| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
4. нид̣̇аанасуд̇д̇аван̣н̣анаа
4. Nidānasuttavaṇṇanā
34. жад̇уд̇т̇з бин̣д̣агаран̣ад̇т̇ааяаад̇и ааяууханавасзна раасигаран̣ад̇т̇ааяа. абхиннаанийд̇и згад̣̇зсзнаби акан̣д̣ид̇аани. бхиннагаалад̇о бадтааяа хи б̣ийж̇ам̣ б̣ийж̇агижжааяа на убагаббад̇и. абууд̇ийнийд̇и уд̣̇агад̇зманзна бууд̇ибхаавам̣ на убаг̇ад̇аани. бууд̇иб̣ийж̇ан̃хи б̣ийж̇ад̇т̇ааяа на убагаббад̇и. д̇знааха ‘‘бууд̇ибхаавзна аб̣ийж̇ад̇д̇ам̣ аббад̇д̇ааний’’д̇и. на ваад̇зна на жа аад̇абзна хад̇аанийд̇и ваад̇зна жа аад̇абзна жа на хад̇аани, нирож̇ад̇ам̣ на баабид̇аани. нирож̇ан̃хи гасадаб̣ийж̇ам̣ б̣ийж̇ад̇т̇ааяа на убагаббад̇и. саараад̣̇аанийд̇и д̇ан̣д̣уласаарасса аад̣̇аанад̇о саараад̣̇аани. ниссааран̃хи б̣ийж̇ам̣ б̣ийж̇ад̇т̇ааяа на убагаббад̇и. д̇знааха ‘‘г̇ахид̇асаарааний’’д̇и, бад̇идтид̇асаараанийд̇и ад̇т̇о. саннижаяабхаавзна сукам̣ саяид̇аанийд̇и жад̇д̇ааро маасз годтабагкид̇д̇анияаамзнзва сукасаяид̇аани.
34. Catutthe piṇḍakaraṇatthāyāti āyūhanavasena rāsikaraṇatthāya. Abhinnānīti ekadesenapi akhaṇḍitāni. Bhinnakālato paṭṭhāya hi bījaṃ bījakiccāya na upakappati. Apūtīnīti udakatemanena pūtibhāvaṃ na upagatāni. Pūtibījañhi bījatthāya na upakappati. Tenāha ‘‘pūtibhāvena abījattaṃ appattānī’’ti. Na vātena na ca ātapena hatānīti vātena ca ātapena ca na hatāni, nirojataṃ na pāpitāni. Nirojañhi kasaṭabījaṃ bījatthāya na upakappati. Sārādānīti taṇḍulasārassa ādānato sārādāni. Nissārañhi bījaṃ bījatthāya na upakappati. Tenāha ‘‘gahitasārānī’’ti, patiṭṭhitasārānīti attho. Sannicayabhāvena sukhaṃ sayitānīti cattāro māse koṭṭhapakkhittaniyāmeneva sukhasayitāni.
гаммавибхад̇д̇ийд̇и гаммавибхааг̇о. д̣̇идтад̇хаммо вужжад̇и бажжагкабхууд̇о бажжуббанно ад̇д̇абхааво, д̇ад̇т̇а взд̣̇ид̇аб̣б̣апалам̣ гаммам̣ д̣̇идтад̇хаммавзд̣̇анийяам̣. бажжубаннабхавад̇о ананд̇арам̣ взд̣̇ид̇аб̣б̣апалам̣ гаммам̣ убабаж̇ж̇авзд̣̇анийяам̣. абарабарияааяавзд̣̇анийяанд̇и д̣̇идтад̇хаммаананд̇арабхавад̇о ан̃н̃асмим̣ ад̇д̇абхаавабарияааяз ад̇д̇абхаавабаривад̇д̇з взд̣̇ид̇аб̣б̣апалам̣ гаммам̣. бадибагкзхи анабхибхууд̇ад̇ааяа бажжаяависзсзна бадилад̣̇д̇хависзсад̇ааяа жа б̣алавабхааваббад̇д̇аа д̇аад̣̇исасса буб̣б̣аабхисан̇каарасса васзна саад̇исаяаа худ̇ваа бавад̇д̇аа батамаж̇аванажзд̇анаа д̇асмим̣язва ад̇д̇абхаавз палад̣̇ааяиний д̣̇идтад̇хаммавзд̣̇анийяагаммам̣ наама. саа хи вуд̇д̇аагаарзна б̣алавад̇ий ж̇аванасанд̇аанз г̇ун̣ависзсаяуд̇д̇зсу убагаараанубагааравасаббавад̇д̇ияаа аасзванаалаабхзна аббавибаагад̇ааяа жа батамаж̇аванажзд̇анаа ид̇арад̣̇ваяам̣ вияа бавад̇д̇асанд̇аанубарамаабзгкам̣ огаасалаабхаабзгкан̃жа гаммам̣ на ход̇ийд̇и ид̇хзва бубпамад̇д̇ам̣ вияа бавад̇д̇ивибаагамад̇д̇ам̣ палам̣ д̣̇зд̇и. д̇ат̇аа асаггонд̇анд̇и гаммасса вибаагад̣̇аанам̣ наама убад̇хиббаяог̇аад̣̇ибажжаяанд̇арасамавааязнзва ход̇ийд̇и д̇ад̣̇абхаавад̇о д̇асмим̣язва ад̇д̇абхаавз вибаагам̣ д̣̇аад̇ум̣ асаггонд̇ам̣. ахосигамманд̇и ахоси зва гаммам̣, на д̇асса вибааго ахоси ад̇т̇и бхависсад̇и жаад̇и звам̣ взд̣̇ид̇аб̣б̣ам̣ гаммам̣.
Kammavibhattīti kammavibhāgo. Diṭṭhadhammo vuccati paccakkhabhūto paccuppanno attabhāvo, tattha veditabbaphalaṃ kammaṃ diṭṭhadhammavedanīyaṃ. Paccupannabhavato anantaraṃ veditabbaphalaṃ kammaṃ upapajjavedanīyaṃ. Aparapariyāyavedanīyanti diṭṭhadhammānantarabhavato aññasmiṃ attabhāvapariyāye attabhāvaparivatte veditabbaphalaṃ kammaṃ. Paṭipakkhehi anabhibhūtatāya paccayavisesena paṭiladdhavisesatāya ca balavabhāvappattā tādisassa pubbābhisaṅkhārassa vasena sātisayā hutvā pavattā paṭhamajavanacetanā tasmiṃyeva attabhāve phaladāyinī diṭṭhadhammavedanīyakammaṃ nāma. Sā hi vuttākārena balavatī javanasantāne guṇavisesayuttesu upakārānupakāravasappavattiyā āsevanālābhena appavipākatāya ca paṭhamajavanacetanā itaradvayaṃ viya pavattasantānuparamāpekkhaṃ okāsalābhāpekkhañca kammaṃ na hotīti idheva pupphamattaṃ viya pavattivipākamattaṃ phalaṃ deti. Tathā asakkontanti kammassa vipākadānaṃ nāma upadhippayogādipaccayantarasamavāyeneva hotīti tadabhāvato tasmiṃyeva attabhāve vipākaṃ dātuṃ asakkontaṃ. Ahosikammanti ahosi eva kammaṃ, na tassa vipāko ahosi atthi bhavissati cāti evaṃ veditabbaṃ kammaṃ.
ад̇т̇асаад̇хигаад̇и д̣̇аанаад̣̇ибаан̣аад̇ибаад̇аад̣̇иад̇т̇асса нибпаад̣̇игаа. гаа бана саад̇и ааха ‘‘сад̇д̇амаж̇аванажзд̇анаа’’д̇и. саа хи саннидтаабагажзд̇анаа вуд̇д̇анаязна бадилад̣̇д̇хависзсаа буримаж̇аванажзд̇анаахи лад̣̇д̇хаасзванаа жа самаанаа ананд̇арад̇д̇абхаавз вибаагад̣̇ааяиний убабаж̇ж̇авзд̣̇анийяагаммам̣ наама. буримаубамааяаязваад̇и миг̇алуд̣̇д̣̇агобамааяаязва.
Atthasādhikāti dānādipāṇātipātādiatthassa nipphādikā. Kā pana sāti āha ‘‘sattamajavanacetanā’’ti. Sā hi sanniṭṭhāpakacetanā vuttanayena paṭiladdhavisesā purimajavanacetanāhi laddhāsevanā ca samānā anantarattabhāve vipākadāyinī upapajjavedanīyakammaṃ nāma. Purimaupamāyayevāti migaluddakopamāyayeva.
сад̇и сам̣саараббавад̇д̇ияаад̇и иминаа асад̇и сам̣саараббавад̇д̇ияам̣ ахосигаммабагкз д̇идтад̇и вибажжаногаасасса абхаавад̇од̇и д̣̇ийбзд̇и. яам̣ г̇аруганд̇и яам̣ агусалам̣ махаасааваж̇ж̇ам̣, гусалан̃жа махаанубхаавам̣ гаммам̣. гусалам̣ ваа хи ход̇у агусалам̣ ваа, яам̣ г̇аругам̣ маад̇угхаад̇аад̣̇игаммам̣ ваа махаг̇г̇ад̇агаммам̣ ваа, д̇ад̣̇зва батамам̣ вибажжад̇и. д̇знааха ‘‘гусалаагусалзсу банаа’’д̇иаад̣̇и. яам̣ б̣ахуланд̇и яам̣ б̣ахулам̣ абхин̣хасо гад̇ам̣ самаасзвид̇ам̣. д̇знааха ‘‘гусалаагусалзсу бана яам̣ б̣ахулам̣ ход̇ий’’д̇иаад̣̇и. яад̣̇аасаннам̣ наама маран̣агаалз ануссарид̇ам̣ гаммам̣, аасаннагаалз гад̇з бана вад̇д̇аб̣б̣амзва над̇т̇ийд̇и ааха ‘‘яам̣ бана гусалаагусалзсу аасаннамаран̣з’’д̇иаад̣̇и. ануссарид̇унд̇и бариб̣яад̇д̇абхаавзна ануссарид̇ум̣.
Sati saṃsārappavattiyāti iminā asati saṃsārappavattiyaṃ ahosikammapakkhe tiṭṭhati vipaccanokāsassa abhāvatoti dīpeti. Yaṃ garukanti yaṃ akusalaṃ mahāsāvajjaṃ, kusalañca mahānubhāvaṃ kammaṃ. Kusalaṃ vā hi hotu akusalaṃ vā, yaṃ garukaṃ mātughātādikammaṃ vā mahaggatakammaṃ vā, tadeva paṭhamaṃ vipaccati. Tenāha ‘‘kusalākusalesu panā’’tiādi. Yaṃ bahulanti yaṃ bahulaṃ abhiṇhaso kataṃ samāsevitaṃ. Tenāha ‘‘kusalākusalesu pana yaṃ bahulaṃ hotī’’tiādi. Yadāsannaṃ nāma maraṇakāle anussaritaṃ kammaṃ, āsannakāle kate pana vattabbameva natthīti āha ‘‘yaṃ pana kusalākusalesu āsannamaraṇe’’tiādi. Anussaritunti paribyattabhāvena anussarituṃ.
д̇зсам̣ абхаавзд̇и д̇зсам̣ яам̣г̇аругаад̣̇ийнам̣ д̇ин̣н̣ам̣ гаммаанам̣ абхаавз. яад̇т̇а гад̇т̇ажи вибаагам̣ д̣̇зд̇ийд̇и бадисанд̇хиж̇анагавасзна вибаагам̣ д̣̇зд̇и. бадисанд̇хиж̇анагавасзна хи г̇аругаад̣̇игаммажад̇уггам̣ вуд̇д̇ам̣. д̇ад̇т̇а г̇аругам̣ саб̣б̣абатамам̣ вибажжад̇и, г̇аругз асад̇и б̣ахулийгад̇ам̣, д̇асмим̣ асад̇и яад̣̇аасаннам̣ , д̇асмим̣ асад̇и ‘‘гадад̇д̇аа ваа банаа’’д̇и вуд̇д̇ам̣ буримаж̇аад̇ийсу гад̇агаммам̣ вибажжад̇и. б̣ахулаасаннабуб̣б̣агад̇зсу жа б̣алааб̣алам̣ ж̇аанид̇аб̣б̣ам̣. баабад̇о баабанд̇арам̣ галяаан̣ан̃жа, галяаан̣ад̇о галяаан̣анд̇арам̣ баабан̃жа б̣ахулийгад̇ам̣. д̇ад̇о махад̇ова буб̣б̣агад̇аад̣̇и аббан̃жа б̣ахулаануссаран̣зна виббадисаараад̣̇иж̇ананад̇о, бадибагкасса абарибун̣н̣ад̇ааяа аарад̣̇д̇хавибаагасса гаммасса гаммасзсасса ваа абарабарияааяавзд̣̇анийяасса абаригкийн̣ад̇ааяа санд̇ад̇ияаа барин̣аамависзсад̇од̇и д̇зхи д̇зхи гааран̣зхи ааяуухид̇апалам̣ батамам̣ вибажжад̇и. махаанаарад̣̇агассабаж̇аад̇агз (ж̇аа. 2.22.1153 аад̣̇аяо) вид̣̇зхаран̃н̃о сзнаабад̇и алаад̇о, б̣ийж̇аго д̣̇аасо, рааж̇аган̃н̃аа ружаа жа зд̇т̇а нид̣̇ассанам̣. д̇ат̇аа хи вуд̇д̇ам̣ бхаг̇авад̇аа –
Tesaṃ abhāveti tesaṃ yaṃgarukādīnaṃ tiṇṇaṃ kammānaṃ abhāve. Yattha katthaci vipākaṃ detīti paṭisandhijanakavasena vipākaṃ deti. Paṭisandhijanakavasena hi garukādikammacatukkaṃ vuttaṃ. Tattha garukaṃ sabbapaṭhamaṃ vipaccati, garuke asati bahulīkataṃ, tasmiṃ asati yadāsannaṃ , tasmiṃ asati ‘‘kaṭattā vā panā’’ti vuttaṃ purimajātīsu katakammaṃ vipaccati. Bahulāsannapubbakatesu ca balābalaṃ jānitabbaṃ. Pāpato pāpantaraṃ kalyāṇañca, kalyāṇato kalyāṇantaraṃ pāpañca bahulīkataṃ. Tato mahatova pubbakatādi appañca bahulānussaraṇena vippaṭisārādijananato, paṭipakkhassa aparipuṇṇatāya āraddhavipākassa kammassa kammasesassa vā aparapariyāyavedanīyassa aparikkhīṇatāya santatiyā pariṇāmavisesatoti tehi tehi kāraṇehi āyūhitaphalaṃ paṭhamaṃ vipaccati. Mahānāradakassapajātake (jā. 2.22.1153 ādayo) videharañño senāpati alāto, bījako dāso, rājakaññā rucā ca ettha nidassanaṃ. Tathā hi vuttaṃ bhagavatā –
‘‘д̇ад̇раананд̣̇а, явааяам̣ буг̇г̇ало ид̇ха баан̣аад̇ибаад̇ий…бз… мижчаад̣̇идти. гааяасса бхзд̣̇аа барам̣ маран̣аа абааяам̣ д̣̇уг̇г̇ад̇им̣ винибаад̇ам̣ нираяам̣ убабаж̇ж̇ад̇и, буб̣б̣з ваасса д̇ам̣ гад̇ам̣ ход̇и баабагаммам̣ д̣̇угкавзд̣̇анийяам̣, бажчаа ваасса д̇ам̣ гад̇ам̣ ход̇и баабагаммам̣ д̣̇угкавзд̣̇анийяам̣, маран̣агаалз ваасса ход̇и мижчаад̣̇идти самад̇д̇аа самаад̣̇иннаа, д̇зна со гааяасса бхзд̣̇аа барам̣ маран̣аа абааяам̣ д̣̇уг̇г̇ад̇им̣ винибаад̇ам̣ нираяам̣ убабаж̇ж̇ад̇ий’’д̇и –
‘‘Tatrānanda, yvāyaṃ puggalo idha pāṇātipātī…pe… micchādiṭṭhi. Kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati, pubbe vāssa taṃ kataṃ hoti pāpakammaṃ dukkhavedanīyaṃ, pacchā vāssa taṃ kataṃ hoti pāpakammaṃ dukkhavedanīyaṃ, maraṇakāle vāssa hoti micchādiṭṭhi samattā samādinnā, tena so kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjatī’’ti –
аад̣̇и . саб̣б̣ам̣ махаагаммавибхан̇г̇асуд̇д̇ам̣ (ма. ни. 3.303) вид̇т̇аарзд̇аб̣б̣ам̣. гим̣ б̣ахунаа. яам̣ д̇ам̣ д̇ат̇ааг̇ад̇асса махаагаммавибхан̇г̇ан̃аан̣ам̣, д̇ассзвааяам̣ висаяо, яад̣̇ид̣̇ам̣ д̇асса д̇асса гаммасса д̇зна д̇зна гааран̣зна буб̣б̣аабаравибаагад̇аа самад̇т̇ийяад̇и.
Ādi . Sabbaṃ mahākammavibhaṅgasuttaṃ (ma. ni. 3.303) vitthāretabbaṃ. Kiṃ bahunā. Yaṃ taṃ tathāgatassa mahākammavibhaṅgañāṇaṃ, tassevāyaṃ visayo, yadidaṃ tassa tassa kammassa tena tena kāraṇena pubbāparavipākatā samatthīyati.
ид̣̇аани ж̇анагаад̣̇игаммажад̇уггам̣ вибхаж̇анд̇о ‘‘ж̇анагам̣ наамаа’’д̇иаад̣̇имааха. бавад̇д̇им̣ на ж̇анзд̇ийд̇и бавад̇д̇ивибаагам̣ на ж̇анзд̇и. батаманаяз ж̇анагагаммасса бадисанд̇хивибаагамад̇д̇ассзва вуд̇д̇ад̇д̇аа д̇асса бавад̇д̇ивибаагад̣̇ааяагад̇д̇амби ануж̇аананд̇о ‘‘абаро наяо’’д̇иаад̣̇имааха. д̇ад̇т̇а бадисанд̇хид̣̇аанаад̣̇ивасзна вибаагасанд̇аанасса ниб̣б̣ад̇д̇агам̣ ж̇анагам̣. сукад̣̇угкасанд̇аанасса наамаруубаббаб̣анд̇хасса ваа жирад̇арам̣ бавад̇д̇ихзд̇убхууд̇ам̣ убад̇т̇амбхагам̣. д̇знааха ‘‘сукад̣̇угкам̣ убад̇т̇амбхзд̇и, ад̣̇д̇хаанам̣ бавад̇д̇зд̇ий’’д̇и. убабийл̣агам̣ сукад̣̇угкаббаб̣анд̇хз бавад̇д̇амаанз сан̣игам̣ сан̣игам̣ хаабзд̇и. д̇знааха ‘‘сукад̣̇угкам̣ бийл̣зд̇и б̣аад̇хзд̇и, ад̣̇д̇хаанам̣ бавад̇д̇ид̇ум̣ на д̣̇зд̇ий’’д̇и.
Idāni janakādikammacatukkaṃ vibhajanto ‘‘janakaṃ nāmā’’tiādimāha. Pavattiṃ na janetīti pavattivipākaṃ na janeti. Paṭhamanaye janakakammassa paṭisandhivipākamattasseva vuttattā tassa pavattivipākadāyakattampi anujānanto ‘‘aparo nayo’’tiādimāha. Tattha paṭisandhidānādivasena vipākasantānassa nibbattakaṃ janakaṃ. Sukhadukkhasantānassa nāmarūpappabandhassa vā cirataraṃ pavattihetubhūtaṃ upatthambhakaṃ. Tenāha ‘‘sukhadukkhaṃ upatthambheti, addhānaṃ pavattetī’’ti. Upapīḷakaṃ sukhadukkhappabandhe pavattamāne saṇikaṃ saṇikaṃ hāpeti. Tenāha ‘‘sukhadukkhaṃ pīḷeti bādheti, addhānaṃ pavattituṃ na detī’’ti.
ваад̇агаал̣аго махаллаго жорз гхаад̇зд̇ум̣ на саггод̇ийд̇и со гира махаллагагаалз згаббахаарзна сийсам̣ чинд̣̇ид̇ум̣ на саггод̇и, д̣̇вз д̇аяо ваарз бахаранд̇о мануссз гиламзд̇и, д̇асмаа д̇з звамаахам̣су. ануломигам̣ канд̇им̣ бадилабхид̇ваад̇и сод̇аабад̇д̇имаг̇г̇асса орад̇о ануломигам̣ канд̇им̣ лабхид̇ваа . д̇арун̣аважчааяа г̇аавияаа мад̣̇д̣̇ид̇ваа ж̇ийвид̇агкаяам̣ баабид̇од̇и згаа гира яагкиний д̇хзнувзсзна ааг̇анд̇ваа урз бахарид̇ваа маарзси, д̇ам̣ санд̇хааязд̇ам̣ вуд̇д̇ам̣. наг̇арз бхаво нааг̇арияо.
Vātakāḷako mahallako core ghātetuṃ na sakkotīti so kira mahallakakāle ekappahārena sīsaṃ chindituṃ na sakkoti, dve tayo vāre paharanto manusse kilameti, tasmā te evamāhaṃsu. Anulomikaṃ khantiṃ paṭilabhitvāti sotāpattimaggassa orato anulomikaṃ khantiṃ labhitvā . Taruṇavacchāya gāviyā madditvā jīvitakkhayaṃ pāpitoti ekā kira yakkhinī dhenuvesena āgantvā ure paharitvā māresi, taṃ sandhāyetaṃ vuttaṃ. Nagare bhavo nāgariyo.
гхаад̇зд̇ваад̇и убажчинд̣̇ид̇ваа. гаммасса убажчинд̣̇анам̣ наама д̇асса вибаагаббадиб̣ааханамзваад̇и ааха ‘‘д̇асса вибаагам̣ бадиб̣аахид̇ваа’’д̇и. д̇ан̃жа ад̇д̇ано вибаагуббад̇д̇ияаа огаасагаран̣анд̇и вуд̇д̇ам̣ ‘‘ад̇д̇ано вибаагасса огаасам̣ гарод̇ий’’д̇и. вибажжанааяа гад̇огаасам̣ гаммам̣ вибаггаммзва наама ход̇ийд̇и ааха ‘‘звам̣ бана гаммзна гад̇з огаасз д̇ам̣ вибаагам̣ уббаннам̣ наама вужжад̇ий’’д̇и. убабийл̣агам̣ ан̃н̃асса вибаагам̣ убажчинд̣̇ад̇и, на саяам̣ ад̇д̇ано вибаагам̣ д̣̇зд̇и. убагхаад̇агам̣ бана д̣̇уб̣б̣алагаммам̣ убажчинд̣̇ид̇ваа ад̇д̇ано вибаагам̣ уббаад̣̇зд̇ийд̇и аяамзд̇зсам̣ висзсо. гин̃жи б̣ахвааб̣аад̇хад̇аад̣̇ибажжаяуубасаннибаад̇зна вибаагасса виб̣аад̇хагам̣ убабийл̣агам̣, д̇ат̇аа вибаагассзва убажчзд̣̇агам̣. убагхаад̇агагаммам̣ бана убагхаад̇зд̇ваа ад̇д̇ано вибаагасса огаасагаран̣зна вибажжанз сад̇и ж̇анагамзва сияаа. ж̇анагаад̣̇ибхааво наама вибаагам̣ бад̇и ижчид̇аб̣б̣о, на гаммам̣ бад̇ийд̇и вибаагассзва убагхаад̇агад̇аа яуд̇д̇аа вияа д̣̇иссад̇и, виймам̣сид̇аб̣б̣ам̣.
Ghātetvāti upacchinditvā. Kammassa upacchindanaṃ nāma tassa vipākappaṭibāhanamevāti āha ‘‘tassa vipākaṃ paṭibāhitvā’’ti. Tañca attano vipākuppattiyā okāsakaraṇanti vuttaṃ ‘‘attano vipākassa okāsaṃ karotī’’ti. Vipaccanāya katokāsaṃ kammaṃ vipakkammeva nāma hotīti āha ‘‘evaṃ pana kammena kate okāse taṃ vipākaṃ uppannaṃ nāma vuccatī’’ti. Upapīḷakaṃ aññassa vipākaṃ upacchindati, na sayaṃ attano vipākaṃ deti. Upaghātakaṃ pana dubbalakammaṃ upacchinditvā attano vipākaṃ uppādetīti ayametesaṃ viseso. Kiñci bahvābādhatādipaccayūpasannipātena vipākassa vibādhakaṃ upapīḷakaṃ, tathā vipākasseva upacchedakaṃ. Upaghātakakammaṃ pana upaghātetvā attano vipākassa okāsakaraṇena vipaccane sati janakameva siyā. Janakādibhāvo nāma vipākaṃ pati icchitabbo, na kammaṃ patīti vipākasseva upaghātakatā yuttā viya dissati, vīmaṃsitabbaṃ.
абаро наяо – яасмим̣ гаммз гад̇з бадисанд̇хияам̣ бавад̇д̇з жа вибаагагадад̇д̇ааруубаанам̣ уббад̇д̇и ход̇и, д̇ам̣ ж̇анагам̣. яасмим̣ бана гад̇з ан̃н̃зна ж̇анид̇асса идтасса ваа анидтасса ваа паласса виб̣аад̇хагавижчзд̣̇агабажжаяаануббад̇д̇ияаа убаб̣рууханабажжаяуббад̇д̇ияаа ж̇анагасаамад̇т̇ияаануруубам̣ барисуд̣̇д̇хижирад̇араббаб̣анд̇хаа ход̇и, д̇ам̣ убад̇т̇амбхагам̣. ж̇анагзна ниб̣б̣ад̇д̇ид̇ам̣ гусалапалам̣ ваа агусалапалам̣ ваа язна бажжанийгабхууд̇зна рог̇ад̇хаад̇увисамад̇аад̣̇инимид̇д̇ад̇ааяа виб̣аад̇хаяад̇и, д̇ам̣ убабийл̣агам̣. язна бана гаммунаа ж̇анагасаамад̇т̇ияавасзна жирад̇араббаб̣анд̇хаарахамби самаанам̣ палам̣ вижчзд̣̇агабажжаяуббад̇д̇ияаа убахан̃н̃ад̇и вижчиж̇ж̇ад̇и, д̇ам̣ убагхаад̇аганд̇и аяамзд̇т̇а сааро.
Aparo nayo – yasmiṃ kamme kate paṭisandhiyaṃ pavatte ca vipākakaṭattārūpānaṃ uppatti hoti, taṃ janakaṃ. Yasmiṃ pana kate aññena janitassa iṭṭhassa vā aniṭṭhassa vā phalassa vibādhakavicchedakapaccayānuppattiyā upabrūhanapaccayuppattiyā janakasāmatthiyānurūpaṃ parisuddhiciratarappabandhā hoti, taṃ upatthambhakaṃ. Janakena nibbattitaṃ kusalaphalaṃ vā akusalaphalaṃ vā yena paccanīkabhūtena rogadhātuvisamatādinimittatāya vibādhayati, taṃ upapīḷakaṃ. Yena pana kammunā janakasāmatthiyavasena ciratarappabandhārahampi samānaṃ phalaṃ vicchedakapaccayuppattiyā upahaññati vicchijjati, taṃ upaghātakanti ayamettha sāro.
д̇ад̇т̇а гзжи д̣̇уд̇ияасса гусалабхаавам̣ ид̇т̇ад̇д̇амааг̇ад̇асса аббааб̣аад̇хад̣̇ийгхааяугад̇аасам̣вад̇д̇анавасзна, бажчимаанам̣ д̣̇виннам̣ агусалабхаавам̣ б̣ахвааб̣аад̇хааббааяугад̇аасам̣вад̇д̇анавасзна ван̣н̣знд̇и. д̇ат̇аа жа вуд̇д̇ам̣ маж̇жхиманигааяз жуул̣агаммавибхан̇г̇асуд̇д̇аван̣н̣анааяам̣ (ма. ни. адта. 3.290) –
Tattha keci dutiyassa kusalabhāvaṃ itthattamāgatassa appābādhadīghāyukatāsaṃvattanavasena, pacchimānaṃ dvinnaṃ akusalabhāvaṃ bahvābādhaappāyukatāsaṃvattanavasena vaṇṇenti. Tathā ca vuttaṃ majjhimanikāye cūḷakammavibhaṅgasuttavaṇṇanāyaṃ (ma. ni. aṭṭha. 3.290) –
‘‘жад̇д̇аари хи гаммаани – убабийл̣агам̣, убажчзд̣̇агам̣, ж̇анагам̣, убад̇т̇амбхаганд̇и. б̣алавагаммзна хи ниб̣б̣ад̇д̇ам̣ бавад̇д̇з убабийл̣агам̣ ааг̇анд̇ваа ад̇т̇ад̇о звам̣ вад̣̇ад̇и наама ‘сажаахам̣ батамад̇арам̣ ж̇аанзяяам̣, на д̇з ид̇ха ниб̣б̣ад̇д̇ид̇ум̣ д̣̇ад̣̇зяяам̣, жад̇уусуязва д̇ам̣ абааязсу ниб̣б̣ад̇д̇аабзяяам̣. ход̇у, д̇вам̣ яад̇т̇а гад̇т̇ажи ниб̣б̣ад̇д̇а, ахам̣ убабийл̣агагаммам̣ наама д̇ам̣ бийл̣зд̇ваа нирож̇ам̣ нияуусам̣ гасадам̣ гариссаамий’д̇и. д̇ад̇о бадтааяа д̇ам̣ д̇аад̣̇исам̣ гарод̇и. гим̣ гарод̇и? бариссаяам̣ убанзд̇и, бхог̇з винаасзд̇и.
‘‘Cattāri hi kammāni – upapīḷakaṃ, upacchedakaṃ, janakaṃ, upatthambhakanti. Balavakammena hi nibbattaṃ pavatte upapīḷakaṃ āgantvā atthato evaṃ vadati nāma ‘sacāhaṃ paṭhamataraṃ jāneyyaṃ, na te idha nibbattituṃ dadeyyaṃ, catūsuyeva taṃ apāyesu nibbattāpeyyaṃ. Hotu, tvaṃ yattha katthaci nibbatta, ahaṃ upapīḷakakammaṃ nāma taṃ pīḷetvā nirojaṃ niyūsaṃ kasaṭaṃ karissāmī’ti. Tato paṭṭhāya taṃ tādisaṃ karoti. Kiṃ karoti? Parissayaṃ upaneti, bhoge vināseti.
‘‘д̇ад̇т̇а д̣̇аарагасса маад̇угужчияам̣ ниб̣б̣ад̇д̇агаалад̇о бадтааяа маад̇у ассаад̣̇о ваа сукам̣ ваа на ход̇и, маад̇аабид̇уунам̣ бийл̣аава уббаж̇ж̇ад̇и. звам̣ бариссаяам̣ убанзд̇и. д̣̇аарагасса бана маад̇угужчимхи ниб̣б̣ад̇д̇агаалад̇о бадтааяа г̇зхз бхог̇аа уд̣̇агам̣ бад̇ваа лон̣ам̣ вияа рааж̇аад̣̇ийнам̣ васзна нассанд̇и, гумбхад̣̇оханад̇хзнуяо кийрам̣ на д̣̇знд̇и, суурад̇аа г̇он̣аа жан̣д̣аа хонд̇и, гаан̣аа хонд̇и, кан̃ж̇аа хонд̇и, г̇оман̣д̣алз рог̇о бад̇ад̇и, д̣̇аасаад̣̇аяо важанам̣ на гаронд̇и, ваабид̇ам̣ сассам̣ на ж̇ааяад̇и, г̇зхаг̇ад̇ам̣ г̇зхз, аран̃н̃аг̇ад̇ам̣ аран̃н̃з нассад̇и, анубуб̣б̣зна гхаасажчаад̣̇анамад̇д̇ам̣ д̣̇уллабхам̣ ход̇и, г̇аб̣бхабарихааро на ход̇и, виж̇аад̇агаалз маад̇у т̇ан̃н̃ам̣ чиж̇ж̇ад̇и, д̣̇аараго барихаарам̣ алабханд̇о бийл̣ид̇о нирож̇о нияуусо гасадо ход̇и. ид̣̇ам̣ убабийл̣агагаммам̣ наама.
‘‘Tattha dārakassa mātukucchiyaṃ nibbattakālato paṭṭhāya mātu assādo vā sukhaṃ vā na hoti, mātāpitūnaṃ pīḷāva uppajjati. Evaṃ parissayaṃ upaneti. Dārakassa pana mātukucchimhi nibbattakālato paṭṭhāya gehe bhogā udakaṃ patvā loṇaṃ viya rājādīnaṃ vasena nassanti, kumbhadohanadhenuyo khīraṃ na denti, sūratā goṇā caṇḍā honti, kāṇā honti, khañjā honti, gomaṇḍale rogo patati, dāsādayo vacanaṃ na karonti, vāpitaṃ sassaṃ na jāyati, gehagataṃ gehe, araññagataṃ araññe nassati, anupubbena ghāsacchādanamattaṃ dullabhaṃ hoti, gabbhaparihāro na hoti, vijātakāle mātu thaññaṃ chijjati, dārako parihāraṃ alabhanto pīḷito nirojo niyūso kasaṭo hoti. Idaṃ upapīḷakakammaṃ nāma.
‘‘д̣̇ийгхааяугагаммзна бана ниб̣б̣ад̇д̇асса убажчзд̣̇агагаммам̣ ааг̇анд̇ваа ааяум̣ чинд̣̇ад̇и. яат̇аа хи бурисо адтусабхаг̇аманам̣ гад̇ваа сарам̣ кибзяяа, д̇аман̃н̃о д̇хануд̇о муд̇д̇амад̇д̇ам̣ муг̇г̇арзна бахарид̇ваа д̇ад̇т̇зва баад̇зяяа, звам̣ д̣̇ийгхааяугагаммзна ниб̣б̣ад̇д̇асса убажчзд̣̇агагаммам̣ ааяум̣ чинд̣̇ад̇и. гим̣ гарод̇и? жораанам̣ адавим̣ бавзсзд̇и, ваал̣амажчод̣̇агам̣ од̇аарзд̇и, ан̃н̃ад̇арам̣ ваа бана сабариссаяатаанам̣ убанзд̇и. ид̣̇ам̣ убажчзд̣̇агагаммам̣ наама. ‘убагхаад̇ага’нд̇иби зд̇ассзва наамам̣. бадисанд̇хиниб̣б̣ад̇д̇агам̣ бана гаммам̣ ж̇анагагаммам̣ наама. аббабхог̇агулаад̣̇ийсу ниб̣б̣ад̇д̇асса бхог̇асамбад̣̇аад̣̇игаран̣зна убад̇т̇амбхагагаммам̣ убад̇т̇амбхагагаммам̣ наама.
‘‘Dīghāyukakammena pana nibbattassa upacchedakakammaṃ āgantvā āyuṃ chindati. Yathā hi puriso aṭṭhusabhagamanaṃ katvā saraṃ khipeyya, tamañño dhanuto muttamattaṃ muggarena paharitvā tattheva pāteyya, evaṃ dīghāyukakammena nibbattassa upacchedakakammaṃ āyuṃ chindati. Kiṃ karoti? Corānaṃ aṭaviṃ paveseti, vāḷamacchodakaṃ otāreti, aññataraṃ vā pana saparissayaṭhānaṃ upaneti. Idaṃ upacchedakakammaṃ nāma. ‘Upaghātaka’ntipi etasseva nāmaṃ. Paṭisandhinibbattakaṃ pana kammaṃ janakakammaṃ nāma. Appabhogakulādīsu nibbattassa bhogasampadādikaraṇena upatthambhakakammaṃ upatthambhakakammaṃ nāma.
‘‘барид̇д̇агаммзнаби ниб̣б̣ад̇д̇ам̣ зд̇ам̣ бавад̇д̇з баан̣аад̇ибаад̇аад̣̇ивирад̇игаммам̣ ааг̇анд̇ваа ад̇т̇ад̇о звам̣ вад̣̇ад̇и наама ‘сажаахам̣ батамад̇арам̣ ж̇аанзяяам̣, на д̇з ид̇ха ниб̣б̣ад̇д̇ид̇ум̣ д̣̇ад̣̇зяяам̣, д̣̇звалогзязва д̇ам̣ ниб̣б̣ад̇д̇аабзяяам̣, ход̇у, д̇вам̣ яад̇т̇а гад̇т̇ажи ниб̣б̣ад̇д̇а, ахам̣ убад̇т̇амбхагагаммам̣ наама убад̇т̇амбхам̣ д̇з гариссаамий’д̇и убад̇т̇амбхам̣ гарод̇и. гим̣ гарод̇и? бариссаяам̣ наасзд̇и, бхог̇з уббаад̣̇зд̇и.
‘‘Parittakammenapi nibbattaṃ etaṃ pavatte pāṇātipātādiviratikammaṃ āgantvā atthato evaṃ vadati nāma ‘sacāhaṃ paṭhamataraṃ jāneyyaṃ, na te idha nibbattituṃ dadeyyaṃ, devalokeyeva taṃ nibbattāpeyyaṃ, hotu, tvaṃ yattha katthaci nibbatta, ahaṃ upatthambhakakammaṃ nāma upatthambhaṃ te karissāmī’ti upatthambhaṃ karoti. Kiṃ karoti? Parissayaṃ nāseti, bhoge uppādeti.
‘‘д̇ад̇т̇а д̣̇аарагасса маад̇угужчияам̣ ниб̣б̣ад̇д̇агаалад̇о бадтааяа маад̇аабид̇уунам̣ сукамзва саад̇амзва ход̇и. язби багад̇ияаа мануссаамануссабариссаяаа хонд̇и, д̇з саб̣б̣з абаг̇ажчанд̇и . звам̣ бариссаяам̣ наасзд̇и. д̣̇аарагасса бана маад̇угужчимхи ниб̣б̣ад̇д̇агаалад̇о бадтааяа г̇зхз бхог̇аанам̣ бамаан̣ам̣ на ход̇и, нид̇хигумбхияо бурад̇оби бажчад̇оби г̇зхам̣ бариваддамаанаа бависанд̇и. маад̇аабид̇аро барзхи табид̇ад̇ханассаби саммукийбхаавам̣ г̇ажчанд̇и, д̇хзнуяо б̣ахукийраа хонд̇и, г̇он̣аа сукасийлаа хонд̇и, ваббадтаанз сассаани самбаж̇ж̇анд̇и, вад̣дхияаа ваа самбаяуд̇д̇ам̣, д̇аавагаалигам̣ ваа д̣̇иннам̣ д̇ханам̣ ажод̣̇ид̇аа саяамзва аахарид̇ваа д̣̇знд̇и, д̣̇аасаад̣̇аяо суб̣б̣ажаа хонд̇и, гамманд̇аа на барихааяанд̇и, д̣̇аараго г̇аб̣бхад̇о бадтааяа барихаарам̣ лабхад̇и, гомааригавзж̇ж̇аа саннихид̇аава хонд̇и. г̇ахабад̇игулз ж̇аад̇о сздтидтаанам̣, амажжагулаад̣̇ийсу ж̇аад̇о сзнаабад̇идтаанаад̣̇ийни лабхад̇и. звам̣ бхог̇з уббаад̣̇зд̇и. со абариссаяо сабхог̇о жирам̣ ж̇ийвад̇и. ид̣̇ам̣ убад̇т̇амбхагагаммам̣ наама. имзсу жад̇уусу буримаани д̣̇вз агусалаанзва, ж̇анагам̣ гусаламби агусаламби, убад̇т̇амбхагам̣ гусаламзваа’’д̇и.
‘‘Tattha dārakassa mātukucchiyaṃ nibbattakālato paṭṭhāya mātāpitūnaṃ sukhameva sātameva hoti. Yepi pakatiyā manussāmanussaparissayā honti, te sabbe apagacchanti . Evaṃ parissayaṃ nāseti. Dārakassa pana mātukucchimhi nibbattakālato paṭṭhāya gehe bhogānaṃ pamāṇaṃ na hoti, nidhikumbhiyo puratopi pacchatopi gehaṃ parivaṭṭamānā pavisanti. Mātāpitaro parehi ṭhapitadhanassapi sammukhībhāvaṃ gacchanti, dhenuyo bahukhīrā honti, goṇā sukhasīlā honti, vappaṭṭhāne sassāni sampajjanti, vaḍḍhiyā vā sampayuttaṃ, tāvakālikaṃ vā dinnaṃ dhanaṃ acoditā sayameva āharitvā denti, dāsādayo subbacā honti, kammantā na parihāyanti, dārako gabbhato paṭṭhāya parihāraṃ labhati, komārikavejjā sannihitāva honti. Gahapatikule jāto seṭṭhiṭṭhānaṃ, amaccakulādīsu jāto senāpatiṭṭhānādīni labhati. Evaṃ bhoge uppādeti. So aparissayo sabhogo ciraṃ jīvati. Idaṃ upatthambhakakammaṃ nāma. Imesu catūsu purimāni dve akusalāneva, janakaṃ kusalampi akusalampi, upatthambhakaṃ kusalamevā’’ti.
зд̇т̇а виб̣аад̇хуубагхаад̇аа наама гусалавибаагамхи на яуд̇д̇аад̇и ад̇хиббааязна ‘‘д̣̇вз агусалаанзваа’’д̇и вуд̇д̇ам̣. д̣̇звад̣̇ад̇д̇аад̣̇ийнам̣ бана нааг̇аад̣̇ийнам̣ ид̇о ануббад̣̇иннаяаабанагабзд̇аанан̃жа нарагаад̣̇ийсу агусалавибаагуубад̇т̇амбхануубабийл̣ануубагхаад̇агаани санд̇ийд̇и жад̇уннамби гусалаагусалабхааво на вируж̇жхад̇и. зван̃жа гад̇ваа яаа б̣ахуусу аананд̇ариязсу гад̇зсу згзна г̇ахид̇аббадисанд̇хигасса ид̇арзсам̣ д̇асса ануб̣алаббад̣̇ааяид̇аа вуд̇д̇аа, сааби самад̇т̇ид̇аа ход̇и.
Ettha vibādhūpaghātā nāma kusalavipākamhi na yuttāti adhippāyena ‘‘dve akusalānevā’’ti vuttaṃ. Devadattādīnaṃ pana nāgādīnaṃ ito anuppadinnayāpanakapetānañca narakādīsu akusalavipākūpatthambhanūpapīḷanūpaghātakāni santīti catunnampi kusalākusalabhāvo na virujjhati. Evañca katvā yā bahūsu ānantariyesu katesu ekena gahitappaṭisandhikassa itaresaṃ tassa anubalappadāyitā vuttā, sāpi samatthitā hoti.
суд̇д̇анд̇абарияааязна згаад̣̇аса гаммаани вибхаж̇ид̇ваа ид̣̇аани абхид̇хаммабарияаабаннам̣ д̣̇ассзнд̇о ‘‘ад̇т̇згажжаани баабагаани гаммасамаад̣̇аанааний’’д̇иаад̣̇инаа вибхан̇г̇абаал̣им̣ (вибха. 810) д̣̇ассзд̇и. д̇ад̇т̇а г̇ад̇исамбад̇д̇ибадиб̣аал̣хаанийд̇и г̇ад̇исамбад̇д̇ияаа бадиб̣аахид̇аани ниваарид̇аани бадисзд̇хид̇аани. сзсабад̣̇зсуби зсзва наяо. д̇ад̇т̇а жа г̇ад̇исамбад̇д̇ийд̇и самбаннаг̇ад̇и д̣̇звалого жа мануссалого жа. г̇ад̇ивибад̇д̇ийд̇и вибаннаг̇ад̇и жад̇д̇ааро абааяаа. убад̇хисамбад̇д̇ийд̇и ад̇д̇абхаавасамид̣̇д̇хи. убад̇хивибад̇д̇ийд̇и хийнаад̇д̇абхаавад̇аа. гааласамбад̇д̇ийд̇и сурааж̇асумануссагааласан̇каад̇о самбаннагаало. гаалавибад̇д̇ийд̇и д̣̇урааж̇ад̣̇уммануссагааласан̇каад̇о вибаннагаало. баяог̇асамбад̇д̇ийд̇и саммаабаяог̇о. баяог̇авибад̇д̇ийд̇и мижчаабаяог̇о.
Suttantapariyāyena ekādasa kammāni vibhajitvā idāni abhidhammapariyāpannaṃ dassento ‘‘atthekaccāni pāpakāni kammasamādānānī’’tiādinā vibhaṅgapāḷiṃ (vibha. 810) dasseti. Tattha gatisampattipaṭibāḷhānīti gatisampattiyā paṭibāhitāni nivāritāni paṭisedhitāni. Sesapadesupi eseva nayo. Tattha ca gatisampattīti sampannagati devaloko ca manussaloko ca. Gativipattīti vipannagati cattāro apāyā. Upadhisampattīti attabhāvasamiddhi. Upadhivipattīti hīnaattabhāvatā. Kālasampattīti surājasumanussakālasaṅkhāto sampannakālo. Kālavipattīti durājadummanussakālasaṅkhāto vipannakālo. Payogasampattīti sammāpayogo. Payogavipattīti micchāpayogo.
ид̣̇аани яат̇аавуд̇д̇абаал̣ияаа ад̇т̇ам̣ д̣̇ассзнд̇о ‘‘д̇ад̇т̇аа’’д̇иаад̣̇имааха. д̇ад̇т̇а анидтаарамман̣аанубхаванаарахз гаммз виж̇ж̇амаанзязваад̇и иминаа анидтаарамман̣аанубхавананиммид̇д̇агасса баабагаммасса саб̣бхаавам̣ д̣̇ассзд̇и. д̇ам̣ гамманд̇и д̇ам̣ баабагам̣ гаммам̣. згажжасса хи анидтаарамман̣аанубхавананимид̇д̇ам̣ б̣ахубаабагаммам̣ виж̇ж̇амаанамби г̇ад̇ивибад̇д̇ияам̣ тид̇ассзва вибажжад̇и. яад̣̇и бана со згзна галяаан̣агаммзна г̇ад̇исамбад̇д̇ияам̣ д̣̇звзсу ваа мануссзсу ваа ниб̣б̣ад̇д̇зяяа, д̇аад̣̇исз таанз агусаласса вааро над̇т̇и, зганд̇ам̣ гусалассзваад̇и д̇ам̣ гаммам̣ г̇ад̇исамбад̇д̇ибадиб̣аал̣хам̣ на вибажжад̇и. бад̇иб̣аахид̇ам̣ худ̇ваад̇и б̣аад̇хид̇ам̣ худ̇ваа. ад̇д̇абхаавасамид̣̇д̇хияанд̇и сарийрасамбад̇д̇ияам̣. гилидтагаммассаад̇и хад̇т̇имзн̣д̣аассаб̣анд̇хагаг̇обаалагаад̣̇игаммасса. балааяид̇аб̣б̣аяуд̇д̇агаалзд̇и хад̇т̇иаад̣̇ибажжад̇т̇игасамааг̇амагаалз. лан̃ж̇ам̣ д̣̇зд̇ийд̇и звам̣ мз б̣аад̇хад̇ам̣ барзсам̣ васз на ход̇ийд̇и д̣̇зд̇и. жоригаяуд̇д̇агаалзд̇и багкаб̣алаад̣̇ийнам̣ лаб̣бхамаанагаалз. анд̇арагаббзд̇и барияосаанаббад̇д̇з анд̇арагаббз.
Idāni yathāvuttapāḷiyā atthaṃ dassento ‘‘tatthā’’tiādimāha. Tattha aniṭṭhārammaṇānubhavanārahe kamme vijjamāneyevāti iminā aniṭṭhārammaṇānubhavananimmittakassa pāpakammassa sabbhāvaṃ dasseti. Taṃ kammanti taṃ pāpakaṃ kammaṃ. Ekaccassa hi aniṭṭhārammaṇānubhavananimittaṃ bahupāpakammaṃ vijjamānampi gativipattiyaṃ ṭhitasseva vipaccati. Yadi pana so ekena kalyāṇakammena gatisampattiyaṃ devesu vā manussesu vā nibbatteyya, tādise ṭhāne akusalassa vāro natthi, ekantaṃ kusalassevāti taṃ kammaṃ gatisampattipaṭibāḷhaṃ na vipaccati. Patibāhitaṃ hutvāti bādhitaṃ hutvā. Attabhāvasamiddhiyanti sarīrasampattiyaṃ. Kiliṭṭhakammassāti hatthimeṇḍaassabandhakagopālakādikammassa. Palāyitabbayuttakāleti hatthiādipaccatthikasamāgamakāle. Lañjaṃ detīti evaṃ me bādhataṃ paresaṃ vase na hotīti deti. Corikayuttakāleti pakkhabalādīnaṃ labbhamānakāle. Antarakappeti pariyosānappatte antarakappe.
абхид̇хамманаязна сол̣аса гаммаани вибхаж̇ид̇ваа бадисамбхид̣̇аамаг̇г̇абарияааязна (бади. ма. 1.234-235) д̣̇ваад̣̇аса гаммаани вибхаж̇ид̇ваа д̣̇ассзд̇ум̣ ‘‘абараанибий’’д̇иаад̣̇имааха. д̇ад̇т̇а ад̇ийд̇абхавзсу гад̇асса гаммасса ад̇ийд̇абхавзсуязва вибаггавибаагам̣ г̇ахзд̇ваа ‘‘ахоси гаммам̣ ахоси гаммавибааго’’д̇и вуд̇д̇анд̇и ааха ‘‘яам̣ гаммам̣ ад̇ийд̇з ааяуухид̇а’’нд̇иаад̣̇и. вибаагавааранд̇и вибажжанаавасарам̣ вибаагаваарам̣. ‘‘вибаагаваарам̣ лабхад̇ий’’д̇и иминаа вуд̇д̇амзвад̇т̇ам̣ ‘‘бадисанд̇хим̣ ж̇анзсий’’д̇иаад̣̇инаа вибхаавзд̇и. д̇ад̇т̇а бадисанд̇хим̣ ж̇анзсийд̇и иминаа жа бадисанд̇хид̣̇ааяагасса гаммасса бавад̇д̇ивибаагад̣̇ааяид̇ааби вуд̇д̇аа ход̇и. бавад̇д̇ивибаагассзва бана д̣̇ааяагам̣ руубаж̇анагасийсзна вад̣̇ад̇и. д̇ассзва ад̇ийд̇асса гаммасса д̣̇идтад̇хаммавзд̣̇анийяасса убабаж̇ж̇авзд̣̇анийяасса жа бажжаяавзгаллзна ад̇ийд̇абхавзсуязва авибаггавибааган̃жа, ад̇ийд̇зязва бариниб̣б̣уд̇асса д̣̇идтад̇хаммавзд̣̇анийяаубабаж̇ж̇авзд̣̇анийяаабарабарияааяавзд̣̇анийяасса гаммасса авибаггавибааган̃жа г̇ахзд̇ваа ‘‘ахоси гаммам̣ наахоси гаммавибааго’’д̇иби вуд̇д̇анд̇и ааха ‘‘яам̣ бана вибаагаваарам̣ на лабхий’’д̇иаад̣̇и.
Abhidhammanayena soḷasa kammāni vibhajitvā paṭisambhidāmaggapariyāyena (paṭi. ma. 1.234-235) dvādasa kammāni vibhajitvā dassetuṃ ‘‘aparānipī’’tiādimāha. Tattha atītabhavesu katassa kammassa atītabhavesuyeva vipakkavipākaṃ gahetvā ‘‘ahosi kammaṃ ahosi kammavipāko’’ti vuttanti āha ‘‘yaṃ kammaṃ atīte āyūhita’’ntiādi. Vipākavāranti vipaccanāvasaraṃ vipākavāraṃ. ‘‘Vipākavāraṃ labhatī’’ti iminā vuttamevatthaṃ ‘‘paṭisandhiṃ janesī’’tiādinā vibhāveti. Tattha paṭisandhiṃ janesīti iminā ca paṭisandhidāyakassa kammassa pavattivipākadāyitāpi vuttā hoti. Pavattivipākasseva pana dāyakaṃ rūpajanakasīsena vadati. Tasseva atītassa kammassa diṭṭhadhammavedanīyassa upapajjavedanīyassa ca paccayavekallena atītabhavesuyeva avipakkavipākañca, atīteyeva parinibbutassa diṭṭhadhammavedanīyaupapajjavedanīyaaparapariyāyavedanīyassa kammassa avipakkavipākañca gahetvā ‘‘ahosi kammaṃ nāhosi kammavipāko’’tipi vuttanti āha ‘‘yaṃ pana vipākavāraṃ na labhī’’tiādi.
ад̇ийд̇ассзва гаммасса авибаггавибаагасса бажжуббаннабхавз бажжаяасамбад̇д̇ияаа вибажжамаанам̣ вибаагам̣ г̇ахзд̇ваа ‘‘ахоси гаммам̣ ад̇т̇и гаммавибааго’’д̇и вуд̇д̇анд̇и ааха ‘‘яам̣ бана ад̇ийд̇з ааяуухид̇а’’нд̇иаад̣̇имааха. ад̇ийд̇ассзва гаммасса ад̇игганд̇авибаагагааласса жа бажжуббаннабхавз бариниб̣б̣ааяанд̇асса жа авибажжамаанавибаагам̣ г̇ахзд̇ваа ‘‘ахоси гаммам̣ над̇т̇и гаммавибааго’’д̇и вуд̇д̇анд̇и ааха ‘‘алад̣̇д̇хавибаагаваара’’нд̇иаад̣̇и. ад̇ийд̇ассзва гаммасса вибаагаарахасса авибаггавибаагасса анааг̇ад̇абхавз бажжаяасамбад̇д̇ияаа вибажжид̇аб̣б̣ам̣ вибаагам̣ г̇ахзд̇ваа ‘‘ахоси гаммам̣ бхависсад̇и гаммавибааго’’д̇и вуд̇д̇анд̇и д̣̇ассзнд̇о ‘‘яам̣ бана ад̇ийд̇з ааяуухид̇а’’нд̇иаад̣̇имааха. ад̇ийд̇ассзва гаммасса ад̇игганд̇авибаагагааласса жа анааг̇ад̇абхавз бариниб̣б̣ааяид̇аб̣б̣асса авибажжид̇аб̣б̣авибааган̃жа г̇ахзд̇ваа ‘‘ахоси гаммам̣ на бхависсад̇и гаммавибааго’’д̇и вуд̇д̇анд̇и ааха ‘‘яам̣ анааг̇ад̇з вибаагаваарам̣ на лабхиссад̇ий’’д̇иаад̣̇и. звам̣ д̇аава ад̇ийд̇агаммам̣ ад̇ийд̇абажжуббаннаанааг̇ад̇авибаагаавибаагавасзна чад̇хаа д̣̇ассид̇ам̣.
Atītasseva kammassa avipakkavipākassa paccuppannabhave paccayasampattiyā vipaccamānaṃ vipākaṃ gahetvā ‘‘ahosi kammaṃ atthi kammavipāko’’ti vuttanti āha ‘‘yaṃ pana atīte āyūhita’’ntiādimāha. Atītasseva kammassa atikkantavipākakālassa ca paccuppannabhave parinibbāyantassa ca avipaccamānavipākaṃ gahetvā ‘‘ahosi kammaṃ natthi kammavipāko’’ti vuttanti āha ‘‘aladdhavipākavāra’’ntiādi. Atītasseva kammassa vipākārahassa avipakkavipākassa anāgatabhave paccayasampattiyā vipaccitabbaṃ vipākaṃ gahetvā ‘‘ahosi kammaṃ bhavissati kammavipāko’’ti vuttanti dassento ‘‘yaṃ pana atīte āyūhita’’ntiādimāha. Atītasseva kammassa atikkantavipākakālassa ca anāgatabhave parinibbāyitabbassa avipaccitabbavipākañca gahetvā ‘‘ahosi kammaṃ na bhavissati kammavipāko’’ti vuttanti āha ‘‘yaṃ anāgate vipākavāraṃ na labhissatī’’tiādi. Evaṃ tāva atītakammaṃ atītapaccuppannānāgatavipākāvipākavasena chadhā dassitaṃ.
ид̣̇аани бажжуббаннабхавз гад̇асса д̣̇идтад̇хаммавзд̣̇анийяасса ид̇хзва вибажжамаанам̣ вибаагам̣ г̇ахзд̇ваа ‘‘ад̇т̇и гаммам̣ ад̇т̇и гаммавибааго’’д̇и вуд̇д̇анд̇и д̣̇ассзнд̇о ‘‘яам̣ бана зд̇арахи ааяуухид̇а’’нд̇иаад̣̇имааха. яам̣ бана зд̇арахи вибаагаваарам̣ на лабхад̇ийд̇иаад̣̇инаа д̇ассзва бажжуббаннасса гаммасса бажжаяавзгаллзна ид̇ха авибажжамаанан̃жа д̣̇идтзва д̇хаммз бариниб̣б̣ааяанд̇асса ид̇ха авибажжамаанан̃жа вибаагам̣ г̇ахзд̇ваа ‘‘ад̇т̇и гаммам̣ над̇т̇и гаммавибааго’’д̇и вуд̇д̇анд̇и д̣̇ассзд̇и. бажжуббаннассзва гаммасса убабаж̇ж̇авзд̣̇анийяасса абарабарияааяавзд̣̇анийяасса жа анааг̇ад̇абхавз вибажжид̇аб̣б̣авибаагам̣ г̇ахзд̇ваа ‘‘ад̇т̇и гаммам̣ бхависсад̇и гаммавибааго’’д̇и вуд̇д̇анд̇и ааха ‘‘яам̣ бана зд̇арахи ааяуухид̇ам̣ анааг̇ад̇з вибаагаваарам̣ лабхиссад̇ий’’д̇иаад̣̇и. бажжуббаннассзва гаммасса убабаж̇ж̇авзд̣̇анийяасса бажжаяавзгаллзна анааг̇ад̇абхавз авибажжид̇аб̣б̣ан̃жа анааг̇ад̇абхавз бариниб̣б̣ааяид̇аб̣б̣асса абарабарияааяавзд̣̇анийяасса авибажжид̇аб̣б̣ан̃жа вибаагам̣ г̇ахзд̇ваа ‘‘ад̇т̇и гаммам̣ на бхависсад̇и гаммавибааго’’д̇и вуд̇д̇анд̇и ааха ‘‘яам̣ бана вибаагаваарам̣ на лабхиссад̇ий’’д̇иаад̣̇и.
Idāni paccuppannabhave katassa diṭṭhadhammavedanīyassa idheva vipaccamānaṃ vipākaṃ gahetvā ‘‘atthi kammaṃ atthi kammavipāko’’ti vuttanti dassento ‘‘yaṃ pana etarahi āyūhita’’ntiādimāha. Yaṃ pana etarahi vipākavāraṃ na labhatītiādinā tasseva paccuppannassa kammassa paccayavekallena idha avipaccamānañca diṭṭheva dhamme parinibbāyantassa idha avipaccamānañca vipākaṃ gahetvā ‘‘atthi kammaṃ natthi kammavipāko’’ti vuttanti dasseti. Paccuppannasseva kammassa upapajjavedanīyassa aparapariyāyavedanīyassa ca anāgatabhave vipaccitabbavipākaṃ gahetvā ‘‘atthi kammaṃ bhavissati kammavipāko’’ti vuttanti āha ‘‘yaṃ pana etarahi āyūhitaṃ anāgate vipākavāraṃ labhissatī’’tiādi. Paccuppannasseva kammassa upapajjavedanīyassa paccayavekallena anāgatabhave avipaccitabbañca anāgatabhave parinibbāyitabbassa aparapariyāyavedanīyassa avipaccitabbañca vipākaṃ gahetvā ‘‘atthi kammaṃ na bhavissati kammavipāko’’ti vuttanti āha ‘‘yaṃ pana vipākavāraṃ na labhissatī’’tiādi.
зван̃жа бажжуббаннагаммам̣ бажжуббаннаанааг̇ад̇авибаагаавибаагавасзна жад̇уд̇хаа д̣̇ассзд̇ваа ид̣̇аани анааг̇ад̇абхавз гад̇асса гаммасса анааг̇ад̇з вибажжид̇аб̣б̣авибаагам̣ г̇ахзд̇ваа ‘‘бхависсад̇и гаммам̣ бхависсад̇и гаммавибааго’’д̇и вуд̇д̇анд̇и д̣̇ассзнд̇о ‘‘яам̣ банаанааг̇ад̇з ааяуухиссад̇ий’’д̇иаад̣̇имааха. д̇ассзва анааг̇ад̇асса гаммасса бажжаяавзгаллзна авибажжид̇аб̣б̣ан̃жа анааг̇ад̇абхавз бариниб̣б̣ааяид̇аб̣б̣асса авибажжид̇аб̣б̣ан̃жа вибаагам̣ г̇ахзд̇ваа ‘‘бхависсад̇и гаммам̣ на бхависсад̇и гаммавибааго’’д̇и вуд̇д̇анд̇и ааха ‘‘яам̣ бана вибаагаваарам̣ на лабхиссад̇ий’’д̇иаад̣̇и . звам̣ анааг̇ад̇агаммам̣ анааг̇ад̇авибаагаавибаагавасзна д̣̇вид̇хаа д̣̇ассид̇ам̣. званд̇иаад̣̇инаа яат̇аавуд̇д̇ад̣̇ваад̣̇асагаммаани ниг̇амзд̇и.
Evañca paccuppannakammaṃ paccuppannānāgatavipākāvipākavasena catudhā dassetvā idāni anāgatabhave katassa kammassa anāgate vipaccitabbavipākaṃ gahetvā ‘‘bhavissati kammaṃ bhavissati kammavipāko’’ti vuttanti dassento ‘‘yaṃ panānāgate āyūhissatī’’tiādimāha. Tasseva anāgatassa kammassa paccayavekallena avipaccitabbañca anāgatabhave parinibbāyitabbassa avipaccitabbañca vipākaṃ gahetvā ‘‘bhavissati kammaṃ na bhavissati kammavipāko’’ti vuttanti āha ‘‘yaṃ pana vipākavāraṃ na labhissatī’’tiādi . Evaṃ anāgatakammaṃ anāgatavipākāvipākavasena dvidhā dassitaṃ. Evantiādinā yathāvuttadvādasakammāni nigameti.
ид̣̇аани саб̣б̣зсу яат̇аавуд̇д̇аббабхзд̣̇зсу гаммзсу яаани абхид̇хамманаязна вибхад̇д̇аани сол̣аса гаммаани, яаани жа бадисамбхид̣̇аамаг̇г̇абарияааязна вибхад̇д̇аани д̣̇ваад̣̇аса гаммаани, д̇аани саб̣б̣аани суд̇д̇анд̇игабарияааязна вибхад̇д̇зсу згаад̣̇асавид̇хзсуязва гаммзсу анд̇ог̇ад̇хаани, д̇аани жа д̣̇идтад̇хаммавзд̣̇анийяаубабаж̇ж̇авзд̣̇анийяаабарабарияааяавзд̣̇анийязсу д̇ийсуязва анд̇ог̇ад̇хаанийд̇и д̣̇ассзнд̇о ‘‘ид̇и имаани жзваа’’д̇иаад̣̇имааха. д̇ад̇т̇а ад̇д̇ано таанаа осаггид̇ваад̇и ад̇д̇ано яат̇аавуд̇д̇ад̣̇ваад̣̇асасол̣асаббабхзд̣̇асан̇каад̇адтаанад̇о барихаабзд̇ваа, д̇ам̣ д̇ам̣ бабхзд̣̇ам̣ хид̇ваад̇и вуд̇д̇ам̣ ход̇и. згаад̣̇аса гаммааниязва бхаванд̇ийд̇и д̇ам̣сабхааваанам̣язва гаммаанам̣ д̣̇ваад̣̇асад̇хаа сол̣асад̇хаа жа вибхаж̇ид̇ваа вуд̇д̇ад̇д̇аа звамааха. яасмаа згаад̣̇асад̇хаа вуд̇д̇агаммаани д̣̇идтад̇хаммавзд̣̇анийяаани ваа сияум̣ убабаж̇ж̇авзд̣̇анийяаани ваа абарабарияааяавзд̣̇анийяаани ваа, д̇асмаа вуд̇д̇ам̣ ‘‘д̇ийн̣иязва гаммаани хонд̇ий’’д̇и.
Idāni sabbesu yathāvuttappabhedesu kammesu yāni abhidhammanayena vibhattāni soḷasa kammāni, yāni ca paṭisambhidāmaggapariyāyena vibhattāni dvādasa kammāni, tāni sabbāni suttantikapariyāyena vibhattesu ekādasavidhesuyeva kammesu antogadhāni, tāni ca diṭṭhadhammavedanīyaupapajjavedanīyaaparapariyāyavedanīyesu tīsuyeva antogadhānīti dassento ‘‘iti imāni cevā’’tiādimāha. Tattha attano ṭhānā osakkitvāti attano yathāvuttadvādasasoḷasappabhedasaṅkhātaṭṭhānato parihāpetvā, taṃ taṃ pabhedaṃ hitvāti vuttaṃ hoti. Ekādasa kammāniyevabhavantīti taṃsabhāvānaṃyeva kammānaṃ dvādasadhā soḷasadhā ca vibhajitvā vuttattā evamāha. Yasmā ekādasadhā vuttakammāni diṭṭhadhammavedanīyāni vā siyuṃ upapajjavedanīyāni vā aparapariyāyavedanīyāni vā, tasmā vuttaṃ ‘‘tīṇiyeva kammāni hontī’’ti.
д̇зсам̣ сан̇гаманам̣ над̇т̇ийд̇и д̇зсам̣ д̣̇идтад̇хаммавзд̣̇анийяаад̣̇ийнам̣ сан̇гаманам̣ над̇т̇и, сан̇гаманам̣ убабаж̇ж̇авзд̣̇анийяаад̣̇ибхааваабад̇д̇и. д̇знааха ‘‘яат̇аатаанзязва д̇идтанд̇ий’’д̇и, ад̇д̇ано д̣̇идтад̇хаммавзд̣̇анийяаад̣̇идтаанзязва д̇идтанд̇ийд̇и ад̇т̇о. д̣̇идтад̇хаммавзд̣̇анийяамзва хи батамаж̇аванажзд̇анаа, убабаж̇ж̇авзд̣̇анийяамзва сад̇д̇амаж̇аванажзд̇анаа, маж̇жхз бан̃жа абарабарияааяавзд̣̇анийяамзваад̇и над̇т̇и д̇зсам̣ ан̃н̃аман̃н̃ам̣ сан̇г̇ахо, д̇асмаа ад̇д̇ано ад̇д̇ано д̣̇идтад̇хаммавзд̣̇анийяаад̣̇исабхаавзязва д̇идтанд̇и. д̇знзва бхаг̇авад̇аа – ‘‘д̣̇идтз ваа д̇хаммз, убабаж̇ж̇а ваа, абарз ваа барияааяз’’д̇и д̇аяо вигаббаа д̣̇ассид̇аа. д̇знзвааха ‘‘д̣̇идтад̇хаммавзд̣̇анийяам̣ гамма’’нд̇иаад̣̇и. д̇ад̇т̇а ‘‘д̣̇идтз ваа д̇хаммз’’д̇и сад̇т̇аа на вад̣̇зяяаад̇и асад̇и нияаамз на вад̣̇зяяа. яасмаа бана д̇зсам̣ сан̇гаманам̣ над̇т̇и, нияад̇асабхааваа хи д̇аани, д̇асмаа сад̇т̇аа ‘‘д̣̇идтз ваа д̇хаммз’’д̇иаад̣̇имавожа.
Tesaṃ saṅkamanaṃ natthīti tesaṃ diṭṭhadhammavedanīyādīnaṃ saṅkamanaṃ natthi, saṅkamanaṃ upapajjavedanīyādibhāvāpatti. Tenāha ‘‘yathāṭhāneyeva tiṭṭhantī’’ti, attano diṭṭhadhammavedanīyādiṭṭhāneyeva tiṭṭhantīti attho. Diṭṭhadhammavedanīyameva hi paṭhamajavanacetanā, upapajjavedanīyameva sattamajavanacetanā, majjhe pañca aparapariyāyavedanīyamevāti natthi tesaṃ aññamaññaṃ saṅgaho, tasmā attano attano diṭṭhadhammavedanīyādisabhāveyeva tiṭṭhanti. Teneva bhagavatā – ‘‘diṭṭhe vā dhamme, upapajja vā, apare vā pariyāye’’ti tayo vikappā dassitā. Tenevāha ‘‘diṭṭhadhammavedanīyaṃ kamma’’ntiādi. Tattha ‘‘diṭṭhe vā dhamme’’ti satthā na vadeyyāti asati niyāme na vadeyya. Yasmā pana tesaṃ saṅkamanaṃ natthi, niyatasabhāvā hi tāni, tasmā satthā ‘‘diṭṭhe vā dhamme’’tiādimavoca.
суггабагкзд̇и ‘‘алобхо нид̣̇аанам̣ гаммаанам̣ самуд̣̇аяааяаа’’д̇иаад̣̇инаа ааг̇ад̇з гусалабагкз. нируд̣̇д̇хзд̇и арияамаг̇г̇аад̇хиг̇амзна ануббаад̣̇анирод̇хзна нируд̣̇д̇хз. д̇аалавад̇т̇у вияа гад̇анд̇и яат̇аа д̇аалз чиннз тид̇адтаанз гин̃жи на ход̇и, звам̣ гаммз бахийнз гин̃жи на ход̇ийд̇и ад̇т̇о. д̇аалавад̇т̇ууд̇и ваа мад̇т̇агажчинно д̇аало вуд̇д̇о бад̇д̇апаламагуласуужиаад̣̇ийнам̣ абхаавад̇о. д̇ад̇о зва со авирул̣хид̇хаммо. звам̣ бахийнагаммо сад̇д̇асанд̇аано. д̇знааха ‘‘мад̇т̇агажчиннад̇аало вияаа’’д̇и. ануабхаавам̣ гад̇ам̣ бажчад̇о д̇хаммаббавад̇д̇ияаа абхаавад̇о. д̇знааха ‘‘яат̇аа’’д̇иаад̣̇и. аббавад̇д̇игад̇агаало вияаад̇и б̣ийж̇аанам̣ саб̣б̣асо аббавад̇д̇ияаа гад̇агаало вияа. чиннамуулагаананд̇и гилзсамууласса саб̣б̣асо чиннад̇д̇аа чиннамуулагаанам̣. гилзсаа хи канд̇хаанам̣ муулаани.
Sukkapakkheti ‘‘alobho nidānaṃ kammānaṃ samudayāyā’’tiādinā āgate kusalapakkhe. Niruddheti ariyamaggādhigamena anuppādanirodhena niruddhe. Tālavatthu viya katanti yathā tāle chinne ṭhitaṭṭhāne kiñci na hoti, evaṃ kamme pahīne kiñci na hotīti attho. Tālavatthūti vā matthakacchinno tālo vutto pattaphalamakulasūciādīnaṃ abhāvato. Tato eva so aviruḷhidhammo. Evaṃ pahīnakammo sattasantāno. Tenāha ‘‘matthakacchinnatālo viyā’’ti. Anuabhāvaṃ kataṃ pacchato dhammappavattiyā abhāvato. Tenāha ‘‘yathā’’tiādi. Appavattikatakālo viyāti bījānaṃ sabbaso appavattiyā katakālo viya. Chinnamūlakānanti kilesamūlassa sabbaso chinnattā chinnamūlakānaṃ. Kilesā hi khandhānaṃ mūlāni.
взд̣̇анийяанд̇и взд̣̇ид̇аб̣б̣ам̣. ан̃н̃ам̣ вад̇т̇у над̇т̇ийд̇и ан̃н̃ам̣ ад̇хидтаанам̣ над̇т̇и. суг̇ад̇исан̃н̃ид̇ааби хздтиманд̇зна сан̇каарад̣̇угкад̇о анабаг̇ад̇ад̇д̇аа д̣̇уг̇г̇ад̇ияо зваад̇и вуд̇д̇ам̣ ‘‘саб̣б̣аа д̣̇уг̇г̇ад̇ияо’’д̇и, звам̣ ваа зд̇т̇а ад̇т̇о д̣̇адтаб̣б̣о. лобхо зд̇асса гааран̣абхууд̇о ад̇т̇ийд̇и лобхам̣, лобханимид̇д̇ам̣ гаммам̣. д̇ат̇аа д̣̇осанд̇и зд̇т̇ааби. д̇знааха ‘‘лобхад̣̇осасийсзна лобхаж̇ан̃жа д̣̇осаж̇ан̃жа гаммамзва нид̣̇д̣̇идта’’нд̇и. ваддавивадданд̇и ваддан̃жа виваддан̃жа.
Vedanīyanti veditabbaṃ. Aññaṃ vatthu natthīti aññaṃ adhiṭṭhānaṃ natthi. Sugatisaññitāpi heṭṭhimantena saṅkhāradukkhato anapagatattā duggatiyo evāti vuttaṃ ‘‘sabbā duggatiyo’’ti, evaṃ vā ettha attho daṭṭhabbo. Lobho etassa kāraṇabhūto atthīti lobhaṃ, lobhanimittaṃ kammaṃ. Tathā dosanti etthāpi. Tenāha ‘‘lobhadosasīsena lobhajañca dosajañca kammameva niddiṭṭha’’nti. Vaṭṭavivaṭṭanti vaṭṭañca vivaṭṭañca.
нид̣̇аанасуд̇д̇аван̣н̣анаа нидтид̇аа.
Nidānasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 4. нид̣̇аанасуд̇д̇ам̣ • 4. Nidānasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 4. нид̣̇аанасуд̇д̇аван̣н̣анаа • 4. Nidānasuttavaṇṇanā
