| Library / Tipiṭaka / तिपिटक • Tipiṭaka / विनयविनिच्छय-उत्तरविनिच्छय • Vinayavinicchaya-uttaravinicchaya |
निगमनकथा
Nigamanakathā
९६१.
961.
रचितो बुद्धदत्तेन, सुद्धचित्तेन धीमता।
Racito buddhadattena, suddhacittena dhīmatā;
सुचिरट्ठितिकामेन, सासनस्स महेसिनो॥
Suciraṭṭhitikāmena, sāsanassa mahesino.
९६२.
962.
अन्तरेनन्तरायं तु, यथा सिद्धिमुपागतो।
Antarenantarāyaṃ tu, yathā siddhimupāgato;
अत्थतो गन्थतो चेव, उत्तरोयमनुत्तरो॥
Atthato ganthato ceva, uttaroyamanuttaro.
९६३.
963.
तथा सिज्झन्तु सङ्कप्पा, सत्तानं धम्मसंयुता।
Tathā sijjhantu saṅkappā, sattānaṃ dhammasaṃyutā;
राजा पातु महिं सम्मा, काले देवो पवस्सतु॥
Rājā pātu mahiṃ sammā, kāle devo pavassatu.
९६४.
964.
याव तिट्ठति सेलिन्दो, याव चन्दो विरोचति।
Yāva tiṭṭhati selindo, yāva cando virocati;
ताव तिट्ठतु सद्धम्मो, गोतमस्स महेसिनो॥
Tāva tiṭṭhatu saddhammo, gotamassa mahesino.
९६५.
965.
खन्तिसोरच्चसोसील्य-बुद्धिसद्धादयादयो।
Khantisoraccasosīlya-buddhisaddhādayādayo;
पतिट्ठिता गुणा यस्मिं, रतनानीव सागरे॥
Patiṭṭhitā guṇā yasmiṃ, ratanānīva sāgare.
९६६.
966.
विनयाचारयुत्तेन, तेन सक्कच्च सादरं।
Vinayācārayuttena, tena sakkacca sādaraṃ;
याचितो सङ्घपालेन, थेरेन थिरचेतसा॥
Yācito saṅghapālena, therena thiracetasā.
९६७.
967.
सुचिरट्ठितिकामेन , विनयस्स महेसिनो।
Suciraṭṭhitikāmena , vinayassa mahesino;
भिक्खूनं पाटवत्थाय, विनयस्स विनिच्छये॥
Bhikkhūnaṃ pāṭavatthāya, vinayassa vinicchaye.
९६८.
968.
अकासिं परमं एतं, उत्तरं नाम नामतो।
Akāsiṃ paramaṃ etaṃ, uttaraṃ nāma nāmato;
सवने सादरं कत्वा, सिक्खितब्बो ततो अयं॥
Savane sādaraṃ katvā, sikkhitabbo tato ayaṃ.
९६९.
969.
पञ्ञासाधिकसङ्ख्यानि, नवगाथासतानि हि।
Paññāsādhikasaṅkhyāni, navagāthāsatāni hi;
गणना उत्तरस्सायं, छन्दसानुट्ठुभेन तु॥
Gaṇanā uttarassāyaṃ, chandasānuṭṭhubhena tu.
९७०.
970.
गाथा चतुसहस्सानि, सतञ्च ऊनवीसति।
Gāthā catusahassāni, satañca ūnavīsati;
पमाणतो इमा वुत्ता, विनयस्स विनिच्छयेति॥
Pamāṇato imā vuttā, vinayassa vinicchayeti.
इति तम्बपण्णियेन परमवेय्याकरणेन तिपिटकनयविधिकुसलेन परमकविजनहदयपदुमवनविकसनकरेन कविवरवसभेन परमरतिकरवरमधुरवचनुग्गारेन उरगपुरेन बुद्धदत्तेन रचितो उत्तरविनिच्छयो समत्तोति।
Iti tambapaṇṇiyena paramaveyyākaraṇena tipiṭakanayavidhikusalena paramakavijanahadayapadumavanavikasanakarena kavivaravasabhena paramaratikaravaramadhuravacanuggārena uragapurena buddhadattena racito uttaravinicchayo samattoti.
उत्तरविनिच्छयो निट्ठितो।
Uttaravinicchayo niṭṭhito.
