| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
நித்³தே³ஸவாரகதா²
Niddesavārakathā
375. நித்³தே³ஸவாரே சித்தஸ்ஸேகக்³க³தானித்³தே³ஸே தாவ ஸண்டி²தி அவட்டி²தீதி. இத³ங் த்³வயங் டி²திவேவசனமேவ. யங் பன குஸலனித்³தே³ஸே ‘ஆரம்மணங் ஓகா³ஹெத்வா அனுபவிஸித்வா திட்ட²தீதி அவட்டி²தீ’தி வுத்தங், தங் இத⁴ ந லப்³ப⁴தி. அகுஸலஸ்மிஞ்ஹி து³ப்³ப³லா சித்தஸ்ஸேகக்³க³தாதி ஹெட்டா² தீ³பிதமேவ.
375. Niddesavāre cittassekaggatāniddese tāva saṇṭhiti avaṭṭhitīti. Idaṃ dvayaṃ ṭhitivevacanameva. Yaṃ pana kusalaniddese ‘ārammaṇaṃ ogāhetvā anupavisitvā tiṭṭhatīti avaṭṭhitī’ti vuttaṃ, taṃ idha na labbhati. Akusalasmiñhi dubbalā cittassekaggatāti heṭṭhā dīpitameva.
384. உத்³த⁴ச்சவிசிகிச்சா²வஸேன பவத்தஸ்ஸ விஸாஹாரஸ்ஸ படிபக்க²தோ அவிஸாஹாரோதி ஏவரூபோபி அத்தோ² இத⁴ ந லப்³ப⁴தி. ஸஹஜாதத⁴ம்மே பன ந விஸாஹரதீதி அவிஸாஹாரோ. ந விக்கி²பதீதி அவிக்கே²போ. அகுஸலசித்தேகக்³க³தாவஸேன அவிஸாஹடஸ்ஸ மானஸஸ்ஸ பா⁴வோ அவிஸாஹடமானஸதா. ஸஹஜாதத⁴ம்மேஸு ந கம்பதீதி ஸமாதி⁴ப³லங். அயாதா²வஸமாதா⁴னதோ மிச்சா²ஸமாதீ⁴தி ஏவமித⁴ அத்தோ² த³ட்ட²ப்³போ³.
384. Uddhaccavicikicchāvasena pavattassa visāhārassa paṭipakkhato avisāhāroti evarūpopi attho idha na labbhati. Sahajātadhamme pana na visāharatīti avisāhāro. Na vikkhipatīti avikkhepo. Akusalacittekaggatāvasena avisāhaṭassa mānasassa bhāvo avisāhaṭamānasatā. Sahajātadhammesu na kampatīti samādhibalaṃ. Ayāthāvasamādhānato micchāsamādhīti evamidha attho daṭṭhabbo.
385. வீரியிந்த்³ரியனித்³தே³ஸே யோ ஹெட்டா² ‘நிக்கமோ சேஸோ காமானங் பனுத³னாயா’திஆதி³ நயோ வுத்தோ, ஸோ இத⁴ ந லப்³ப⁴தி. ஸஹஜாதத⁴ம்மேஸு அகம்பனட்டே²னேவ வீரியப³லங் வேதி³தப்³ப³ங்.
385. Vīriyindriyaniddese yo heṭṭhā ‘nikkamo ceso kāmānaṃ panudanāyā’tiādi nayo vutto, so idha na labbhati. Sahajātadhammesu akampanaṭṭheneva vīriyabalaṃ veditabbaṃ.
386. மிச்சா²தி³ட்டி²னித்³தே³ஸே அயாதா²வத³ஸ்ஸனட்டே²ன மிச்சா²தி³ட்டி². தி³ட்டீ²ஸு க³தங் இத³ங் த³ஸ்ஸனங், த்³வாஸட்டி²தி³ட்டி²அந்தோக³தத்தாதி தி³ட்டி²க³தங். ஹெட்டா²பிஸ்ஸ அத்தோ² வுத்தோயேவ. தி³ட்டி²யேவ து³ரதிக்கமனட்டே²ன தி³ட்டி²க³ஹனங், திணக³ஹனவனக³ஹனபப்³ப³தக³ஹனானி விய. தி³ட்டி²யேவ ஸாஸங்கஸப்படிப⁴யட்டே²ன தி³ட்டி²கந்தாரோ , சோரகந்தாரவாளகந்தாரமருகந்தாரனிருத³ககந்தாரது³ப்³பி⁴க்க²கந்தாரா விய. ஸம்மாதி³ட்டி²யா வினிவிஜ்ஜ²னட்டே²ன விலோமனட்டே²ன ச தி³ட்டி²விஸூகாயிகங். மிச்சா²த³ஸ்ஸனஞ்ஹி உப்பஜ்ஜமானங் ஸம்மாத³ஸ்ஸனங் வினிவிஜ்ஜ²தி சேவ விலோமேதி ச. கதா³சி ஸஸ்ஸதஸ்ஸ கதா³சி உச்சே²த³ஸ்ஸ க³ஹணதோ தி³ட்டி²யா விரூபங் ப²ந்தி³தந்தி தி³ட்டி²விப்ப²ந்தி³தங். தி³ட்டி²க³திகோ ஹி ஏகஸ்மிங் பதிட்டா²துங் ந ஸக்கோதி, கதா³சி ஸஸ்ஸதங் அனுபததி கதா³சி உச்சே²த³ங். தி³ட்டி²யேவ ப³ந்த⁴னட்டே²ன ஸங்யோஜனந்தி தி³ட்டி²ஸங்யோஜனங்.
386. Micchādiṭṭhiniddese ayāthāvadassanaṭṭhena micchādiṭṭhi. Diṭṭhīsu gataṃ idaṃ dassanaṃ, dvāsaṭṭhidiṭṭhiantogatattāti diṭṭhigataṃ. Heṭṭhāpissa attho vuttoyeva. Diṭṭhiyeva duratikkamanaṭṭhena diṭṭhigahanaṃ, tiṇagahanavanagahanapabbatagahanāni viya. Diṭṭhiyeva sāsaṅkasappaṭibhayaṭṭhena diṭṭhikantāro, corakantāravāḷakantāramarukantāranirudakakantāradubbhikkhakantārā viya. Sammādiṭṭhiyā vinivijjhanaṭṭhena vilomanaṭṭhena ca diṭṭhivisūkāyikaṃ. Micchādassanañhi uppajjamānaṃ sammādassanaṃ vinivijjhati ceva vilometi ca. Kadāci sassatassa kadāci ucchedassa gahaṇato diṭṭhiyā virūpaṃ phanditanti diṭṭhivipphanditaṃ. Diṭṭhigatiko hi ekasmiṃ patiṭṭhātuṃ na sakkoti, kadāci sassataṃ anupatati kadāci ucchedaṃ. Diṭṭhiyeva bandhanaṭṭhena saṃyojananti diṭṭhisaṃyojanaṃ.
ஸுஸுமாராத³யோ விய புரிஸங், ஆரம்மணங் த³ள்ஹங் க³ண்ஹாதீதி கா³ஹோ. பதிட்ட²ஹனதோ பதிட்டா²ஹோ. அயஞ்ஹி ப³லவப்பவத்திபா⁴வேன பதிட்ட²ஹித்வா க³ண்ஹாதி. நிச்சாதி³வஸேன அபி⁴னிவிஸதீதி அபி⁴னிவேஸோ. த⁴ம்மஸபா⁴வங் அதிக்கமித்வா நிச்சாதி³வஸேன பரதோ ஆமஸதீதி பராமாஸோ. அனத்தா²வஹத்தா குச்சி²தோ மக்³கோ³, குச்சி²தானங் வா அபாயானங் மக்³கோ³தி கும்மக்³கோ³. அயாதா²வபத²தோ மிச்சா²பதோ². யதா² ஹி தி³ஸாமூள்ஹேன அயங் அஸுககா³மஸ்ஸ நாம பதோ²தி க³ஹிதோபி தங் கா³மங் ந ஸம்பாபேதி, ஏவங் தி³ட்டி²க³திகேன ஸுக³திபதோ²தி க³ஹிதாபி தி³ட்டி² ஸுக³திங் ந பாபேதீதி அயாதா²வபத²தோ, மிச்சா²பதோ². மிச்சா²ஸபா⁴வதோ மிச்ச²த்தங். தத்தே²வ பரிப்³ப⁴மனதோ தரந்தி எத்த² பா³லாதி தித்த²ங். தித்த²ஞ்ச தங் அனத்தா²னஞ்ச ஆயதனந்தி தித்தா²யதனங். தித்தி²யானங் வா ஸஞ்ஜாதிதே³ஸட்டே²ன நிவாஸடா²னட்டே²ன ச ஆயதனந்திபி தித்தா²யதனங். விபரியேஸபூ⁴தோ கா³ஹோ, விபரியேஸதோ வா கா³ஹோதி விபரியேஸக்³கா³ஹோ; விபல்லத்த² கா³ஹோதி அத்தோ².
Susumārādayo viya purisaṃ, ārammaṇaṃ daḷhaṃ gaṇhātīti gāho. Patiṭṭhahanato patiṭṭhāho. Ayañhi balavappavattibhāvena patiṭṭhahitvā gaṇhāti. Niccādivasena abhinivisatīti abhiniveso. Dhammasabhāvaṃ atikkamitvā niccādivasena parato āmasatīti parāmāso. Anatthāvahattā kucchito maggo, kucchitānaṃ vā apāyānaṃ maggoti kummaggo. Ayāthāvapathato micchāpatho. Yathā hi disāmūḷhena ayaṃ asukagāmassa nāma pathoti gahitopi taṃ gāmaṃ na sampāpeti, evaṃ diṭṭhigatikena sugatipathoti gahitāpi diṭṭhi sugatiṃ na pāpetīti ayāthāvapathato, micchāpatho. Micchāsabhāvato micchattaṃ. Tattheva paribbhamanato taranti ettha bālāti titthaṃ. Titthañca taṃ anatthānañca āyatananti titthāyatanaṃ. Titthiyānaṃ vā sañjātidesaṭṭhena nivāsaṭhānaṭṭhena ca āyatanantipi titthāyatanaṃ. Vipariyesabhūto gāho, vipariyesato vā gāhoti vipariyesaggāho; vipallattha gāhoti attho.
387-388. அஹிரிகானொத்தப்பனித்³தே³ஸேஸு ஹிரொத்தப்பனித்³தே³ஸவிபரியாயேன அத்தோ² வேதி³தப்³போ³. ஸஹஜாதத⁴ம்மேஸு பன அகம்பனட்டே²னேவ அஹிரிகப³லங் அனொத்தப்பப³லஞ்ச வேதி³தப்³ப³ங்.
387-388. Ahirikānottappaniddesesu hirottappaniddesavipariyāyena attho veditabbo. Sahajātadhammesu pana akampanaṭṭheneva ahirikabalaṃ anottappabalañca veditabbaṃ.
389. லோப⁴மோஹனித்³தே³ஸேஸு லுப்³ப⁴தீதி லோபோ⁴. லுப்³ப⁴னாதி லுப்³ப⁴னாகாரோ. லோப⁴ஸம்பயுத்தசித்தங், புக்³க³லோ வா லுப்³பி⁴தோ; லுப்³பி⁴தஸ்ஸ பா⁴வோ லுப்³பி⁴தத்தங். ஸாரஜ்ஜதீதி ஸாராகோ³. ஸாரஜ்ஜனாகாரோ ஸாரஜ்ஜனா. ஸாரஜ்ஜிதஸ்ஸ பா⁴வோ ஸாரஜ்ஜிதத்தங். அபி⁴ஜ்ஜா²யனட்டே²ன அபி⁴ஜ்ஜா² . புன ‘லோப⁴’-வசனே காரணங் வுத்தமேவ. அகுஸலஞ்ச தங் மூலஞ்ச அகுஸலானங் வா மூலந்தி அகுஸலமூலங்.
389. Lobhamohaniddesesu lubbhatīti lobho. Lubbhanāti lubbhanākāro. Lobhasampayuttacittaṃ, puggalo vā lubbhito; lubbhitassa bhāvo lubbhitattaṃ. Sārajjatīti sārāgo. Sārajjanākāro sārajjanā. Sārajjitassa bhāvo sārajjitattaṃ. Abhijjhāyanaṭṭhena abhijjhā. Puna ‘lobha’-vacane kāraṇaṃ vuttameva. Akusalañca taṃ mūlañca akusalānaṃ vā mūlanti akusalamūlaṃ.
390. ஞாணத³ஸ்ஸனபடிபக்க²தோ அஞ்ஞாணங் அத³ஸ்ஸனங். அபி⁴முகோ² ஹுத்வா த⁴ம்மேன ந ஸமேதி, ந ஸமாக³ச்ச²தீதி அனபி⁴ஸமயோ. அனுரூபதோ த⁴ம்மே பு³ஜ்ஜ²தீதி அனுபோ³தோ⁴. தப்படிபக்க²தாய அனநுபோ³தோ⁴. அனிச்சாதீ³ஹி ஸத்³தி⁴ங் யோஜெத்வா ந பு³ஜ்ஜ²தீதி அஸம்போ³தோ⁴. அஸந்தங் அஸமஞ்ச பு³ஜ்ஜ²தீதிபி அஸம்போ³தோ⁴. சதுஸச்சத⁴ம்மங் நப்படிவிஜ்ஜ²தீதி அப்படிவேதோ⁴. ரூபாதீ³ஸு ஏகத⁴ம்மம்பி அனிச்சாதி³ஸாமஞ்ஞதோ ந ஸங்க³ண்ஹாதீதி அஸங்கா³ஹனா. தமேவ த⁴ம்மங் ந பரியோகா³ஹதீதி அபரியோகா³ஹனா. ந ஸமங் பெக்க²தீதி அஸமபெக்க²ணா. த⁴ம்மானங் ஸபா⁴வங் பதி ந அபெக்க²தீதி அபச்சவெக்க²ணா.
390. Ñāṇadassanapaṭipakkhato aññāṇaṃ adassanaṃ. Abhimukho hutvā dhammena na sameti, na samāgacchatīti anabhisamayo. Anurūpato dhamme bujjhatīti anubodho. Tappaṭipakkhatāya ananubodho. Aniccādīhi saddhiṃ yojetvā na bujjhatīti asambodho. Asantaṃ asamañca bujjhatītipi asambodho. Catusaccadhammaṃ nappaṭivijjhatīti appaṭivedho. Rūpādīsu ekadhammampi aniccādisāmaññato na saṅgaṇhātīti asaṃgāhanā. Tameva dhammaṃ na pariyogāhatīti apariyogāhanā. Na samaṃ pekkhatīti asamapekkhaṇā. Dhammānaṃ sabhāvaṃ pati na apekkhatīti apaccavekkhaṇā.
குஸலாகுஸலகம்மேஸு விபரீதவுத்தியா ஸபா⁴வக்³க³ஹணாபா⁴வேன வா ஏகம்பி கம்மங் ஏதஸ்ஸ பச்சக்க²ங் நத்தி², ஸயங் வா கஸ்ஸசி கம்மஸ்ஸ பச்சக்க²கரணங் நாம ந ஹோதீதி அப்பச்சக்க²கம்மங். யங் ஏதஸ்மிங் அனுப்பஜ்ஜமானே சித்தஸந்தானங் மெஜ்ஜ²ங் ப⁴வெய்ய, ஸுசி, வோதா³னங், தங் து³ட்ட²ங் மெஜ்ஜ²ங் இமினாதி து³ம்மெஜ்ஜ²ங். பா³லானங் பா⁴வோதி பா³ல்யங். முய்ஹதீதி மோஹோ. ப³லவதரோ மோஹோ பமோஹோ. ஸமந்ததோ முய்ஹதீதி ஸம்மோஹோ. விஜ்ஜாய படிபக்க²பா⁴வதோ ந விஜ்ஜாதி அவிஜ்ஜா. ஓக⁴யோக³த்தோ² வுத்தோயேவ. தா²மக³தட்டே²ன அனுஸேதீதி அனுஸயோ. சித்தங் பரியுட்டா²தி, அபி⁴ப⁴வதீதி பரியுட்டா²னங். ஹிதக்³க³ஹணாபா⁴வேன ஹிதாபி⁴முக²ங் க³ந்துங் ந ஸக்கோதி, அஞ்ஞத³த்து² லங்க³தியேவாதி லங்கீ³; க²ஞ்ஜதீதி அத்தோ². து³ருக்³கா⁴டனட்டே²ன வா லங்கீ³. யதா² ஹி மஹாபலிக⁴ஸங்கா²தா லங்கீ³ து³ருக்³கா⁴டா ஹோதி, ஏவமயம்பி லங்கீ³ வியாதி லங்கீ³. ஸேஸங் உத்தானத்த²மேவ. ஸங்க³ஹவாரஸுஞ்ஞதவாராபி ஹெட்டா² வுத்தனயேனேவ அத்த²தோ வேதி³தப்³பா³தி.
Kusalākusalakammesu viparītavuttiyā sabhāvaggahaṇābhāvena vā ekampi kammaṃ etassa paccakkhaṃ natthi, sayaṃ vā kassaci kammassa paccakkhakaraṇaṃ nāma na hotīti appaccakkhakammaṃ. Yaṃ etasmiṃ anuppajjamāne cittasantānaṃ mejjhaṃ bhaveyya, suci, vodānaṃ, taṃ duṭṭhaṃ mejjhaṃ imināti dummejjhaṃ. Bālānaṃ bhāvoti bālyaṃ. Muyhatīti moho. Balavataro moho pamoho. Samantato muyhatīti sammoho. Vijjāya paṭipakkhabhāvato na vijjāti avijjā. Oghayogattho vuttoyeva. Thāmagataṭṭhena anusetīti anusayo. Cittaṃ pariyuṭṭhāti, abhibhavatīti pariyuṭṭhānaṃ. Hitaggahaṇābhāvena hitābhimukhaṃ gantuṃ na sakkoti, aññadatthu laṅgatiyevāti laṅgī; khañjatīti attho. Durugghāṭanaṭṭhena vā laṅgī. Yathā hi mahāpalighasaṅkhātā laṅgī durugghāṭā hoti, evamayampi laṅgī viyāti laṅgī. Sesaṃ uttānatthameva. Saṅgahavārasuññatavārāpi heṭṭhā vuttanayeneva atthato veditabbāti.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / த்³வாத³ஸ அகுஸலானி • Dvādasa akusalāni
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / நித்³தே³ஸவாரகதா²வண்ணனா • Niddesavārakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / நித்³தே³ஸவாரகதா²வண்ணனா • Niddesavārakathāvaṇṇanā
