| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೯. ನಿಬ್ಬೇಧಿಕಸುತ್ತವಣ್ಣನಾ
9. Nibbedhikasuttavaṇṇanā
೬೩. ನವಮೇ ಅನಿಬ್ಬಿದ್ಧಪುಬ್ಬೇ ಅಪ್ಪದಾಲಿತಪುಬ್ಬೇ ಲೋಭಕ್ಖನ್ಧಾದಯೋ ನಿಬ್ಬಿಜ್ಝತಿ ಪದಾಲೇತೀತಿ ನಿಬ್ಬೇಧಿಕಪರಿಯಾಯೋ, ನಿಬ್ಬಿಜ್ಝನಕಾರಣನ್ತಿ ಅತ್ಥೋ। ನಿದಾನಸಮ್ಭವೋತಿ ಕಾಮೇ ನಿದೇತಿ ಉಪ್ಪಾದನಸಮತ್ಥತಾಯ ನಿಯ್ಯಾದೇತೀತಿ ನಿದಾನಂ। ಸಮ್ಭವತಿ ತತೋತಿ ಸಮ್ಭವೋ, ನಿದಾನಮೇವ ಸಮ್ಭವೋ ನಿದಾನಸಮ್ಭವೋ। ವೇಮತ್ತತಾತಿ ನಾನಾಕರಣಂ।
63. Navame anibbiddhapubbe appadālitapubbe lobhakkhandhādayo nibbijjhati padāletīti nibbedhikapariyāyo, nibbijjhanakāraṇanti attho. Nidānasambhavoti kāme nideti uppādanasamatthatāya niyyādetīti nidānaṃ. Sambhavati tatoti sambhavo, nidānameva sambhavo nidānasambhavo. Vemattatāti nānākaraṇaṃ.
ಕಾಮಗುಣಾತಿ ಕಾಮಯಿತಬ್ಬಟ್ಠೇನ ಕಾಮಾ, ಬನ್ಧನಟ್ಠೇನ ಗುಣಾ ‘‘ಅನ್ತಗುಣ’’ನ್ತಿಆದೀಸು ವಿಯ। ಚಕ್ಖುವಿಞ್ಞೇಯ್ಯಾತಿ ಚಕ್ಖುವಿಞ್ಞಾಣೇನ ಪಸ್ಸಿತಬ್ಬಾ। ಇಟ್ಠಾತಿ ಪರಿಯಿಟ್ಠಾ ವಾ ಹೋನ್ತು ಮಾ ವಾ, ಇಟ್ಠಾರಮ್ಮಣಭೂತಾತಿ ಅತ್ಥೋ। ಕನ್ತಾತಿ ಕಮನೀಯಾ। ಮನಾಪಾತಿ ಮನವಡ್ಢನಕಾ। ಪಿಯರೂಪಾತಿ ಪಿಯಜಾತಿಕಾ। ಕಾಮೂಪಸಞ್ಹಿತಾತಿ ಆರಮ್ಮಣಂ ಕತ್ವಾ ಉಪ್ಪಜ್ಜಮಾನೇನ ಕಾಮೇನ ಉಪಸಞ್ಹಿತಾ। ರಜನೀಯಾತಿ ರಾಗುಪ್ಪತ್ತಿಕಾರಣಭೂತಾ। ನೇತೇ ಕಾಮಾತಿ ನ ಏತೇ ಕಮನಟ್ಠೇನ ಕಾಮಾ ನಾಮ ಹೋನ್ತಿ। ಸಙ್ಕಪ್ಪರಾಗೋತಿ ಸಙ್ಕಪ್ಪವಸೇನ ಉಪ್ಪನ್ನರಾಗೋ। ಕಾಮೋತಿ ಅಯಂ ಕಾಮಪ್ಪಹಾನಾಯ ಪಟಿಪನ್ನೇಹಿ ಪಹಾತಬ್ಬೋ। ಕಮನಟ್ಠೇನ ಕಾಮಾ ನಾಮ। ಚಿತ್ರಾನೀತಿ ಚಿತ್ರವಿಚಿತ್ರಾರಮ್ಮಣಾನಿ।
Kāmaguṇāti kāmayitabbaṭṭhena kāmā, bandhanaṭṭhena guṇā ‘‘antaguṇa’’ntiādīsu viya. Cakkhuviññeyyāti cakkhuviññāṇena passitabbā. Iṭṭhāti pariyiṭṭhā vā hontu mā vā, iṭṭhārammaṇabhūtāti attho. Kantāti kamanīyā. Manāpāti manavaḍḍhanakā. Piyarūpāti piyajātikā. Kāmūpasañhitāti ārammaṇaṃ katvā uppajjamānena kāmena upasañhitā. Rajanīyāti rāguppattikāraṇabhūtā. Nete kāmāti na ete kamanaṭṭhena kāmā nāma honti. Saṅkapparāgoti saṅkappavasena uppannarāgo. Kāmoti ayaṃ kāmappahānāya paṭipannehi pahātabbo. Kamanaṭṭhena kāmā nāma. Citrānīti citravicitrārammaṇāni.
ಫಸ್ಸೋತಿ ಸಹಜಾತಫಸ್ಸೋ। ಕಾಮಯಮಾನೋತಿ ಕಾಮಂ ಕಾಮಯಮಾನೋ। ತಜ್ಜಂ ತಜ್ಜನ್ತಿ ತಜ್ಜಾತಿಕಂ ತಜ್ಜಾತಿಕಂ। ಪುಞ್ಞಭಾಗಿಯನ್ತಿ ದಿಬ್ಬೇ ಕಾಮೇ ಪತ್ಥೇತ್ವಾ ಸುಚರಿತಪಾರಿಪೂರಿಯಾ ದೇವಲೋಕೇ ನಿಬ್ಬತ್ತಸ್ಸ ಅತ್ತಭಾವೋ ಪುಞ್ಞಭಾಗಿಯೋ ನಾಮ, ದುಚ್ಚರಿತಪಾರಿಪೂರಿಯಾ ಅಪಾಯೇ ನಿಬ್ಬತ್ತಸ್ಸ ಅತ್ತಭಾವೋ ಅಪುಞ್ಞಭಾಗಿಯೋ ನಾಮ। ಅಯಂ ವುಚ್ಚತಿ, ಭಿಕ್ಖವೇ, ಕಾಮಾನಂ ವಿಪಾಕೋತಿ ಅಯಂ ದುವಿಧೋಪಿ ಕಾಮಪತ್ಥನಂ ನಿಸ್ಸಾಯ ಉಪ್ಪನ್ನತ್ತಾ ಕಾಮಾನಂ ವಿಪಾಕೋತಿ ವುಚ್ಚತಿ। ಸೋ ಇಮಂ ನಿಬ್ಬೇಧಿಕನ್ತಿ ಸೋ ಭಿಕ್ಖು ಇಮಂ ಛತ್ತಿಂಸಟ್ಠಾನೇಸು ನಿಬ್ಬಿಜ್ಝನಕಂ ಸೇಟ್ಠಚರಿಯಂ ಜಾನಾತಿ। ಕಾಮನಿರೋಧನ್ತಿ ಕಾಮಾನಂ ನಿರೋಧನೇ ಏವಂ ಲದ್ಧನಾಮಂ। ಇಮಸ್ಮಿಞ್ಹಿ ಠಾನೇ ಬ್ರಹ್ಮಚರಿಯಸಙ್ಖಾತೋ ಮಗ್ಗೋವ ಕಾಮನಿರೋಧೋತಿ ವುತ್ತೋ।
Phassoti sahajātaphasso. Kāmayamānoti kāmaṃ kāmayamāno. Tajjaṃ tajjanti tajjātikaṃ tajjātikaṃ. Puññabhāgiyanti dibbe kāme patthetvā sucaritapāripūriyā devaloke nibbattassa attabhāvo puññabhāgiyo nāma, duccaritapāripūriyā apāye nibbattassa attabhāvo apuññabhāgiyo nāma. Ayaṃ vuccati, bhikkhave, kāmānaṃ vipākoti ayaṃ duvidhopi kāmapatthanaṃ nissāya uppannattā kāmānaṃ vipākoti vuccati. So imaṃ nibbedhikanti so bhikkhu imaṃ chattiṃsaṭṭhānesu nibbijjhanakaṃ seṭṭhacariyaṃ jānāti. Kāmanirodhanti kāmānaṃ nirodhane evaṃ laddhanāmaṃ. Imasmiñhi ṭhāne brahmacariyasaṅkhāto maggova kāmanirodhoti vutto.
ಸಾಮಿಸಾತಿ ಕಿಲೇಸಾಮಿಸಸಮ್ಪಯುತ್ತಾ। ಇಮಿನಾ ನಯೇನ ಸಬ್ಬಠಾನೇಸು ಅತ್ಥೋ ವೇದಿತಬ್ಬೋ। ಅಪಿಚೇತ್ಥ ವೋಹಾರವೇಪಕ್ಕನ್ತಿ ವೋಹಾರವಿಪಾಕಂ। ಕಥಾಸಙ್ಖಾತೋ ಹಿ ವೋಹಾರೋ ಸಞ್ಞಾಯ ವಿಪಾಕೋ ನಾಮ। ಯಥಾ ಯಥಾ ನನ್ತಿ ಏತ್ಥ ನಂ-ಇತಿ ನಿಪಾತಮತ್ತಮೇವ। ಇತಿ ಯಸ್ಮಾ ಯಥಾ ಯಥಾ ಸಞ್ಜಾನಾತಿ, ತಥಾ ತಥಾ ಏವಂಸಞ್ಞೀ ಅಹೋಸಿನ್ತಿ ಕಥೇತಿ, ತಸ್ಮಾ ವೋಹಾರವೇಪಕ್ಕಾತಿ ಅತ್ಥೋ।
Sāmisāti kilesāmisasampayuttā. Iminā nayena sabbaṭhānesu attho veditabbo. Apicettha vohāravepakkanti vohāravipākaṃ. Kathāsaṅkhāto hi vohāro saññāya vipāko nāma. Yathāyathā nanti ettha naṃ-iti nipātamattameva. Iti yasmā yathā yathā sañjānāti, tathā tathā evaṃsaññī ahosinti katheti, tasmā vohāravepakkāti attho.
ಅವಿಜ್ಜಾತಿ ಅಟ್ಠಸು ಠಾನೇಸು ಅಞ್ಞಾಣಭೂತಾ ಬಹಲಅವಿಜ್ಜಾ। ನಿರಯಂ ಗಮೇನ್ತೀತಿ ನಿರಯಗಮನೀಯಾ, ನಿರಯೇ ನಿಬ್ಬತ್ತಿಪಚ್ಚಯಾತಿ ಅತ್ಥೋ। ಸೇಸೇಸುಪಿ ಏಸೇವ ನಯೋ। ಚೇತನಾಹನ್ತಿ ಚೇತನಂ ಅಹಂ। ಇಧ ಸಬ್ಬಸಙ್ಗಾಹಿಕಾ ಸಂವಿದಹನಚೇತನಾ ಗಹಿತಾ। ಚೇತಯಿತ್ವಾತಿ ದ್ವಾರಪ್ಪವತ್ತಚೇತನಾ। ಮನಸಾತಿ ಚೇತನಾಸಮ್ಪಯುತ್ತಚಿತ್ತೇನ। ನಿರಯವೇದನೀಯನ್ತಿ ನಿರಯೇ ವಿಪಾಕದಾಯಕಂ। ಸೇಸೇಸುಪಿ ಏಸೇವ ನಯೋ। ಅಧಿಮತ್ತನ್ತಿ ಬಲವದುಕ್ಖಂ। ದನ್ಧವಿರಾಗೀತಿ ಗರುಕಂ ನ ಖಿಪ್ಪಂ ಸಣಿಕಂ ವಿಗಚ್ಛನಕದುಕ್ಖಂ। ಉರತ್ತಾಳಿಂ ಕನ್ದತೀತಿ ಉರಂ ತಾಳೇತ್ವಾ ರೋದತಿ। ಪರಿಯೇಟ್ಠಿನ್ತಿ ಪರಿಯೇಸನಂ। ಏಕಪದಂ ದ್ವಿಪದನ್ತಿ ಏಕಪದಮನ್ತಂ ವಾ ದ್ವಿಪದಮನ್ತಂ ವಾ, ಕೋ ಮನ್ತಂ ಜಾನಾತೀತಿ ಅತ್ಥೋ। ಸಮ್ಮೋಹವೇಪಕ್ಕನ್ತಿ ಸಮ್ಮೋಹವಿಪಾಕಂ। ದುಕ್ಖಸ್ಸ ಹಿ ಸಮ್ಮೋಹೋ ನಿಸ್ಸನ್ದವಿಪಾಕೋ ನಾಮ। ದುತಿಯಪದೇಪಿ ಏಸೇವ ನಯೋ। ಪರಿಯೇಸನಾಪಿ ಹಿ ತಸ್ಸ ನಿಸ್ಸನ್ದವಿಪಾಕೋತಿ। ಇಮಸ್ಮಿಂ ಸುತ್ತೇ ವಟ್ಟವಿವಟ್ಟಂ ಕಥಿತಂ।
Avijjāti aṭṭhasu ṭhānesu aññāṇabhūtā bahalaavijjā. Nirayaṃ gamentīti nirayagamanīyā, niraye nibbattipaccayāti attho. Sesesupi eseva nayo. Cetanāhanti cetanaṃ ahaṃ. Idha sabbasaṅgāhikā saṃvidahanacetanā gahitā. Cetayitvāti dvārappavattacetanā. Manasāti cetanāsampayuttacittena. Nirayavedanīyanti niraye vipākadāyakaṃ. Sesesupi eseva nayo. Adhimattanti balavadukkhaṃ. Dandhavirāgīti garukaṃ na khippaṃ saṇikaṃ vigacchanakadukkhaṃ. Urattāḷiṃ kandatīti uraṃ tāḷetvā rodati. Pariyeṭṭhinti pariyesanaṃ. Ekapadaṃ dvipadanti ekapadamantaṃ vā dvipadamantaṃ vā, ko mantaṃ jānātīti attho. Sammohavepakkanti sammohavipākaṃ. Dukkhassa hi sammoho nissandavipāko nāma. Dutiyapadepi eseva nayo. Pariyesanāpi hi tassa nissandavipākoti. Imasmiṃ sutte vaṭṭavivaṭṭaṃ kathitaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೯. ನಿಬ್ಬೇಧಿಕಸುತ್ತಂ • 9. Nibbedhikasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೯. ನಿಬ್ಬೇಧಿಕಸುತ್ತವಣ್ಣನಾ • 9. Nibbedhikasuttavaṇṇanā
