| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
নিদানকথাৰণ্ণনা
Nidānakathāvaṇṇanā
অনুপাদিসেসায নিব্বানধাতুযা পরিনিব্বাযীতি পরিনিব্বানমেৰ পরিনিব্বানস্স পরিনিব্বানন্তরতো ৰিসেসনত্থং করণভাৰেন ৰুত্তং। যায ৰা নিব্বানধাতুযা অধিগতায পচ্ছিমচিত্তং অপ্পটিসন্ধিকং জাতং, সা তস্স অপ্পটিসন্ধিৰূপসমস্স করণভাৰেন ৰুত্তাতি। দুব্বলপক্খন্তি ন কাল়াসোকং ৰিয বলৰন্তং, অথ খো একমণ্ডলিকন্তি ৰদন্তি। ধম্মৰাদীঅধম্মৰাদীৰিসেসজননসমত্থায পন পঞ্ঞায অভাৰতো দুব্বলতা ৰুত্তা। তেসংযেৰাতি বাহুলিযানমেৰ , বহুস্সুতিকাতিপি নামং। ভিন্নকাতি মূলসঙ্গীতিতো মূলনিকাযতো ৰা ভিন্না, লদ্ধিযা সুত্তন্তেহি লিঙ্গাকপ্পেহি চ ৰিসদিসভাৰং গতাতি অত্থো।
Anupādisesāya nibbānadhātuyā parinibbāyīti parinibbānameva parinibbānassa parinibbānantarato visesanatthaṃ karaṇabhāvena vuttaṃ. Yāya vā nibbānadhātuyā adhigatāya pacchimacittaṃ appaṭisandhikaṃ jātaṃ, sā tassa appaṭisandhivūpasamassa karaṇabhāvena vuttāti. Dubbalapakkhanti na kāḷāsokaṃ viya balavantaṃ, atha kho ekamaṇḍalikanti vadanti. Dhammavādīadhammavādīvisesajananasamatthāya pana paññāya abhāvato dubbalatā vuttā. Tesaṃyevāti bāhuliyānameva , bahussutikātipi nāmaṃ. Bhinnakāti mūlasaṅgītito mūlanikāyato vā bhinnā, laddhiyā suttantehi liṅgākappehi ca visadisabhāvaṃ gatāti attho.
মূলসঙ্গহন্তি পঞ্চসতিকসঙ্গীতিং। অঞ্ঞত্র সঙ্গহিতাতিআদীসু দীঘাদীসু অঞ্ঞত্র সঙ্গহিততো সুত্তন্তরাসিতো তং তং সুত্তং নিক্কড্ঢিত্ৰা অঞ্ঞত্র অকরিংসূতি ৰুত্তং হোতি। সঙ্গহিততো ৰা অঞ্ঞত্র অসঙ্গহিতং সুত্তং অঞ্ঞত্র কত্থচি অকরিংসু, অঞ্ঞং ৰা অকরিংসূতি অত্থো। অত্থং ধম্মঞ্চাতি পাল়িযা অত্থং পাল়িঞ্চ। ৰিনযে নিকাযেসু চ পঞ্চসূতি ৰিনযে চ অৰসেসপঞ্চনিকাযেসু চ।
Mūlasaṅgahanti pañcasatikasaṅgītiṃ. Aññatra saṅgahitātiādīsu dīghādīsu aññatra saṅgahitato suttantarāsito taṃ taṃ suttaṃ nikkaḍḍhitvā aññatra akariṃsūti vuttaṃ hoti. Saṅgahitato vā aññatra asaṅgahitaṃ suttaṃ aññatra katthaci akariṃsu, aññaṃ vā akariṃsūti attho. Atthaṃ dhammañcāti pāḷiyā atthaṃ pāḷiñca. Vinaye nikāyesu ca pañcasūti vinaye ca avasesapañcanikāyesu ca.
‘‘দ্ৰেপানন্দ , ৰেদনা ৰুত্তা মযা পরিযাযেনা’’তিআদি (ম॰ নি॰ ২.৮৯) পরিযাযদেসিতং। উপেক্খাৰেদনা হি সন্তস্মিং পণীতে সুখে ৰুত্তা ভগৰতাতি অযঞ্হেত্থ পরিযাযো। ‘‘তিস্সো ইমা, ভিক্খৰে, ৰেদনা সুখা দুক্খা উপেক্খা ৰেদনা’’তিআদি (সং॰ নি॰ ৪.২৪৯-২৫১) নিপ্পরিযাযদেসিতং। ৰেদনাসভাৰো হি তিৰিধোতি অযমেত্থ নিপ্পরিযাযতা। ‘‘সুখাপি ৰেদনা অনিচ্চা সঙ্খতা’’তিআদি (দী॰ নি॰ ২.১২৩) নীতত্থং। ‘‘যং কিঞ্চি ৰেদযিতং, সব্বং তং দুক্খ’’ন্তিআদি (সং॰ নি॰ ২.৩২) নেয্যত্থং। ‘‘তীহি, ভিক্খৰে, ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে’’তিআদিকং (অ॰ নি॰ ৯.২১) অঞ্ঞং সন্ধায ভণিতং গহেত্ৰা অঞ্ঞং অত্থং ঠপযিংসু। ‘‘নত্থি দেৰেসু ব্রহ্মচরিযৰাসো’’তিআদিকং (কথা॰ ২৭০) সুত্তঞ্চ অঞ্ঞং সন্ধায ভণিতং অত্থঞ্চ অঞ্ঞং ঠপযিংসূতি এৰমেত্থ অত্থো দট্ঠব্বো। ‘‘অত্থেকচ্চো পুগ্গলো অত্তহিতায পটিপন্নো’’তিআদি (পু॰ প॰ মাতিকা ৪.২৪) ব্যঞ্জনচ্ছাযায সণ্হসুখুমং সুঞ্ঞতাদিঅত্থং বহুং ৰিনাসযুং।
‘‘Dvepānanda , vedanā vuttā mayā pariyāyenā’’tiādi (ma. ni. 2.89) pariyāyadesitaṃ. Upekkhāvedanā hi santasmiṃ paṇīte sukhe vuttā bhagavatāti ayañhettha pariyāyo. ‘‘Tisso imā, bhikkhave, vedanā sukhā dukkhā upekkhā vedanā’’tiādi (saṃ. ni. 4.249-251) nippariyāyadesitaṃ. Vedanāsabhāvo hi tividhoti ayamettha nippariyāyatā. ‘‘Sukhāpi vedanā aniccā saṅkhatā’’tiādi (dī. ni. 2.123) nītatthaṃ. ‘‘Yaṃ kiñci vedayitaṃ, sabbaṃ taṃ dukkha’’ntiādi (saṃ. ni. 2.32) neyyatthaṃ. ‘‘Tīhi, bhikkhave, ṭhānehi jambudīpakā manussā uttarakuruke ca manusse adhiggaṇhanti deve ca tāvatiṃse’’tiādikaṃ (a. ni. 9.21) aññaṃ sandhāya bhaṇitaṃ gahetvā aññaṃ atthaṃ ṭhapayiṃsu. ‘‘Natthi devesu brahmacariyavāso’’tiādikaṃ (kathā. 270) suttañca aññaṃ sandhāya bhaṇitaṃ atthañca aññaṃ ṭhapayiṃsūti evamettha attho daṭṭhabbo. ‘‘Atthekacco puggalo attahitāya paṭipanno’’tiādi (pu. pa. mātikā 4.24) byañjanacchāyāya saṇhasukhumaṃ suññatādiatthaṃ bahuṃ vināsayuṃ.
ৰিনযগম্ভীরন্তি ৰিনযে গম্ভীরঞ্চ একদেসং ছড্ডেত্ৰাতি অত্থো। কিলেসৰিনযেন ৰা গম্ভীরং একদেসং সুত্তং ছড্ডেত্ৰাতি অত্থো। পতিরূপন্তি অত্তনো অধিপ্পাযানুরূপং সুত্তং, সুত্তপতিরূপকং ৰা অসুত্তং। একচ্চে অট্ঠকথাকণ্ডমেৰ ৰিস্সজ্জিংসু, একচ্চে সকলং অভিধম্মপিটকন্তি আহ ‘‘অত্থুদ্ধারং অভিধম্মং ছপ্পকরণ’’ন্তি। কথাৰত্থুস্স সৰিৰাদত্তেপি অৰিৰাদানি ছপ্পকরণানি পঠিতব্বানি সিযুং, তানি নপ্পৰত্তন্তীতি হি দস্সনত্থং ‘‘ছপ্পকরণ’’ন্তি ৰুত্তন্তি। ততিযসঙ্গীতিতো ৰা পুব্বে পৰত্তমানানং ৰসেন ‘‘ছপ্পকরণ’’ন্তি ৰুত্তং । অঞ্ঞানীতি অঞ্ঞানি অভিধম্মপকরণাদীনি। নামন্তি যং বুদ্ধাদিপটিসংযুত্তং ন হোতি মঞ্জুসিরীতিআদিকং, তং নিকাযনামং। লিঙ্গন্তি নিৰাসনপারুপনাদিৰিসেসকতং সণ্ঠানৰিসেসং। সিক্কাদিকং পরিক্খারং। আকপ্পো ঠানাদীসু অঙ্গট্ঠপনৰিসেসো দট্ঠব্বো। করণন্তি চীৰরসিব্বনাদিকিচ্চৰিসেসো।
Vinayagambhīranti vinaye gambhīrañca ekadesaṃ chaḍḍetvāti attho. Kilesavinayena vā gambhīraṃ ekadesaṃ suttaṃ chaḍḍetvāti attho. Patirūpanti attano adhippāyānurūpaṃ suttaṃ, suttapatirūpakaṃ vā asuttaṃ. Ekacce aṭṭhakathākaṇḍameva vissajjiṃsu, ekacce sakalaṃ abhidhammapiṭakanti āha ‘‘atthuddhāraṃ abhidhammaṃ chappakaraṇa’’nti. Kathāvatthussa savivādattepi avivādāni chappakaraṇāni paṭhitabbāni siyuṃ, tāni nappavattantīti hi dassanatthaṃ ‘‘chappakaraṇa’’nti vuttanti. Tatiyasaṅgītito vā pubbe pavattamānānaṃ vasena ‘‘chappakaraṇa’’nti vuttaṃ . Aññānīti aññāni abhidhammapakaraṇādīni. Nāmanti yaṃ buddhādipaṭisaṃyuttaṃ na hoti mañjusirītiādikaṃ, taṃ nikāyanāmaṃ. Liṅganti nivāsanapārupanādivisesakataṃ saṇṭhānavisesaṃ. Sikkādikaṃ parikkhāraṃ. Ākappo ṭhānādīsu aṅgaṭṭhapanaviseso daṭṭhabbo. Karaṇanti cīvarasibbanādikiccaviseso.
সঙ্কন্তিকস্সপিকেন নিকাযেন ৰাদেন ৰা ভিন্না সঙ্কন্তিকাতি অত্থো। সঙ্কন্তিকানং ভেদা সুত্তৰাদী অনুপুব্বেন ভিজ্জথ ভিজ্জিংসূতি অত্থো। ভিন্নৰাদেনাতি ভিন্না ৰাদা এতস্মিন্তি ভিন্নৰাদো, তেন অভিন্নেন থেরৰাদেন সহ অট্ঠারস হোন্তীতি ৰুত্তং হোতি। ভিন্নৰাদেনাতি ৰা ভিন্নায লদ্ধিযা অট্ঠারস হোন্তি, তে সব্বেপি সহাতি অত্থো। থেরৰাদানমুত্তমোতি এত্থ থের-ইতি অৰিভত্তিকো নিদ্দেসো। থেরানং অযন্তি থেরো। কো সো? ৰাদো। থেরো ৰাদানমুত্তমোতি অযমেত্থ অত্থো।
Saṅkantikassapikena nikāyena vādena vā bhinnā saṅkantikāti attho. Saṅkantikānaṃ bhedā suttavādī anupubbena bhijjatha bhijjiṃsūti attho. Bhinnavādenāti bhinnā vādā etasminti bhinnavādo, tena abhinnena theravādena saha aṭṭhārasa hontīti vuttaṃ hoti. Bhinnavādenāti vā bhinnāya laddhiyā aṭṭhārasa honti, te sabbepi sahāti attho. Theravādānamuttamoti ettha thera-iti avibhattiko niddeso. Therānaṃ ayanti thero. Ko so? Vādo. Thero vādānamuttamoti ayamettha attho.
উপ্পন্নে ৰাদে সন্ধায ‘‘পরপ্পৰাদমথন’’ন্তি আহ। আযতিং উপ্পজ্জনকৰাদানং পটিসেধনলক্খণভাৰতো ‘‘আযতিলক্খণ’’ন্তি ৰুত্তং।
Uppanne vāde sandhāya ‘‘parappavādamathana’’nti āha. Āyatiṃ uppajjanakavādānaṃ paṭisedhanalakkhaṇabhāvato ‘‘āyatilakkhaṇa’’nti vuttaṃ.
নিদানকথাৰণ্ণনা নিট্ঠিতা।
Nidānakathāvaṇṇanā niṭṭhitā.
