| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. நித்³த³ஸவத்து²ஸுத்தவண்ணனா
10. Niddasavatthusuttavaṇṇanā
20. த³ஸமே நித்³த³ஸவத்தூ²னீதி ஆதி³ஸத்³த³லோபேனாயங் நித்³தே³ஸோதி ஆஹ ‘‘நித்³த³ஸாதி³வத்தூ²னீ’’தி. நத்தி² இதா³னி இமஸ்ஸ த³ஸாதி நித்³த³ஸோ. பஞ்ஹோதி ஞாதுங் இச்சி²தோ அத்தோ². புன த³ஸவஸ்ஸோ ந ஹோதீதி தேஸங் மதிமத்தமேதந்தி த³ஸ்ஸேதுங் ‘‘ஸோ கிரா’’தி கிரஸத்³த³க்³க³ஹணங். நித்³த³ஸோதி சேதங் வசனமத்தங். தஸ்ஸ நிப்³பீ³ஸாதி³பா⁴வஸ்ஸ விய நின்னவாதி³பா⁴வஸ்ஸ ச இச்சி²தத்தாதி த³ஸ்ஸேதுங் ‘‘ந கேவலஞ்சா’’திஆதி³ வுத்தங். கா³மே விசரந்தோதி கா³மே பிண்டா³ய சரந்தோ. ந இத³ங் தித்தி²யானங் அதி⁴வசனங் தேஸு தன்னிமித்தஸ்ஸ அபா⁴வா, ஸாஸனேபி ஸேக²ஸ்ஸபி ந இத³ங் அதி⁴வசனங், கிமங்க³ங் பன புது²ஜ்ஜனஸ்ஸ. யஸ்ஸ பனேதங் அதி⁴வசனங் யேன ச காரணேன, தங் த³ஸ்ஸேதுங் ‘‘கீ²ணாஸவஸ்ஸேத’’ந்திஆதி³ வுத்தங். அப்படிஸந்தி⁴கபா⁴வோ ஹிஸ்ஸ பச்சக்க²தோ காரணங். பரம்பராய இதரானி யானி பாளியங் ஆக³தானிங்.
20. Dasame niddasavatthūnīti ādisaddalopenāyaṃ niddesoti āha ‘‘niddasādivatthūnī’’ti. Natthi idāni imassa dasāti niddaso. Pañhoti ñātuṃ icchito attho. Puna dasavasso na hotīti tesaṃ matimattametanti dassetuṃ ‘‘so kirā’’ti kirasaddaggahaṇaṃ. Niddasoti cetaṃ vacanamattaṃ. Tassa nibbīsādibhāvassa viya ninnavādibhāvassa ca icchitattāti dassetuṃ ‘‘na kevalañcā’’tiādi vuttaṃ. Gāme vicarantoti gāme piṇḍāya caranto. Na idaṃ titthiyānaṃ adhivacanaṃ tesu tannimittassa abhāvā, sāsanepi sekhassapi na idaṃ adhivacanaṃ, kimaṅgaṃ pana puthujjanassa. Yassa panetaṃ adhivacanaṃ yena ca kāraṇena, taṃ dassetuṃ ‘‘khīṇāsavasseta’’ntiādi vuttaṃ. Appaṭisandhikabhāvo hissa paccakkhato kāraṇaṃ. Paramparāya itarāni yāni pāḷiyaṃ āgatāniṃ.
ஸிக்கா²ய ஸம்மதே³வ ஆதா³னங் ஸிக்கா²ஸமாதா³னங். தங் பனஸ்ஸா பாரிபூரியா வேதி³தப்³ப³ந்தி ஆஹ ‘‘ஸிக்கா²த்தயபூரணே’’தி. ஸிக்கா²ய வா ஸம்மதே³வ ஆதி³தோ பட்டா²ய ரக்க²ணங் ஸிக்கா²ஸமாதா³னங். தஞ்ச அத்த²தோ பூரணேன பரிச்சி²ன்னங் அரக்க²ணே ஸப்³பே³ன ஸப்³ப³ங் அபா⁴வதோ, ரக்க²ணே ச பரிபூரணதோ. ப³லவச்ச²ந்தோ³தி த³ள்ஹச்ச²ந்தோ³. ஆயதிந்தி அனந்தரானாக³ததி³வஸாதி³காலோ அதி⁴ப்பேதோ, ந அனாக³தப⁴வோதி ஆஹ ‘‘அனாக³தே புனதி³வஸாதீ³ஸுபீ’’தி. ஸிக்க²ங் பரிபூரெந்தஸ்ஸ தத்த² நிப³த்³த⁴ப⁴த்திதா அவிக³தபேமதா. தேபூ⁴மகத⁴ம்மானங் அனிச்சாதி³வஸேன ஸம்மதே³வ நிஜ்ஜா²னங் த⁴ம்மனிஸாமனாதி ஆஹ ‘‘விபஸ்ஸனாயேதங் அதி⁴வசன’’ந்தி. தண்ஹாவினயேதி ப⁴ங்கா³னுபஸ்ஸனாஞாணானுபா⁴வஸித்³தே⁴ தண்ஹாவிக்க²ம்ப⁴னே. ஏகீபா⁴வேதி க³ணஸங்க³ணிகாகிலேஸஸங்க³ணிகாவிக³மஸித்³தே⁴ விவேகவாஸே. வீரியாரம்பே⁴தி ஸம்மப்பதா⁴னஸ்ஸ பக்³க³ண்ஹனே . தங் பன ஸப்³ப³ஸோ வீரியஸ்ஸ பரிப்³ரூஹனங் ஹோதீதி ஆஹ ‘‘காயிகசேதஸிகஸ்ஸ வீரியஸ்ஸ பூரணே’’தி. ஸதியஞ்சேவ நிபகபா⁴வே சாதி ஸதோகாரிதாய சேவ ஸம்பஜானகாரிதாய ச. ஸதிஸம்பஜஞ்ஞப³லேனேவ ஹி வீரியாரம்போ⁴ இஜ்ஜ²தி. தி³ட்டி²படிவேதே⁴தி மக்³க³ஸம்மாதி³ட்டி²யா படிவிஜ்ஜ²னே. தேனாஹ ‘‘மக்³க³த³ஸ்ஸனே’’தி.
Sikkhāya sammadeva ādānaṃ sikkhāsamādānaṃ. Taṃ panassā pāripūriyā veditabbanti āha ‘‘sikkhāttayapūraṇe’’ti. Sikkhāya vā sammadeva ādito paṭṭhāya rakkhaṇaṃ sikkhāsamādānaṃ. Tañca atthato pūraṇena paricchinnaṃ arakkhaṇe sabbena sabbaṃ abhāvato, rakkhaṇe ca paripūraṇato. Balavacchandoti daḷhacchando. Āyatinti anantarānāgatadivasādikālo adhippeto, na anāgatabhavoti āha ‘‘anāgate punadivasādīsupī’’ti. Sikkhaṃ paripūrentassa tattha nibaddhabhattitā avigatapematā. Tebhūmakadhammānaṃ aniccādivasena sammadeva nijjhānaṃ dhammanisāmanāti āha ‘‘vipassanāyetaṃ adhivacana’’nti. Taṇhāvinayeti bhaṅgānupassanāñāṇānubhāvasiddhe taṇhāvikkhambhane. Ekībhāveti gaṇasaṅgaṇikākilesasaṅgaṇikāvigamasiddhe vivekavāse. Vīriyārambheti sammappadhānassa paggaṇhane . Taṃ pana sabbaso vīriyassa paribrūhanaṃ hotīti āha ‘‘kāyikacetasikassa vīriyassa pūraṇe’’ti. Satiyañceva nipakabhāve cāti satokāritāya ceva sampajānakāritāya ca. Satisampajaññabaleneva hi vīriyārambho ijjhati. Diṭṭhipaṭivedheti maggasammādiṭṭhiyā paṭivijjhane. Tenāha ‘‘maggadassane’’ti.
நித்³த³ஸவத்து²ஸுத்தவண்ணனா நிட்டி²தா.
Niddasavatthusuttavaṇṇanā niṭṭhitā.
அனுஸயவக்³க³வண்ணனா நிட்டி²தா.
Anusayavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. நித்³த³ஸவத்து²ஸுத்தங் • 10. Niddasavatthusuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. நித்³த³ஸவத்து²ஸுத்தவண்ணனா • 10. Niddasavatthusuttavaṇṇanā
