| Library / Tipiṭaka / តិបិដក • Tipiṭaka / សម្មោហវិនោទនី-អដ្ឋកថា • Sammohavinodanī-aṭṭhakathā |
និគមនកថា
Nigamanakathā
ឯត្តាវតា ច –
Ettāvatā ca –
អភិធម្មំ ទេសេន្តោ, ធម្មគរុ ធម្មគារវយុត្តានំ;
Abhidhammaṃ desento, dhammagaru dhammagāravayuttānaṃ;
ទេវានំ ទេវបុរេ, ទេវគណសហស្សបរិវារោ។
Devānaṃ devapure, devagaṇasahassaparivāro.
ទុតិយំ អទុតិយបុរិសោ, យំ អាហ វិភង្គបករណំ នាថោ;
Dutiyaṃ adutiyapuriso, yaṃ āha vibhaṅgapakaraṇaṃ nātho;
អដ្ឋារសហិ វិភង្គេហិ, មណ្ឌិតមណ្ឌបេយ្យគុណោ។
Aṭṭhārasahi vibhaṅgehi, maṇḍitamaṇḍapeyyaguṇo.
អត្ថប្បកាសនត្ថំ, តស្សាហំ យាចិតោ ឋិតគុណេន;
Atthappakāsanatthaṃ, tassāhaṃ yācito ṭhitaguṇena;
យតិនា អទន្ធគតិនា, សុពុទ្ធិនា ពុទ្ធឃោសេន។
Yatinā adandhagatinā, subuddhinā buddhaghosena.
យំ អារភិំ រចយិតុំ, អដ្ឋកថំ សុនិបុណេសុ អត្ថេសុ;
Yaṃ ārabhiṃ racayituṃ, aṭṭhakathaṃ sunipuṇesu atthesu;
សម្មោហវិនោទនតោ, សម្មោហវិនោទនិំ នាម។
Sammohavinodanato, sammohavinodaniṃ nāma.
បោរាណដ្ឋកថានំ, សារំ អាទាយ សា អយំ និដ្ឋំ;
Porāṇaṭṭhakathānaṃ, sāraṃ ādāya sā ayaṃ niṭṭhaṃ;
បត្តា អនន្តរាយេន, បាឡិយា ភាណវារេហិ។
Pattā anantarāyena, pāḷiyā bhāṇavārehi.
ចត្តាលីសាយ យថា, ឯកេន ច ឯវមេវ សព្ពេបិ;
Cattālīsāya yathā, ekena ca evameva sabbepi;
និដ្ឋំ វជន្តុ វិមលា, មនោរថា សព្ពសត្តានំ។
Niṭṭhaṃ vajantu vimalā, manorathā sabbasattānaṃ.
សទ្ធម្មស្ស ឋិតត្ថំ, យញ្ច ឥមំ រចយតា មយា បុញ្ញំ;
Saddhammassa ṭhitatthaṃ, yañca imaṃ racayatā mayā puññaṃ;
បត្តំ តេន សមត្តំ, បាបុណតុ សទេវកោ លោកោ។
Pattaṃ tena samattaṃ, pāpuṇatu sadevako loko.
សុចិរំ តិដ្ឋតុ ធម្មោ, ធម្មាភិរតោ សទា ភវតុ លោកោ;
Suciraṃ tiṭṭhatu dhammo, dhammābhirato sadā bhavatu loko;
និច្ចំ ខេមសុភិក្ខាទិ-សម្បទា ជនបទា ហោន្តូតិ។
Niccaṃ khemasubhikkhādi-sampadā janapadā hontūti.
បរមវិសុទ្ធសទ្ធាពុទ្ធិវីរិយបដិមណ្ឌិតេន សីលាចារជ្ជវមទ្ទវាទិគុណសមុទយសមុទិតេន សកសមយសមយន្តរគហនជ្ឈោគាហណសមត្ថេន បញ្ញាវេយ្យត្តិយសមន្នាគតេន តិបិដកបរិយត្តិប្បភេទេ សាដ្ឋកថេ សត្ថុសាសនេ អប្បដិហតញាណប្បភាវេន មហាវេយ្យាករណេន ករណសម្បត្តិជនិតសុខវិនិគ្គតមធុរោទារវចនលាវណ្ណយុត្តេន យុត្តមុត្តវាទិនា វាទីវរេន មហាកវិនា បភិន្នបដិសម្ភិទាបរិវារេ ឆឡភិញ្ញាបដិសម្ភិទាទិប្បភេទគុណបដិមណ្ឌិតេ ឧត្តរិមនុស្សធម្មេ សុប្បតិដ្ឋិតពុទ្ធីនំ ថេរវំសប្បទីបានំ ថេរានំ មហាវិហារវាសីនំ វំសាលង្ការភូតេន វិបុលវិសុទ្ធពុទ្ធិនា ពុទ្ធឃោសោតិ គរូហិ គហិតនាមធេយ្យេន ថេរេន កតា អយំ សម្មោហវិនោទនី នាម វិភង្គដ្ឋកថា។
Paramavisuddhasaddhābuddhivīriyapaṭimaṇḍitena sīlācārajjavamaddavādiguṇasamudayasamuditena sakasamayasamayantaragahanajjhogāhaṇasamatthena paññāveyyattiyasamannāgatena tipiṭakapariyattippabhede sāṭṭhakathe satthusāsane appaṭihatañāṇappabhāvena mahāveyyākaraṇena karaṇasampattijanitasukhaviniggatamadhurodāravacanalāvaṇṇayuttena yuttamuttavādinā vādīvarena mahākavinā pabhinnapaṭisambhidāparivāre chaḷabhiññāpaṭisambhidādippabhedaguṇapaṭimaṇḍite uttarimanussadhamme suppatiṭṭhitabuddhīnaṃ theravaṃsappadīpānaṃ therānaṃ mahāvihāravāsīnaṃ vaṃsālaṅkārabhūtena vipulavisuddhabuddhinā buddhaghosoti garūhi gahitanāmadheyyena therena katā ayaṃ sammohavinodanī nāma vibhaṅgaṭṭhakathā.
តាវ តិដ្ឋតុ លោកស្មិំ, លោកនិត្ថរណេសិនំ;
Tāva tiṭṭhatu lokasmiṃ, lokanittharaṇesinaṃ;
ទស្សេន្តី កុលបុត្តានំ, នយំ បញ្ញាវិសុទ្ធិយា។
Dassentī kulaputtānaṃ, nayaṃ paññāvisuddhiyā.
យាវ ពុទ្ធោតិ នាមម្បិ, សុទ្ធចិត្តស្ស តាទិនោ;
Yāva buddhoti nāmampi, suddhacittassa tādino;
លោកម្ហិ លោកជេដ្ឋស្ស, បវត្តតិ មហេសិនោតិ។
Lokamhi lokajeṭṭhassa, pavattati mahesinoti.
សម្មោហវិនោទនី នាម វិភង្គ-អដ្ឋកថា និដ្ឋិតា។
Sammohavinodanī nāma vibhaṅga-aṭṭhakathā niṭṭhitā.
