| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
நிதா³னகதா²வண்ணனா
Nidānakathāvaṇṇanā
பரினிப்³பா³னமேவ …பே॰… வுத்தங். அபி⁴ன்னஸபா⁴வம்பி ஹி அத்த²ங் தத³ஞ்ஞத⁴ம்மதோ விஸேஸாவபோ³த⁴னத்த²ங் அஞ்ஞங் விய கத்வா வோஹரந்தி யதா² ‘‘அத்தனோ ஸபா⁴வங் தா⁴ரெந்தீதி த⁴ம்மா’’தி (த⁴॰ ஸ॰ அட்ட²॰ 1). ஸாதி அஸங்க²தா தா⁴து. கரணபா⁴வேன வுத்தா யதா²வுத்தஸ்ஸ உபஸமஸ்ஸ ஸாத⁴கதமபா⁴வங் ஸந்தா⁴ய. த⁴ம்மவாதீ³…பே॰… து³ப்³ப³லதா வுத்தா ததா²ரூபாய பஞ்ஞாய பா⁴வே தாதி³ஸானங் பக்க²பா⁴வாபா⁴வதோ. லத்³தி⁴யாதி ‘‘அத்தி² புக்³க³லோ ஸச்சிகட்ட²பரமத்தே²ன, பரிஹாயதி அரஹா அரஹத்தா’’திஆதி³லத்³தி⁴யா. ஸுத்தந்தேஹீதி தே³வதாஸங்யுத்தாதீ³ஹி. லிங்கா³கப்பபே⁴த³ங் பரதோ ஸயமேவ வக்க²தி.
Parinibbānameva…pe… vuttaṃ. Abhinnasabhāvampi hi atthaṃ tadaññadhammato visesāvabodhanatthaṃ aññaṃ viya katvā voharanti yathā ‘‘attano sabhāvaṃ dhārentīti dhammā’’ti (dha. sa. aṭṭha. 1). Sāti asaṅkhatā dhātu. Karaṇabhāvena vuttā yathāvuttassa upasamassa sādhakatamabhāvaṃ sandhāya. Dhammavādī…pe… dubbalatā vuttā tathārūpāya paññāya bhāve tādisānaṃ pakkhabhāvābhāvato. Laddhiyāti ‘‘atthi puggalo saccikaṭṭhaparamatthena, parihāyati arahā arahattā’’tiādiladdhiyā. Suttantehīti devatāsaṃyuttādīhi. Liṅgākappabhedaṃ parato sayameva vakkhati.
பி⁴ந்தி³த்வா மூலஸங்க³ஹந்தி மூலஸங்கீ³திங் வினாஸெத்வா, பே⁴த³ங் வா கத்வா யதா² ஸா டி²தா, ததோ அஞ்ஞதா² கத்வா. ஸங்க³ஹிததோ வா அஞ்ஞத்ராதி மூலஸங்கீ³தியா ஸங்க³ஹிததோ அஞ்ஞத்ர. தேனாஹ ‘‘அஸங்க³ஹிதங் ஸுத்த’’ந்தி. நீதத்த²ங் யதா²ருதவஸேன விஞ்ஞெய்யத்த²த்தா. நெய்யத்த²ங் விபரிணாமது³க்க²தாதி³வஸேன நித்³தா⁴ரேதப்³ப³த்த²த்தா. தீஹி டா²னேஹீதி ‘‘ஸூரா ஸதிமந்தோ இத⁴ ப்³ரஹ்மசரியவாஸோ’’தி (அ॰ நி॰ 9.21) ஏவங் வுத்தேஹி தீஹி காரணேஹி. அஞ்ஞங் ஸந்தா⁴ய ப⁴ணிதந்தி ஏகங் பப்³ப³ஜ்ஜாஸங்கா²தங் ப்³ரஹ்மசரியவாஸங் ஸந்தா⁴ய ப⁴ணிதங். அஞ்ஞங் அத்த²ங் ட²பயிங்ஸூதி ஸப்³ப³ஸ்ஸபி ப்³ரஹ்மசரியவாஸஸ்ஸ வஸேன ‘‘நத்தி² தே³வேஸு ப்³ரஹ்மசரியவாஸோ’’திஆதி³கங் (கதா²॰ 269) அஞ்ஞங் அத்த²ங் ட²பயிங்ஸு. ஸுத்தஞ்ச அஞ்ஞங் ஸந்தா⁴ய ப⁴ணிதங் ததோ அஞ்ஞங் ஸந்தா⁴ய ப⁴ணிதங் கத்வா ட²பயிங்ஸு, தஸ்ஸ அத்த²ஞ்ச அஞ்ஞங் ட²பயிங்ஸூதி ஏவமெத்த² யோஜனா வேதி³தப்³பா³. ஸுஞ்ஞதாதீ³தி ஆதி³-ஸத்³தே³ன அனிச்சதாதி³ங் ஸங்க³ண்ஹாதி.
Bhinditvā mūlasaṅgahanti mūlasaṅgītiṃ vināsetvā, bhedaṃ vā katvā yathā sā ṭhitā, tato aññathā katvā. Saṅgahitato vā aññatrāti mūlasaṅgītiyā saṅgahitato aññatra. Tenāha ‘‘asaṅgahitaṃ sutta’’nti. Nītatthaṃ yathārutavasena viññeyyatthattā. Neyyatthaṃ vipariṇāmadukkhatādivasena niddhāretabbatthattā. Tīhi ṭhānehīti ‘‘sūrā satimanto idha brahmacariyavāso’’ti (a. ni. 9.21) evaṃ vuttehi tīhi kāraṇehi. Aññaṃ sandhāya bhaṇitanti ekaṃ pabbajjāsaṅkhātaṃ brahmacariyavāsaṃ sandhāya bhaṇitaṃ. Aññaṃ atthaṃ ṭhapayiṃsūti sabbassapi brahmacariyavāsassa vasena ‘‘natthi devesu brahmacariyavāso’’tiādikaṃ (kathā. 269) aññaṃ atthaṃ ṭhapayiṃsu. Suttañca aññaṃ sandhāya bhaṇitaṃ tato aññaṃ sandhāya bhaṇitaṃ katvā ṭhapayiṃsu, tassa atthañca aññaṃ ṭhapayiṃsūti evamettha yojanā veditabbā. Suññatādīti ādi-saddena aniccatādiṃ saṅgaṇhāti.
க³ம்பீ⁴ரங் ஏகதே³ஸங் மஹாபதே³ஸபரிவாராதி³ங். ஏகச்சே ஸகலங் அபி⁴த⁴ம்மங் விஸ்ஸஜ்ஜிங்ஸு ச²ட்³ட³யிங்ஸு ஸெய்யதா²பி ஸுத்தந்திகா. தே ஹி தங் ந ஜினவசனந்தி வத³ந்தி. கதா²வத்து²ஸ்ஸ ஸவிவாத³த்தேதிஆதி³ ஹெட்டா² நிதா³னட்ட²கதா²ய ஆக³தனயங் ஸந்தா⁴ய வுத்தங். கேசி பன புக்³க³லபஞ்ஞத்தியாபி ஸவிவாத³த்தங் மஞ்ஞந்தி. ‘‘ததியஸங்கீ³திதோ புப்³பே³ பவத்தமானானங் வஸேனா’’தி இத³ங் கஸ்மா வுத்தங், நனு ததியஸங்கீ³திதோ புப்³பே³பி தங் மாதிகாரூபேன பவத்ததேவ? நித்³தே³ஸங் வா ஸந்தா⁴ய ததா² வுத்தந்தி வேதி³தப்³ப³ங். அஞ்ஞானீதி அஞ்ஞாகாரானி அபி⁴த⁴ம்மபகரணாதீ³னி அகரிங்ஸு, பவத்தந்தானிபி தானி அஞ்ஞதா² கத்வா படி²ங்ஸூதி அத்தோ² . மஞ்ஜுஸிரீதி இத³ங் கஸ்மா வுத்தங். ந ஹி தங் நாமங் பிடகத்தயங் அனுவத்தந்தேஹி பி⁴க்கூ²ஹி க³ய்ஹதி? இதரேஹி க³ய்ஹமானம்பி வா ஸாஸனிகபரிஞ்ஞேஹி ந ஸாஸனாவசரங் க³ய்ஹதீதி கத்வா வுத்தங். நிகாயனாமந்தி மஹாஸங்கி⁴காதி³னிகாயனாமங், து³த்தகு³த்தாதி³வக்³க³னாமஞ்ச.
Gambhīraṃ ekadesaṃ mahāpadesaparivārādiṃ. Ekacce sakalaṃ abhidhammaṃ vissajjiṃsu chaḍḍayiṃsu seyyathāpi suttantikā. Te hi taṃ na jinavacananti vadanti. Kathāvatthussa savivādattetiādi heṭṭhā nidānaṭṭhakathāya āgatanayaṃ sandhāya vuttaṃ. Keci pana puggalapaññattiyāpi savivādattaṃ maññanti. ‘‘Tatiyasaṅgītito pubbe pavattamānānaṃ vasenā’’ti idaṃ kasmā vuttaṃ, nanu tatiyasaṅgītito pubbepi taṃ mātikārūpena pavattateva? Niddesaṃ vā sandhāya tathā vuttanti veditabbaṃ. Aññānīti aññākārāni abhidhammapakaraṇādīni akariṃsu, pavattantānipi tāni aññathā katvā paṭhiṃsūti attho . Mañjusirīti idaṃ kasmā vuttaṃ. Na hi taṃ nāmaṃ piṭakattayaṃ anuvattantehi bhikkhūhi gayhati? Itarehi gayhamānampi vā sāsanikapariññehi na sāsanāvacaraṃ gayhatīti katvā vuttaṃ. Nikāyanāmanti mahāsaṅghikādinikāyanāmaṃ, duttaguttādivagganāmañca.
ஸங்கந்திகானங் பே⁴தோ³ ஸுத்தவாதீ³தி ஸங்கந்திகானங் அனந்தரே ஏகோ நிகாயபே⁴தோ³ ஸுத்தவாதீ³ நாம பி⁴ஜ்ஜித்த². ஸஹாதி ஏகஜ்ஜ²ங் கத்வா, க³ணியமானாதி அத்தோ².
Saṅkantikānaṃ bhedo suttavādīti saṅkantikānaṃ anantare eko nikāyabhedo suttavādī nāma bhijjittha. Sahāti ekajjhaṃ katvā, gaṇiyamānāti attho.
உப்பன்னே வாதே³ ஸந்தா⁴யாதி ததியஸங்கீ³திகாலே உப்பன்னே வாதே³ ஸந்தா⁴ய. உப்பஜ்ஜனகேதி ததோ பட்டா²ய யாவ ஸத்³த⁴ம்மந்தரதா⁴னா எத்த²ந்தரே உப்பஜ்ஜனகே. ஸுத்தஸஹஸ்ஸாஹரணஞ்செத்த² பரவாத³ப⁴ஞ்ஜனத்த²ஞ்ச ஸகவாத³பதிட்டா²பனத்த²ஞ்ச. ஸுத்தேகதே³ஸோபி ஹி ‘‘ஸுத்த’’ந்தி வுச்சதி ஸமுதா³யவோஹாரஸ்ஸ அவயவேஸுபி தி³ஸ்ஸனதோ யதா² ‘‘படோ த³ட்³டோ⁴, ஸமுத்³தோ³ தி³ட்டோ²’’தி ச. தே பனெத்த² ஸுத்தபதே³ஸா ‘‘அத்தி² புக்³க³லோ அத்தஹிதாய படிபன்னோ’’திஆதி³னா ஆக³தா வேதி³தப்³பா³.
Uppanne vāde sandhāyāti tatiyasaṅgītikāle uppanne vāde sandhāya. Uppajjanaketi tato paṭṭhāya yāva saddhammantaradhānā etthantare uppajjanake. Suttasahassāharaṇañcettha paravādabhañjanatthañca sakavādapatiṭṭhāpanatthañca. Suttekadesopi hi ‘‘sutta’’nti vuccati samudāyavohārassa avayavesupi dissanato yathā ‘‘paṭo daḍḍho, samuddo diṭṭho’’ti ca. Te panettha suttapadesā ‘‘atthi puggalo attahitāya paṭipanno’’tiādinā āgatā veditabbā.
நிதா³னகதா²வண்ணனா நிட்டி²தா.
Nidānakathāvaṇṇanā niṭṭhitā.
