேனாஹ ‘‘ஆரம்மணங் கத்வா’’திஆதி³. ஸங்கப்பராகோ³தி வா ஸுபா⁴தி³வஸேன ஸங்கப்பிதவுத்த²ம்ஹி உப்பன்னராகோ³. ஏவமெத்த² வத்து²காமங் படிக்கி²பித்வா கிலேஸகாமோ வுத்தோ தஸ்ஸேவ வஸேன தேஸம்பி காமபா⁴வஸித்³தி⁴தோ, கிலேஸகாமஸ்ஸபி இட்ட²வேத³னா தி³ட்டா²தி³ஸம்பயோக³பே⁴தே³ன பவத்திஆகாரபே⁴தே³ன ச அத்தி² விசித்தகாதி ததோ விஸேஸேதுங் ‘‘சித்ரவிசித்ராரம்மணானீ’’தி ஆஹ, நானப்பகாரானி ரூபாதி³ஆரம்மணானீதி அத்தோ².
‘‘Anujānāmi , bhikkhave, ahatānaṃ vatthānaṃ diguṇaṃ saṅghāṭi’’nti ettha hi paṭalaṭṭho guṇaṭṭho. ‘‘Accenti kālā tarayanti rattiyo, vayoguṇā anupubbaṃ jahantī’’ti (saṃ. ni. 1.4) ettha rāsaṭṭho guṇaṭṭho. ‘‘Sataguṇā dakkhiṇā pāṭikaṅkhitabbā’’ti (ma. ni. 3.379) ettha ānisaṃsaṭṭho. ‘‘Antaṃ antaguṇaṃ (dī. ni. 2.377; ma. ni. 1.110; khu. pā. 3.dvattiṃsākāro), kayirā mālāguṇe bahū’’ti (dha. pa. 53) ettha bandhanaṭṭho guṇaṭṭho. Idhāpi esova adhippetoti āha ‘‘bandhanaṭṭhena guṇā’’ti. Kāmarāgassa saṃyojanassa paccayabhāvena vatthukāmesupi bandhanaṭṭho rāsaṭṭho vā guṇaṭṭho daṭṭhabbo. Cakkhuviññeyyāti vā cakkhuviññāṇataṃdvārikaviññāṇehi jānitabbā. Sotaviññeyyātiādīsupi eseva nayo. Iṭṭhārammaṇabhūtāti sabhāveneva iṭṭhārammaṇajātikā, iṭṭhārammaṇabhāvaṃ vā pattā. Kamanīyāti kāmetabbā. Manavaḍḍhanakāti manoharā. Etena parikappanatopi iṭṭhārammaṇabhāvaṃ saṅgaṇhāti. Piyajātikāti piyāyitabbasabhāvā. Kāmūpasañhitāti kāmarāgena upecca sambandhanīyā sambandhā kātabbā. Tenāha ‘‘ārammaṇaṃ katvā’’tiādi. Saṅkapparāgoti vā subhādivasena saṅkappitavutthamhi uppannarāgo. Evamettha vatthukāmaṃ paṭikkhipitvā kilesakāmo vutto tasseva vasena tesampi kāmabhāvasiddhito, kilesakāmassapi iṭṭhavedanā diṭṭhādisampayogabhedena pavattiākārabhedena ca atthi vicittakāti tato visesetuṃ ‘‘citravicitrārammaṇānī’’ti āha, nānappakārāni rūpādiārammaṇānīti attho.
அதெ²த்த² தீ⁴ரா வினயந்தி ச²ந்த³ந்தி அத² ஏதேஸு ஆரம்மணேஸு தி⁴திஸம்பன்னா பண்டி³தா ச²ந்த³ராக³ங் வினயந்தி.
Athettha dhīrā vinayanti chandanti atha etesu ārammaṇesu dhitisampannā paṇḍitā chandarāgaṃ vinayanti.
தஜ்ஜாதிகந்தி தங்ஸபா⁴வங், அத்த²தோ பன தஸ்ஸ காமஸ்ஸ அனுரூபந்தி வுத்தங் ஹோதி. புஞ்ஞஸ்ஸ பா⁴கோ³ புஞ்ஞபா⁴கோ³, புஞ்ஞகொட்டா²ஸோ. தேன நிப்³ப³த்தோ, தத்த² வா ப⁴வோதி புஞ்ஞபா⁴கி³யோ. அபுஞ்ஞபா⁴கி³யோதி எத்தா²பி ஏஸேவ நயோ. விபாகோயேவ வேபக்கந்தி ஆஹ ‘‘வோஹாரவிபாக’’ந்தி.
Tajjātikanti taṃsabhāvaṃ, atthato pana tassa kāmassa anurūpanti vuttaṃ hoti. Puññassa bhāgo puññabhāgo, puññakoṭṭhāso. Tena nibbatto, tattha vā bhavoti puññabhāgiyo. Apuññabhāgiyoti etthāpi eseva nayo. Vipākoyeva vepakkanti āha ‘‘vohāravipāka’’nti.
ஸப்³ப³ஸங்கா³ஹிகாதி குஸலாகுஸலஸாதா⁴ரணா. ஸங்வித³ஹனசேதனாதி ஸம்பயுத்தத⁴ம்மேஸு ஸங்வித³ஹனலக்க²ணா சேதனா. உரத்தாளிந்தி உரங் தாளெத்வா . ஏகபத³ந்தி ஏகபத³சிதங் மந்தங். தேனாஹ ‘‘ஏகபத³மந்தங் வா’’திஆதி³.
Sabbasaṅgāhikāti kusalākusalasādhāraṇā. Saṃvidahanacetanāti sampayuttadhammesu saṃvidahanalakkhaṇā cetanā. Urattāḷinti uraṃ tāḷetvā . Ekapadanti ekapadacitaṃ mantaṃ. Tenāha ‘‘ekapadamantaṃ vā’’tiādi.
நிப்³பே³தி⁴கஸுத்தவண்ணனா நிட்டி²தா.
Nibbedhikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. நிப்³பே³தி⁴கஸுத்தங் • 9. Nibbedhikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. நிப்³பே³தி⁴கஸுத்தவண்ணனா • 9. Nibbedhikasuttavaṇṇanā
