| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༠. ནིདྡྷམནཱིཡསུཏྟཾ
10. Niddhamanīyasuttaṃ
༡༡༠. ‘‘དསཡིམེ, བྷིཀྑཝེ, ནིདྡྷམནཱིཡཱ དྷམྨཱ། ཀཏམེ དས? སམྨཱདིཊྛིཀསྶ, བྷིཀྑཝེ, མིཙྪཱདིཊྛི ནིདྡྷནྟཱ ཧོཏི; ཡེ ཙ མིཙྪཱདིཊྛིཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི ཏེ ཙསྶ ནིདྡྷནྟཱ ཧོནྟི; སམྨཱདིཊྛིཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི །
110. ‘‘Dasayime, bhikkhave, niddhamanīyā dhammā. Katame dasa? Sammādiṭṭhikassa, bhikkhave, micchādiṭṭhi niddhantā hoti; ye ca micchādiṭṭhipaccayā aneke pāpakā akusalā dhammā sambhavanti te cassa niddhantā honti; sammādiṭṭhipaccayā ca aneke kusalā dhammā bhāvanāpāripūriṃ gacchanti .
‘‘སམྨཱསངྐཔྤསྶ, བྷིཀྑཝེ, མིཙྪཱསངྐཔྤོ ནིདྡྷནྟོ ཧོཏི…པེ॰… སམྨཱཝཱཙསྶ བྷིཀྑཝེ, མིཙྪཱཝཱཙཱ ནིདྡྷནྟཱ ཧོཏི… སམྨཱཀམྨནྟསྶ, བྷིཀྑཝེ, མིཙྪཱཀམྨནྟོ ནིདྡྷནྟོ ཧོཏི… སམྨཱཨཱཛཱིཝསྶ, བྷིཀྑཝེ, མིཙྪཱཨཱཛཱིཝོ ནིདྡྷནྟོ ཧོཏི… སམྨཱཝཱཡཱམསྶ, བྷིཀྑཝེ, མིཙྪཱཝཱཡཱམོ ནིདྡྷནྟོ ཧོཏི… སམྨཱསཏིསྶ, བྷིཀྑཝེ, མིཙྪཱསཏི ནིདྡྷནྟཱ ཧོཏི… སམྨཱསམཱདྷིསྶ, བྷིཀྑཝེ, མིཙྪཱསམཱདྷི ནིདྡྷནྟོ ཧོཏི… སམྨཱཉཱཎིསྶ, བྷིཀྑཝེ, མིཙྪཱཉཱཎཾ ནིདྡྷནྟཾ ཧོཏི…།
‘‘Sammāsaṅkappassa, bhikkhave, micchāsaṅkappo niddhanto hoti…pe… sammāvācassa bhikkhave, micchāvācā niddhantā hoti… sammākammantassa, bhikkhave, micchākammanto niddhanto hoti… sammāājīvassa, bhikkhave, micchāājīvo niddhanto hoti… sammāvāyāmassa, bhikkhave, micchāvāyāmo niddhanto hoti… sammāsatissa, bhikkhave, micchāsati niddhantā hoti… sammāsamādhissa, bhikkhave, micchāsamādhi niddhanto hoti… sammāñāṇissa, bhikkhave, micchāñāṇaṃ niddhantaṃ hoti….
‘‘སམྨཱཝིམུཏྟིསྶ , བྷིཀྑཝེ, མིཙྪཱཝིམུཏྟི ནིདྡྷནྟཱ ཧོཏི; ཡེ ཙ མིཙྪཱཝིམུཏྟིཔཙྩཡཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི ཏེ ཙསྶ ནིདྡྷནྟཱ ཧོནྟི; སམྨཱཝིམུཏྟིཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟི། ཨིམེ ཁོ, བྷིཀྑཝེ, དས ནིདྡྷམནཱིཡཱ དྷམྨཱ’’ཏི། དསམཾ།
‘‘Sammāvimuttissa , bhikkhave, micchāvimutti niddhantā hoti; ye ca micchāvimuttipaccayā aneke pāpakā akusalā dhammā sambhavanti te cassa niddhantā honti; sammāvimuttipaccayā ca aneke kusalā dhammā bhāvanāpāripūriṃ gacchanti. Ime kho, bhikkhave, dasa niddhamanīyā dhammā’’ti. Dasamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨-༡༠. ཏིཀིཙྪཀསུཏྟཱདིཝཎྞནཱ • 8-10. Tikicchakasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༢. སམཎསཉྙཱསུཏྟཱདིཝཎྞནཱ • 1-12. Samaṇasaññāsuttādivaṇṇanā
