| Library / Tipiṭaka / ติปิฎก • Tipiṭaka / สโมฺมหวิโนทนี-อฎฺฐกถา • Sammohavinodanī-aṭṭhakathā |
นิคมนกถา
Nigamanakathā
เอตฺตาวตา จ –
Ettāvatā ca –
อภิธมฺมํ เทเสโนฺต, ธมฺมครุ ธมฺมคารวยุตฺตานํ;
Abhidhammaṃ desento, dhammagaru dhammagāravayuttānaṃ;
เทวานํ เทวปุเร, เทวคณสหสฺสปริวาโรฯ
Devānaṃ devapure, devagaṇasahassaparivāro.
ทุติยํ อทุติยปุริโส, ยํ อาห วิภงฺคปกรณํ นาโถ;
Dutiyaṃ adutiyapuriso, yaṃ āha vibhaṅgapakaraṇaṃ nātho;
อฎฺฐารสหิ วิภเงฺคหิ, มณฺฑิตมณฺฑเปยฺยคุโณฯ
Aṭṭhārasahi vibhaṅgehi, maṇḍitamaṇḍapeyyaguṇo.
อตฺถปฺปกาสนตฺถํ, ตสฺสาหํ ยาจิโต ฐิตคุเณน;
Atthappakāsanatthaṃ, tassāhaṃ yācito ṭhitaguṇena;
ยตินา อทนฺธคตินา, สุพุทฺธินา พุทฺธโฆเสนฯ
Yatinā adandhagatinā, subuddhinā buddhaghosena.
ยํ อารภิํ รจยิตุํ, อฎฺฐกถํ สุนิปุเณสุ อเตฺถสุ;
Yaṃ ārabhiṃ racayituṃ, aṭṭhakathaṃ sunipuṇesu atthesu;
สโมฺมหวิโนทนโต, สโมฺมหวิโนทนิํ นามฯ
Sammohavinodanato, sammohavinodaniṃ nāma.
โปราณฎฺฐกถานํ, สารํ อาทาย สา อยํ นิฎฺฐํ;
Porāṇaṭṭhakathānaṃ, sāraṃ ādāya sā ayaṃ niṭṭhaṃ;
ปตฺตา อนนฺตราเยน, ปาฬิยา ภาณวาเรหิฯ
Pattā anantarāyena, pāḷiyā bhāṇavārehi.
จตฺตาลีสาย ยถา, เอเกน จ เอวเมว สเพฺพปิ;
Cattālīsāya yathā, ekena ca evameva sabbepi;
นิฎฺฐํ วชนฺตุ วิมลา, มโนรถา สพฺพสตฺตานํฯ
Niṭṭhaṃ vajantu vimalā, manorathā sabbasattānaṃ.
สทฺธมฺมสฺส ฐิตตฺถํ, ยญฺจ อิมํ รจยตา มยา ปุญฺญํ;
Saddhammassa ṭhitatthaṃ, yañca imaṃ racayatā mayā puññaṃ;
ปตฺตํ เตน สมตฺตํ, ปาปุณตุ สเทวโก โลโกฯ
Pattaṃ tena samattaṃ, pāpuṇatu sadevako loko.
สุจิรํ ติฎฺฐตุ ธโมฺม, ธมฺมาภิรโต สทา ภวตุ โลโก;
Suciraṃ tiṭṭhatu dhammo, dhammābhirato sadā bhavatu loko;
นิจฺจํ เขมสุภิกฺขาทิ-สมฺปทา ชนปทา โหนฺตูติฯ
Niccaṃ khemasubhikkhādi-sampadā janapadā hontūti.
ปรมวิสุทฺธสทฺธาพุทฺธิวีริยปฎิมณฺฑิเตน สีลาจารชฺชวมทฺทวาทิคุณสมุทยสมุทิเตน สกสมยสมยนฺตรคหนโชฺฌคาหณสมเตฺถน ปญฺญาเวยฺยตฺติยสมนฺนาคเตน ติปิฎกปริยตฺติปฺปเภเท สาฎฺฐกเถ สตฺถุสาสเน อปฺปฎิหตญาณปฺปภาเวน มหาเวยฺยากรเณน กรณสมฺปตฺติชนิตสุขวินิคฺคตมธุโรทารวจนลาวณฺณยุเตฺตน ยุตฺตมุตฺตวาทินา วาทีวเรน มหากวินา ปภินฺนปฎิสมฺภิทาปริวาเร ฉฬภิญฺญาปฎิสมฺภิทาทิปฺปเภทคุณปฎิมณฺฑิเต อุตฺตริมนุสฺสธเมฺม สุปฺปติฎฺฐิตพุทฺธีนํ เถรวํสปฺปทีปานํ เถรานํ มหาวิหารวาสีนํ วํสาลงฺการภูเตน วิปุลวิสุทฺธพุทฺธินา พุทฺธโฆโสติ ครูหิ คหิตนามเธเยฺยน เถเรน กตา อยํ สโมฺมหวิโนทนี นาม วิภงฺคฎฺฐกถาฯ
Paramavisuddhasaddhābuddhivīriyapaṭimaṇḍitena sīlācārajjavamaddavādiguṇasamudayasamuditena sakasamayasamayantaragahanajjhogāhaṇasamatthena paññāveyyattiyasamannāgatena tipiṭakapariyattippabhede sāṭṭhakathe satthusāsane appaṭihatañāṇappabhāvena mahāveyyākaraṇena karaṇasampattijanitasukhaviniggatamadhurodāravacanalāvaṇṇayuttena yuttamuttavādinā vādīvarena mahākavinā pabhinnapaṭisambhidāparivāre chaḷabhiññāpaṭisambhidādippabhedaguṇapaṭimaṇḍite uttarimanussadhamme suppatiṭṭhitabuddhīnaṃ theravaṃsappadīpānaṃ therānaṃ mahāvihāravāsīnaṃ vaṃsālaṅkārabhūtena vipulavisuddhabuddhinā buddhaghosoti garūhi gahitanāmadheyyena therena katā ayaṃ sammohavinodanī nāma vibhaṅgaṭṭhakathā.
ตาว ติฎฺฐตุ โลกสฺมิํ, โลกนิตฺถรเณสินํ;
Tāva tiṭṭhatu lokasmiṃ, lokanittharaṇesinaṃ;
ทเสฺสนฺตี กุลปุตฺตานํ, นยํ ปญฺญาวิสุทฺธิยาฯ
Dassentī kulaputtānaṃ, nayaṃ paññāvisuddhiyā.
ยาว พุโทฺธติ นามมฺปิ, สุทฺธจิตฺตสฺส ตาทิโน;
Yāva buddhoti nāmampi, suddhacittassa tādino;
โลกมฺหิ โลกเชฎฺฐสฺส, ปวตฺตติ มเหสิโนติฯ
Lokamhi lokajeṭṭhassa, pavattati mahesinoti.
สโมฺมหวิโนทนี นาม วิภงฺค-อฎฺฐกถา นิฎฺฐิตาฯ
Sammohavinodanī nāma vibhaṅga-aṭṭhakathā niṭṭhitā.
