| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
নিগমনকথাৰণ্ণনা
Nigamanakathāvaṇṇanā
মহাঅট্ঠকথায সারন্তি অঙ্গুত্তরমহাঅট্ঠকথায সারং। একূনসট্ঠিমত্তোতি থোকং ঊনভাৰতো মত্তসদ্দগ্গহণং। মূলট্ঠকথাসারন্তি পুব্বে ৰুত্তঅঙ্গুত্তরমহাঅট্ঠকথায সারমেৰ অনুনিগমৰসেন ৰদতি। অথ ৰা মূলট্ঠকথাসারন্তি পোরাণট্ঠকথাসু অত্থসারং। তেনেদং দস্সেতি – অঙ্গুত্তরমহাঅট্ঠকথায অত্থসারং আদায ইমং মনোরথপূরণিং করোন্তো সেসমহানিকাযানম্পি মূলট্ঠকথাসু ইধ ৰিনিযোগক্খমং অত্থসারং আদায এৰমকাসিন্তি। মহাৰিহারাধিৰাসীনন্তি চ ইদং পুরিমপচ্ছিমপদেহি সদ্ধিং সম্বন্ধিতব্বং ‘‘মহাৰিহারাধিৰাসীনং সমযং পকাসযন্তী, মহাৰিহারাধিৰাসীনং মূলট্ঠকথাসারং আদাযা’’তি। তেনাতি পুঞ্ঞেন। হোতু সব্বো সুখী লোকোতি কামাৰচরাদিৰিভাগো সব্বো সত্তলোকো যথারহং বোধিত্তযাধিগমৰসেন সম্পত্তেন নিব্বানসুখেন সুখী সুখিতো হোতূতি সদেৰকস্স লোকস্স অচ্চন্তং সুখাধিগমায অত্তনো পুঞ্ঞং পরিণামেতি।
Mahāaṭṭhakathāyasāranti aṅguttaramahāaṭṭhakathāya sāraṃ. Ekūnasaṭṭhimattoti thokaṃ ūnabhāvato mattasaddaggahaṇaṃ. Mūlaṭṭhakathāsāranti pubbe vuttaaṅguttaramahāaṭṭhakathāya sārameva anunigamavasena vadati. Atha vā mūlaṭṭhakathāsāranti porāṇaṭṭhakathāsu atthasāraṃ. Tenedaṃ dasseti – aṅguttaramahāaṭṭhakathāya atthasāraṃ ādāya imaṃ manorathapūraṇiṃ karonto sesamahānikāyānampi mūlaṭṭhakathāsu idha viniyogakkhamaṃ atthasāraṃ ādāya evamakāsinti. Mahāvihārādhivāsīnanti ca idaṃ purimapacchimapadehi saddhiṃ sambandhitabbaṃ ‘‘mahāvihārādhivāsīnaṃ samayaṃ pakāsayantī, mahāvihārādhivāsīnaṃ mūlaṭṭhakathāsāraṃ ādāyā’’ti. Tenāti puññena. Hotu sabbo sukhī lokoti kāmāvacarādivibhāgo sabbo sattaloko yathārahaṃ bodhittayādhigamavasena sampattena nibbānasukhena sukhī sukhito hotūti sadevakassa lokassa accantaṃ sukhādhigamāya attano puññaṃ pariṇāmeti.
এত্তাৰতা সমত্তাৰ, সব্বসো ৰণ্ণনা অযং।
Ettāvatā samattāva, sabbaso vaṇṇanā ayaṃ;
ৰীসতিযা সহস্সেহি, গন্থেহি পরিমাণতো॥
Vīsatiyā sahassehi, ganthehi parimāṇato.
পোরাণানং কথামগ্গ-সারমেত্থ যতো ঠিতং।
Porāṇānaṃ kathāmagga-sāramettha yato ṭhitaṃ;
তস্মা সারত্থমঞ্জূসা, ইতি নামেন ৰিস্সুতা॥
Tasmā sāratthamañjūsā, iti nāmena vissutā.
অজ্ঝেসিতো নরিন্দেন, সোহং পরক্কমবাহুনা।
Ajjhesito narindena, sohaṃ parakkamabāhunā;
সদ্ধম্মট্ঠিতিকামেন, সাসনুজ্জোতকারিনা॥
Saddhammaṭṭhitikāmena, sāsanujjotakārinā.
তেনেৰ কারিতে রম্মে, পাসাদসতমণ্ডিতে।
Teneva kārite ramme, pāsādasatamaṇḍite;
নানাদুমগণাকিণ্ণে, ভাৰনাভিরতালযে॥
Nānādumagaṇākiṇṇe, bhāvanābhiratālaye.
সীতলূদকসম্পন্নে , ৰসং জেতৰনে ইমং।
Sītalūdakasampanne , vasaṃ jetavane imaṃ;
অত্থব্যঞ্জনসম্পন্নং, অকাসিং সাধুসম্মতং॥
Atthabyañjanasampannaṃ, akāsiṃ sādhusammataṃ.
যং সিদ্ধং ইমিনা পুঞ্ঞং, যং চঞ্ঞং পসুতং মযা।
Yaṃ siddhaṃ iminā puññaṃ, yaṃ caññaṃ pasutaṃ mayā;
এতেন পুঞ্ঞকম্মেন, দুতিযে অত্তসম্ভৰে॥
Etena puññakammena, dutiye attasambhave.
তাৰতিংসে পমোদেন্তো, সীলাচারগুণে রতো।
Tāvatiṃse pamodento, sīlācāraguṇe rato;
অলগ্গো পঞ্চকামেসু, পত্ৰান পঠমং ফলং॥
Alaggo pañcakāmesu, patvāna paṭhamaṃ phalaṃ.
অন্তিমে অত্তভাৰম্হি, মেত্তেয্যং মুনিপুঙ্গৰং।
Antime attabhāvamhi, metteyyaṃ munipuṅgavaṃ;
লোকগ্গপুগ্গলং নাথং, সব্বসত্তহিতে রতং॥
Lokaggapuggalaṃ nāthaṃ, sabbasattahite rataṃ.
দিস্ৰান তস্স ধীরস্স, সুত্ৰা সদ্ধম্মদেসনং।
Disvāna tassa dhīrassa, sutvā saddhammadesanaṃ;
অধিগন্ত্ৰা ফলং অগ্গং, সোভেয্যং জিনসাসনং॥
Adhigantvā phalaṃ aggaṃ, sobheyyaṃ jinasāsanaṃ.
সদা রক্খন্তু রাজানো, ধম্মেনেৰ ইমং পজং।
Sadā rakkhantu rājāno, dhammeneva imaṃ pajaṃ;
নিরতা পুঞ্ঞকম্মেসু, জোতেন্তু জিনসাসনং॥
Niratā puññakammesu, jotentu jinasāsanaṃ.
ইমে চ পাণিনো সব্বে, সব্বদা নিরুপদ্দৰা।
Ime ca pāṇino sabbe, sabbadā nirupaddavā;
নিচ্চং কল্যাণসঙ্কপ্পা, পপ্পোন্তু অমতং পদন্তি॥
Niccaṃ kalyāṇasaṅkappā, pappontu amataṃ padanti.
অঙ্গুত্তরটীকা সমত্তা।
Aṅguttaraṭīkā samattā.
