| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
නිගමනකථා
Nigamanakathā
එත්‌තාවතා ච –
Ettāvatā ca –
1.
1.
ලඞ්‌කිස්‌සරො යො විජිතාරිරාජො;
Laṅkissaro yo vijitārirājo;
රාජා පරක්‌කන්‌තභුජො යසස්‌සී;
Rājā parakkantabhujo yasassī;
තිධාගතං සීහළමෙකරජ්‌ජං;
Tidhāgataṃ sīhaḷamekarajjaṃ;
අකා නිකායඤ්‌ච තථා සමග්‌ගං.
Akā nikāyañca tathā samaggaṃ.
2.
2.
පුරෙ පුලත්‌ථිම්‌හි වරෙ පුරානං;
Pure pulatthimhi vare purānaṃ;
මජ්‌ඣම්‌හි නානාරතනාකරානං;
Majjhamhi nānāratanākarānaṃ;
අනන්‌තසම්‌පත්‌තිභරාභිරාමෙ;
Anantasampattibharābhirāme;
වරාචලුත්‌තඞ්‌ගඝරාභිරාමෙ.
Varācaluttaṅgagharābhirāme.
3.
3.
අභෙජ්‌ජපාකාරසුගොපුරස්‌මිං ;
Abhejjapākārasugopurasmiṃ ;
නිරාකුලානෙකකුලාකුලස්‌මිං;
Nirākulānekakulākulasmiṃ;
මුනින්‌දදාඨඞ්‌කුරවාසභූතෙ;
Munindadāṭhaṅkuravāsabhūte;
යො ලොචනානන්‌දවහෙ වසන්‌තො.
Yo locanānandavahe vasanto.
4.
4.
සුඵුල්‌ලිතබ්‌භොරුහසාදුසීත
Suphullitabbhoruhasādusīta
පසන්‌නනීරෙහි ජලාසයෙහි;
Pasannanīrehi jalāsayehi;
සුපුප්‌ඵිතානෙකකදම්‌බජම්‌බු-
Supupphitānekakadambajambu-
පුන්‌නාගනාගාදිහි වාභිරම්‌මෙ.
Punnāganāgādihi vābhiramme.
5.
5.
සුධාවදාතෙහි මනොහරෙහි;
Sudhāvadātehi manoharehi;
පාකාරපන්‌තීහි ච ගොපුරෙහි;
Pākārapantīhi ca gopurehi;
විකිණ්‌ණමුත්‌තාඵලසන්‌නිභෙහි;
Vikiṇṇamuttāphalasannibhehi;
විලොකනීයෙහි සුධාතලෙහි.
Vilokanīyehi sudhātalehi.
6.
6.
කත්‌වාන පාසාදසහස්‌සරම්‌මෙ;
Katvāna pāsādasahassaramme;
තහිං තහිං පීතිකරෙ විහාරෙ;
Tahiṃ tahiṃ pītikare vihāre;
මහාදයො ජෙතවනාදයොපි;
Mahādayo jetavanādayopi;
සුසංයමානං යතිනං අදාසි.
Susaṃyamānaṃ yatinaṃ adāsi.
7.
7.
යො සාදුභූතං චතුපච්‌චයඤ්‌ච;
Yo sādubhūtaṃ catupaccayañca;
ගුණප්‌පසන්‌නො සමණෙසු තෙසු;
Guṇappasanno samaṇesu tesu;
නිච්‌චං මහොඝං විය වත්‌තයන්‌තො;
Niccaṃ mahoghaṃ viya vattayanto;
යොජෙති තෙ ගන්‌ථවිපස්‌සනාසු.
Yojeti te ganthavipassanāsu.
8.
8.
කාරිතෙසු විහාරෙසු, තෙන තෙසු යසස්‌සිනා;
Kāritesu vihāresu, tena tesu yasassinā;
රම්‌මො යො පච්‌ඡිමාරාමො, පුප්‌ඵාරාමාදිසොභිතො.
Rammo yo pacchimārāmo, pupphārāmādisobhito.
9.
9.
පරිවෙණම්‌හි නාමෙන, තහිං චොළකුලන්‌තිකෙ;
Pariveṇamhi nāmena, tahiṃ coḷakulantike;
පාසාදෙ දස්‌සනීයම්‌හි, වසන්‌තො කරුණාපරො.
Pāsāde dassanīyamhi, vasanto karuṇāparo.
10.
10.
සිස්‌සො සසීකරස්‌වච්‌ඡ-සීලාචාරස්‌ස ධීමතො;
Sisso sasīkarasvaccha-sīlācārassa dhīmato;
සාරිපුත්‌තමහාථෙර-මහාසාමිස්‌ස තාදිනො.
Sāriputtamahāthera-mahāsāmissa tādino.
11.
11.
ධීරානෙකගුණොඝෙන, ථෙරෙන සුචිවුත්‌තිනා;
Dhīrānekaguṇoghena, therena sucivuttinā;
විනයට්‌ඨිතිකාමෙන, සුමෙධෙනාභියාචිතො.
Vinayaṭṭhitikāmena, sumedhenābhiyācito.
12.
12.
සො බුද්‌ධනාගත්‌ථෙරොහං, භික්‌ඛූනං පරමං හිතං;
So buddhanāgattherohaṃ, bhikkhūnaṃ paramaṃ hitaṃ;
මහාවිහාරවාසීනං, යතීනං සමයානුගං.
Mahāvihāravāsīnaṃ, yatīnaṃ samayānugaṃ.
13.
13.
විනයත්‌ථාදිමඤ්‌ජූසං , ලීනත්‌ථස්‌ස පකාසනිං;
Vinayatthādimañjūsaṃ , līnatthassa pakāsaniṃ;
මාතිකට්‌ඨකථායෙමං, අකාසිං සාධු වණ්‌ණනං.
Mātikaṭṭhakathāyemaṃ, akāsiṃ sādhu vaṇṇanaṃ.
14.
14.
සායං සුබොධා බුධවණ්‌ණනීයා;
Sāyaṃ subodhā budhavaṇṇanīyā;
සංවණ්‌ණනා සත්‌තසහස්‌සමත්‌තා;
Saṃvaṇṇanā sattasahassamattā;
නිරාකරොන්‌තී විනයම්‌හි මොහං;
Nirākarontī vinayamhi mohaṃ;
තමං චරන්‌තී සසි ඛෙව භාතු.
Tamaṃ carantī sasi kheva bhātu.
15.
15.
ආකඞ්‌ඛමානෙන පරත්‌ථමිට්‌ඨං;
Ākaṅkhamānena paratthamiṭṭhaṃ;
මහත්‌ථසාරං සුවිනිච්‌ඡයඤ්‌ච;
Mahatthasāraṃ suvinicchayañca;
සංවණ්‌ණනං සාධු පකුබ්‌බතා යං;
Saṃvaṇṇanaṃ sādhu pakubbatā yaṃ;
චිතං මයා පුඤ්‌ඤමනප්‌පභූතං.
Citaṃ mayā puññamanappabhūtaṃ.
16.
16.
පුඤ්‌ඤෙන තෙනාචිතදානසීල-
Puññena tenācitadānasīla-
මයාදිනානෙකවිධෙන චෙව;
Mayādinānekavidhena ceva;
සත්‌තා අනීඝා සුඛිනො අවෙරා;
Sattā anīghā sukhino averā;
පප්‌පොන්‌තු සබ්‌බෙ සුගතිං සිවඤ්‌ච.
Pappontu sabbe sugatiṃ sivañca.
17.
17.
සද්‌ධිං යථොපද්‌දවමන්‌තරෙන;
Saddhiṃ yathopaddavamantarena;
ගතා හි ලීනත්‌ථපදීපනීයං;
Gatā hi līnatthapadīpanīyaṃ;
තථා ජනානං අපි ධම්‌මයුත්‌තා;
Tathā janānaṃ api dhammayuttā;
මනොරථා සිද්‌ධිමුපෙන්‌තු නිච්‌චං.
Manorathā siddhimupentu niccaṃ.
18.
18.
කාලෙ පවස්‌සන්‌තු සදා පයොදා;
Kāle pavassantu sadā payodā;
ධම්‌මෙන පාලෙන්‌තු මහිං මහින්‌දා;
Dhammena pālentu mahiṃ mahindā;
සත්‌තා පසන්‌නා රතනත්‌තයස්‌මිං;
Sattā pasannā ratanattayasmiṃ;
දානාදිපුඤ්‌ඤාභිරතා භවන්‌තූති.
Dānādipuññābhiratā bhavantūti.
විනයත්‌ථමඤ්‌ජූසා ලීනත්‌ථප්‌පකාසනීනාමිකාකඞ්‌ඛාවිතරණීඅභිනවටීකා නිට්‌ඨිතා.
Vinayatthamañjūsā līnatthappakāsanīnāmikākaṅkhāvitaraṇīabhinavaṭīkā niṭṭhitā.
