| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
១០. និទ្ទសវត្ថុសុត្តវណ្ណនា
10. Niddasavatthusuttavaṇṇanā
២០. ទសមេ និទ្ទសវត្ថូនីតិ អាទិសទ្ទលោបេនាយំ និទ្ទេសោតិ អាហ ‘‘និទ្ទសាទិវត្ថូនី’’តិ។ នត្ថិ ឥទានិ ឥមស្ស ទសាតិ និទ្ទសោ។ បញ្ហោតិ ញាតុំ ឥច្ឆិតោ អត្ថោ។ បុន ទសវស្សោ ន ហោតីតិ តេសំ មតិមត្តមេតន្តិ ទស្សេតុំ ‘‘សោ កិរា’’តិ កិរសទ្ទគ្គហណំ។ និទ្ទសោតិ ចេតំ វចនមត្តំ។ តស្ស និព្ពីសាទិភាវស្ស វិយ និន្នវាទិភាវស្ស ច ឥច្ឆិតត្តាតិ ទស្សេតុំ ‘‘ន កេវលញ្ចា’’តិអាទិ វុត្តំ។ គាមេ វិចរន្តោតិ គាមេ បិណ្ឌាយ ចរន្តោ។ ន ឥទំ តិត្ថិយានំ អធិវចនំ តេសុ តន្និមិត្តស្ស អភាវា, សាសនេបិ សេខស្សបិ ន ឥទំ អធិវចនំ, កិមង្គំ បន បុថុជ្ជនស្ស។ យស្ស បនេតំ អធិវចនំ យេន ច ការណេន, តំ ទស្សេតុំ ‘‘ខីណាសវស្សេត’’ន្តិអាទិ វុត្តំ។ អប្បដិសន្ធិកភាវោ ហិស្ស បច្ចក្ខតោ ការណំ។ បរម្បរាយ ឥតរានិ យានិ បាឡិយំ អាគតានិំ។
20. Dasame niddasavatthūnīti ādisaddalopenāyaṃ niddesoti āha ‘‘niddasādivatthūnī’’ti. Natthi idāni imassa dasāti niddaso. Pañhoti ñātuṃ icchito attho. Puna dasavasso na hotīti tesaṃ matimattametanti dassetuṃ ‘‘so kirā’’ti kirasaddaggahaṇaṃ. Niddasoti cetaṃ vacanamattaṃ. Tassa nibbīsādibhāvassa viya ninnavādibhāvassa ca icchitattāti dassetuṃ ‘‘na kevalañcā’’tiādi vuttaṃ. Gāme vicarantoti gāme piṇḍāya caranto. Na idaṃ titthiyānaṃ adhivacanaṃ tesu tannimittassa abhāvā, sāsanepi sekhassapi na idaṃ adhivacanaṃ, kimaṅgaṃ pana puthujjanassa. Yassa panetaṃ adhivacanaṃ yena ca kāraṇena, taṃ dassetuṃ ‘‘khīṇāsavasseta’’ntiādi vuttaṃ. Appaṭisandhikabhāvo hissa paccakkhato kāraṇaṃ. Paramparāya itarāni yāni pāḷiyaṃ āgatāniṃ.
សិក្ខាយ សម្មទេវ អាទានំ សិក្ខាសមាទានំ។ តំ បនស្សា បារិបូរិយា វេទិតព្ពន្តិ អាហ ‘‘សិក្ខាត្តយបូរណេ’’តិ។ សិក្ខាយ វា សម្មទេវ អាទិតោ បដ្ឋាយ រក្ខណំ សិក្ខាសមាទានំ។ តញ្ច អត្ថតោ បូរណេន បរិច្ឆិន្នំ អរក្ខណេ សព្ពេន សព្ពំ អភាវតោ, រក្ខណេ ច បរិបូរណតោ។ ពលវច្ឆន្ទោតិ ទឡ្ហច្ឆន្ទោ។ អាយតិន្តិ អនន្តរានាគតទិវសាទិកាលោ អធិប្បេតោ, ន អនាគតភវោតិ អាហ ‘‘អនាគតេ បុនទិវសាទីសុបី’’តិ។ សិក្ខំ បរិបូរេន្តស្ស តត្ថ និពទ្ធភត្តិតា អវិគតបេមតា។ តេភូមកធម្មានំ អនិច្ចាទិវសេន សម្មទេវ និជ្ឈានំ ធម្មនិសាមនាតិ អាហ ‘‘វិបស្សនាយេតំ អធិវចន’’ន្តិ។ តណ្ហាវិនយេតិ ភង្គានុបស្សនាញាណានុភាវសិទ្ធេ តណ្ហាវិក្ខម្ភនេ។ ឯកីភាវេតិ គណសង្គណិកាកិលេសសង្គណិកាវិគមសិទ្ធេ វិវេកវាសេ។ វីរិយារម្ភេតិ សម្មប្បធានស្ស បគ្គណ្ហនេ ។ តំ បន សព្ពសោ វីរិយស្ស បរិព្រូហនំ ហោតីតិ អាហ ‘‘កាយិកចេតសិកស្ស វីរិយស្ស បូរណេ’’តិ។ សតិយញ្ចេវ និបកភាវេ ចាតិ សតោការិតាយ ចេវ សម្បជានការិតាយ ច។ សតិសម្បជញ្ញពលេនេវ ហិ វីរិយារម្ភោ ឥជ្ឈតិ។ ទិដ្ឋិបដិវេធេតិ មគ្គសម្មាទិដ្ឋិយា បដិវិជ្ឈនេ។ តេនាហ ‘‘មគ្គទស្សនេ’’តិ។
Sikkhāya sammadeva ādānaṃ sikkhāsamādānaṃ. Taṃ panassā pāripūriyā veditabbanti āha ‘‘sikkhāttayapūraṇe’’ti. Sikkhāya vā sammadeva ādito paṭṭhāya rakkhaṇaṃ sikkhāsamādānaṃ. Tañca atthato pūraṇena paricchinnaṃ arakkhaṇe sabbena sabbaṃ abhāvato, rakkhaṇe ca paripūraṇato. Balavacchandoti daḷhacchando. Āyatinti anantarānāgatadivasādikālo adhippeto, na anāgatabhavoti āha ‘‘anāgate punadivasādīsupī’’ti. Sikkhaṃ paripūrentassa tattha nibaddhabhattitā avigatapematā. Tebhūmakadhammānaṃ aniccādivasena sammadeva nijjhānaṃ dhammanisāmanāti āha ‘‘vipassanāyetaṃ adhivacana’’nti. Taṇhāvinayeti bhaṅgānupassanāñāṇānubhāvasiddhe taṇhāvikkhambhane. Ekībhāveti gaṇasaṅgaṇikākilesasaṅgaṇikāvigamasiddhe vivekavāse. Vīriyārambheti sammappadhānassa paggaṇhane . Taṃ pana sabbaso vīriyassa paribrūhanaṃ hotīti āha ‘‘kāyikacetasikassa vīriyassa pūraṇe’’ti. Satiyañceva nipakabhāve cāti satokāritāya ceva sampajānakāritāya ca. Satisampajaññabaleneva hi vīriyārambho ijjhati. Diṭṭhipaṭivedheti maggasammādiṭṭhiyā paṭivijjhane. Tenāha ‘‘maggadassane’’ti.
និទ្ទសវត្ថុសុត្តវណ្ណនា និដ្ឋិតា។
Niddasavatthusuttavaṇṇanā niṭṭhitā.
អនុសយវគ្គវណ្ណនា និដ្ឋិតា។
Anusayavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. និទ្ទសវត្ថុសុត្តំ • 10. Niddasavatthusuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០. និទ្ទសវត្ថុសុត្តវណ្ណនា • 10. Niddasavatthusuttavaṇṇanā
