| Library / Tipiṭaka / តិបិដក • Tipiṭaka / ធម្មសង្គណិ-អដ្ឋកថា • Dhammasaṅgaṇi-aṭṭhakathā |
និគមនកថា
Nigamanakathā
ឯត្តាវតា ច –
Ettāvatā ca –
ចិត្តំ រូបញ្ច និក្ខេបំ, អត្ថុទ្ធារំ មនោរមំ;
Cittaṃ rūpañca nikkhepaṃ, atthuddhāraṃ manoramaṃ;
យំ លោកនាថោ ភាជេន្តោ, ទេសេសិ ធម្មសង្គណិំ។
Yaṃ lokanātho bhājento, desesi dhammasaṅgaṇiṃ.
អភិធម្មស្ស សង្គយ្ហ, ធម្មេ អនវសេសតោ;
Abhidhammassa saṅgayha, dhamme anavasesato;
ឋិតាយ តស្សា អារទ្ធា, យា មយា អត្ថវណ្ណនា។
Ṭhitāya tassā āraddhā, yā mayā atthavaṇṇanā.
អនាកុលានមត្ថានំ, សម្ភវា អដ្ឋសាលិនី;
Anākulānamatthānaṃ, sambhavā aṭṭhasālinī;
ឥតិ នាមេន សា ឯសា, សន្និដ្ឋានមុបាគតា។
Iti nāmena sā esā, sanniṭṭhānamupāgatā.
ឯកូនចត្តាលីសាយ, បាឡិយា ភាណវារតោ;
Ekūnacattālīsāya, pāḷiyā bhāṇavārato;
ចិរដ្ឋិតត្ថំ ធម្មស្ស, និដ្ឋាបេន្តេន តំ មយា។
Ciraṭṭhitatthaṃ dhammassa, niṭṭhāpentena taṃ mayā.
យំ បត្តំ កុសលំ តស្ស, អានុភាវេន បាណិនោ;
Yaṃ pattaṃ kusalaṃ tassa, ānubhāvena pāṇino;
សព្ពេ សទ្ធម្មរាជស្ស, ញត្វា ធម្មំ សុខាវហំ។
Sabbe saddhammarājassa, ñatvā dhammaṃ sukhāvahaṃ.
បាបុណន្តុ វិសុទ្ធាយ, សុខាយ បដិបត្តិយា;
Pāpuṇantu visuddhāya, sukhāya paṭipattiyā;
អសោកមនុបាយាសំ, និព្ពានសុខមុត្តមំ។
Asokamanupāyāsaṃ, nibbānasukhamuttamaṃ.
ចិរំ តិដ្ឋតុ សទ្ធម្មោ, ធម្មេ ហោន្តុ សគារវា;
Ciraṃ tiṭṭhatu saddhammo, dhamme hontu sagāravā;
សព្ពេបិ សត្តា កាលេន, សម្មា ទេវោ បវស្សតុ។
Sabbepi sattā kālena, sammā devo pavassatu.
យថា រក្ខិំសុ បោរាណា, សុរាជានោ តថេវិមំ;
Yathā rakkhiṃsu porāṇā, surājāno tathevimaṃ;
រាជា រក្ខតុ ធម្មេន, អត្តនោវ បជំ បជន្តិ។
Rājā rakkhatu dhammena, attanova pajaṃ pajanti.
បរមវិសុទ្ធសទ្ធាពុទ្ធិវីរិយបដិមណ្ឌិតេន សីលាចារជ្ជវមទ្ទវាទិគុណសមុទយសមុទិតេន សកសមយសមយន្តរគហនជ្ឈោគាហណសមត្ថេន បញ្ញាវេយ្យត្តិយសមន្នាគតេន តិបិដកបរិយត្តិប្បភេទេ សាដ្ឋកថេ សត្ថុសាសនេ អប្បដិហតញាណប្បភាវេន មហាវេយ្យាករណេន ករណសម្បត្តិជនិតសុខវិនិគ្គតមធុរោទារវចនលាវណ្ណយុត្តេន យុត្តមុត្តវាទិនា វាទីវរេន មហាកវិនា បភិន្នបដិសម្ភិទាបរិវារេ ឆឡភិញ្ញាទិប្បភេទគុណបដិមណ្ឌិតេ ឧត្តរិមនុស្សធម្មេ សុប្បតិដ្ឋិតពុទ្ធីនំ ថេរវំសប្បទីបានំ ថេរានំ មហាវិហារវាសីនំ វំសាលង្ការភូតេន វិបុលវិសុទ្ធពុទ្ធិនា ពុទ្ធឃោសោតិ គរូហិ គហិតនាមធេយ្យេន ថេរេន កតា អយំ អដ្ឋសាលិនី នាម ធម្មសង្គហដ្ឋកថា។
Paramavisuddhasaddhābuddhivīriyapaṭimaṇḍitena sīlācārajjavamaddavādiguṇasamudayasamuditena sakasamayasamayantaragahanajjhogāhaṇasamatthena paññāveyyattiyasamannāgatena tipiṭakapariyattippabhede sāṭṭhakathe satthusāsane appaṭihatañāṇappabhāvena mahāveyyākaraṇena karaṇasampattijanitasukhaviniggatamadhurodāravacanalāvaṇṇayuttena yuttamuttavādinā vādīvarena mahākavinā pabhinnapaṭisambhidāparivāre chaḷabhiññādippabhedaguṇapaṭimaṇḍite uttarimanussadhamme suppatiṭṭhitabuddhīnaṃ theravaṃsappadīpānaṃ therānaṃ mahāvihāravāsīnaṃ vaṃsālaṅkārabhūtena vipulavisuddhabuddhinā buddhaghosoti garūhi gahitanāmadheyyena therena katā ayaṃ aṭṭhasālinī nāma dhammasaṅgahaṭṭhakathā.
តាវ តិដ្ឋតុ លោកស្មិំ, លោកនិត្ថរណេសិនំ;
Tāva tiṭṭhatu lokasmiṃ, lokanittharaṇesinaṃ;
ទស្សេន្តី កុលបុត្តានំ, នយំ បញ្ញាវិសុទ្ធិយា។
Dassentī kulaputtānaṃ, nayaṃ paññāvisuddhiyā.
យាវ ‘ពុទ្ធោ’តិ នាមម្បិ, សុទ្ធចិត្តស្ស តាទិនោ;
Yāva ‘buddho’ti nāmampi, suddhacittassa tādino;
លោកម្ហិ លោកជេដ្ឋស្ស, បវត្តតិ មហេសិនោតិ។
Lokamhi lokajeṭṭhassa, pavattati mahesinoti.
អដ្ឋសាលិនី នាម
Aṭṭhasālinī nāma
ធម្មសង្គហ-អដ្ឋកថា និដ្ឋិតា។
Dhammasaṅgaha-aṭṭhakathā niṭṭhitā.
