| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
निगमनकथा
Nigamanakathā
एत्तावता च –
Ettāvatā ca –
रतनपुण्णनामस्स, पुरस्स राजधानिया।
Ratanapuṇṇanāmassa, purassa rājadhāniyā;
दक्खिणे मुनिरूपस्स, ईसंपाचीननिस्सिते॥
Dakkhiṇe munirūpassa, īsaṃpācīnanissite.
यो विहारो सपासादो, कारितो राजदेविया।
Yo vihāro sapāsādo, kārito rājadeviyā;
या वसता मया तत्र, कता पाचित्यादियोजना॥
Yā vasatā mayā tatra, katā pācityādiyojanā.
मापितरत्नपुण्णस्स, सत्तरसेव राजिनो।
Māpitaratnapuṇṇassa, sattaraseva rājino;
जयवस्सेट्ठारसम्हि, सम्पत्तेयं सुनिट्ठिता॥
Jayavasseṭṭhārasamhi, sampatteyaṃ suniṭṭhitā.
‘‘रतनपुण्णा’’तिव्हयस्स राजधानीनगरस्स दक्खिणस्मिं दिसाभागे पञ्चयोजनप्पमाणे ठाने द्वीहि महातळाकेहि सुसोभितस्स मिधिलनामनगरस्स पुरत्थिमस्मिं दिसाभागे दियड्ढगावुतप्पमाणे ठाने अनेकतालपन्तीहि सुसोभितो चतुन्नं कुलानं रमणीयभूतो ‘‘कफ्रू’’ इति वोहरितो यो सो महागामो पतिट्ठितो, तत्थ पटिसन्धिया जातेन सीलादिगुणेहि पसंसितेन ‘‘जागरो’’ति गरूहि गहितनामधेय्येन तिक्खत्तुं राजूहि राजमुद्दिना लञ्छितेन मे कतायं पाचित्यादिवण्णनाय योजना सम्पत्ते जिनचक्के तेरसाधिकचतुवस्ससताधिकं द्विसहस्सं, सक्कराजे पन एकतिंसाधिकद्विवस्ससताधिकं सहस्सं गिम्हाने जेट्ठमासे जुण्हपक्खस्स पञ्चमे सुक्कवारे निट्ठं पत्ता अनायासेनाति।
‘‘Ratanapuṇṇā’’tivhayassa rājadhānīnagarassa dakkhiṇasmiṃ disābhāge pañcayojanappamāṇe ṭhāne dvīhi mahātaḷākehi susobhitassa midhilanāmanagarassa puratthimasmiṃ disābhāge diyaḍḍhagāvutappamāṇe ṭhāne anekatālapantīhi susobhito catunnaṃ kulānaṃ ramaṇīyabhūto ‘‘kaphrū’’ iti voharito yo so mahāgāmo patiṭṭhito, tattha paṭisandhiyā jātena sīlādiguṇehi pasaṃsitena ‘‘jāgaro’’ti garūhi gahitanāmadheyyena tikkhattuṃ rājūhi rājamuddinā lañchitena me katāyaṃ pācityādivaṇṇanāya yojanā sampatte jinacakke terasādhikacatuvassasatādhikaṃ dvisahassaṃ, sakkarāje pana ekatiṃsādhikadvivassasatādhikaṃ sahassaṃ gimhāne jeṭṭhamāse juṇhapakkhassa pañcame sukkavāre niṭṭhaṃ pattā anāyāsenāti.
योजनाय इमिस्साहं, रचनस्सानुभावतो।
Yojanāya imissāhaṃ, racanassānubhāvato;
भवेय्यानेकजातीसु, पिटकत्तयधारको॥
Bhaveyyānekajātīsu, piṭakattayadhārako.
कुसलो चुभयत्थेसु, परिसासु विसारदो।
Kusalo cubhayatthesu, parisāsu visārado;
समिज्झन्तु सुसङ्कप्पा, मय्हञ्च सब्बपाणिनं॥
Samijjhantu susaṅkappā, mayhañca sabbapāṇinaṃ.
वप्पादिमनतिक्कम्म, सम्मा देवो पवस्सतु।
Vappādimanatikkamma, sammā devo pavassatu;
अत्तजमिव रक्खन्तु, राजानो चापि मेदिनिन्ति॥
Attajamiva rakkhantu, rājāno cāpi medininti.
इति भदन्तजागरत्थेरेन कता
Iti bhadantajāgarattherena katā
पाचित्यादिवण्णनाय योजना समत्ता।
Pācityādivaṇṇanāya yojanā samattā.
