| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
নিগমনকথাৰণ্ণনা
Nigamanakathāvaṇṇanā
৯৬১-৩. মহেসিনো তিৰিধস্সাপি সাসনস্স সুচিরট্ঠিতিকামেন অতিচিরকালপ্পৰত্তিং ইচ্ছন্তেন ধীমতা পসত্থতরঞাণেন সুদ্ধচিত্তেন লাভসক্কারনিরপেক্খতায পরিসুদ্ধজ্ঝাসযেন বুদ্ধদত্তেন বুদ্ধদত্তাভিধানেন আচরিযৰরেন রচিতো।
961-3. Mahesino tividhassāpi sāsanassa suciraṭṭhitikāmena aticirakālappavattiṃ icchantena dhīmatā pasatthatarañāṇena suddhacittena lābhasakkāranirapekkhatāya parisuddhajjhāsayena buddhadattena buddhadattābhidhānena ācariyavarena racito.
পজ্জৰসেন গন্থতো, অত্থতো চেৰ পরমুত্তরো উত্তরো ৰিনিচ্ছযো অন্তরাযং অন্তরেন অজ্ঝত্তিকং, বাহিরং ৰা অন্তরাযং ৰিনা যথা সিদ্ধিং উপাগতো পরিনিট্ঠানং পত্তো, তথা সত্তানং ধম্মসংযুতা কুসলূপসংহিতা সঙ্কপ্পা মনোরথা সিজ্ঝন্তু অন্তরাযং ৰিনা নিপ্পজ্জন্তু, এতেন উত্তরৰিনিচ্ছযরচনামযেন মহতা পুঞ্ঞোদযেন চতূহি সঙ্গহৰত্থূহি জনং রঞ্জেতীতি ‘‘রাজা’’তি সঙ্খং গতো মহীপালো মহিং পথৰিসন্নিস্সিতং জনকাযং সম্মা ঞাযেন দস রাজধম্মে অকোপেন্তো পালেতু। দেৰো পজ্জুন্নো কালে থাৰরজঙ্গমানং উপযোগারহকালে সম্মা পৰস্সতু অৰুট্ঠিঅতিৰুট্ঠিকং অকত্ৰা সম্মা পৰচ্ছতু।
Pajjavasena ganthato, atthato ceva paramuttaro uttaro vinicchayo antarāyaṃ antarena ajjhattikaṃ, bāhiraṃ vā antarāyaṃ vinā yathā siddhiṃ upāgato pariniṭṭhānaṃ patto, tathā sattānaṃ dhammasaṃyutā kusalūpasaṃhitā saṅkappā manorathā sijjhantu antarāyaṃ vinā nippajjantu, etena uttaravinicchayaracanāmayena mahatā puññodayena catūhi saṅgahavatthūhi janaṃ rañjetīti ‘‘rājā’’ti saṅkhaṃ gato mahīpālo mahiṃ pathavisannissitaṃ janakāyaṃ sammā ñāyena dasa rājadhamme akopento pāletu. Devo pajjunno kāle thāvarajaṅgamānaṃ upayogārahakāle sammā pavassatu avuṭṭhiativuṭṭhikaṃ akatvā sammā pavacchatu.
৯৬৪. সেলিন্দো সিনেরুপব্বতরাজা যাৰ তিট্ঠতি যাৰ লোকে পৰত্ততি, চন্দো সকলজনপদনযনসাযনো যাৰ ৰিরোচতি যাৰ অত্তনো সভাৰং জোতেতি, তাৰ যসস্সিনো গোতমস্স অরহতো সম্মাসম্বুদ্ধস্স সদ্ধম্মো পরিযত্তিপটিপত্তিপটিৰেধৰসেন তিৰিধো সদ্ধম্মো তিট্ঠতু পৰত্ততু।
964.Selindo sinerupabbatarājā yāva tiṭṭhati yāva loke pavattati, cando sakalajanapadanayanasāyano yāva virocati yāva attano sabhāvaṃ joteti, tāva yasassino gotamassa arahato sammāsambuddhassa saddhammo pariyattipaṭipattipaṭivedhavasena tividho saddhammo tiṭṭhatu pavattatu.
৯৬৫. সীহাদীনং, দাহাদীনঞ্চ বাহিরজ্ঝত্তিকানং পরিস্সযানং খমনং সহনং অভিভৰিত্ৰা পৰত্তনং খন্তি। সোরচ্চন্তি সোভনে রতোতি সুরতো, সুরতস্স ভাৰো সোরচ্চং। সুন্দরং অখণ্ডতাদিগুণসমন্নাগতং সীলং অস্সাতি সুসীলো। সুসীলস্স ভাৰো।
965. Sīhādīnaṃ, dāhādīnañca bāhirajjhattikānaṃ parissayānaṃ khamanaṃ sahanaṃ abhibhavitvā pavattanaṃ khanti. Soraccanti sobhane ratoti surato, suratassa bhāvo soraccaṃ. Sundaraṃ akhaṇḍatādiguṇasamannāgataṃ sīlaṃ assāti susīlo. Susīlassa bhāvo.
নিগমনকথাৰণ্ণনা নিট্ঠিতা।
Nigamanakathāvaṇṇanā niṭṭhitā.
উত্তরৰিনিচ্ছযটীকা নিট্ঠিতা।
Uttaravinicchayaṭīkā niṭṭhitā.
ইতি ৰিনযত্থসারসন্দীপনী নাম ৰিনযৰিনিচ্ছযৰণ্ণনা,
Iti vinayatthasārasandīpanī nāma vinayavinicchayavaṇṇanā,
লীনত্থপকাসনী নাম উত্তরৰিনিচ্ছযৰণ্ণনা চ
Līnatthapakāsanī nāma uttaravinicchayavaṇṇanā ca
সমত্তা।
Samattā.
পচ্ছা ঠপিতগাথাযো
Pacchā ṭhapitagāthāyo
থেরেন থিরচিত্তেন, সাসনুজ্জোতনত্থিনা।
Therena thiracittena, sāsanujjotanatthinā;
পুঞ্ঞৰা ঞাণৰা সীলী, সুহজ্জো মুদুকো তথা॥
Puññavā ñāṇavā sīlī, suhajjo muduko tathā.
যো সীহল়ারিমদ্দেসু, চন্দিমা সূরিযো ৰিয।
Yo sīhaḷārimaddesu, candimā sūriyo viya;
পাকটো সীৰলিত্থেরো, মহাতেজো মহাযসো॥
Pākaṭo sīvalitthero, mahātejo mahāyaso.
তেন নীতা সীহল়া যা, ইধ পত্তা সুধীমতা।
Tena nītā sīhaḷā yā, idha pattā sudhīmatā;
এসা সংৰণ্ণনা সীহ-ল়ক্খরেন সুলিক্খিতা॥
Esā saṃvaṇṇanā sīha-ḷakkharena sulikkhitā.
রেৰতো ইতি নামেন, থেরেন থিরচেতসা।
Revato iti nāmena, therena thiracetasā;
অরিমদ্দিকে রক্খন্তেন, পরিৰত্তেত্ৰান সাধুকং॥
Arimaddike rakkhantena, parivattetvāna sādhukaṃ.
লিখাপিতা হিতত্থায, ভিক্খূনং অরিমদ্দিকে।
Likhāpitā hitatthāya, bhikkhūnaṃ arimaddike;
এসা সংৰণ্ণনা সুট্ঠু, সন্নিট্ঠানমুপাগতা।
Esā saṃvaṇṇanā suṭṭhu, sanniṭṭhānamupāgatā;
তথেৰ সব্বসত্তানং, সব্বত্থো চ সমিজ্ঝতূতি॥
Tatheva sabbasattānaṃ, sabbattho ca samijjhatūti.
