| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. நித்³த³ஸவத்து²ஸுத்தவண்ணனா
10. Niddasavatthusuttavaṇṇanā
20. த³ஸமே நித்³த³ஸவத்தூ²னீதி நித்³த³ஸாதி³வத்தூ²னி, ‘‘நித்³த³ஸோ பி⁴க்கு², நிப்³பீ³ஸோ, நித்திங்ஸோ, நிச்சத்தாலீஸோ, நிப்பஞ்ஞாஸோ’’தி ஏவங் வசனகாரணானி. அயங் கிர பஞ்ஹோ தித்தி²யஸமயே உப்பன்னோ. தித்தி²யா ஹி த³ஸவஸ்ஸகாலே மதங் நிக³ண்ட²ங் நித்³த³ஸோதி வத³ந்தி. ஸோ கிர புன த³ஸவஸ்ஸோ ந ஹோதி. ந கேவலஞ்ச த³ஸவஸ்ஸோ, நவவஸ்ஸோபி ஏகவஸ்ஸோபி ந ஹோதி. ஏதேனேவ நயேன வீஸதிவஸ்ஸாதி³காலேபி மதங் நிக³ண்ட²ங் ‘‘நிப்³பீ³ஸோ நித்திங்ஸோ நிச்சத்தாலீஸோ நிப்பஞ்ஞாஸோ’’தி வத³ந்தி. ஆயஸ்மா ஆனந்தோ³ கா³மே விசரந்தோ தங் கத²ங் ஸுத்வா விஹாரங் க³ந்த்வா ப⁴க³வதோ ஆரோசேஸி. ப⁴க³வா ஆஹ – ‘‘ந இத³ங், ஆனந்த³, தித்தி²யானங் அதி⁴வசனங், மம ஸாஸனே கீ²ணாஸவஸ்ஸேதங் அதி⁴வசனங். கீ²ணாஸவோ ஹி த³ஸவஸ்ஸகாலே பரினிப்³பு³தோ புன த³ஸவஸ்ஸோ ந ஹோதி. ந கேவலஞ்ச த³ஸவஸ்ஸோவ, நவவஸ்ஸோபி…பே॰… ஏகவஸ்ஸோபி. ந கேவலஞ்ச ஏகவஸ்ஸோவ, ஏகாத³ஸமாஸிகோபி…பே॰… ஏகமாஸிகோபி ஏகமுஹுத்திகோபி ந ஹோதியேவ’’. கஸ்மா? புன படிஸந்தி⁴யா அபா⁴வா. நிப்³பீ³ஸாதீ³ஸுபி ஏஸேவ நயோ. இதி ப⁴க³வா ‘‘மம ஸாஸனே கீ²ணாஸவஸ்ஸேதங் அதி⁴வசன’’ந்தி வத்வா யேஹி காரணேஹி நித்³த³ஸோ ஹோதி, தானி த³ஸ்ஸேதுங் இமங் தே³ஸனங் ஆரபி⁴.
20. Dasame niddasavatthūnīti niddasādivatthūni, ‘‘niddaso bhikkhu, nibbīso, nittiṃso, niccattālīso, nippaññāso’’ti evaṃ vacanakāraṇāni. Ayaṃ kira pañho titthiyasamaye uppanno. Titthiyā hi dasavassakāle mataṃ nigaṇṭhaṃ niddasoti vadanti. So kira puna dasavasso na hoti. Na kevalañca dasavasso, navavassopi ekavassopi na hoti. Eteneva nayena vīsativassādikālepi mataṃ nigaṇṭhaṃ ‘‘nibbīso nittiṃso niccattālīso nippaññāso’’ti vadanti. Āyasmā ānando gāme vicaranto taṃ kathaṃ sutvā vihāraṃ gantvā bhagavato ārocesi. Bhagavā āha – ‘‘na idaṃ, ānanda, titthiyānaṃ adhivacanaṃ, mama sāsane khīṇāsavassetaṃ adhivacanaṃ. Khīṇāsavo hi dasavassakāle parinibbuto puna dasavasso na hoti. Na kevalañca dasavassova, navavassopi…pe… ekavassopi. Na kevalañca ekavassova, ekādasamāsikopi…pe… ekamāsikopi ekamuhuttikopi na hotiyeva’’. Kasmā? Puna paṭisandhiyā abhāvā. Nibbīsādīsupi eseva nayo. Iti bhagavā ‘‘mama sāsane khīṇāsavassetaṃ adhivacana’’nti vatvā yehi kāraṇehi niddaso hoti, tāni dassetuṃ imaṃ desanaṃ ārabhi.
தத்த² இதா⁴தி இமஸ்மிங் ஸாஸனே. ஸிக்கா²ஸமாதா³னே திப்³ப³ச்ச²ந்தோ³ ஹோதீதி ஸிக்கா²த்தயபூரணே ப³லவச்ச²ந்தோ³ ஹோதி. ஆயதிஞ்ச ஸிக்கா²ஸமாதா³னே அவிக³தபேமோதி அனாக³தே புனதி³வஸாதீ³ஸுபி ஸிக்கா²பூரணே அவிக³தபேமேனேவ ஸமன்னாக³தோ ஹோதி. த⁴ம்மனிஸந்தியாதி த⁴ம்மனிஸாமனாய. விபஸ்ஸனாயேதங் அதி⁴வசனங். இச்சா²வினயேதி தண்ஹாவினயே. படிஸல்லானேதி ஏகீபா⁴வே. வீரியாரம்பே⁴தி காயிகசேதஸிகஸ்ஸ வீரியஸ்ஸ பூரணே. ஸதினேபக்கேதி ஸதியஞ்சேவ நிபகபா⁴வே. தி³ட்டி²படிவேதே⁴தி மக்³க³த³ஸ்ஸனே. ஸேஸங் ஸப்³ப³த்த² உத்தானமேவாதி.
Tattha idhāti imasmiṃ sāsane. Sikkhāsamādāne tibbacchando hotīti sikkhāttayapūraṇe balavacchando hoti. Āyatiñca sikkhāsamādāne avigatapemoti anāgate punadivasādīsupi sikkhāpūraṇe avigatapemeneva samannāgato hoti. Dhammanisantiyāti dhammanisāmanāya. Vipassanāyetaṃ adhivacanaṃ. Icchāvinayeti taṇhāvinaye. Paṭisallāneti ekībhāve. Vīriyārambheti kāyikacetasikassa vīriyassa pūraṇe. Satinepakketi satiyañceva nipakabhāve. Diṭṭhipaṭivedheti maggadassane. Sesaṃ sabbattha uttānamevāti.
அனுஸயவக்³கோ³ து³தியோ.
Anusayavaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. நித்³த³ஸவத்து²ஸுத்தங் • 10. Niddasavatthusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. நித்³த³ஸவத்து²ஸுத்தவண்ணனா • 10. Niddasavatthusuttavaṇṇanā
