| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. නිදානසුත්‌තං
9. Nidānasuttaṃ
39. ‘‘තීණිමානි , භික්‌ඛවෙ, නිදානානි කම්‌මානං සමුදයාය. කතමානි තීණි? ලොභො නිදානං කම්‌මානං සමුදයාය, දොසො නිදානං කම්‌මානං සමුදයාය, මොහො නිදානං කම්‌මානං සමුදයාය. න, භික්‌ඛවෙ, ලොභා අලොභො සමුදෙති; අථ ඛො, භික්‌ඛවෙ, ලොභා ලොභොව සමුදෙති. න, භික්‌ඛවෙ, දොසා අදොසො සමුදෙති; අථ ඛො, භික්‌ඛවෙ, දොසා දොසොව සමුදෙති. න, භික්‌ඛවෙ, මොහා අමොහො සමුදෙති; අථ ඛො, භික්‌ඛවෙ, මොහා මොහොව සමුදෙති. න, භික්‌ඛවෙ, ලොභජෙන කම්‌මෙන දොසජෙන කම්‌මෙන මොහජෙන කම්‌මෙන දෙවා පඤ්‌ඤායන්‌ති, මනුස්‌සා පඤ්‌ඤායන්‌ති, යා වා පනඤ්‌ඤාපි කාචි සුගතියො. අථ ඛො, භික්‌ඛවෙ, ලොභජෙන කම්‌මෙන දොසජෙන කම්‌මෙන මොහජෙන කම්‌මෙන නිරයො පඤ්‌ඤායති තිරච්‌ඡානයොනි පඤ්‌ඤායති පෙත්‌තිවිසයො පඤ්‌ඤායති, යා වා පනඤ්‌ඤාපි කාචි දුග්‌ගතියො. ඉමානි ඛො, භික්‌ඛවෙ, තීණි නිදානානි කම්‌මානං සමුදයාය.
39. ‘‘Tīṇimāni , bhikkhave, nidānāni kammānaṃ samudayāya. Katamāni tīṇi? Lobho nidānaṃ kammānaṃ samudayāya, doso nidānaṃ kammānaṃ samudayāya, moho nidānaṃ kammānaṃ samudayāya. Na, bhikkhave, lobhā alobho samudeti; atha kho, bhikkhave, lobhā lobhova samudeti. Na, bhikkhave, dosā adoso samudeti; atha kho, bhikkhave, dosā dosova samudeti. Na, bhikkhave, mohā amoho samudeti; atha kho, bhikkhave, mohā mohova samudeti. Na, bhikkhave, lobhajena kammena dosajena kammena mohajena kammena devā paññāyanti, manussā paññāyanti, yā vā panaññāpi kāci sugatiyo. Atha kho, bhikkhave, lobhajena kammena dosajena kammena mohajena kammena nirayo paññāyati tiracchānayoni paññāyati pettivisayo paññāyati, yā vā panaññāpi kāci duggatiyo. Imāni kho, bhikkhave, tīṇi nidānāni kammānaṃ samudayāya.
‘‘තීණිමානි, භික්‌ඛවෙ, නිදානානි කම්‌මානං සමුදයාය. කතමානි තීණි? අලොභො නිදානං කම්‌මානං සමුදයාය, අදොසො නිදානං කම්‌මානං සමුදයාය, අමොහො නිදානං කම්‌මානං සමුදයාය. න, භික්‌ඛවෙ, අලොභා ලොභො සමුදෙති; අථ ඛො, භික්‌ඛවෙ, අලොභා අලොභොව සමුදෙති. න, භික්‌ඛවෙ, අදොසා දොසො සමුදෙති; අථ ඛො, භික්‌ඛවෙ, අදොසා අදොසොව සමුදෙති. න, භික්‌ඛවෙ, අමොහා මොහො සමුදෙති; අථ ඛො, භික්‌ඛවෙ, අමොහා අමොහොව සමුදෙති. න, භික්‌ඛවෙ, අලොභජෙන කම්‌මෙන අදොසජෙන කම්‌මෙන අමොහජෙන කම්‌මෙන නිරයො පඤ්‌ඤායති තිරච්‌ඡානයොනි පඤ්‌ඤායති පෙත්‌තිවිසයො පඤ්‌ඤායති, යා වා පනඤ්‌ඤාපි කාචි දුග්‌ගතියො. අථ ඛො, භික්‌ඛවෙ, අලොභජෙන කම්‌මෙන අදොසජෙන කම්‌මෙන අමොහජෙන කම්‌මෙන දෙවා පඤ්‌ඤායන්‌ති, මනුස්‌සා පඤ්‌ඤායන්‌ති, යා වා පනඤ්‌ඤාපි කාචි සුගතියො. ඉමානි ඛො, භික්‌ඛවෙ, තීණි නිදානානි කම්‌මානං සමුදයායා’’ති. නවමං.
‘‘Tīṇimāni, bhikkhave, nidānāni kammānaṃ samudayāya. Katamāni tīṇi? Alobho nidānaṃ kammānaṃ samudayāya, adoso nidānaṃ kammānaṃ samudayāya, amoho nidānaṃ kammānaṃ samudayāya. Na, bhikkhave, alobhā lobho samudeti; atha kho, bhikkhave, alobhā alobhova samudeti. Na, bhikkhave, adosā doso samudeti; atha kho, bhikkhave, adosā adosova samudeti. Na, bhikkhave, amohā moho samudeti; atha kho, bhikkhave, amohā amohova samudeti. Na, bhikkhave, alobhajena kammena adosajena kammena amohajena kammena nirayo paññāyati tiracchānayoni paññāyati pettivisayo paññāyati, yā vā panaññāpi kāci duggatiyo. Atha kho, bhikkhave, alobhajena kammena adosajena kammena amohajena kammena devā paññāyanti, manussā paññāyanti, yā vā panaññāpi kāci sugatiyo. Imāni kho, bhikkhave, tīṇi nidānāni kammānaṃ samudayāyā’’ti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9-10. නිදානසුත්‌තාදිවණ්‌ණනා • 9-10. Nidānasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8-11. අත්‌තකාරීසුත්‌තාදිවණ්‌ණනා • 8-11. Attakārīsuttādivaṇṇanā
