| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
নিগমনকথাৰণ্ণনা
Nigamanakathāvaṇṇanā
অৰসানগাথাসু পন অযমত্থো। ৰিভত্তদেসনন্তি উভতোৰিভঙ্গখন্ধকপরিৰারেহি ৰিভত্তদেসনং ৰিনযপিটকন্তি যোজেতব্বং। তস্সাতি তস্স ৰিনযস্স।
Avasānagāthāsu pana ayamattho. Vibhattadesananti ubhatovibhaṅgakhandhakaparivārehi vibhattadesanaṃ vinayapiṭakanti yojetabbaṃ. Tassāti tassa vinayassa.
তত্রিদন্তিআদি পঠমপারাজিকৰণ্ণনাযং ৰুত্তনযমেৰ।
Tatridantiādi paṭhamapārājikavaṇṇanāyaṃ vuttanayameva.
সত্থুমহাবোধিৰিভূসিতোতি সত্থুনা পরিভুত্তমহাবোধিৰিভূসিতো মণ্ডিতো, তস্স মহাৰিহারস্স দক্খিণভাগে উত্তমং যং পধানঘরন্তি সম্বন্ধো। তত্থ পধানঘরন্তি তংনামকং পরিৰেণং। সুচিচারিত্তসীলেন, ভিক্খুসঙ্ঘেন সেৰিতন্তি ইদম্পি পধানঘরৰিসেসনং।
Satthumahābodhivibhūsitoti satthunā paribhuttamahābodhivibhūsito maṇḍito, tassa mahāvihārassa dakkhiṇabhāge uttamaṃ yaṃ padhānagharanti sambandho. Tattha padhānagharanti taṃnāmakaṃ pariveṇaṃ. Sucicārittasīlena, bhikkhusaṅghena sevitanti idampi padhānagharavisesanaṃ.
তত্থাতি তস্মিং পধানঘরে। চারুপাকারসঞ্চিতন্তি মনাপেন পাকারেন পরিক্খিত্তং। সীতচ্ছাযতরূপেতন্তি ঘননিচিতপত্তসঞ্ছন্নসাখাপসাখতায সীতচ্ছাযেহি রুক্খেহি উপেতং। ৰিকসিতকমলকুৰলযপুণ্ডরীকসোগন্ধিকাদিপুপ্ফসঞ্ছন্নমধুরসীতলুদকপুণ্ণতায সম্পন্না সলিলাসযা অস্সাতি সম্পন্নসলিলাসযো। উদ্দিসিত্ৰাতি বুদ্ধসিরিং নাম থেরং নিস্সায, তস্স অজ্ঝেসনং নিস্সাযাতি ৰুত্তং হোতি। ইদ্ধাতি অত্থৰিনিচ্ছযাদীহি ইদ্ধা ফীতা পরিপুণ্ণা।
Tatthāti tasmiṃ padhānaghare. Cārupākārasañcitanti manāpena pākārena parikkhittaṃ. Sītacchāyatarūpetanti ghananicitapattasañchannasākhāpasākhatāya sītacchāyehi rukkhehi upetaṃ. Vikasitakamalakuvalayapuṇḍarīkasogandhikādipupphasañchannamadhurasītaludakapuṇṇatāya sampannā salilāsayā assāti sampannasalilāsayo. Uddisitvāti buddhasiriṃ nāma theraṃ nissāya, tassa ajjhesanaṃ nissāyāti vuttaṃ hoti. Iddhāti atthavinicchayādīhi iddhā phītā paripuṇṇā.
সিরিনিৰাসস্সাতি সিরিযা নিৰাসট্ঠানভূতস্স। জযসংৰচ্ছরেতি জযপ্পত্তসংৰচ্ছরে। অযন্তি থেরং বুদ্ধসিরিং উদ্দিস্স যা ৰিনযৰণ্ণনা আরদ্ধা, অযং। ধম্মূপসংহিতাতি কুসলসন্নিস্সিতা। ইদানি সদেৰকস্স লোকস্স অচ্চন্তসুখাধিগমায অত্তনো পুঞ্ঞং পরিণামেন্তো ‘‘চিরট্ঠিতত্থ ধম্মস্সা’’তিআদিমাহ । তত্থ সমাচিতন্তি উপচিতং। সব্বস্স আনুভাৰেনাতি সব্বস্স তস্স পুঞ্ঞস্স তেজেন। সব্বেপি পাণিনোতি কামাৰচরাদিভেদা সব্বে সত্তা। সদ্ধম্মরসসেৰিনোতি যথারহং বোধিত্তযাধিগমৰসেন সদ্ধম্মরসসেৰিনো ভৰন্তু। সেসমেত্থ সুৰিঞ্ঞেয্যমেৰ।
Sirinivāsassāti siriyā nivāsaṭṭhānabhūtassa. Jayasaṃvacchareti jayappattasaṃvacchare. Ayanti theraṃ buddhasiriṃ uddissa yā vinayavaṇṇanā āraddhā, ayaṃ. Dhammūpasaṃhitāti kusalasannissitā. Idāni sadevakassa lokassa accantasukhādhigamāya attano puññaṃ pariṇāmento ‘‘ciraṭṭhitattha dhammassā’’tiādimāha . Tattha samācitanti upacitaṃ. Sabbassa ānubhāvenāti sabbassa tassa puññassa tejena. Sabbepi pāṇinoti kāmāvacarādibhedā sabbe sattā. Saddhammarasasevinoti yathārahaṃ bodhittayādhigamavasena saddhammarasasevino bhavantu. Sesamettha suviññeyyameva.
নিগমনকথাৰণ্ণনা নিট্ঠিতা।
Nigamanakathāvaṇṇanā niṭṭhitā.
