| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৬. নিদ্দাতন্দীসুত্তৰণ্ণনা
6. Niddātandīsuttavaṇṇanā
১৬. ছট্ঠে নিদ্দাতি, ‘‘অভিজানামহং, অগ্গিৰেস্সন, গিম্হানং পচ্ছিমে মাসে নিদ্দং ওক্কমিতা’’তি (ম॰ নি॰ ১.৩৮৭) এৰরূপায অব্যাকতনিদ্দায পুব্বভাগাপরভাগেসু সেখপুথুজ্জনানং সসঙ্খারিকঅকুসলে চিত্তে উপ্পন্নং থিনমিদ্ধং। তন্দীতি অতিচ্ছাতাতিসীতাদিকালেসু উপ্পন্নং আগন্তুকং আলসিযং। ৰুত্তম্পি চেতং – ‘‘তত্থ কতমা তন্দী? যা তন্দী তন্দিযনা তন্দিমনতা আলস্যং আলস্যাযনা আলস্যাযিতত্তং, অযং ৰুচ্চতি তন্দী’’তি (ৰিভ॰ ৮৫৭)। ৰিজম্ভিতাতি কাযৰিজম্ভনা। অরতীতি অকুসলপক্খা উক্কণ্ঠিততা। ভত্তসম্মদোতি ভত্তমুচ্ছা ভত্তকিলমথো। ৰিত্থারো পন তেসং – ‘‘তত্থ কতমা ৰিজম্ভিতা? যা কাযস্স জম্ভনা ৰিজম্ভনা’’তিআদিনা নযেন অভিধম্মে আগতোৰ। এতেনাতি এতেন নিদ্দাদিনা উপক্কিলেসেন উপক্কিলিট্ঠো নিৰারিতপাতুভাৰো। নপ্পকাসতীতি ন জোততি, ন পাতুভৰতীতি অত্থো। অরিযমগ্গোতি লোকুত্তরমগ্গো। ইধাতি ইমস্মিং লোকে। পাণিনন্তি সত্তানং। ৰীরিযেনাতি মগ্গসহজাতৰীরিযেন। নং পণামেত্ৰাতি এতং কিলেসজাতং নীহরিত্ৰা। অরিযমগ্গোতি লোকিযলোকুত্তরমগ্গো। ইতি মগ্গেনেৰ উপক্কিলেসে নীহরিত্ৰা মগ্গস্স ৰিসুদ্ধি ৰুত্তাতি।
16. Chaṭṭhe niddāti, ‘‘abhijānāmahaṃ, aggivessana, gimhānaṃ pacchime māse niddaṃ okkamitā’’ti (ma. ni. 1.387) evarūpāya abyākataniddāya pubbabhāgāparabhāgesu sekhaputhujjanānaṃ sasaṅkhārikaakusale citte uppannaṃ thinamiddhaṃ. Tandīti aticchātātisītādikālesu uppannaṃ āgantukaṃ ālasiyaṃ. Vuttampi cetaṃ – ‘‘tattha katamā tandī? Yā tandī tandiyanā tandimanatā ālasyaṃ ālasyāyanā ālasyāyitattaṃ, ayaṃ vuccati tandī’’ti (vibha. 857). Vijambhitāti kāyavijambhanā. Aratīti akusalapakkhā ukkaṇṭhitatā. Bhattasammadoti bhattamucchā bhattakilamatho. Vitthāro pana tesaṃ – ‘‘tattha katamā vijambhitā? Yā kāyassa jambhanā vijambhanā’’tiādinā nayena abhidhamme āgatova. Etenāti etena niddādinā upakkilesena upakkiliṭṭho nivāritapātubhāvo. Nappakāsatīti na jotati, na pātubhavatīti attho. Ariyamaggoti lokuttaramaggo. Idhāti imasmiṃ loke. Pāṇinanti sattānaṃ. Vīriyenāti maggasahajātavīriyena. Naṃ paṇāmetvāti etaṃ kilesajātaṃ nīharitvā. Ariyamaggoti lokiyalokuttaramaggo. Iti maggeneva upakkilese nīharitvā maggassa visuddhi vuttāti.
নিদ্দাতন্দীসুত্তৰণ্ণনা নিট্ঠিতা।
Niddātandīsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৬. নিদ্দাতন্দীসুত্তং • 6. Niddātandīsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. নিদ্দাতন্দীসুত্তৰণ্ণনা • 6. Niddātandīsuttavaṇṇanā
