| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. নিদানসুত্তৰণ্ণনা
10. Nidānasuttavaṇṇanā
৬০. বহুৰচনৰসেনাতি কুরূ নাম জানপদিনো রাজকুমারা, তেসং নিৰাসো একোপি জনপদো রুল়্হীৰসেন ‘‘কুরূ’’তি এৰং বহুৰচনৰসেন। যত্থ ভগৰতো ৰসনোকাসভূতো কোচি ৰিহারো ন হোতি, তত্থ কেৰলং গোচরগামকিত্তনং নিদানকথায পকতি যথা ‘‘সক্কেসু ৰিহরতি দেৰদহং নাম সক্যানং নিগমো’’তি। ‘‘আযস্মা’’তি ৰা ‘‘দেৰানং পিযো’’তি ৰা ভৰন্তি ৰা পিযসমুদাহারো এসোতি আহ ‘‘আযস্মাতি পিযৰচনমেত’’ন্তি। তযিদং পিযৰচনং গারৰৰসেন ৰুচ্চতীতি আহ ‘‘গরুৰচনমেত’’ন্তি। অতিদূরং অচ্চাসন্নং অতিসম্মুখা অতিপচ্ছতো উপরিৰাতো উন্নতপ্পদেসোতি ইমে ছ নিসজ্জদোসা। নীলপীতলোহিতোদাতমঞ্জিট্ঠপভস্সরৰসেন ছব্বণ্ণানং।
60.Bahuvacanavasenāti kurū nāma jānapadino rājakumārā, tesaṃ nivāso ekopi janapado ruḷhīvasena ‘‘kurū’’ti evaṃ bahuvacanavasena. Yattha bhagavato vasanokāsabhūto koci vihāro na hoti, tattha kevalaṃ gocaragāmakittanaṃ nidānakathāya pakati yathā ‘‘sakkesu viharati devadahaṃ nāma sakyānaṃ nigamo’’ti. ‘‘Āyasmā’’ti vā ‘‘devānaṃ piyo’’ti vā bhavanti vā piyasamudāhāro esoti āha ‘‘āyasmāti piyavacanameta’’nti. Tayidaṃ piyavacanaṃ gāravavasena vuccatīti āha ‘‘garuvacanameta’’nti. Atidūraṃ accāsannaṃ atisammukhā atipacchato uparivāto unnatappadesoti ime cha nisajjadosā. Nīlapītalohitodātamañjiṭṭhapabhassaravasena chabbaṇṇānaṃ.
কুলসঙ্গহত্থাযাতি কুলানুদ্দযতাৰসেন কুলানুগ্গণ্হনত্থায। সহস্সভণ্ডিকং নিক্খিপন্তো ৰিয ভিক্খাপটিগ্গণ্হনেন তেসং অভিৰাদনাদিসম্পটিচ্ছনেন চ পুঞ্ঞাভিসন্দস্স জননেন। পটিসম্মজ্জিত্ৰাতি অন্তেৰাসিকেহি সম্মট্ঠট্ঠানং সক্কচ্চকারিতায পুন সম্মজ্জিত্ৰা। উভযন্ততো পট্ঠায মজ্ঝন্তি আদিতো পট্ঠায ৰেদনং, জরামরণতো পট্ঠায চ ৰেদনং পাপেত্ৰা সম্মসনমাহ। তিক্খত্তুন্তি ‘‘আদিতো পট্ঠায অন্ত’’ন্তিআদিনা ৰুত্তচতুরাকারুপসংহিতে তযো ৰারে। তেন দ্ৰাদসক্খত্তুং সম্মসনমাহ। অম্হাকং ভগৰতা গম্ভীরভাৰেনেৰ কথিতত্তা সেসবুদ্ধেহিপি এৰমেৰ কথিতোতি ধম্মন্ৰযে ঠত্ৰা ৰুত্তং ‘‘সব্ববুদ্ধেহি…পে॰… কথিতো’’তি।
Kulasaṅgahatthāyāti kulānuddayatāvasena kulānuggaṇhanatthāya. Sahassabhaṇḍikaṃ nikkhipanto viya bhikkhāpaṭiggaṇhanena tesaṃ abhivādanādisampaṭicchanena ca puññābhisandassa jananena. Paṭisammajjitvāti antevāsikehi sammaṭṭhaṭṭhānaṃ sakkaccakāritāya puna sammajjitvā. Ubhayantato paṭṭhāya majjhanti ādito paṭṭhāya vedanaṃ, jarāmaraṇato paṭṭhāya ca vedanaṃ pāpetvā sammasanamāha. Tikkhattunti ‘‘ādito paṭṭhāya anta’’ntiādinā vuttacaturākārupasaṃhite tayo vāre. Tena dvādasakkhattuṃ sammasanamāha. Amhākaṃ bhagavatā gambhīrabhāveneva kathitattā sesabuddhehipi evameva kathitoti dhammanvaye ṭhatvā vuttaṃ ‘‘sabbabuddhehi…pe… kathito’’ti.
পমাণাতিক্কমেতি অপরিমাণত্থে ‘‘যাৰঞ্চিদং তেন ভগৰতা’’তিআদীসু (দী॰ নি॰ ১.৩) ৰিয। অতিরেকভাৰজোতনো হি যং যাৰ-সদ্দো। তেনাহ ‘‘অতিগম্ভীরোতি অত্থো’’তি। অৰভাসতি খাযতি উপট্ঠাতি ঞাণস্স। তথা উপট্ঠানঞ্হি সন্ধায ‘‘দিস্সতী’’তি ৰুত্তং। ননু এস পটিচ্চসমুপ্পাদো একন্তগম্ভীরোৰ, অথ কস্মা গম্ভীরাৰভাসতা জোতিতাতি? সচ্চমেতং, একন্তগম্ভীরতাদস্সনত্থমেৰ পনস্স গম্ভীরাৰভাসগ্গহণং, তস্মা অঞ্ঞত্থ লব্ভমানং চাতুকোটিকং ব্যতিরেকমুখেন নিদস্সেত্ৰা তমেৰস্স একন্তগম্ভীরতং ৰিভাৰেতুং ‘‘একং হী’’তিআদি ৰুত্তং। এতং নত্থীতি অগম্ভীরো অগম্ভীরাৰভাসো চাতি এতং দ্ৰযং নত্থি। তেন যথাদস্সিতে চাতুকোটিকে পচ্ছিমা এককোটি লব্ভতীতি দস্সেতি। তেনাহ ‘‘অযং হী’’তিআদি।
Pamāṇātikkameti aparimāṇatthe ‘‘yāvañcidaṃ tena bhagavatā’’tiādīsu (dī. ni. 1.3) viya. Atirekabhāvajotano hi yaṃ yāva-saddo. Tenāha ‘‘atigambhīroti attho’’ti. Avabhāsati khāyati upaṭṭhāti ñāṇassa. Tathā upaṭṭhānañhi sandhāya ‘‘dissatī’’ti vuttaṃ. Nanu esa paṭiccasamuppādo ekantagambhīrova, atha kasmā gambhīrāvabhāsatā jotitāti? Saccametaṃ, ekantagambhīratādassanatthameva panassa gambhīrāvabhāsaggahaṇaṃ, tasmā aññattha labbhamānaṃ cātukoṭikaṃ byatirekamukhena nidassetvā tamevassa ekantagambhīrataṃ vibhāvetuṃ ‘‘ekaṃ hī’’tiādi vuttaṃ. Etaṃ natthīti agambhīro agambhīrāvabhāso cāti etaṃ dvayaṃ natthi. Tena yathādassite cātukoṭike pacchimā ekakoṭi labbhatīti dasseti. Tenāha ‘‘ayaṃ hī’’tiādi.
যেহি গম্ভীরভাৰেহি পটিচ্চসমুপ্পাদো ‘‘গম্ভীরো’’তি ৰুচ্চতি, তে চতূহি উপমাহি উল্লিঙ্গেন্তো ‘‘ভৰগ্গগ্গহণাযা’’তিআদিমাহ। যথা ভৰগ্গগ্গহণত্থং হত্থং পসারেত্ৰা গহেতুং ন সক্কা দূরভাৰতো, এৰং সঙ্খারাদীনং অৰিজ্জাদিপচ্চযসম্ভূতসমুদাগতত্থো পকতিঞাণেন গহেতুং ন সক্কা। যথা সিনেরুং ভিন্দিত্ৰা মিঞ্জং পব্বতরসং পাকতিকপুরিসেন নীহরিতুং ন সক্কা, এৰং পটিচ্চসমুপ্পাদগতে ধম্মত্থাদিকে পকতিঞাণেন ভিন্দিত্ৰা ৰিভজ্জ পটিৰিজ্ঝনৰসেন জানিতুং ন সক্কা। যথা মহাসমুদ্দং পকতিপুরিসস্স বাহুদ্ৰযৰসেন পারং তরিতুং ন সক্কা। এৰং ৰেপুল্লট্ঠেন মহাসমুদ্দসদিসং পটিচ্চসমুপ্পাদং পকতিঞাণেন দেসনাৰসেন পরিহরিতুং ন সক্কা। যথা পথৰিং পরিৰত্তেত্ৰা পাকতিকপুরিসস্স পথৰোজং গহেতুং ন সক্কা, এৰং ইত্থং অৰিজ্জাদযো সঙ্খারাদীনং পচ্চযা হোন্তীতি তেসং পটিচ্চসমুপ্পাদসভাৰো পাকতিকঞাণেন নীহরিত্ৰা গহেতুং ন সক্কোতি, এৰং চতুব্বিধগম্ভীরতাৰসেন চতস্সো উপমা যোজেতব্বা। পাকতিকঞাণৰসেন চাযমত্থযোজনা কতা দিট্ঠসচ্চানং তত্থ পটিৰেধসব্ভাৰতো, তথাপি যস্মা সাৰকানং পচ্চেকবুদ্ধানঞ্চ তত্থ সপ্পদেসমেৰ ঞাণং, বুদ্ধানংযেৰ নিপ্পদেসং। তস্মা ৰুত্তং ‘‘বুদ্ধৰিসযং পঞ্হ’’ন্তি।
Yehi gambhīrabhāvehi paṭiccasamuppādo ‘‘gambhīro’’ti vuccati, te catūhi upamāhi ulliṅgento ‘‘bhavaggaggahaṇāyā’’tiādimāha. Yathā bhavaggaggahaṇatthaṃ hatthaṃ pasāretvā gahetuṃ na sakkā dūrabhāvato, evaṃ saṅkhārādīnaṃ avijjādipaccayasambhūtasamudāgatattho pakatiñāṇena gahetuṃ na sakkā. Yathā sineruṃ bhinditvā miñjaṃ pabbatarasaṃ pākatikapurisena nīharituṃ na sakkā, evaṃ paṭiccasamuppādagate dhammatthādike pakatiñāṇena bhinditvā vibhajja paṭivijjhanavasena jānituṃ na sakkā. Yathā mahāsamuddaṃ pakatipurisassa bāhudvayavasena pāraṃ tarituṃ na sakkā. Evaṃ vepullaṭṭhena mahāsamuddasadisaṃ paṭiccasamuppādaṃ pakatiñāṇena desanāvasena pariharituṃ na sakkā. Yathā pathaviṃ parivattetvā pākatikapurisassa pathavojaṃ gahetuṃ na sakkā, evaṃ itthaṃ avijjādayo saṅkhārādīnaṃ paccayā hontīti tesaṃ paṭiccasamuppādasabhāvo pākatikañāṇena nīharitvā gahetuṃ na sakkoti, evaṃ catubbidhagambhīratāvasena catasso upamā yojetabbā. Pākatikañāṇavasena cāyamatthayojanā katā diṭṭhasaccānaṃ tattha paṭivedhasabbhāvato, tathāpi yasmā sāvakānaṃ paccekabuddhānañca tattha sappadesameva ñāṇaṃ, buddhānaṃyeva nippadesaṃ. Tasmā vuttaṃ ‘‘buddhavisayaṃ pañha’’nti.
মাতি পটিসেধে নিপাতো। স্ৰাযং ‘‘উত্তানকুত্তানকো ৰিয খাযতী’’তি ৰচনং সন্ধায ৰুত্তোতি আহ ‘‘মা ভণীতি অত্থো’’তি। উস্সাদেন্তোতি পঞ্ঞাৰসেন উক্কংসন্তোতি অত্থো। অপসাদেন্তোতি নিব্ভচ্ছন্তো, নিগ্গণ্হন্তোতি অত্থো। তেনাতি মহাপঞ্ঞভাৰেন।
Māti paṭisedhe nipāto. Svāyaṃ ‘‘uttānakuttānako viya khāyatī’’ti vacanaṃ sandhāya vuttoti āha ‘‘mā bhaṇīti attho’’ti. Ussādentoti paññāvasena ukkaṃsantoti attho. Apasādentoti nibbhacchanto, niggaṇhantoti attho. Tenāti mahāpaññabhāvena.
তত্থাতি থেরস্স সতিপি উত্তানভাৰে পটিচ্চসমুপ্পাদস্স অঞ্ঞেসং গম্ভীরভাৰে। সুভোজনরসপুট্ঠস্সাতি সুন্দরেন ভোজনরসেন পোসিতস্স। কতযোগস্সাতি নিব্বুদ্ধপযোগে কতপরিচযস্স। মল্লপাসাণন্তি মল্লেহি মহাবলেহেৰ খিপিতব্বপাসাণং। কুহিং ইমস্স ভারিযট্ঠানন্তি কস্মিং পস্সে ইমস্স পাসাণস্স গরুতরপদেসোতি তস্স সল্লহুকভাৰং দীপেন্তো ৰদতি।
Tatthāti therassa satipi uttānabhāve paṭiccasamuppādassa aññesaṃ gambhīrabhāve. Subhojanarasapuṭṭhassāti sundarena bhojanarasena positassa. Katayogassāti nibbuddhapayoge kataparicayassa. Mallapāsāṇanti mallehi mahābaleheva khipitabbapāsāṇaṃ. Kuhiṃ imassa bhāriyaṭṭhānanti kasmiṃ passe imassa pāsāṇassa garutarapadesoti tassa sallahukabhāvaṃ dīpento vadati.
তিমিরপিঙ্গলেনেৰ দীপেন্তি তস্স মহাৰিপ্ফারভাৰতো। তেনাহ ‘‘তস্স কিরা’’তিআদি। পক্কুথতীতি পক্কুথন্তং ৰিয পরিৰত্ততি পরিতো ৰত্ততি। লক্খণৰচনঞ্হেতং। পিট্ঠিযং সকলিকঅট্ঠিকা পিট্ঠিপত্তং। কাযূপপন্নস্সাতি মহতা কাযেন উপেতস্স, মহাকাযস্সাতি অত্থো। পিঞ্ছ ৰট্টীতি পিঞ্ছ কলাপো। সুপণ্ণৰাতন্তি নাগগ্গহণাদীসু পক্খপপ্ফোটনৰসেন উপ্পজ্জনকৰাতং।
Timirapiṅgalenevadīpenti tassa mahāvipphārabhāvato. Tenāha ‘‘tassa kirā’’tiādi. Pakkuthatīti pakkuthantaṃ viya parivattati parito vattati. Lakkhaṇavacanañhetaṃ. Piṭṭhiyaṃ sakalikaaṭṭhikā piṭṭhipattaṃ. Kāyūpapannassāti mahatā kāyena upetassa, mahākāyassāti attho. Piñcha vaṭṭīti piñcha kalāpo. Supaṇṇavātanti nāgaggahaṇādīsu pakkhapapphoṭanavasena uppajjanakavātaṃ.
‘‘পুব্বূপনিস্সযসম্পত্তিযা’’তিআদিনা উদ্দিট্ঠকারণানি ৰিত্থারতো ৰিৰরিতুং ‘‘ইতো কিরা’’তিআদি ৰুত্তং। তত্থ ইতোতি ইতো ভদ্দকপ্পতো। সতসহস্সিমেতি সতসহস্সমে। হংসৰতী নাম নগরং অহোসি জাতনগরং। ধুরপত্তানীতি বাহিরপত্তানি, যানি দীঘতমানি।
‘‘Pubbūpanissayasampattiyā’’tiādinā uddiṭṭhakāraṇāni vitthārato vivarituṃ ‘‘ito kirā’’tiādi vuttaṃ. Tattha itoti ito bhaddakappato. Satasahassimeti satasahassame. Haṃsavatī nāma nagaraṃ ahosi jātanagaraṃ. Dhurapattānīti bāhirapattāni, yāni dīghatamāni.
কনিট্ঠভাতাতি ৰেমাতিকভাতা কনিট্ঠো যথা অম্হাকং ভগৰতো নন্দত্থেরো। বুদ্ধানঞ্হি সহোদরা ভাতরো নাম ন হোন্তি। তত্থ জেট্ঠা তাৰ নুপ্পজ্জন্তি, কনিট্ঠানং পন অসম্ভৰো এৰ। ভোগন্তি ৰিভৰং। উপসন্তোতি চোরজনিতসঙ্খোভৰূপসমেন উপসন্তো জনপদো।
Kaniṭṭhabhātāti vemātikabhātā kaniṭṭho yathā amhākaṃ bhagavato nandatthero. Buddhānañhi sahodarā bhātaro nāma na honti. Tattha jeṭṭhā tāva nuppajjanti, kaniṭṭhānaṃ pana asambhavo eva. Bhoganti vibhavaṃ. Upasantoti corajanitasaṅkhobhavūpasamena upasanto janapado.
দ্ৰে সাটকে নিৰাসেত্ৰাতি সাটকদ্ৰযমেৰ অত্তনো কাযপরিহারিযং কত্ৰা, ইতরং সব্বসম্ভারং অত্তনা মোচেত্ৰা।
Dvesāṭake nivāsetvāti sāṭakadvayameva attano kāyaparihāriyaṃ katvā, itaraṃ sabbasambhāraṃ attanā mocetvā.
পত্তগ্গহণত্থন্তি অন্তোপক্খিত্তউণ্হভোজনত্তা পত্তস্স অপরাপরং হত্থে পরিৰত্তেন্তস্স সুখেন পত্তগ্গহণত্থং। উত্তরিসাটকন্তি অত্তনো উত্তরিযং সাটকং। এতানি পাকটট্ঠানানীতি এতানি যথাৰুত্তানি ভগৰতো দেসনায পাকটানি বুদ্ধে বুদ্ধসাৰকে চ উদ্দিস্স থেরস্স পুঞ্ঞকরণট্ঠানানি, পচ্চেকবুদ্ধং পন বোধিসত্তঞ্চ উদ্দিস্স থেরস্স পুঞ্ঞকরণট্ঠানানি বহূনিযেৰ।
Pattaggahaṇatthanti antopakkhittauṇhabhojanattā pattassa aparāparaṃ hatthe parivattentassa sukhena pattaggahaṇatthaṃ. Uttarisāṭakanti attano uttariyaṃ sāṭakaṃ. Etāni pākaṭaṭṭhānānīti etāni yathāvuttāni bhagavato desanāya pākaṭāni buddhe buddhasāvake ca uddissa therassa puññakaraṇaṭṭhānāni, paccekabuddhaṃ pana bodhisattañca uddissa therassa puññakaraṇaṭṭhānāni bahūniyeva.
পটিসন্ধিং গহেত্ৰাতি অম্হাকং বোধিসত্তস্স পটিসন্ধিগ্গহণদিৰসেযেৰ পটিসন্ধিং গহেত্ৰা।
Paṭisandhiṃ gahetvāti amhākaṃ bodhisattassa paṭisandhiggahaṇadivaseyeva paṭisandhiṃ gahetvā.
উগ্গহনং পাল়িযা উগ্গণ্হনং, সৰনং অত্থসৰনং, পরিপুচ্ছনং গণ্ঠিট্ঠানেসু অত্থপরিপুচ্ছনং, ধারণং পাল়িযা পাল়িঅত্থস্স চ চিত্তে ঠপনং। সব্বঞ্চেতং ইধ পটিচ্চসমুপ্পাদৰসেন ৰেদিতব্বং, সব্বস্সপি বুদ্ধৰচনস্স ৰসেনাতিপি ৰট্টতি। সোতাপন্নানঞ্চ…পে॰… উপট্ঠাতি তত্থ সম্মোহৰিগমেন ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি অত্তপচ্চক্খৰসেন উপট্ঠানতো । নামরূপপরিচ্ছেদোতি সহ পচ্চযেন নামরূপস্স পরিচ্ছিজ্জ অৰবোধো। চতূহীতি ধম্মগম্ভীরাদীহি চতূহি গম্ভীরতাহি সব্বাপি গম্ভীরতা।
Uggahanaṃ pāḷiyā uggaṇhanaṃ, savanaṃ atthasavanaṃ, paripucchanaṃ gaṇṭhiṭṭhānesu atthaparipucchanaṃ, dhāraṇaṃ pāḷiyā pāḷiatthassa ca citte ṭhapanaṃ. Sabbañcetaṃ idha paṭiccasamuppādavasena veditabbaṃ, sabbassapi buddhavacanassa vasenātipi vaṭṭati. Sotāpannānañca…pe… upaṭṭhāti tattha sammohavigamena ‘‘yaṃ kiñci samudayadhammaṃ, sabbaṃ taṃ nirodhadhamma’’nti attapaccakkhavasena upaṭṭhānato . Nāmarūpaparicchedoti saha paccayena nāmarūpassa paricchijja avabodho. Catūhīti dhammagambhīrādīhi catūhi gambhīratāhi sabbāpi gambhīratā.
সাৰকেহি দেসিতা দেসনাপি পন সত্থু এৰ দেসনাতি আহ ‘‘মযা দিন্ননযে ঠত্ৰা’’তি। ‘‘সেক্খেন নাম নিব্বানং সব্বাকারেন পটিৰিদ্ধং ন হোতী’’তি ন তস্স গম্ভীরতাতি তস্স গম্ভীরস্স উপাদানস্স গম্ভীরতা ৰিয সুট্ঠু দিট্ঠা নাম হোতি। তস্মা আহ ‘‘ইদং নিব্বানমেৰ গম্ভীরং, পচ্চযাকারো পন উত্তানকো জাতো’’তি। নিব্বানঞ্হি সব্বেপি অসেক্খা সব্বসো পটিৰিজ্ঝন্তি নিপ্পদেসত্তা, পচ্চযাকারং পন সম্মাসম্বুদ্ধাযেৰ অনৰসেসতো পটিৰিজ্ঝন্তি, ন ইতরে। তস্মা পচ্চযৰসেন ‘‘ইদং অপরদ্ধ’’ন্তি ৰুত্তং থেরং অপসাদেন্তেন। তমেৰ হিস্স অনৰসেসতো পটিৰেধাভাৰং ৰিভাৰেতুং ‘‘অথ কস্মা’’তিআদি ৰুত্তং। অসতিপি ধম্মতো ভেদে সংযোজনত্থঅনুসযত্থৰসেন পন তেসং লব্ভমানভেদং গহেত্ৰা ‘‘ইমে চত্তারো কিলেসে’’তি ৰুত্তং। অঞ্ঞো হি তেসং বন্ধনত্থো, অঞ্ঞো থামগমনট্ঠোতি। এস নযো সেসেসুপি। ইতি ইমেসং কিলেসানং অপ্পহীনত্তা তথারূপং উপনিস্সযসম্পদং অভাৰযতোৰ অনুত্তানমেৰ ধম্মং উত্তানন্তি ন ৰত্তব্বমেৰাতি অধিপ্পাযো। চত্তারি অট্ঠ সোল়স ৰা অসঙ্খ্যেয্যানীতি ইদং মহাবোধিসত্তানং সন্তানে বোধিপরিপাচকধম্মানং তিক্খমজ্ঝিমমুদুভাৰসিদ্ধকালৰিসেসদস্সনং, তঞ্চ খো মহাভিনীহারতো পট্ঠাযাতি ৰদন্তি। এতেহীতি যথাৰুত্তবুদ্ধসাৰকঅগ্গসাৰকপচ্চেকবুদ্ধসম্মাসম্বুদ্ধানং ৰিসেসাধিগমেহি। পচ্চনীকন্তি পটিক্কূলং ৰিরুদ্ধং। সব্বথা পচ্চযাকারপটিৰেধো নাম সম্মাসম্বোধিযাধিগমো এৰাতি ৰুত্তং ‘‘পচ্চযাকারং পটিৰিজ্ঝিতুং ৰাযমন্তস্সেৰা’’তি। নৰহি আকারেহীতি উপ্পাদাদীহি নৰহি পচ্চযাকারেহি। ৰুত্তঞ্হেতং পটিসম্ভিদাযং (পটি॰ ম॰ ১.৪৫) –
Sāvakehi desitā desanāpi pana satthu eva desanāti āha ‘‘mayā dinnanaye ṭhatvā’’ti. ‘‘Sekkhena nāma nibbānaṃ sabbākārena paṭividdhaṃ na hotī’’ti na tassa gambhīratāti tassa gambhīrassa upādānassa gambhīratā viya suṭṭhu diṭṭhā nāma hoti. Tasmā āha ‘‘idaṃ nibbānameva gambhīraṃ, paccayākāro pana uttānako jāto’’ti. Nibbānañhi sabbepi asekkhā sabbaso paṭivijjhanti nippadesattā, paccayākāraṃ pana sammāsambuddhāyeva anavasesato paṭivijjhanti, na itare. Tasmā paccayavasena ‘‘idaṃ aparaddha’’nti vuttaṃ theraṃ apasādentena. Tameva hissa anavasesato paṭivedhābhāvaṃ vibhāvetuṃ ‘‘atha kasmā’’tiādi vuttaṃ. Asatipi dhammato bhede saṃyojanatthaanusayatthavasena pana tesaṃ labbhamānabhedaṃ gahetvā ‘‘ime cattāro kilese’’ti vuttaṃ. Añño hi tesaṃ bandhanattho, añño thāmagamanaṭṭhoti. Esa nayo sesesupi. Iti imesaṃ kilesānaṃ appahīnattā tathārūpaṃ upanissayasampadaṃ abhāvayatova anuttānameva dhammaṃ uttānanti na vattabbamevāti adhippāyo. Cattāri aṭṭha soḷasa vā asaṅkhyeyyānīti idaṃ mahābodhisattānaṃ santāne bodhiparipācakadhammānaṃ tikkhamajjhimamudubhāvasiddhakālavisesadassanaṃ, tañca kho mahābhinīhārato paṭṭhāyāti vadanti. Etehīti yathāvuttabuddhasāvakaaggasāvakapaccekabuddhasammāsambuddhānaṃ visesādhigamehi. Paccanīkanti paṭikkūlaṃ viruddhaṃ. Sabbathā paccayākārapaṭivedho nāma sammāsambodhiyādhigamo evāti vuttaṃ ‘‘paccayākāraṃ paṭivijjhituṃ vāyamantassevā’’ti. Navahi ākārehīti uppādādīhi navahi paccayākārehi. Vuttañhetaṃ paṭisambhidāyaṃ (paṭi. ma. 1.45) –
‘‘অৰিজ্জাসঙ্খারানং উপ্পাদট্ঠিতি চ পৰত্তট্ঠিতি চ নিমিত্তট্ঠিতি চ আযূহনট্ঠিতি চ সংযোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ, ইমেহি নৰহাকারেহি অৰিজ্জা পচ্চযো, সঙ্খারা পচ্চযসমুপ্পন্না’’তিআদি।
‘‘Avijjāsaṅkhārānaṃ uppādaṭṭhiti ca pavattaṭṭhiti ca nimittaṭṭhiti ca āyūhanaṭṭhiti ca saṃyogaṭṭhiti ca palibodhaṭṭhiti ca samudayaṭṭhiti ca hetuṭṭhiti ca paccayaṭṭhiti ca, imehi navahākārehi avijjā paccayo, saṅkhārā paccayasamuppannā’’tiādi.
তত্থ নৰহাকারেহীতি নৰহি পচ্চযভাৰূপগমনেহি আকারেহি। উপ্পজ্জতি এতস্মা ফলন্তি উপ্পাদো, ফলুপ্পত্তিযা কারণভাৰো। সতি চ অৰিজ্জায সঙ্খারা উপ্পজ্জন্তি, নাসতি, তস্মা অৰিজ্জা সঙ্খারানং উপ্পাদো হোতি। তথা অৰিজ্জায সতি সঙ্খারা পৰত্তন্তি চ নিমিযন্তি চ। যথা চ ভৰাদীসু খিপন্তি, এৰং তেসং অৰিজ্জা পচ্চযো হোতি, তথা আযূহন্তি ফলুপ্পত্তিযা ঘটেন্তি সংযুজ্জন্তি অত্তনো ফলেন। যস্মিং সন্তানে সযং উপ্পন্না, তং পলিবুন্ধন্তি পচ্চযন্তরসমৰাযে উদযন্তি উপ্পজ্জন্তি, হিনোতি চ সঙ্খারানং কারণভাৰং উপগচ্ছতি। পটিচ্চ অৰিজ্জং সঙ্খারা অযন্তি পৰত্তন্তীতি এৰং অৰিজ্জায সঙ্খারানং কারণভাৰূপগমনৰিসেসা উপ্পাদাদযো ৰেদিতব্বাতি। উপ্পাদট্ঠিতীতি চ তিট্ঠতি এতেনাতি ঠিতি, কারণং। উপ্পাদো এৰ ঠিতি উপ্পাদঠিতি। এস নযো সেসেসুপি। ইদঞ্চ পচ্চযাকারদস্সনং যথা পুরিমেহি মহাবোধিমূলে পৰত্তিতং, তথা অম্হাকং ভগৰতাপি পৰত্তিতন্তি অচ্ছরিযৰেগাভিহতা দসসহস্সিলোকধাতু সঙ্কম্পি সম্পকম্পীতি দস্সেন্তো ‘‘দিট্ঠমত্তে’’তিআদিমাহ।
Tattha navahākārehīti navahi paccayabhāvūpagamanehi ākārehi. Uppajjati etasmā phalanti uppādo, phaluppattiyā kāraṇabhāvo. Sati ca avijjāya saṅkhārā uppajjanti, nāsati, tasmā avijjā saṅkhārānaṃ uppādo hoti. Tathā avijjāya sati saṅkhārā pavattanti ca nimiyanti ca. Yathā ca bhavādīsu khipanti, evaṃ tesaṃ avijjā paccayo hoti, tathā āyūhanti phaluppattiyā ghaṭenti saṃyujjanti attano phalena. Yasmiṃ santāne sayaṃ uppannā, taṃ palibundhanti paccayantarasamavāye udayanti uppajjanti, hinoti ca saṅkhārānaṃ kāraṇabhāvaṃ upagacchati. Paṭicca avijjaṃ saṅkhārā ayanti pavattantīti evaṃ avijjāya saṅkhārānaṃ kāraṇabhāvūpagamanavisesā uppādādayo veditabbāti. Uppādaṭṭhitīti ca tiṭṭhati etenāti ṭhiti, kāraṇaṃ. Uppādo eva ṭhiti uppādaṭhiti. Esa nayo sesesupi. Idañca paccayākāradassanaṃ yathā purimehi mahābodhimūle pavattitaṃ, tathā amhākaṃ bhagavatāpi pavattitanti acchariyavegābhihatā dasasahassilokadhātu saṅkampi sampakampīti dassento ‘‘diṭṭhamatte’’tiādimāha.
এতস্স ধম্মস্সাতি এতস্স পটিচ্চসমুপ্পাদসঞ্ঞিতস্স ধম্মস্স। সো পন যস্মা অত্থতো হেতুপ্পভৰানং হেতু। তেনাহ ‘‘এতস্স পচ্চযধম্মস্সা’’তি । জাতিআদীনং জরামরণপচ্চযতাযাতি অত্থো। নামরূপপরিচ্ছেদো তস্স চ পচ্চযপরিগ্গহো ন পঠমাভিনিৰেসমত্তেন হোতি, অথ খো তত্থ অপরাপরং ঞাণুপ্পত্তিসঞ্ঞিতেন অনু অনু বুজ্ঝনেন। তদুভযভাৰং পন দস্সেন্তো ‘‘ঞাতপরিঞ্ঞাৰসেন অননুবুজ্ঝনা’’তি আহ। নিচ্চসঞ্ঞাদীনং পজহনৰসেন পৰত্তমানা ৰিপস্সনাধম্মে পটিৰিজ্ঝতি এৰ নাম হোতি পটিপক্খৰিক্খম্ভনেন তিক্খৰিসদভাৰাপত্তিতো, তদধিট্ঠানভূতা চ তীরণপরিঞ্ঞা অরিযমগ্গো চ পরিঞ্ঞাপহানাভিসমযৰসেন পৰত্তিযা তীরণপ্পহানপরিঞ্ঞাসঙ্গহো চাতি তদুভযপটিৰেধাভাৰং দস্সেন্তো ‘‘তীরণপ্পহানপরিঞ্ঞাৰসেন অপ্পটিৰিজ্ঝনা’’তি আহ। তন্তং ৰুচ্চতি পটৰীননত্থং তন্তৰাযেতি তন্তং আৰঞ্ছিত্ৰা পসারিতসুত্তৰট্টিতং নীযতীতি কত্ৰা, তং পন তন্তাকুলতায নিদস্সনভাৰেন আকুলমেৰ গহিতন্তি আহ ‘‘তন্তং ৰিয আকুলজাতা’’তি। সঙ্খেপতো ৰুত্তমত্থং ৰিত্থারতো দস্সেন্তো ‘‘যথা নামা’’তিআদি ৰুত্তং। সমানেতুন্তি পুব্বেনাপরং সমং কত্ৰা আনেতুং, অৰিসমং উজুং কাতুন্তি অত্থো। তন্তমেৰ ৰা আকুলং তন্তাকুলং, তন্তাকুলং ৰিয জাতা ভূতা তন্তাকুলকজাতা। মজ্ঝিমং পটিপদং অনুপগন্ত্ৰা অন্তদ্ৰযপক্খন্দেন পচ্চযাকারে খলিত্ৰা আকুলব্যাকুলা হোন্তি, তেনেৰ অন্তদ্ৰযপক্খন্দেন তংতংদিট্ঠিগ্গাহৰসেন পরিব্ভমন্তা উজুকং ধম্মট্ঠিতিতন্তং পটিৰিজ্ঝিতুং ন জানন্তি। তেনাহ ‘‘ন সক্কোন্তি পচ্চযাকারং উজুং কাতু’’ন্তি। দ্ৰে বোধিসত্তেতি পচ্চেকবোধিসত্তমহাবোধিসত্তে। অত্তনো ধম্মতাযাতি অত্তনো সভাৰেন, পরোপদেসেন ৰিনাতি অত্থো। তত্থ তত্থ গুল়কজাতন্তি তস্মিং তস্মিং ঠানে জাতগুল়কং পিণ্ডিসুত্তং। ততো এৰ গণ্ঠিবদ্ধন্তি ৰুত্তং। পচ্চযেসু পক্খলিত্ৰাতি অনিচ্চদুক্খানত্তাদিসভাৰেসু পচ্চযধম্মেসু নিচ্চাদিভাৰৰসেন পক্খলিত্ৰা। পচ্চযে উজুং কাতুং অসক্কোন্তোতি তস্সেৰ নিচ্চাদিগাহস্স অৰিস্সজ্জনতো পচ্চযধম্মনিমিত্তং অত্তনো দস্সনং উজুং কাতুং অসক্কোন্তো ইদংসচ্চাভিনিৰেসকাযগন্থৰসেন গণ্ঠিকজাতা হোন্তীতি আহ ‘‘দ্ৰাসট্ঠি…পে॰… গণ্ঠিবদ্ধা’’তি।
Etassa dhammassāti etassa paṭiccasamuppādasaññitassa dhammassa. So pana yasmā atthato hetuppabhavānaṃ hetu. Tenāha ‘‘etassa paccayadhammassā’’ti . Jātiādīnaṃ jarāmaraṇapaccayatāyāti attho. Nāmarūpaparicchedo tassa ca paccayapariggaho na paṭhamābhinivesamattena hoti, atha kho tattha aparāparaṃ ñāṇuppattisaññitena anu anu bujjhanena. Tadubhayabhāvaṃ pana dassento ‘‘ñātapariññāvasena ananubujjhanā’’ti āha. Niccasaññādīnaṃ pajahanavasena pavattamānā vipassanādhamme paṭivijjhati eva nāma hoti paṭipakkhavikkhambhanena tikkhavisadabhāvāpattito, tadadhiṭṭhānabhūtā ca tīraṇapariññā ariyamaggo ca pariññāpahānābhisamayavasena pavattiyā tīraṇappahānapariññāsaṅgaho cāti tadubhayapaṭivedhābhāvaṃ dassento ‘‘tīraṇappahānapariññāvasena appaṭivijjhanā’’ti āha. Tantaṃ vuccati paṭavīnanatthaṃ tantavāyeti tantaṃ āvañchitvā pasāritasuttavaṭṭitaṃ nīyatīti katvā, taṃ pana tantākulatāya nidassanabhāvena ākulameva gahitanti āha ‘‘tantaṃ viya ākulajātā’’ti. Saṅkhepato vuttamatthaṃ vitthārato dassento ‘‘yathā nāmā’’tiādi vuttaṃ. Samānetunti pubbenāparaṃ samaṃ katvā ānetuṃ, avisamaṃ ujuṃ kātunti attho. Tantameva vā ākulaṃ tantākulaṃ, tantākulaṃ viya jātā bhūtā tantākulakajātā. Majjhimaṃ paṭipadaṃ anupagantvā antadvayapakkhandena paccayākāre khalitvā ākulabyākulā honti, teneva antadvayapakkhandena taṃtaṃdiṭṭhiggāhavasena paribbhamantā ujukaṃ dhammaṭṭhititantaṃ paṭivijjhituṃ na jānanti. Tenāha ‘‘na sakkonti paccayākāraṃ ujuṃ kātu’’nti. Dve bodhisatteti paccekabodhisattamahābodhisatte. Attano dhammatāyāti attano sabhāvena, paropadesena vināti attho. Tattha tattha guḷakajātanti tasmiṃ tasmiṃ ṭhāne jātaguḷakaṃ piṇḍisuttaṃ. Tato eva gaṇṭhibaddhanti vuttaṃ. Paccayesu pakkhalitvāti aniccadukkhānattādisabhāvesu paccayadhammesu niccādibhāvavasena pakkhalitvā. Paccaye ujuṃ kātuṃ asakkontoti tasseva niccādigāhassa avissajjanato paccayadhammanimittaṃ attano dassanaṃ ujuṃ kātuṃ asakkonto idaṃsaccābhinivesakāyaganthavasena gaṇṭhikajātā hontīti āha ‘‘dvāsaṭṭhi…pe… gaṇṭhibaddhā’’ti.
যে হি কেচি সমণা ৰা ব্রাহ্মণা ৰা সস্সতদিট্ঠিআদি দিট্ঠিযো নিস্সিতা অল্লীনা, ৰিননতো কুলাতি ইত্থিলিঙ্গৰসেন লদ্ধনামস্স তন্তৰাযস্স গণ্ঠিকং নাম আকুলভাৰেন অগ্গতো ৰা মূলতো ৰা দুৰিঞ্ঞেয্যাৰযৰং খলিতবন্ধসুত্তন্তি আহ ‘‘কুলাগণ্ঠিকং ৰুচ্চতি পেসকারকঞ্জিযসুত্ত’’ন্তি। সকুণিকাতি ৰট্টচাটকসকুণিকা। সা হি রুক্খসাখাসু ওলম্বনকুলাৰকা হোতি। তঞ্হি সা কুলাৰকং ততো ততো তিণহীরাদিকে আনেত্ৰা তথা তথা ৰিনন্ধতি, যথা তেসং পেসকারকঞ্জিযসুত্তং ৰিয অগ্গেন ৰা অগ্গং, মূলেন ৰা মূলং সমানেতুং ৰিৰেচেতুং ৰা ন সক্কা। তেনাহ ‘‘যথা’’তিআদি। তদুভযম্পীতি কুলাগণ্ঠিকন্তি ৰুত্তং কঞ্জিযসুত্তং কুলাৰকঞ্চ। পুরিমনযেনেৰাতি ‘‘এৰমেৰ সত্তা’’তিআদিনা পুব্বে ৰুত্তনযেনেৰ।
Ye hi keci samaṇā vā brāhmaṇā vā sassatadiṭṭhiādi diṭṭhiyo nissitā allīnā, vinanato kulāti itthiliṅgavasena laddhanāmassa tantavāyassa gaṇṭhikaṃ nāma ākulabhāvena aggato vā mūlato vā duviññeyyāvayavaṃ khalitabandhasuttanti āha ‘‘kulāgaṇṭhikaṃ vuccati pesakārakañjiyasutta’’nti. Sakuṇikāti vaṭṭacāṭakasakuṇikā. Sā hi rukkhasākhāsu olambanakulāvakā hoti. Tañhi sā kulāvakaṃ tato tato tiṇahīrādike ānetvā tathā tathā vinandhati, yathā tesaṃ pesakārakañjiyasuttaṃ viya aggena vā aggaṃ, mūlena vā mūlaṃ samānetuṃ vivecetuṃ vā na sakkā. Tenāha ‘‘yathā’’tiādi. Tadubhayampīti kulāgaṇṭhikanti vuttaṃ kañjiyasuttaṃ kulāvakañca. Purimanayenevāti ‘‘evameva sattā’’tiādinā pubbe vuttanayeneva.
কামং মুঞ্জপব্বজতিণানি যথাজাতানিপি দীঘভাৰেন পতিত্ৰা অরঞ্ঞট্ঠানে অঞ্ঞমঞ্ঞং ৰিনন্ধিত্ৰা আকুলানি হুত্ৰা তিট্ঠন্তি, তানি পন তথা দুব্বিৰেচিযানি যথা রজ্জুভূতানীতি দস্সেতুং ‘‘যথা হী’’তিআদি ৰুত্তং। সেসমেত্থ হেট্ঠা ৰুত্তনযমেৰ।
Kāmaṃ muñjapabbajatiṇāni yathājātānipi dīghabhāvena patitvā araññaṭṭhāne aññamaññaṃ vinandhitvā ākulāni hutvā tiṭṭhanti, tāni pana tathā dubbiveciyāni yathā rajjubhūtānīti dassetuṃ ‘‘yathā hī’’tiādi vuttaṃ. Sesamettha heṭṭhā vuttanayameva.
অপাযোতি অযেন সুখেন, সুখহেতুনা ৰা ৰিরহিতো। দুক্খস্স গতিভাৰতোতি অপাযিকস্স দুক্খস্স পৰত্তিট্ঠানভাৰতো। সুখসমুস্সযতোতি ‘‘অব্ভুদযতো ৰিনিপতিতত্তা’’তি ৰিরূপং নিপতিতত্তা যথা তেনত্তভাৰেন সুখসমুস্সযো ন হোতি, এৰং নিপতিতত্তা। ইতরোতি সংসারো ননু ‘‘অপায’’ন্তিআদিনা ৰুত্তোপি সংসারো এৰাতি? সচ্চমেতং, নিরযাদীনং পন অধিমত্তদুক্খভাৰদস্সনত্থং অপাযাদিগ্গহণং গোবলিবদ্দঞাযেন অযমত্থো ৰেদিতব্বো। খন্ধানঞ্চ পটিপাটীতি পঞ্চন্নং খন্ধানং হেতুফলভাৰেন অপরাপরুপ্পত্তি। অব্ভোচ্ছিন্নং ৰত্তমানাতি অৰিচ্ছেদেন পৰত্তমানা।
Apāyoti ayena sukhena, sukhahetunā vā virahito. Dukkhassa gatibhāvatoti apāyikassa dukkhassa pavattiṭṭhānabhāvato. Sukhasamussayatoti ‘‘abbhudayato vinipatitattā’’ti virūpaṃ nipatitattā yathā tenattabhāvena sukhasamussayo na hoti, evaṃ nipatitattā. Itaroti saṃsāro nanu ‘‘apāya’’ntiādinā vuttopi saṃsāro evāti? Saccametaṃ, nirayādīnaṃ pana adhimattadukkhabhāvadassanatthaṃ apāyādiggahaṇaṃ gobalibaddañāyena ayamattho veditabbo. Khandhānañca paṭipāṭīti pañcannaṃ khandhānaṃ hetuphalabhāvena aparāparuppatti. Abbhocchinnaṃ vattamānāti avicchedena pavattamānā.
তং সব্বম্পীতি তং ‘‘অপায’’ন্তিআদিনা ৰুত্তং সব্বং অপাযদুক্খঞ্চেৰ ৰট্টদুক্খঞ্চ। মহাসমুদ্দে ৰাতক্খিত্তা নাৰা ৰিযাতি ইদং পরিব্ভমনট্ঠানস্স মহন্তভাৰদস্সনত্থঞ্চেৰ পরিব্ভমনস্স অনৰত্তিতদস্সনত্থঞ্চ ৰেদিতব্বং। সেসং ৰুত্তনযমেৰ।
Taṃ sabbampīti taṃ ‘‘apāya’’ntiādinā vuttaṃ sabbaṃ apāyadukkhañceva vaṭṭadukkhañca. Mahāsamudde vātakkhittā nāvā viyāti idaṃ paribbhamanaṭṭhānassa mahantabhāvadassanatthañceva paribbhamanassa anavattitadassanatthañca veditabbaṃ. Sesaṃ vuttanayameva.
নিদানসুত্তৰণ্ণনা নিট্ঠিতা।
Nidānasuttavaṇṇanā niṭṭhitā.
দুক্খৰগ্গৰণ্ণনা নিট্ঠিতা।
Dukkhavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. নিদানসুত্তং • 10. Nidānasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. নিদানসুত্তৰণ্ণনা • 10. Nidānasuttavaṇṇanā
