| Library / Tipiṭaka / ติปิฎก • Tipiṭaka / อุทาน-อฎฺฐกถา • Udāna-aṭṭhakathā |
นิคมนกถา
Nigamanakathā
เอตฺตาวตา จ –
Ettāvatāca –
สุวิมุตฺตภวาทาโน, เทวทานวมานิโต;
Suvimuttabhavādāno, devadānavamānito;
ปจฺฉินฺนตณฺหาสนฺตาโน, ปีติสํเวคทีปโนฯ
Pacchinnataṇhāsantāno, pītisaṃvegadīpano.
สทฺธมฺมทานนิรโต, อุปาทานกฺขยาวโห;
Saddhammadānanirato, upādānakkhayāvaho;
ตตฺถ ตตฺถ อุทาเน เย, อุทาเนสิ วินายโกฯ
Tattha tattha udāne ye, udānesi vināyako.
เต สเพฺพ เอกโต กตฺวา, อาโรเปเนฺตหิ สงฺคหํ;
Te sabbe ekato katvā, āropentehi saṅgahaṃ;
อุทานมิติ สงฺคีตํ, ธมฺมสงฺคาหเกหิ ยํฯ
Udānamiti saṅgītaṃ, dhammasaṅgāhakehi yaṃ.
ตสฺส อตฺถํ ปกาเสตุํ, โปราณฎฺฐกถานยํ;
Tassa atthaṃ pakāsetuṃ, porāṇaṭṭhakathānayaṃ;
นิสฺสาย ยา สมารทฺธา, อตฺถสํวณฺณนา มยาฯ
Nissāya yā samāraddhā, atthasaṃvaṇṇanā mayā.
สา ตตฺถ ปรมตฺถานํ, สุตฺตเนฺตสุ ยถารหํ;
Sā tattha paramatthānaṃ, suttantesu yathārahaṃ;
ปกาสนา ปรมตฺถทีปนี นาม นามโตฯ
Pakāsanā paramatthadīpanī nāma nāmato.
สมฺปตฺตา ปรินิฎฺฐานํ, อนากุลวินิจฺฉยา;
Sampattā pariniṭṭhānaṃ, anākulavinicchayā;
จตุตฺติํสปฺปมาณาย, ปาฬิยา ภาณวารโตฯ
Catuttiṃsappamāṇāya, pāḷiyā bhāṇavārato.
อิติ ตํ สงฺขโรเนฺตน, ยํ ตํ อธิคตํ มยา;
Iti taṃ saṅkharontena, yaṃ taṃ adhigataṃ mayā;
ปุญฺญํ ตสฺสานุภาเวน, โลกนาถสฺส สาสนํฯ
Puññaṃ tassānubhāvena, lokanāthassa sāsanaṃ.
โอคาหิตฺวา วิสุทฺธาย, สีลาทิปฎิปตฺติยา;
Ogāhitvā visuddhāya, sīlādipaṭipattiyā;
สเพฺพปิ เทหิโน โหนฺตุ, วิมุตฺติรสภาคิโนฯ
Sabbepi dehino hontu, vimuttirasabhāgino.
จิรํ ติฎฺฐตุ โลกสฺมิํ, สมฺมาสมฺพุทฺธสาสนํ;
Ciraṃ tiṭṭhatu lokasmiṃ, sammāsambuddhasāsanaṃ;
ตสฺมิํ สคารวา นิจฺจํ, โหนฺตุ สเพฺพปิ ปาณิโนฯ
Tasmiṃ sagāravā niccaṃ, hontu sabbepi pāṇino.
สมฺมา วสฺสตุ กาเลน, เทโวปิ ชคตีปติ;
Sammā vassatu kālena, devopi jagatīpati;
สทฺธมฺมนิรโต โลกํ, ธเมฺมเนว ปสาสตูติฯ
Saddhammanirato lokaṃ, dhammeneva pasāsatūti.
พทรติตฺถวิหารวาสินา อาจริยธมฺมปาลเตฺถเรน
Badaratitthavihāravāsinā ācariyadhammapālattherena
กตาอุทานสฺส อฎฺฐกถา สมตฺตาฯ
Katāudānassa aṭṭhakathā samattā.
