| Library / Tipiṭaka / තිපිටක • Tipiṭaka / විමානවත්‌ථුපාළි • Vimānavatthupāḷi |
8. නිද්‌දාවිමානවත්‌ථු
8. Niddāvimānavatthu
246.
246.
‘‘අභික්‌කන්‌තෙන වණ්‌ණෙන, යා ත්‌වං තිට්‌ඨසි දෙවතෙ;
‘‘Abhikkantena vaṇṇena, yā tvaṃ tiṭṭhasi devate;
ඔභාසෙන්‌තී දිසා සබ්‌බා, ඔසධී විය තාරකා.
Obhāsentī disā sabbā, osadhī viya tārakā.
247.
247.
‘‘කෙන තෙතාදිසො වණ්‌ණො…පෙ.…
‘‘Kena tetādiso vaṇṇo…pe…
වණ්‌ණො ච තෙ සබ්‌බදිසා පභාසතී’’ති.
Vaṇṇo ca te sabbadisā pabhāsatī’’ti.
249.
249.
සා දෙවතා අත්‌තමනා…පෙ.… යස්‌ස කම්‌මස්‌සිදං ඵලං.
Sā devatā attamanā…pe… yassa kammassidaṃ phalaṃ.
250.
250.
සද්‌ධා සීලෙන සම්‌පන්‌නා, සංවිභාගරතා සදා.
Saddhā sīlena sampannā, saṃvibhāgaratā sadā.
251.
251.
‘‘අච්‌ඡාදනඤ්‌ච භත්‌තඤ්‌ච, සෙනාසනං පදීපියං;
‘‘Acchādanañca bhattañca, senāsanaṃ padīpiyaṃ;
අදාසිං උජුභූතෙසු, විප්‌පසන්‌නෙන චෙතසා.
Adāsiṃ ujubhūtesu, vippasannena cetasā.
252.
252.
‘‘චාතුද්‌දසිං පඤ්‌චදසිං, යා ච පක්‌ඛස්‌ස අට්‌ඨමී;
‘‘Cātuddasiṃ pañcadasiṃ, yā ca pakkhassa aṭṭhamī;
පාටිහාරියපක්‌ඛඤ්‌ච, අට්‌ඨඞ්‌ගසුසමාගතං.
Pāṭihāriyapakkhañca, aṭṭhaṅgasusamāgataṃ.
253.
253.
‘‘උපොසථං උපවසිස්‌සං, සදා සීලෙසු සංවුතා;
‘‘Uposathaṃ upavasissaṃ, sadā sīlesu saṃvutā;
සඤ්‌ඤමා සංවිභාගා ච, විමානං ආවසාමහං.
Saññamā saṃvibhāgā ca, vimānaṃ āvasāmahaṃ.
254.
254.
‘‘පාණාතිපාතා විරතා, මුසාවාදා ච සඤ්‌ඤතා;
‘‘Pāṇātipātā viratā, musāvādā ca saññatā;
ථෙය්‍යා ච අතිචාරා ච, මජ්‌ජපානා ච ආරකා.
Theyyā ca aticārā ca, majjapānā ca ārakā.
255.
255.
‘‘පඤ්‌චසික්‌ඛාපදෙ රතා, අරියසච්‌චාන කොවිදා;
‘‘Pañcasikkhāpade ratā, ariyasaccāna kovidā;
උපාසිකා චක්‌ඛුමතො, ගොතමස්‌ස යසස්‌සිනො.
Upāsikā cakkhumato, gotamassa yasassino.
256.
256.
‘‘තෙන මෙතාදිසො වණ්‌ණො…පෙ.… වණ්‌ණො ච මෙ සබ්‌බදිසා පභාසතී’’ති.
‘‘Tena metādiso vaṇṇo…pe… vaṇṇo ca me sabbadisā pabhāsatī’’ti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / විමානවත්‌ථු-අට්‌ඨකථා • Vimānavatthu-aṭṭhakathā / 8-9. නිද්‌දා-සුනිද්‌දාවිමානවණ්‌ණනා • 8-9. Niddā-suniddāvimānavaṇṇanā
