| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. நிதா³னஸுத்தங்
10. Nidānasuttaṃ
60. ஏகங் ஸமயங் ப⁴க³வா குரூஸு விஹரதி கம்மாஸத⁴ம்மங் நாம குரூனங் நிக³மோ. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘அச்ச²ரியங், ப⁴ந்தே, அப்³பு⁴தங், ப⁴ந்தே! யாவ க³ம்பீ⁴ரோ சாயங், ப⁴ந்தே, படிச்சஸமுப்பாதோ³ க³ம்பீ⁴ராவபா⁴ஸோ ச, அத² ச பன மே உத்தானகுத்தானகோ விய கா²யதீ’’தி.
60. Ekaṃ samayaṃ bhagavā kurūsu viharati kammāsadhammaṃ nāma kurūnaṃ nigamo. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘acchariyaṃ, bhante, abbhutaṃ, bhante! Yāva gambhīro cāyaṃ, bhante, paṭiccasamuppādo gambhīrāvabhāso ca, atha ca pana me uttānakuttānako viya khāyatī’’ti.
‘‘உபாதா³னியேஸு, ஆனந்த³, த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னங்; உபாதா³னபச்சயா ப⁴வோ; ப⁴வபச்சயா ஜாதி; ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
‘‘Upādāniyesu, ānanda, dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo; bhavapaccayā jāti; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.
‘‘ஸெய்யதா²பி, ஆனந்த³, மஹாருக்கோ². தஸ்ஸ யானி சேவ மூலானி அதோ⁴க³மானி, யானி ச திரியங்க³மானி, ஸப்³பா³னி தானி உத்³த⁴ங் ஓஜங் அபி⁴ஹரந்தி. ஏவஞ்ஹி ஸோ, ஆனந்த³, மஹாருக்கோ² ததா³ஹாரோ தது³பாதா³னோ சிரங் தீ³க⁴மத்³தா⁴னங் திட்டெ²ய்ய. ஏவமேவ கோ², ஆனந்த³, உபாதா³னியேஸு த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னங் ; உபாதா³னபச்சயா ப⁴வோ…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
‘‘Seyyathāpi, ānanda, mahārukkho. Tassa yāni ceva mūlāni adhogamāni, yāni ca tiriyaṅgamāni, sabbāni tāni uddhaṃ ojaṃ abhiharanti. Evañhi so, ānanda, mahārukkho tadāhāro tadupādāno ciraṃ dīghamaddhānaṃ tiṭṭheyya. Evameva kho, ānanda, upādāniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ ; upādānapaccayā bhavo…pe… evametassa kevalassa dukkhakkhandhassa samudayo hoti.
‘‘உபாதா³னியேஸு, ஆனந்த³, த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி. தண்ஹானிரோதா⁴ உபாதா³னநிரோதோ⁴; உபாதா³னநிரோதா⁴ ப⁴வனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி.
‘‘Upādāniyesu, ānanda, dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho…pe… evametassa kevalassa dukkhakkhandhassa nirodho hoti.
‘‘ஸெய்யதா²பி , ஆனந்த³, மஹாருக்கோ². அத² புரிஸோ ஆக³ச்செ²ய்ய குத்³தா³லபிடகங் ஆதா³ய. ஸோ தங் ருக்க²ங் மூலே சி²ந்தெ³ய்ய, மூலே செ²த்வா பலிக²ணெய்ய, பலிக²ணித்வா மூலானி உத்³த⁴ரெய்ய அந்தமஸோ உஸீரனாளிமத்தானிபி. ஸோ தங் ருக்க²ங் க²ண்டா³க²ண்டி³கங் சி²ந்தெ³ய்ய. க²ண்டா³க²ண்டி³கங் சி²ந்தி³த்வா பா²லெய்ய; பா²லெத்வா ஸகலிகங் ஸகலிகங் கரெய்ய, ஸகலிகங் ஸகலிகங் கரித்வா வாதாதபே விஸோஸெய்ய, வாதாதபே விஸோஸெத்வா அக்³கி³னா ட³ஹெய்ய, அக்³கி³னா ட³ஹெத்வா மஸிங் கரெய்ய, மஸிங் கரித்வா மஹாவாதே வா ஓபு²ணெய்ய, நதி³யா வா ஸீக⁴ஸோதாய பவாஹெய்ய. ஏவஞ்ஹி ஸோ, ஆனந்த³, மஹாருக்கோ² உச்சி²ன்னமூலோ அஸ்ஸ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ . ஏவமேவ கோ², ஆனந்த³, உபாதா³னியேஸு த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி. தண்ஹானிரோதா⁴ உபாதா³னநிரோதோ⁴; உபாதா³னநிரோதா⁴ ப⁴வனிரோதோ⁴; ப⁴வனிரோதா⁴ ஜாதினிரோதோ⁴; ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. த³ஸமங்.
‘‘Seyyathāpi , ānanda, mahārukkho. Atha puriso āgaccheyya kuddālapiṭakaṃ ādāya. So taṃ rukkhaṃ mūle chindeyya, mūle chetvā palikhaṇeyya, palikhaṇitvā mūlāni uddhareyya antamaso usīranāḷimattānipi. So taṃ rukkhaṃ khaṇḍākhaṇḍikaṃ chindeyya. Khaṇḍākhaṇḍikaṃ chinditvā phāleyya; phāletvā sakalikaṃ sakalikaṃ kareyya, sakalikaṃ sakalikaṃ karitvā vātātape visoseyya, vātātape visosetvā agginā ḍaheyya, agginā ḍahetvā masiṃ kareyya, masiṃ karitvā mahāvāte vā ophuṇeyya, nadiyā vā sīghasotāya pavāheyya. Evañhi so, ānanda, mahārukkho ucchinnamūlo assa tālāvatthukato anabhāvaṅkato āyatiṃ anuppādadhammo . Evameva kho, ānanda, upādāniyesu dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho; bhavanirodhā jātinirodho; jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hotī’’ti. Dasamaṃ.
து³க்க²வக்³கோ³ ச²ட்டோ².
Dukkhavaggo chaṭṭho.
தஸ்ஸுத்³தா³னங் –
Tassuddānaṃ –
பரிவீமங்ஸனுபாதா³னங், த்³வே ச ஸங்யோஜனானி ச;
Parivīmaṃsanupādānaṃ, dve ca saṃyojanāni ca;
மஹாருக்கே²ன த்³வே வுத்தா, தருணேன ச ஸத்தமங்;
Mahārukkhena dve vuttā, taruṇena ca sattamaṃ;
நாமரூபஞ்ச விஞ்ஞாணங், நிதா³னேன ச தே த³ஸாதி.
Nāmarūpañca viññāṇaṃ, nidānena ca te dasāti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. நிதா³னஸுத்தவண்ணனா • 10. Nidānasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. நிதா³னஸுத்தவண்ணனா • 10. Nidānasuttavaṇṇanā
