| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১০. নিদানসুত্তৰণ্ণনা
10. Nidānasuttavaṇṇanā
৬০. দসমে কুরূসু ৰিহরতীতি কুরূতি এৰং বহুৰচনৰসেন লদ্ধৰোহারে জনপদে ৰিহরতি। কম্মাসধম্মং নাম কুরূনং নিগমোতি এৰংনামকো কুরূনং নিগমো, তং গোচরগামং কত্ৰাতি অত্থো। আযস্মাতি পিযৰচনমেতং গরুৰচনমেতং। আনন্দোতি তস্স থেরস্স নামং। একমন্তং নিসীদীতি ছ নিসজ্জদোসে ৰিৰজ্জেন্তো দক্খিণজাণুমণ্ডলস্স অভিমুখট্ঠানে ছব্বণ্ণানং বুদ্ধরস্মীনং অন্তো পৰিসিত্ৰা পসন্নলাখারসং ৰিগাহন্তো ৰিয সুৰণ্ণপটং পারুপন্তো ৰিয রত্তকম্বলৰিতানমজ্ঝং পৰিসন্তো ৰিয ধম্মভণ্ডাগারিকো আযস্মা আনন্দো নিসীদি। তেন ৰুত্তং ‘‘একমন্তং নিসীদী’’তি।
60. Dasame kurūsu viharatīti kurūti evaṃ bahuvacanavasena laddhavohāre janapade viharati. Kammāsadhammaṃ nāma kurūnaṃ nigamoti evaṃnāmako kurūnaṃ nigamo, taṃ gocaragāmaṃ katvāti attho. Āyasmāti piyavacanametaṃ garuvacanametaṃ. Ānandoti tassa therassa nāmaṃ. Ekamantaṃ nisīdīti cha nisajjadose vivajjento dakkhiṇajāṇumaṇḍalassa abhimukhaṭṭhāne chabbaṇṇānaṃ buddharasmīnaṃ anto pavisitvā pasannalākhārasaṃ vigāhanto viya suvaṇṇapaṭaṃ pārupanto viya rattakambalavitānamajjhaṃ pavisanto viya dhammabhaṇḍāgāriko āyasmā ānando nisīdi. Tena vuttaṃ ‘‘ekamantaṃ nisīdī’’ti.
কায পন ৰেলায কেন কারণেন অযমাযস্মা ভগৰন্তং উপসঙ্কমন্তোতি? সাযন্হৰেলায পচ্চযাকারপঞ্হং পুচ্ছনকারণেন। তং দিৰসং কির অযমাযস্মা কুলসঙ্গহত্থায ঘরদ্ৰারে ঘরদ্ৰারে সহস্সভণ্ডিকং নিক্খিপন্তো ৰিয কম্মাসধম্মং পিণ্ডায চরিত্ৰা পিণ্ডপাতপটিক্কন্তো সত্থু ৰত্তং দস্সেত্ৰা সত্থরি গন্ধকুটিং পৰিট্ঠে সত্থারং ৰন্দিত্ৰা অত্তনো দিৰাট্ঠানং গন্ত্ৰা অন্তেৰাসিকেসু ৰত্তং দস্সেত্ৰা পটিক্কন্তেসু দিৰাট্ঠানং পটিসম্মজ্জিত্ৰা চম্মক্খণ্ডং পঞ্ঞপেত্ৰা উদকতুম্বতো উদকেন হত্থপাদে সীতলং কত্ৰা পল্লঙ্কং আভুজিত্ৰা নিসিন্নো সোতাপত্তিফলসমাপত্তিং সমাপজ্জিত্ৰা। অথ পরিচ্ছিন্নকালৰসেন সমাপত্তিতো ৰুট্ঠায পচ্চযাকারে ঞাণং ওতারেসি। সো ‘‘অৰিজ্জাপচ্চযা সঙ্খারা’’তিআদিতো পট্ঠায অন্তং, অন্ততো পট্ঠায আদিং, উভযন্ততো পট্ঠায মজ্ঝং, মজ্ঝতো পট্ঠায উভো অন্তে পাপেন্তো তিক্খত্তুং দ্ৰাদসপদং পচ্চযাকারং সম্মসি। তস্সেৰং সম্মসন্তস্স পচ্চযাকারো ৰিভূতো হুত্ৰা উত্তানকুত্তানকো ৰিয উপট্ঠাসি। ততো চিন্তেসি – ‘‘অযং পচ্চযাকারো সব্ববুদ্ধেহি গম্ভীরো চেৰ গম্ভীরাৰভাসো চাতি কথিতো, ময্হং খো পন পদেসঞাণে ঠিতস্স সাৰকস্স সতো উত্তানো ৰিয ৰিভূতো পাকটো হুত্ৰা উপট্ঠাতি, ময্হংযেৰ নু খো এস উত্তানকো ৰিয উপট্ঠাতি, উদাহু অঞ্ঞেসম্পীতি অত্তনো উপট্ঠানকারণং সত্থু আরোচেস্সামী’’তি নিসিন্নট্ঠানতো উট্ঠায চম্মক্খণ্ডং পপ্ফোটেত্ৰা আদায সাযন্হসমযে ভগৰন্তং উপসঙ্কমি। তেন ৰুত্তং – ‘‘সাযন্হৰেলাযং পচ্চযাকারপঞ্হং পুচ্ছনকারণেন উপসঙ্কমন্তো’’তি।
Kāya pana velāya kena kāraṇena ayamāyasmā bhagavantaṃ upasaṅkamantoti? Sāyanhavelāya paccayākārapañhaṃ pucchanakāraṇena. Taṃ divasaṃ kira ayamāyasmā kulasaṅgahatthāya gharadvāre gharadvāre sahassabhaṇḍikaṃ nikkhipanto viya kammāsadhammaṃ piṇḍāya caritvā piṇḍapātapaṭikkanto satthu vattaṃ dassetvā satthari gandhakuṭiṃ paviṭṭhe satthāraṃ vanditvā attano divāṭṭhānaṃ gantvā antevāsikesu vattaṃ dassetvā paṭikkantesu divāṭṭhānaṃ paṭisammajjitvā cammakkhaṇḍaṃ paññapetvā udakatumbato udakena hatthapāde sītalaṃ katvā pallaṅkaṃ ābhujitvā nisinno sotāpattiphalasamāpattiṃ samāpajjitvā. Atha paricchinnakālavasena samāpattito vuṭṭhāya paccayākāre ñāṇaṃ otāresi. So ‘‘avijjāpaccayā saṅkhārā’’tiādito paṭṭhāya antaṃ, antato paṭṭhāya ādiṃ, ubhayantato paṭṭhāya majjhaṃ, majjhato paṭṭhāya ubho ante pāpento tikkhattuṃ dvādasapadaṃ paccayākāraṃ sammasi. Tassevaṃ sammasantassa paccayākāro vibhūto hutvā uttānakuttānako viya upaṭṭhāsi. Tato cintesi – ‘‘ayaṃ paccayākāro sabbabuddhehi gambhīro ceva gambhīrāvabhāso cāti kathito, mayhaṃ kho pana padesañāṇe ṭhitassa sāvakassa sato uttāno viya vibhūto pākaṭo hutvā upaṭṭhāti, mayhaṃyeva nu kho esa uttānako viya upaṭṭhāti, udāhu aññesampīti attano upaṭṭhānakāraṇaṃ satthu ārocessāmī’’ti nisinnaṭṭhānato uṭṭhāya cammakkhaṇḍaṃ papphoṭetvā ādāya sāyanhasamaye bhagavantaṃ upasaṅkami. Tena vuttaṃ – ‘‘sāyanhavelāyaṃ paccayākārapañhaṃ pucchanakāraṇena upasaṅkamanto’’ti.
যাৰ গম্ভীরোতি এত্থ যাৰসদ্দো পমাণাতিক্কমে। অতিক্কম্ম পমাণং গম্ভীরো, অতিগম্ভীরোতি অত্থো। গম্ভীরাৰভাসোতি গম্ভীরোৰ হুত্ৰা অৰভাসতি, দিস্সতীতি অত্থো। একঞ্হি উত্তানমেৰ গম্ভীরাৰভাসং হোতি পূতিপণ্ণরসৰসেন কাল়ৰণ্ণং পুরাণউদকং ৰিয। তঞ্হি জাণুপ্পমাণম্পি সতপোরিসং ৰিয দিস্সতি। একং গম্ভীরং উত্তানাৰভাসং হোতি মণিভাসং ৰিপ্পসন্নউদকং ৰিয। তঞ্হি সতপোরিসম্পি জাণুপ্পমাণং ৰিয খাযতি। একং উত্তানং উত্তানাৰভাসং হোতি পাতিআদীসু উদকং ৰিয। একং গম্ভীরং গম্ভীরাৰভাসং হোতি সিনেরুপাদকমহাসমুদ্দে উদকং ৰিয। এৰং উদকমেৰ চত্তারি নামানি লভতি। পটিচ্চসমুপ্পাদে পনেতং নত্থি। অযঞ্হি গম্ভীরো চ গম্ভীরাৰভাসো চাতি একমেৰ নামং লভতি । এৰরূপো সমানোপি অথ চ পন মে উত্তানকুত্তানকো ৰিয খাযতি, তদিদং অচ্ছরিযং, ভন্তে, অব্ভুতং, ভন্তেতি এৰং অত্তনো ৰিম্হযং পকাসেন্তো পঞ্হং পুচ্ছিত্ৰা তুণ্হীভূতো নিসীদি।
Yāva gambhīroti ettha yāvasaddo pamāṇātikkame. Atikkamma pamāṇaṃ gambhīro, atigambhīroti attho. Gambhīrāvabhāsoti gambhīrova hutvā avabhāsati, dissatīti attho. Ekañhi uttānameva gambhīrāvabhāsaṃ hoti pūtipaṇṇarasavasena kāḷavaṇṇaṃ purāṇaudakaṃ viya. Tañhi jāṇuppamāṇampi sataporisaṃ viya dissati. Ekaṃ gambhīraṃ uttānāvabhāsaṃ hoti maṇibhāsaṃ vippasannaudakaṃ viya. Tañhi sataporisampi jāṇuppamāṇaṃ viya khāyati. Ekaṃ uttānaṃ uttānāvabhāsaṃ hoti pātiādīsu udakaṃ viya. Ekaṃ gambhīraṃ gambhīrāvabhāsaṃ hoti sinerupādakamahāsamudde udakaṃ viya. Evaṃ udakameva cattāri nāmāni labhati. Paṭiccasamuppāde panetaṃ natthi. Ayañhi gambhīro ca gambhīrāvabhāso cāti ekameva nāmaṃ labhati . Evarūpo samānopi atha ca pana me uttānakuttānako viya khāyati, tadidaṃ acchariyaṃ, bhante, abbhutaṃ, bhanteti evaṃ attano vimhayaṃ pakāsento pañhaṃ pucchitvā tuṇhībhūto nisīdi.
ভগৰা তস্স ৰচনং সুত্ৰা ‘‘আনন্দো ভৰগ্গগহণায হত্থং পসারেন্তো ৰিয সিনেরুং ভিন্দিত্ৰা মিঞ্জং নীহরিতুং ৰাযমমানো ৰিয ৰিনা নাৰায মহাসমুদ্দং তরিতুকামো ৰিয পথৰিং পরিৰত্তেত্ৰা পথৰোজং গহেতুং ৰাযমমানো ৰিয বুদ্ধৰিসযং পঞ্হং অত্তনো উত্তানুত্তানন্তি ৰদতি, হন্দস্স গম্ভীরভাৰং আচিক্খামী’’তি চিন্তেত্ৰা মা হেৰন্তিআদিমাহ।
Bhagavā tassa vacanaṃ sutvā ‘‘ānando bhavaggagahaṇāya hatthaṃ pasārento viya sineruṃ bhinditvā miñjaṃ nīharituṃ vāyamamāno viya vinā nāvāya mahāsamuddaṃ taritukāmo viya pathaviṃ parivattetvā pathavojaṃ gahetuṃ vāyamamāno viya buddhavisayaṃ pañhaṃ attano uttānuttānanti vadati, handassa gambhīrabhāvaṃ ācikkhāmī’’ti cintetvā mā hevantiādimāha.
তত্থ মা হেৰন্তি হ-কারো নিপাতমত্তং, এৰং মা ভণীতি অত্থো। ‘‘মা হেৰ’’ন্তি চ ইদং ৰচনং ভগৰা আযস্মন্তং আনন্দং উস্সাদেন্তোপি ভণতি অপসাদেন্তোপি। তত্থ উস্সাদেন্তোপীতি, আনন্দ, ত্ৰং মহাপঞ্ঞো ৰিসদঞাণো, তেন তে গম্ভীরোপি পটিচ্চসমুপ্পাদো উত্তানকো ৰিয খাযতি, অঞ্ঞেসং পনেস উত্তানকোতি ন সল্লক্খেতব্বো, গম্ভীরোযেৰ চ সো গম্ভীরাৰভাসো চ।
Tattha mā hevanti ha-kāro nipātamattaṃ, evaṃ mā bhaṇīti attho. ‘‘Mā heva’’nti ca idaṃ vacanaṃ bhagavā āyasmantaṃ ānandaṃ ussādentopi bhaṇati apasādentopi. Tattha ussādentopīti, ānanda, tvaṃ mahāpañño visadañāṇo, tena te gambhīropi paṭiccasamuppādo uttānako viya khāyati, aññesaṃ panesa uttānakoti na sallakkhetabbo, gambhīroyeva ca so gambhīrāvabhāso ca.
তত্থ চতস্সো উপমা ৰদন্তি – ছ মাসে সুভোজনরসপুট্ঠস্স কির কতযোগস্স মহামল্লস্স সমজ্জসমযে কতমল্লপাসাণপরিচযস্স যুদ্ধভূমিং গচ্ছন্তস্স অন্তরা মল্লপাসাণং দস্সেসুং। সো ‘‘কিং এত’’ন্তি আহ। মল্লপাসাণোতি। আহরথ নন্তি। ‘‘উক্খিপিতুং ন সক্কোমা’’তি ৰুত্তে সযং গন্ত্ৰা ‘‘কুহিং ইমস্স ভারিযট্ঠান’’ন্তি ৰত্ৰা দ্ৰীহি হত্থেহি দ্ৰে পাসাণে উক্খিপিত্ৰা কীল়াগুল়ে ৰিয খিপিত্ৰা অগমাসি। তত্থ মল্লস্স মল্লপাসাণো লহুকোতি ন অঞ্ঞেসম্পি লহুকোতি ৰত্তব্বো। ছ মাসে সুভোজনরসপুট্ঠো মল্লো ৰিয হি কপ্পসতসহস্সং অভিনীহারসম্পন্নো আযস্মা আনন্দো। যথা মল্লস্স মহাবলতায মল্লপাসাণো লহুকো, এৰং থেরস্স মহাপঞ্ঞতায পটিচ্চসমুপ্পাদো উত্তানোতি ৰত্তব্বো, সো অঞ্ঞেসং উত্তানোতি ন ৰত্তব্বো।
Tattha catasso upamā vadanti – cha māse subhojanarasapuṭṭhassa kira katayogassa mahāmallassa samajjasamaye katamallapāsāṇaparicayassa yuddhabhūmiṃ gacchantassa antarā mallapāsāṇaṃ dassesuṃ. So ‘‘kiṃ eta’’nti āha. Mallapāsāṇoti. Āharatha nanti. ‘‘Ukkhipituṃ na sakkomā’’ti vutte sayaṃ gantvā ‘‘kuhiṃ imassa bhāriyaṭṭhāna’’nti vatvā dvīhi hatthehi dve pāsāṇe ukkhipitvā kīḷāguḷe viya khipitvā agamāsi. Tattha mallassa mallapāsāṇo lahukoti na aññesampi lahukoti vattabbo. Cha māse subhojanarasapuṭṭho mallo viya hi kappasatasahassaṃ abhinīhārasampanno āyasmā ānando. Yathā mallassa mahābalatāya mallapāsāṇo lahuko, evaṃ therassa mahāpaññatāya paṭiccasamuppādo uttānoti vattabbo, so aññesaṃ uttānoti na vattabbo.
মহাসমুদ্দে চ তিমি নাম মহামচ্ছো দ্ৰিযোজনসতিকো, তিমিঙ্গলো তিযোজনসতিকো, তিমিরপিঙ্গলো পঞ্চযোজনসতিকো, আনন্দো তিমিনন্দো অজ্ঝারোহো মহাতিমীতি ইমে চত্তারো যোজনসহস্সিকা। তত্থ তিমিরপিঙ্গলেনেৰ দীপেন্তি। তস্স কির দক্খিণকণ্ণং চালেন্তস্স পঞ্চযোজনসতে পদেসে উদকং চলতি, তথা ৰামকণ্ণং, তথা নঙ্গুট্ঠং, তথা সীসং। দ্ৰে পন কণ্ণে চালেত্ৰা নঙ্গুট্ঠেন পহরিত্ৰা সীসং অপরাপরং কত্ৰা কীল়িতুং আরদ্ধস্স সত্তট্ঠযোজনসতে ঠানে ভাজনে পক্খিপিত্ৰা উদ্ধনে আরোপিতং ৰিয উদকং পক্কুথতি। যোজনসতমত্তে পদেসে উদকং পিট্ঠিং ছাদেতুং ন সক্কোতি। সো এৰং ৰদেয্য – ‘‘অযং মহাসমুদ্দো গম্ভীরোতি ৰদন্তি, কুতস্স গম্ভীরতা, মযং পিট্ঠিমত্তচ্ছাদনম্পি উদকং ন লভামা’’তি। তত্থ কাযূপপন্নস্স তিমিরপিঙ্গলস্স মহাসমুদ্দো উত্তানোতি অঞ্ঞেসঞ্চ খুদ্দকমচ্ছানং উত্তানোতি ন ৰত্তব্বো, এৰমেৰ ঞাণূপপন্নস্স থেরস্স পটিচ্চসমুপ্পাদো উত্তানোতি অঞ্ঞেসম্পি উত্তানোতি ন ৰত্তব্বো। সুপণ্ণরাজা চ দিযড্ঢযোজনসতিকো হোতি। তস্স দক্খিণপক্খো পঞ্ঞাসযোজনিকো হোতি, তথা ৰামপক্খো, পিঞ্ছৰট্টি চ সট্ঠিযোজনিকা, গীৰা তিংসযোজনিকা, মুখং নৰযোজনং, পাদা দ্ৰাদসযোজনিকা, তস্মিং সুপণ্ণৰাতং দস্সেতুং আরদ্ধে সত্তট্ঠযোজনসতং ঠানং নপ্পহোতি। সো এৰং ৰদেয্য – ‘‘অযং আকাসো অনন্তোতি ৰদন্তি, কুতস্স অনন্ততা, মযং পক্খৰাতপ্পত্থরণোকাসম্পি ন লভামা’’তি। তত্থ কাযূপপন্নস্স সুপণ্ণরঞ্ঞো আকাসো পরিত্তোতি অঞ্ঞেসঞ্চ খুদ্দকপক্খীনং পরিত্তোতি ন ৰত্তব্বো, এৰমেৰ ঞাণূপপন্নস্স থেরস্স পটিচ্চসমুপ্পাদো উত্তানোতি অঞ্ঞেসম্পি উত্তানোতি ন ৰত্তব্বো।
Mahāsamudde ca timi nāma mahāmaccho dviyojanasatiko, timiṅgalo tiyojanasatiko, timirapiṅgalo pañcayojanasatiko, ānando timinando ajjhāroho mahātimīti ime cattāro yojanasahassikā. Tattha timirapiṅgaleneva dīpenti. Tassa kira dakkhiṇakaṇṇaṃ cālentassa pañcayojanasate padese udakaṃ calati, tathā vāmakaṇṇaṃ, tathā naṅguṭṭhaṃ, tathā sīsaṃ. Dve pana kaṇṇe cāletvā naṅguṭṭhena paharitvā sīsaṃ aparāparaṃ katvā kīḷituṃ āraddhassa sattaṭṭhayojanasate ṭhāne bhājane pakkhipitvā uddhane āropitaṃ viya udakaṃ pakkuthati. Yojanasatamatte padese udakaṃ piṭṭhiṃ chādetuṃ na sakkoti. So evaṃ vadeyya – ‘‘ayaṃ mahāsamuddo gambhīroti vadanti, kutassa gambhīratā, mayaṃ piṭṭhimattacchādanampi udakaṃ na labhāmā’’ti. Tattha kāyūpapannassa timirapiṅgalassa mahāsamuddo uttānoti aññesañca khuddakamacchānaṃ uttānoti na vattabbo, evameva ñāṇūpapannassa therassa paṭiccasamuppādo uttānoti aññesampi uttānoti na vattabbo. Supaṇṇarājā ca diyaḍḍhayojanasatiko hoti. Tassa dakkhiṇapakkho paññāsayojaniko hoti, tathā vāmapakkho, piñchavaṭṭi ca saṭṭhiyojanikā, gīvā tiṃsayojanikā, mukhaṃ navayojanaṃ, pādā dvādasayojanikā, tasmiṃ supaṇṇavātaṃ dassetuṃ āraddhe sattaṭṭhayojanasataṃ ṭhānaṃ nappahoti. So evaṃ vadeyya – ‘‘ayaṃ ākāso anantoti vadanti, kutassa anantatā, mayaṃ pakkhavātappattharaṇokāsampi na labhāmā’’ti. Tattha kāyūpapannassa supaṇṇarañño ākāso parittoti aññesañca khuddakapakkhīnaṃ parittoti na vattabbo, evameva ñāṇūpapannassa therassa paṭiccasamuppādo uttānoti aññesampi uttānoti na vattabbo.
রাহু অসুরিন্দো পন পাদন্ততো যাৰ কেসন্তা যোজনানং চত্তারি সহস্সানি অট্ঠ চ সতানি হোন্তি। তস্স দ্ৰিন্নং বাহানং অন্তরে দ্ৰাদসযোজনসতিকং, বহলত্তেন ছযোজনসতিকং, হত্থপাদতলানি তিযোজনসতিকানি, তথা মুখং, একঙ্গুলিপব্বং পঞ্ঞাসযোজনং, তথা ভমুকন্তরং, নলাটং তিযোজনসতিকং, সীসং নৰযোজনসতিকং। তস্স মহাসমুদ্দং ওতিণ্ণস্স গম্ভীরং উদকং জাণুপ্পমাণং হোতি। সো এৰং ৰদেয্য – ‘‘অযং মহাসমুদ্দো গম্ভীরোতি ৰদন্তি। কুতস্স গম্ভীরতা? মযং জাণুপ্পটিচ্ছাদনমত্তম্পি উদকং ন লভামা’’তি। তত্থ কাযূপপন্নস্স রাহুনো মহাসমুদ্দো উত্তানোতি অঞ্ঞেসঞ্চ উত্তানোতি ন ৰত্তব্বো। এৰমেৰ ঞাণূপপন্নস্স থেরস্স পটিচ্চসমুপ্পাদো উত্তানোতি অঞ্ঞেসম্পি উত্তানোতি ন ৰত্তব্বো। এতমত্থং সন্ধায ভগৰা মা হেৰং, আনন্দ, মা হেৰং, আনন্দাতি আহ।
Rāhu asurindo pana pādantato yāva kesantā yojanānaṃ cattāri sahassāni aṭṭha ca satāni honti. Tassa dvinnaṃ bāhānaṃ antare dvādasayojanasatikaṃ, bahalattena chayojanasatikaṃ, hatthapādatalāni tiyojanasatikāni, tathā mukhaṃ, ekaṅgulipabbaṃ paññāsayojanaṃ, tathā bhamukantaraṃ, nalāṭaṃ tiyojanasatikaṃ, sīsaṃ navayojanasatikaṃ. Tassa mahāsamuddaṃ otiṇṇassa gambhīraṃ udakaṃ jāṇuppamāṇaṃ hoti. So evaṃ vadeyya – ‘‘ayaṃ mahāsamuddo gambhīroti vadanti. Kutassa gambhīratā? Mayaṃ jāṇuppaṭicchādanamattampi udakaṃ na labhāmā’’ti. Tattha kāyūpapannassa rāhuno mahāsamuddo uttānoti aññesañca uttānoti na vattabbo. Evameva ñāṇūpapannassa therassa paṭiccasamuppādo uttānoti aññesampi uttānoti na vattabbo. Etamatthaṃ sandhāya bhagavā mā hevaṃ, ānanda, mā hevaṃ, ānandāti āha.
থেরস্স হি চতূহি কারণেহি গম্ভীরো পটিচ্চসমুপ্পাদো উত্তানোতি উপট্ঠাসি। কতমেহি চতূহি? পুব্বূপনিস্সযসম্পত্তিযা তিত্থৰাসেন সোতাপন্নতায বহুস্সুতভাৰেনাতি।
Therassa hi catūhi kāraṇehi gambhīro paṭiccasamuppādo uttānoti upaṭṭhāsi. Katamehi catūhi? Pubbūpanissayasampattiyā titthavāsena sotāpannatāya bahussutabhāvenāti.
ইতো কির সতসহস্সিমে কপ্পে পদুমুত্তরো নাম সত্থা লোকে উপ্পজ্জি। তস্স হংসৰতী নাম নগরং অহোসি, আনন্দো নাম রাজা পিতা, সুমেধা নাম দেৰী মাতা, বোধিসত্তো উত্তরকুমারো নাম অহোসি। সো পুত্তস্স জাতদিৰসে মহাভিনিক্খমনং নিক্খম্ম পব্বজিত্ৰা পধানমনুযুত্তো অনুক্কমেন সব্বঞ্ঞুতং পত্ৰা, ‘‘অনেকজাতিসংসার’’ন্তি উদানং উদানেত্ৰা সত্তাহং বোধিপল্লঙ্কে ৰীতিনামেত্ৰা ‘‘পথৰিযং পাদং ঠপেস্সামী’’তি পাদং অভিনীহরি। অথ পথৰিং ভিন্দিত্ৰা মহন্তং পদুমং উট্ঠাসি। তস্স ধুরপত্তানি নৰুতিহত্থানি, কেসরং তিংসহত্থং, কণ্ণিকা দ্ৰাদসহত্থা, নৰঘটপ্পমাণা রেণু অহোসি।
Ito kira satasahassime kappe padumuttaro nāma satthā loke uppajji. Tassa haṃsavatī nāma nagaraṃ ahosi, ānando nāma rājā pitā, sumedhā nāma devī mātā, bodhisatto uttarakumāro nāma ahosi. So puttassa jātadivase mahābhinikkhamanaṃ nikkhamma pabbajitvā padhānamanuyutto anukkamena sabbaññutaṃ patvā, ‘‘anekajātisaṃsāra’’nti udānaṃ udānetvā sattāhaṃ bodhipallaṅke vītināmetvā ‘‘pathaviyaṃ pādaṃ ṭhapessāmī’’ti pādaṃ abhinīhari. Atha pathaviṃ bhinditvā mahantaṃ padumaṃ uṭṭhāsi. Tassa dhurapattāni navutihatthāni, kesaraṃ tiṃsahatthaṃ, kaṇṇikā dvādasahatthā, navaghaṭappamāṇā reṇu ahosi.
সত্থা পন উব্বেধতো অট্ঠপঞ্ঞাসহত্থো অহোসি, তস্স উভিন্নং বাহানমন্তরং অট্ঠারসহত্থং, নলাটং পঞ্চহত্থং, হত্থপাদা একাদসহত্থা। তস্স একাদসহত্থেন পাদেন দ্ৰাদসহত্থায কণ্ণিকায অক্কন্তমত্তায নৰঘটপ্পমাণা রেণু উট্ঠায অট্ঠপঞ্ঞাসহত্থং পদেসং উগ্গন্ত্ৰা ওকিণ্ণমনোসিলাচুণ্ণং ৰিয পচ্চোকিণ্ণং। তদুপাদায ভগৰা ‘‘পদুমুত্তরো’’ত্ৰেৰ পঞ্ঞাযিত্থ। তস্স দেৰিলো চ সুজাতো চ দ্ৰে অগ্গসাৰকা অহেসুং, অমিতা চ অসমা চ দ্ৰে অগ্গসাৰিকা, সুমনো নাম উপট্ঠাকো। পদুমুত্তরো ভগৰা পিতুসঙ্গহং কুরুমানো ভিক্খুসতসহস্সপরিৰারো হংসৰতিযা রাজধানিযা ৰসতি।
Satthā pana ubbedhato aṭṭhapaññāsahattho ahosi, tassa ubhinnaṃ bāhānamantaraṃ aṭṭhārasahatthaṃ, nalāṭaṃ pañcahatthaṃ, hatthapādā ekādasahatthā. Tassa ekādasahatthena pādena dvādasahatthāya kaṇṇikāya akkantamattāya navaghaṭappamāṇā reṇu uṭṭhāya aṭṭhapaññāsahatthaṃ padesaṃ uggantvā okiṇṇamanosilācuṇṇaṃ viya paccokiṇṇaṃ. Tadupādāya bhagavā ‘‘padumuttaro’’tveva paññāyittha. Tassa devilo ca sujāto ca dve aggasāvakā ahesuṃ, amitā ca asamā ca dve aggasāvikā, sumano nāma upaṭṭhāko. Padumuttaro bhagavā pitusaṅgahaṃ kurumāno bhikkhusatasahassaparivāro haṃsavatiyā rājadhāniyā vasati.
কনিট্ঠভাতা পনস্স সুমনকুমারো নাম। তস্স রাজা হংসৰতিতো ৰীসযোজনসতে ভোগং অদাসি। সো কদাচি আগন্ত্ৰা পিতরঞ্চ সত্থারঞ্চ পস্সতি। অথেকদিৰসং পচ্চন্তো কুপিতো। সুমনো রঞ্ঞো সাসনং পেসেসি। রাজা ‘‘ত্ৰং মযা, তাত, কস্মা ঠপিতো’’তি পটিপেসেসি। সো চোরে ৰূপসমেত্ৰা ‘‘উপসন্তো, দেৰ, জনপদো’’তি রঞ্ঞো পেসেসি। রাজা তুট্ঠো ‘‘সীঘং মম পুত্তো আগচ্ছতূ’’তি আহ। তস্স সহস্সমত্তা অমচ্চা হোন্তি। সো তেহি সদ্ধিং অন্তরামগ্গে মন্তেসি – ‘‘ময্হং পিতা তুট্ঠো সচে মে ৰরং দেতি, কিং গণ্হামী’’তি? অথ নং একচ্চে ‘‘হত্থিং গণ্হথ, অস্সং গণ্হথ, জনপদং গণ্হথ, সত্তরতনানি গণ্হথা’’তি আহংসু। অপরে ‘‘তুম্হে পথৰিস্সরস্স পুত্তা, ন তুম্হাকং ধনং দুল্লভং, লদ্ধম্পি চেতং সব্বং পহায গমনীযং, পুঞ্ঞমেৰ একং আদায গমনীযং, তস্মা দেৰে ৰরং দদমানে তেমাসং পদুমুত্তরং ভগৰন্তং উপট্ঠাতুং ৰরং গণ্হথা’’তি। সো ‘‘তুম্হে ময্হং কল্যাণমিত্তা নাম, মমেতং চিত্তং নত্থি, তুম্হেহি পন উপ্পাদিতং, এৰং করিস্সামী’’তি, গন্ত্ৰা পিতরং ৰন্দিত্ৰা পিতরা আলিঙ্গেত্ৰা, মত্থকে চুম্বিত্ৰা ‘‘ৰরং তে, পুত্ত, দেমী’’তি ৰুত্তে ‘‘ইচ্ছামহং, মহারাজ, ভগৰন্তং তেমাসং চতূহি পচ্চযেহি উপট্ঠহন্তো জীৰিতং অৰঞ্ঝং কাতুং, ইদং মে ৰরং দেহী’’তি আহ। ন সক্কা, তাত, অঞ্ঞং ৰরেহীতি। দেৰ, খত্তিযানং নাম দ্ৰেকথা নত্থি, এতমেৰ মে দেহি, ন মমঞ্ঞেন অত্থোতি। তাত, বুদ্ধানং নাম চিত্তং দুজ্জানং, সচে ভগৰা ন ইচ্ছিস্সতি, মযা দিন্নম্পি কিং ভৰিস্সতীতি? ‘‘সাধু, দেৰ, অহং ভগৰতো চিত্তং জানিস্সামী’’তি ৰিহারং গতো।
Kaniṭṭhabhātā panassa sumanakumāro nāma. Tassa rājā haṃsavatito vīsayojanasate bhogaṃ adāsi. So kadāci āgantvā pitarañca satthārañca passati. Athekadivasaṃ paccanto kupito. Sumano rañño sāsanaṃ pesesi. Rājā ‘‘tvaṃ mayā, tāta, kasmā ṭhapito’’ti paṭipesesi. So core vūpasametvā ‘‘upasanto, deva, janapado’’ti rañño pesesi. Rājā tuṭṭho ‘‘sīghaṃ mama putto āgacchatū’’ti āha. Tassa sahassamattā amaccā honti. So tehi saddhiṃ antarāmagge mantesi – ‘‘mayhaṃ pitā tuṭṭho sace me varaṃ deti, kiṃ gaṇhāmī’’ti? Atha naṃ ekacce ‘‘hatthiṃ gaṇhatha, assaṃ gaṇhatha, janapadaṃ gaṇhatha, sattaratanāni gaṇhathā’’ti āhaṃsu. Apare ‘‘tumhe pathavissarassa puttā, na tumhākaṃ dhanaṃ dullabhaṃ, laddhampi cetaṃ sabbaṃ pahāya gamanīyaṃ, puññameva ekaṃ ādāya gamanīyaṃ, tasmā deve varaṃ dadamāne temāsaṃ padumuttaraṃ bhagavantaṃ upaṭṭhātuṃ varaṃ gaṇhathā’’ti. So ‘‘tumhe mayhaṃ kalyāṇamittā nāma, mametaṃ cittaṃ natthi, tumhehi pana uppāditaṃ, evaṃ karissāmī’’ti, gantvā pitaraṃ vanditvā pitarā āliṅgetvā, matthake cumbitvā ‘‘varaṃ te, putta, demī’’ti vutte ‘‘icchāmahaṃ, mahārāja, bhagavantaṃ temāsaṃ catūhi paccayehi upaṭṭhahanto jīvitaṃ avañjhaṃ kātuṃ, idaṃ me varaṃ dehī’’ti āha. Na sakkā, tāta, aññaṃ varehīti. Deva, khattiyānaṃ nāma dvekathā natthi, etameva me dehi, na mamaññena atthoti. Tāta, buddhānaṃ nāma cittaṃ dujjānaṃ, sace bhagavā na icchissati, mayā dinnampi kiṃ bhavissatīti? ‘‘Sādhu, deva, ahaṃ bhagavato cittaṃ jānissāmī’’ti vihāraṃ gato.
তেন চ সমযেন ভত্তকিচ্চং নিট্ঠাপেত্ৰা ভগৰা গন্ধকুটিং পৰিট্ঠো হোতি। সো মণ্ডলমাল়ে সন্নিসিন্নানং ভিক্খূনং সন্তিকং অগমাসি। তে নং আহংসু – ‘‘রাজপুত্ত কস্মা আগতোসী’’তি? ভগৰন্তং দস্সনায, দস্সেথ মে ভগৰন্তন্তি। ‘‘ন মযং, রাজপুত্ত, ইচ্ছিতিচ্ছিতক্খণে সত্থারং দট্ঠুং লভামা’’তি। কো পন, ভন্তে, লভতীতি? সুমনত্থেরো নাম রাজপুত্তাতি। সো ‘‘কুহিং ভন্তে থেরো’’তি? থেরস্স নিসিন্নট্ঠানং পুচ্ছিত্ৰা গন্ত্ৰা ৰন্দিত্ৰা – ‘‘ইচ্ছামহং, ভন্তে, ভগৰন্তং পস্সিতুং, দস্সেথ মে ভগৰন্ত’’ন্তি আহ। থেরো ‘‘এহি, রাজপুত্তা’’তি তং গহেত্ৰা গন্ধকুটিপরিৰেণে ঠপেত্ৰা গন্ধকুটিং আরুহি। অথ নং ভগৰা ‘‘সুমন, কস্মা আগতোসী’’তি আহ। রাজপুত্তো, ভন্তে, ভগৰন্তং দস্সনায আগতোতি। তেন হি ভিক্খু আসনং পঞ্ঞপেহীতি। থেরো আসনং পঞ্ঞপেসি। নিসীদি ভগৰা পঞ্ঞত্তে আসনে। রাজপুত্তো ভগৰন্তং ৰন্দিত্ৰা পটিসন্থারং অকাসি, ‘‘কদা আগতোসি রাজপুত্তা’’তি? ভন্তে, তুম্হেসু গন্ধকুটিং পৰিট্ঠেসু, ভিক্খূ পন ‘‘ন মযং ইচ্ছিতিচ্ছিতক্খণে ভগৰন্তং দট্ঠুং লভামা’’তি মং থেরস্স সন্তিকং পাহেসুং, থেরো পন একৰচনেনেৰ দস্সেসি, থেরো, ভন্তে, তুম্হাকং সাসনে ৰল্লভো মঞ্ঞেতি। আম, রাজকুমার, ৰল্লভো এস ভিক্খু ময্হং সাসনেতি। ভন্তে, বুদ্ধানং সাসনে কিং কত্ৰা ৰল্লভো হোতীতি? দানং দত্ৰা সীলং সমাদিযিত্ৰা উপোসথকম্মং কত্ৰা, কুমারাতি। ভগৰা অহম্পি থেরো ৰিয বুদ্ধসাসনে ৰল্লভো হোতুকামো, তেমাসং মে ৰস্সাৰাসং অধিৰাসেথাতি। ভগৰা, ‘‘অত্থি নু খো গতেন অত্থো’’তি ওলোকেত্ৰা ‘‘অত্থী’’তি দিস্ৰা ‘‘সুঞ্ঞাগারে খো, রাজকুমার, তথাগতা অভিরমন্তী’’তি আহ। কুমারো ‘‘অঞ্ঞাতং ভগৰা, অঞ্ঞাতং সুগতা’’তি ৰত্ৰা – ‘‘অহং, ভন্তে, পুরিমতরং গন্ত্ৰা ৰিহারং কারেমি, মযা পেসিতে ভিক্খুসতসহস্সেন সদ্ধিং আগচ্ছথা’’তি পটিঞ্ঞং গহেত্ৰা পিতু সন্তিকং গন্ত্ৰা, ‘‘দিন্না মে, দেৰ, ভগৰতা পটিঞ্ঞা, মযা পহিতে তুম্হে ভগৰন্তং পেসেয্যাথা’’তি পিতরং ৰন্দিত্ৰা নিক্খমিত্ৰা যোজনে যোজনে ৰিহারং কারেত্ৰা ৰীসযোজনসতং অদ্ধানং গতো। গন্ত্ৰা অত্তনো নগরে ৰিহারট্ঠানং ৰিচিনন্তো সোভনস্স নাম কুটুম্বিকস্স উয্যানং দিস্ৰা সতসহস্সেন কিণিত্ৰা সতসহস্সং ৰিস্সজ্জেত্ৰা ৰিহারং কারেসি। তত্থ ভগৰতো গন্ধকুটিং, সেসভিক্খূনঞ্চ রত্তিট্ঠানদিৰাট্ঠানত্থায কুটিলেণমণ্ডপে কারাপেত্ৰা পাকারপরিক্খেপং দ্ৰারকোট্ঠকঞ্চ নিট্ঠাপেত্ৰা পিতু সন্তিকং পেসেসি ‘‘নিট্ঠিতং ময্হং কিচ্চং, সত্থারং পহিণথা’’তি।
Tena ca samayena bhattakiccaṃ niṭṭhāpetvā bhagavā gandhakuṭiṃ paviṭṭho hoti. So maṇḍalamāḷe sannisinnānaṃ bhikkhūnaṃ santikaṃ agamāsi. Te naṃ āhaṃsu – ‘‘rājaputta kasmā āgatosī’’ti? Bhagavantaṃ dassanāya, dassetha me bhagavantanti. ‘‘Na mayaṃ, rājaputta, icchiticchitakkhaṇe satthāraṃ daṭṭhuṃ labhāmā’’ti. Ko pana, bhante, labhatīti? Sumanatthero nāma rājaputtāti. So ‘‘kuhiṃ bhante thero’’ti? Therassa nisinnaṭṭhānaṃ pucchitvā gantvā vanditvā – ‘‘icchāmahaṃ, bhante, bhagavantaṃ passituṃ, dassetha me bhagavanta’’nti āha. Thero ‘‘ehi, rājaputtā’’ti taṃ gahetvā gandhakuṭipariveṇe ṭhapetvā gandhakuṭiṃ āruhi. Atha naṃ bhagavā ‘‘sumana, kasmā āgatosī’’ti āha. Rājaputto, bhante, bhagavantaṃ dassanāya āgatoti. Tena hi bhikkhu āsanaṃ paññapehīti. Thero āsanaṃ paññapesi. Nisīdi bhagavā paññatte āsane. Rājaputto bhagavantaṃ vanditvā paṭisanthāraṃ akāsi, ‘‘kadā āgatosi rājaputtā’’ti? Bhante, tumhesu gandhakuṭiṃ paviṭṭhesu, bhikkhū pana ‘‘na mayaṃ icchiticchitakkhaṇe bhagavantaṃ daṭṭhuṃ labhāmā’’ti maṃ therassa santikaṃ pāhesuṃ, thero pana ekavacaneneva dassesi, thero, bhante, tumhākaṃ sāsane vallabho maññeti. Āma, rājakumāra, vallabho esa bhikkhu mayhaṃ sāsaneti. Bhante, buddhānaṃ sāsane kiṃ katvā vallabho hotīti? Dānaṃ datvā sīlaṃ samādiyitvā uposathakammaṃ katvā, kumārāti. Bhagavā ahampi thero viya buddhasāsane vallabho hotukāmo, temāsaṃ me vassāvāsaṃ adhivāsethāti. Bhagavā, ‘‘atthi nu kho gatena attho’’ti oloketvā ‘‘atthī’’ti disvā ‘‘suññāgāre kho, rājakumāra, tathāgatā abhiramantī’’ti āha. Kumāro ‘‘aññātaṃ bhagavā, aññātaṃ sugatā’’ti vatvā – ‘‘ahaṃ, bhante, purimataraṃ gantvā vihāraṃ kāremi, mayā pesite bhikkhusatasahassena saddhiṃ āgacchathā’’ti paṭiññaṃ gahetvā pitu santikaṃ gantvā, ‘‘dinnā me, deva, bhagavatā paṭiññā, mayā pahite tumhe bhagavantaṃ peseyyāthā’’ti pitaraṃ vanditvā nikkhamitvā yojane yojane vihāraṃ kāretvā vīsayojanasataṃ addhānaṃ gato. Gantvā attano nagare vihāraṭṭhānaṃ vicinanto sobhanassa nāma kuṭumbikassa uyyānaṃ disvā satasahassena kiṇitvā satasahassaṃ vissajjetvā vihāraṃ kāresi. Tattha bhagavato gandhakuṭiṃ, sesabhikkhūnañca rattiṭṭhānadivāṭṭhānatthāya kuṭileṇamaṇḍape kārāpetvā pākāraparikkhepaṃ dvārakoṭṭhakañca niṭṭhāpetvā pitu santikaṃ pesesi ‘‘niṭṭhitaṃ mayhaṃ kiccaṃ, satthāraṃ pahiṇathā’’ti.
রাজা ভগৰন্তং ভোজেত্ৰা ‘‘ভগৰা সুমনস্স কিচ্চং নিট্ঠিতং, তুম্হাকং আগমনং পচ্চাসীসতী’’তি। ভগৰা সতসহস্সভিক্খুপরিৰারো যোজনে যোজনে ৰিহারেসু ৰসমানো অগমাসি। কুমারো ‘‘সত্থা আগচ্ছতী’’তি সুত্ৰা যোজনং পচ্চুগ্গন্ত্ৰা গন্ধমালাদীহি পূজযমানো ৰিহারং পৰেসেত্ৰা –
Rājā bhagavantaṃ bhojetvā ‘‘bhagavā sumanassa kiccaṃ niṭṭhitaṃ, tumhākaṃ āgamanaṃ paccāsīsatī’’ti. Bhagavā satasahassabhikkhuparivāro yojane yojane vihāresu vasamāno agamāsi. Kumāro ‘‘satthā āgacchatī’’ti sutvā yojanaṃ paccuggantvā gandhamālādīhi pūjayamāno vihāraṃ pavesetvā –
‘‘সতসহস্সেন মে কীতং, সতসহস্সেন মাপিতং।
‘‘Satasahassena me kītaṃ, satasahassena māpitaṃ;
সোভনং নাম উয্যানং পটিগ্গণ্হ, মহামুনী’’তি॥ –
Sobhanaṃ nāma uyyānaṃ paṭiggaṇha, mahāmunī’’ti. –
ৰিহারং নিয্যাতেসি। সো ৰস্সূপনাযিকদিৰসে দানং দত্ৰা অত্তনো পুত্তদারে চ অমচ্চে চ পক্কোসাপেত্ৰা আহ –‘‘সত্থা অম্হাকং সন্তিকং দূরতো আগতো, বুদ্ধা চ নাম ধম্মগরুনোৰ, নামিসগরুকা। তস্মা অহং ইমং তেমাসং দ্ৰে সাটকে নিৰাসেত্ৰা দস সীলানি সমাদিযিত্ৰা ইধেৰ ৰসিস্সামি, তুম্হে খীণাসৰসতসহস্সস্স ইমিনাৰ নীহারেন তেমাসং দানং দদেয্যাথা’’তি।
Vihāraṃ niyyātesi. So vassūpanāyikadivase dānaṃ datvā attano puttadāre ca amacce ca pakkosāpetvā āha –‘‘satthā amhākaṃ santikaṃ dūrato āgato, buddhā ca nāma dhammagarunova, nāmisagarukā. Tasmā ahaṃ imaṃ temāsaṃ dve sāṭake nivāsetvā dasa sīlāni samādiyitvā idheva vasissāmi, tumhe khīṇāsavasatasahassassa imināva nīhārena temāsaṃ dānaṃ dadeyyāthā’’ti.
সো সুমনত্থেরস্স ৰসনট্ঠানসভাগেযেৰ ঠানে ৰসন্তো যং থেরো ভগৰতো ৰত্তং করোতি, তং সব্বং দিস্ৰা, ‘‘ইমস্মিং ঠানে একন্তৰল্লভো এস থেরো, এতস্সেৰ ঠানন্তরং পত্থেতুং ৰট্টতী’’তি চিন্তেত্ৰা, উপকট্ঠায পৰারণায গামং পৰিসিত্ৰা সত্তাহং মহাদানং দত্ৰা সত্তমে দিৰসে ভিক্খূসতসহস্সস্স পাদমূলে তিচীৰরং ঠপেত্ৰা ভগৰন্তং ৰন্দিত্ৰা, ‘‘ভন্তে, যদেতং মযা মগ্গে যোজনন্তরিকৰিহারকারাপনতো পট্ঠায পুঞ্ঞং কতং, তং নেৰ সক্কসম্পত্তিং, ন মারব্রহ্মসম্পত্তিং পত্থযন্তেন, বুদ্ধস্স পন উপট্ঠাকভাৰং পত্থেন্তেন কতং। তস্মা অহম্পি ভগৰা অনাগতে সুমনত্থেরো ৰিয একস্স বুদ্ধস্স উপট্ঠাকো হোমী’’তি পঞ্চপতিট্ঠিতেন পতিত্ৰা ৰন্দিত্ৰা নিপন্নো। ভগৰা ‘‘মহন্তং কুলপুত্তস্স চিত্তং, ইজ্ঝিস্সতি নু খো, নো’’তি ওলোকেন্তো , ‘‘অনাগতে ইতো সতসহস্সিমে কপ্পে গোতমো নাম বুদ্ধো উপ্পজ্জিস্সতি, তস্সেৰ উপট্ঠাকো ভৰিস্সতী’’তি ঞত্ৰা –
So sumanattherassa vasanaṭṭhānasabhāgeyeva ṭhāne vasanto yaṃ thero bhagavato vattaṃ karoti, taṃ sabbaṃ disvā, ‘‘imasmiṃ ṭhāne ekantavallabho esa thero, etasseva ṭhānantaraṃ patthetuṃ vaṭṭatī’’ti cintetvā, upakaṭṭhāya pavāraṇāya gāmaṃ pavisitvā sattāhaṃ mahādānaṃ datvā sattame divase bhikkhūsatasahassassa pādamūle ticīvaraṃ ṭhapetvā bhagavantaṃ vanditvā, ‘‘bhante, yadetaṃ mayā magge yojanantarikavihārakārāpanato paṭṭhāya puññaṃ kataṃ, taṃ neva sakkasampattiṃ, na mārabrahmasampattiṃ patthayantena, buddhassa pana upaṭṭhākabhāvaṃ patthentena kataṃ. Tasmā ahampi bhagavā anāgate sumanatthero viya ekassa buddhassa upaṭṭhāko homī’’ti pañcapatiṭṭhitena patitvā vanditvā nipanno. Bhagavā ‘‘mahantaṃ kulaputtassa cittaṃ, ijjhissati nu kho, no’’ti olokento , ‘‘anāgate ito satasahassime kappe gotamo nāma buddho uppajjissati, tasseva upaṭṭhāko bhavissatī’’ti ñatvā –
‘‘ইচ্ছিতং পত্থিতং তুয্হং, সব্বমেৰ সমিজ্ঝতু।
‘‘Icchitaṃ patthitaṃ tuyhaṃ, sabbameva samijjhatu;
সব্বে পূরেন্তু সঙ্কপ্পা, চন্দো পন্নরসো যথা’’তি॥ –
Sabbe pūrentu saṅkappā, cando pannaraso yathā’’ti. –
আহ। কুমারো সুত্ৰা ‘‘বুদ্ধা নাম অদ্ৰেজ্ঝকথা হোন্তী’’তি দুতিযদিৰসেযেৰ তস্স ভগৰতো পত্তচীৰরং গহেত্ৰা পিট্ঠিতো পিট্ঠিতো গচ্ছন্তো ৰিয অহোসি। সো তস্মিং বুদ্ধুপ্পাদে ৰস্সসতসহস্সং দানং দত্ৰা সগ্গে নিব্বত্তিত্ৰা কস্সপবুদ্ধকালেপি পিণ্ডায চরতো থেরস্স পত্তগ্গহণত্থং উত্তরিসাটকং দত্ৰা পূজং অকাসি। পুন সগ্গে নিব্বত্তিত্ৰা ততো চুতো বারাণসিরাজা হুত্ৰা অট্ঠন্নং পচ্চেকবুদ্ধানং পণ্ণসালাযো কারেত্ৰা মণিআধারকে উপট্ঠপেত্ৰা চতূহি পচ্চযেহি দসৰস্সসহস্সানি উপট্ঠানং অকাসি। এতানি পাকটট্ঠানানি।
Āha. Kumāro sutvā ‘‘buddhā nāma advejjhakathā hontī’’ti dutiyadivaseyeva tassa bhagavato pattacīvaraṃ gahetvā piṭṭhito piṭṭhito gacchanto viya ahosi. So tasmiṃ buddhuppāde vassasatasahassaṃ dānaṃ datvā sagge nibbattitvā kassapabuddhakālepi piṇḍāya carato therassa pattaggahaṇatthaṃ uttarisāṭakaṃ datvā pūjaṃ akāsi. Puna sagge nibbattitvā tato cuto bārāṇasirājā hutvā aṭṭhannaṃ paccekabuddhānaṃ paṇṇasālāyo kāretvā maṇiādhārake upaṭṭhapetvā catūhi paccayehi dasavassasahassāni upaṭṭhānaṃ akāsi. Etāni pākaṭaṭṭhānāni.
কপ্পসতসহস্সং পন দানং দদমানোৰ অম্হাকং বোধিসত্তেন সদ্ধিং তুসিতপুরে নিব্বত্তিত্ৰা ততো চুতো অমিতোদনসক্কস্স গেহে পটিসন্ধিং গহেত্ৰা অনুপুব্বেন কতাভিনিক্খমনো সম্মাসম্বোধিং পত্ৰা পঠমগমনেন কপিলৰত্থুং আগন্ত্ৰা ততো নিক্খমন্তে ভগৰতি ভগৰতো পরিৰারত্থং রাজকুমারেসু পব্বজন্তেসু ভদ্দিযাদীহি সদ্ধিং নিক্খমিত্ৰা ভগৰতো সন্তিকে পব্বজিত্ৰা নচিরস্সেৰ আযস্মতো পুণ্ণস্স মন্তাণিপুত্তস্স সন্তিকে ধম্মকথং সুত্ৰা সোতাপত্তিফলে পতিট্ঠহি। এৰমেস আযস্মা পুব্বূপনিস্সযসম্পন্নো, তস্সিমায পুব্বূপনিস্সযসম্পত্তিযা গম্ভীরোপি পটিচ্চসমুপ্পাদো উত্তানকো ৰিয উপট্ঠাসি।
Kappasatasahassaṃ pana dānaṃ dadamānova amhākaṃ bodhisattena saddhiṃ tusitapure nibbattitvā tato cuto amitodanasakkassa gehe paṭisandhiṃ gahetvā anupubbena katābhinikkhamano sammāsambodhiṃ patvā paṭhamagamanena kapilavatthuṃ āgantvā tato nikkhamante bhagavati bhagavato parivāratthaṃ rājakumāresu pabbajantesu bhaddiyādīhi saddhiṃ nikkhamitvā bhagavato santike pabbajitvā nacirasseva āyasmato puṇṇassa mantāṇiputtassa santike dhammakathaṃ sutvā sotāpattiphale patiṭṭhahi. Evamesa āyasmā pubbūpanissayasampanno, tassimāya pubbūpanissayasampattiyā gambhīropi paṭiccasamuppādo uttānako viya upaṭṭhāsi.
তিত্থৰাসোতি পন গরূনং সন্তিকে উগ্গহণসৰনপরিপুচ্ছনধারণানি ৰুচ্চন্তি। সো থেরস্স অতিৰিয পরিসুদ্ধো। তেনাপিস্সাযং গম্ভীরোপি উত্তানকো ৰিয উপট্ঠাসি। সোতাপন্নানঞ্চ নাম পচ্চযাকারো উত্তানকো হুত্ৰা উপট্ঠাতি, অযঞ্চ আযস্মা সোতাপন্নো। বহুস্সুতানং চতুহত্থে ওৰরকে পদীপে জলমানে মঞ্চপীঠং ৰিয নামরূপপরিচ্ছেদো পাকটো হোতি, অযঞ্চ আযস্মা বহুস্সুতানং অগ্গো। ইতি বাহুসচ্চভাৰেনপিস্স গম্ভীরোপি পচ্চযাকারো উত্তানকো ৰিয উপট্ঠাসি। পটিচ্চসমুপ্পাদো চতূহি গম্ভীরতাহি গম্ভীরো। সা পনস্স গম্ভীরতা ৰিসুদ্ধিমগ্গে ৰিত্থারিতাৰ। সা সব্বাপি থেরস্স উত্তানকা ৰিয উপট্ঠাসি। তেন ভগৰা আযস্মন্তং আনন্দং উস্সাদেন্তো মা হেৰন্তিআদিমাহ। অযঞ্হেত্থ অধিপ্পাযো – আনন্দ, ত্ৰং মহাপঞ্ঞো ৰিসদঞাণো, তেন তে গম্ভীরোপি পটিচ্চসমুপ্পাদো উত্তানকো ৰিয খাযতি। তস্মা ‘‘ময্হমেৰ নু খো এস উত্তানকো ৰিয হুত্ৰা উপট্ঠাতি, উদাহু অঞ্ঞেসম্পী’’তি মা এৰং অৰচ।
Titthavāsoti pana garūnaṃ santike uggahaṇasavanaparipucchanadhāraṇāni vuccanti. So therassa ativiya parisuddho. Tenāpissāyaṃ gambhīropi uttānako viya upaṭṭhāsi. Sotāpannānañca nāma paccayākāro uttānako hutvā upaṭṭhāti, ayañca āyasmā sotāpanno. Bahussutānaṃ catuhatthe ovarake padīpe jalamāne mañcapīṭhaṃ viya nāmarūpaparicchedo pākaṭo hoti, ayañca āyasmā bahussutānaṃ aggo. Iti bāhusaccabhāvenapissa gambhīropi paccayākāro uttānako viya upaṭṭhāsi. Paṭiccasamuppādo catūhi gambhīratāhi gambhīro. Sā panassa gambhīratā visuddhimagge vitthāritāva. Sā sabbāpi therassa uttānakā viya upaṭṭhāsi. Tena bhagavā āyasmantaṃ ānandaṃ ussādento mā hevantiādimāha. Ayañhettha adhippāyo – ānanda, tvaṃ mahāpañño visadañāṇo, tena te gambhīropi paṭiccasamuppādo uttānako viya khāyati. Tasmā ‘‘mayhameva nu kho esa uttānako viya hutvā upaṭṭhāti, udāhu aññesampī’’ti mā evaṃ avaca.
যং পন ৰুত্তং ‘‘অপসাদেন্তো’’তি, তত্থাযমধিপ্পাযো – আনন্দ, ‘‘অথ চ পন মে উত্তানকুত্তানকো ৰিয খাযতী’’তি মা হেৰং অৰচ। যদি হি তে এস উত্তানকুত্তানকো ৰিয খাযতি, কস্মা ত্ৰং অত্তনো ধম্মতায সোতাপন্নো নাহোসি, মযা দিন্ননযে ঠত্ৰা সোতাপত্তিমগ্গং পটিৰিজ্ঝি? আনন্দ , ইদং নিব্বানমেৰ গম্ভীরং, পচ্চযাকারো পন উত্তানকো জাতো, অথ কস্মা ওল়ারিকং কামরাগসংযোজনং পটিঘসংযোজনং ওল়ারিকং কামরাগানুসযং পটিঘানুসযন্তি ইমে চত্তারো কিলেসে সমুগ্ঘাতেত্ৰা সকদাগামিফলং ন সচ্ছিকরোসি, তেযেৰ অণুসহগতে চত্তারো কিলেসে সমুগ্ঘাতেত্ৰা অনাগামিফলং ন সচ্ছিকরোসি, রূপরাগাদীনি পঞ্চ সংযোজনানি, মানানুসযং ভৰরাগানুসযং অৰিজ্জানুসযন্তি ইমে অট্ঠ কিলেসে সমুগ্ঘাতেত্ৰা অরহত্তং ন সচ্ছিকরোসি? কস্মা ৰা সতসহস্সকপ্পাধিকং একং অসঙ্খ্যেয্যং পূরিতপারমিনো সারিপুত্তমোগ্গল্লানা ৰিয সাৰকপারমীঞাণং ন পটিৰিজ্ঝসি, সতসহস্সকপ্পাধিকানি দ্ৰে অসঙ্খ্যেয্যানি পূরিতপারমিনো পচ্চেকবুদ্ধা ৰিয চ পচ্চেকবোধিঞাণং ন পটিৰিজ্ঝসি? যদি ৰা তে সব্বথাৰ এস উত্তানকো হুত্ৰা উপট্ঠাসি। অথ কস্মা সতসহস্সকপ্পাধিকানি চত্তারি অট্ঠ সোল়স ৰা অসঙ্খ্যেয্যানি পূরিতপারমিনো বুদ্ধা ৰিয সব্বঞ্ঞুতঞ্ঞাণং ন সচ্ছিকরোসি? কিং অনত্থিকোসি এতেহি ৰিসেসাধিগমেহি? পস্স যাৰ চ তে অপরদ্ধং, ত্ৰং নাম সাৰকপদেসঞাণে ঠিতো অতিগম্ভীরং পচ্চযাকারং ‘‘উত্তানকো ৰিয মে উপট্ঠাতী’’তি ৰদসি। তস্স তে ইদং ৰচনং বুদ্ধানং কথায পচ্চনীকং হোতি। তাদিসেন নাম ভিক্খুনা বুদ্ধানং কথায পচ্চনীকং কথেতব্বন্তি ন যুত্তমেতং। ননু ময্হং, আনন্দ, ইমং পচ্চযাকারং পটিৰিজ্ঝিতুং ৰাযমন্তস্সেৰ কপ্পসতসহস্সাধিকানি চত্তারি অসঙ্খ্যেয্যানি অতিক্কন্তানি। পচ্চযাকারপটিৰিজ্ঝনত্থায চ পন মে অদিন্নদানং নাম নত্থি, অপূরিতপারমী নাম নত্থি। ‘‘অজ্জ পচ্চযাকারং পটিৰিজ্ঝিস্সামী’’তি পন মে নিরুস্সাহং ৰিয মারবলং ৰিধমন্তস্স অযং মহাপথৰী দ্ৰঙ্গুলমত্তম্পি নাকম্পি, তথা পঠমযামে পুব্বেনিৰাসং, মজ্ঝিমযামে দিব্বচক্খুং সম্পাদেন্তস্স। পচ্ছিমযামে পন মে বলৰপচ্চূসসমযে, ‘‘অৰিজ্জা সঙ্খারানং নৰহি আকারেহি পচ্চযো হোতী’’তি দিট্ঠমত্তেযেৰ দসসহস্সিলোকধাতু অযদণ্ডেন আকোটিতকংসথালো ৰিয ৰিরৰসতং ৰিরৰসহস্সং মুঞ্চমানা ৰাতাহতে পদুমিনিপণ্ণে উদকবিন্দু ৰিয পকম্পিত্থ। এৰং গম্ভীরো চাযং, আনন্দ, পটিচ্চসমুপ্পাদো গম্ভীরাৰভাসো চ, এতস্স, আনন্দ, ধম্মস্স অননুবোধা…পে॰… নাতিৰত্ততীতি।
Yaṃ pana vuttaṃ ‘‘apasādento’’ti, tatthāyamadhippāyo – ānanda, ‘‘atha ca pana me uttānakuttānako viya khāyatī’’ti mā hevaṃ avaca. Yadi hi te esa uttānakuttānako viya khāyati, kasmā tvaṃ attano dhammatāya sotāpanno nāhosi, mayā dinnanaye ṭhatvā sotāpattimaggaṃ paṭivijjhi? Ānanda , idaṃ nibbānameva gambhīraṃ, paccayākāro pana uttānako jāto, atha kasmā oḷārikaṃ kāmarāgasaṃyojanaṃ paṭighasaṃyojanaṃ oḷārikaṃ kāmarāgānusayaṃ paṭighānusayanti ime cattāro kilese samugghātetvā sakadāgāmiphalaṃ na sacchikarosi, teyeva aṇusahagate cattāro kilese samugghātetvā anāgāmiphalaṃ na sacchikarosi, rūparāgādīni pañca saṃyojanāni, mānānusayaṃ bhavarāgānusayaṃ avijjānusayanti ime aṭṭha kilese samugghātetvā arahattaṃ na sacchikarosi? Kasmā vā satasahassakappādhikaṃ ekaṃ asaṅkhyeyyaṃ pūritapāramino sāriputtamoggallānā viya sāvakapāramīñāṇaṃ na paṭivijjhasi, satasahassakappādhikāni dve asaṅkhyeyyāni pūritapāramino paccekabuddhā viya ca paccekabodhiñāṇaṃ na paṭivijjhasi? Yadi vā te sabbathāva esa uttānako hutvā upaṭṭhāsi. Atha kasmā satasahassakappādhikāni cattāri aṭṭha soḷasa vā asaṅkhyeyyāni pūritapāramino buddhā viya sabbaññutaññāṇaṃ na sacchikarosi? Kiṃ anatthikosi etehi visesādhigamehi? Passa yāva ca te aparaddhaṃ, tvaṃ nāma sāvakapadesañāṇe ṭhito atigambhīraṃ paccayākāraṃ ‘‘uttānako viya me upaṭṭhātī’’ti vadasi. Tassa te idaṃ vacanaṃ buddhānaṃ kathāya paccanīkaṃ hoti. Tādisena nāma bhikkhunā buddhānaṃ kathāya paccanīkaṃ kathetabbanti na yuttametaṃ. Nanu mayhaṃ, ānanda, imaṃ paccayākāraṃ paṭivijjhituṃ vāyamantasseva kappasatasahassādhikāni cattāri asaṅkhyeyyāni atikkantāni. Paccayākārapaṭivijjhanatthāya ca pana me adinnadānaṃ nāma natthi, apūritapāramī nāma natthi. ‘‘Ajja paccayākāraṃ paṭivijjhissāmī’’ti pana me nirussāhaṃ viya mārabalaṃ vidhamantassa ayaṃ mahāpathavī dvaṅgulamattampi nākampi, tathā paṭhamayāme pubbenivāsaṃ, majjhimayāme dibbacakkhuṃ sampādentassa. Pacchimayāme pana me balavapaccūsasamaye, ‘‘avijjā saṅkhārānaṃ navahi ākārehi paccayo hotī’’ti diṭṭhamatteyeva dasasahassilokadhātu ayadaṇḍena ākoṭitakaṃsathālo viya viravasataṃ viravasahassaṃ muñcamānā vātāhate paduminipaṇṇe udakabindu viya pakampittha. Evaṃ gambhīro cāyaṃ, ānanda, paṭiccasamuppādo gambhīrāvabhāso ca, etassa, ānanda, dhammassa ananubodhā…pe… nātivattatīti.
এতস্স ধম্মস্সাতি এতস্স পচ্চযধম্মস্স। অননুবোধাতি ঞাতপরিঞ্ঞাৰসেন অননুবুজ্ঝনা। অপ্পটিৰেধাতি তীরণপ্পহানপরিঞ্ঞাৰসেন অপ্পটিৰিজ্ঝনা। তন্তাকুলকজাতাতি তন্তং ৰিয আকুলজাতা। যথা নাম দুন্নিক্খিত্তং মূসিকচ্ছিন্নং পেসকারানং তন্তং তহিং তহিং আকুলং হোতি, ‘‘ইদং অগ্গং, ইদং মূল’’ন্তি অগ্গেন ৰা অগ্গং, মূলেন ৰা মূলং সমানেতুং দুক্করং হোতি। এৰমেৰ সত্তা ইমস্মিং পচ্চযাকারে খলিতা আকুলা ব্যাকুলা হোন্তি , ন সক্কোন্তি পচ্চযাকারং উজুং কাতুং। তত্থ তন্তং পচ্চত্তপুরিসকারে ঠত্ৰা সক্কাপি ভৰেয্য উজুং কাতুং, ঠপেত্ৰা পন দ্ৰে বোধিসত্তে অঞ্ঞো সত্তো অত্তনো ধম্মতায পচ্চযাকারং উজুং কাতুং সমত্থো নাম নত্থি। যথা পন আকুলং তন্তং কঞ্জিযং দত্ৰা কোচ্ছেন পহটং তত্থ তত্থ গুল়কজাতং হোতি গণ্ঠিবদ্ধং, এৰমিমে সত্তা পচ্চযেসু পক্খলিত্ৰা পচ্চযে উজুং কাতুং অসক্কোন্তা দ্ৰাসট্ঠিদিট্ঠিগতৰসেন গুল়কজাতা হোন্তি গণ্ঠিবদ্ধা। যে হি কেচি দিট্ঠিযো সন্নিস্সিতা, সব্বে তে পচ্চযং উজুং কাতুং অসক্কোন্তাযেৰ।
Etassa dhammassāti etassa paccayadhammassa. Ananubodhāti ñātapariññāvasena ananubujjhanā. Appaṭivedhāti tīraṇappahānapariññāvasena appaṭivijjhanā. Tantākulakajātāti tantaṃ viya ākulajātā. Yathā nāma dunnikkhittaṃ mūsikacchinnaṃ pesakārānaṃ tantaṃ tahiṃ tahiṃ ākulaṃ hoti, ‘‘idaṃ aggaṃ, idaṃ mūla’’nti aggena vā aggaṃ, mūlena vā mūlaṃ samānetuṃ dukkaraṃ hoti. Evameva sattā imasmiṃ paccayākāre khalitā ākulā byākulā honti , na sakkonti paccayākāraṃ ujuṃ kātuṃ. Tattha tantaṃ paccattapurisakāre ṭhatvā sakkāpi bhaveyya ujuṃ kātuṃ, ṭhapetvā pana dve bodhisatte añño satto attano dhammatāya paccayākāraṃ ujuṃ kātuṃ samattho nāma natthi. Yathā pana ākulaṃ tantaṃ kañjiyaṃ datvā kocchena pahaṭaṃ tattha tattha guḷakajātaṃ hoti gaṇṭhibaddhaṃ, evamime sattā paccayesu pakkhalitvā paccaye ujuṃ kātuṃ asakkontā dvāsaṭṭhidiṭṭhigatavasena guḷakajātā honti gaṇṭhibaddhā. Ye hi keci diṭṭhiyo sannissitā, sabbe te paccayaṃ ujuṃ kātuṃ asakkontāyeva.
কুলাগণ্ঠিকজাতাতি কুলাগণ্ঠিকং ৰুচ্চতি পেসকারকঞ্জিযসুত্তং। কুলা নাম সকুণিকা, তস্সা কুলাৰকোতিপি একে। যথা হি তদুভযম্পি আকুলং অগ্গেন ৰা অগ্গং, মূলেন ৰা মূলং সমানেতুং দুক্করন্তি পুরিমনযেনেৰ যোজেতব্বং।
Kulāgaṇṭhikajātāti kulāgaṇṭhikaṃ vuccati pesakārakañjiyasuttaṃ. Kulā nāma sakuṇikā, tassā kulāvakotipi eke. Yathā hi tadubhayampi ākulaṃ aggena vā aggaṃ, mūlena vā mūlaṃ samānetuṃ dukkaranti purimanayeneva yojetabbaṃ.
মুঞ্জপব্বজভূতাতি মুঞ্জতিণং ৰিয পব্বজতিণং ৰিয চ ভূতা তাদিসা জাতা। যথা হি তানি তিণানি কোট্টেত্ৰা কতরজ্জু জিণ্ণকালে কত্থচি পতিতং গহেত্ৰা তেসং তিণানং ‘‘ইদং অগ্গং, ইদং মূল’’ন্তি অগ্গেন ৰা অগ্গং, মূলেন ৰা মূলং সমানেতুং দুক্করং, তম্পি পচ্চত্তপুরিসকারে ঠত্ৰা সক্কা ভৰেয্য উজুং কাতুং, ঠপেত্ৰা পন দ্ৰে বোধিসত্তে অঞ্ঞো সত্তো অত্তনো ধম্মতায পচ্চযাকারং উজুং কাতুং সমত্থো নাম নত্থি, এৰমযং পজা পচ্চযং উজুং কাতুং অসক্কোন্তী দিট্ঠিগতৰসেন গণ্ঠিকজাতা হুত্ৰা অপাযং দুগ্গতিং ৰিনিপাতং সংসারং নাতিৰত্ততি।
Muñjapabbajabhūtāti muñjatiṇaṃ viya pabbajatiṇaṃ viya ca bhūtā tādisā jātā. Yathā hi tāni tiṇāni koṭṭetvā katarajju jiṇṇakāle katthaci patitaṃ gahetvā tesaṃ tiṇānaṃ ‘‘idaṃ aggaṃ, idaṃ mūla’’nti aggena vā aggaṃ, mūlena vā mūlaṃ samānetuṃ dukkaraṃ, tampi paccattapurisakāre ṭhatvā sakkā bhaveyya ujuṃ kātuṃ, ṭhapetvā pana dve bodhisatte añño satto attano dhammatāya paccayākāraṃ ujuṃ kātuṃ samattho nāma natthi, evamayaṃ pajā paccayaṃ ujuṃ kātuṃ asakkontī diṭṭhigatavasena gaṇṭhikajātā hutvā apāyaṃ duggatiṃ vinipātaṃ saṃsāraṃ nātivattati.
তত্থ অপাযোতি নিরযতিরচ্ছানযোনিপেত্তিৰিসযঅসুরকাযা। সব্বেপি হি তে ৰড্ঢিসঙ্খাতস্স অযস্স অভাৰতো ‘‘অপাযো’’তি ৰুচ্চতি, তথা দুক্খস্স গতিভাৰতো দুগ্গতি, সুখসমুস্সযতো ৰিনিপতিতত্তা ৰিনিপাতো। ইতরো পন –
Tattha apāyoti nirayatiracchānayonipettivisayaasurakāyā. Sabbepi hi te vaḍḍhisaṅkhātassa ayassa abhāvato ‘‘apāyo’’ti vuccati, tathā dukkhassa gatibhāvato duggati, sukhasamussayato vinipatitattā vinipāto. Itaro pana –
‘‘খন্ধানঞ্চ পটিপাটি, ধাতুআযতনান চ।
‘‘Khandhānañca paṭipāṭi, dhātuāyatanāna ca;
অব্ভোচ্ছিন্নং ৰত্তমানা, সংসারোতি পৰুচ্চতি’’॥
Abbhocchinnaṃ vattamānā, saṃsāroti pavuccati’’.
তং সব্বম্পি নাতিৰত্ততি নাতিক্কমতি, অথ খো চুতিতো পটিসন্ধিং, পটিসন্ধিতো চুতিন্তি এৰং পুনপ্পুনং চুতিপটিসন্ধিযো গণ্হমানা তীসু ভৰেসু চতূসু যোনীসু পঞ্চসু গতীসু সত্তসু ৰিঞ্ঞাণট্ঠিতীসু নৰসু সত্তাৰাসেসু মহাসমুদ্দে ৰাতক্খিত্তা নাৰা ৰিয যন্তে যুত্তগোণো ৰিয চ পরিব্ভমতিযেৰ। ইতি সব্বমেতং ভগৰা আযস্মন্তং আনন্দং অপসাদেন্তো আহ। সেসমেত্থ ৰুত্তনযমেৰাতি। দসমং।
Taṃ sabbampi nātivattati nātikkamati, atha kho cutito paṭisandhiṃ, paṭisandhito cutinti evaṃ punappunaṃ cutipaṭisandhiyo gaṇhamānā tīsu bhavesu catūsu yonīsu pañcasu gatīsu sattasu viññāṇaṭṭhitīsu navasu sattāvāsesu mahāsamudde vātakkhittā nāvā viya yante yuttagoṇo viya ca paribbhamatiyeva. Iti sabbametaṃ bhagavā āyasmantaṃ ānandaṃ apasādento āha. Sesamettha vuttanayamevāti. Dasamaṃ.
দুক্খৰগ্গো ছট্ঠো।
Dukkhavaggo chaṭṭho.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. নিদানসুত্তং • 10. Nidānasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. নিদানসুত্তৰণ্ণনা • 10. Nidānasuttavaṇṇanā
