| Library / Tipiṭaka / д̇ибидага • Tipiṭaka / винаяавинижчаяа-дийгаа • Vinayavinicchaya-ṭīkā |
ниг̇аманагат̇ааван̣н̣анаа
Nigamanakathāvaṇṇanā
3168-78. звам̣ ‘‘винаяо сам̣варад̇т̇ааяа, сам̣варо авиббадисаарад̇т̇ааяа, авиббадисааро баамож̇ж̇ад̇т̇ааяа, баамож̇ж̇ам̣ бийд̇ад̇т̇ааяа, бийд̇и бассад̣̇д̇хад̇т̇ааяа, бассад̣̇д̇хи сукад̇т̇ааяа, сукам̣ самаад̇хад̇т̇ааяа, самаад̇хи яат̇аабхууд̇ан̃аан̣ад̣̇ассанад̇т̇ааяа, яат̇аабхууд̇ан̃аан̣ад̣̇ассанам̣ ниб̣б̣ид̣̇ад̇т̇ааяа, ниб̣б̣ид̣̇аа вирааг̇ад̇т̇ааяа, вирааг̇о вимуд̇д̇ад̇т̇ааяа, вимуд̇д̇и вимуд̇д̇ин̃аан̣ад̣̇ассанад̇т̇ааяа, вимуд̇д̇ин̃аан̣ад̣̇ассанам̣ анубаад̣̇аабааниб̣б̣аанад̇т̇ааяаа’’д̇и (бари. 365) д̣̇ассид̇аанисам̣сабарамбараанид̣̇д̇хааран̣амукзна анубаад̣̇исзсаниб̣б̣аанад̇хаад̇убарияанд̇ам̣ саанисам̣сам̣ винаяагат̇ам̣ гат̇зд̇ваа д̇ассаа бамаан̣ад̇ан̃жа вибхаавзд̇ваа ад̇д̇ано суд̇аб̣уд̣̇д̇хад̇д̇аа ‘‘санид̣̇аанам̣, бхигкавз, д̇хаммам̣ д̣̇зсзмий’’д̇и (а. ни. 3.126; гат̇аа. 806) важанад̇о бхаг̇авад̇о жарид̇аманувад̇д̇анд̇о д̇асса д̣̇зсагаалаад̣̇ивасзна нид̣̇аанам̣ д̣̇ассзд̇умааха ‘‘сздтассаа’’д̇иаад̣̇и.
3168-78. Evaṃ ‘‘vinayo saṃvaratthāya, saṃvaro avippaṭisāratthāya, avippaṭisāro pāmojjatthāya, pāmojjaṃ pītatthāya, pīti passaddhatthāya, passaddhi sukhatthāya, sukhaṃ samādhatthāya, samādhi yathābhūtañāṇadassanatthāya, yathābhūtañāṇadassanaṃ nibbidatthāya, nibbidā virāgatthāya, virāgo vimuttatthāya, vimutti vimuttiñāṇadassanatthāya, vimuttiñāṇadassanaṃ anupādāpaanibbānatthāyā’’ti (pari. 365) dassitānisaṃsaparamparāniddhāraṇamukhena anupādisesanibbānadhātupariyantaṃ sānisaṃsaṃ vinayakathaṃ kathetvā tassā pamāṇatañca vibhāvetvā attano sutabuddhattā ‘‘sanidānaṃ, bhikkhave, dhammaṃ desemī’’ti (a. ni. 3.126; kathā. 806) vacanato bhagavato caritamanuvattanto tassa desakālādivasena nidānaṃ dassetumāha ‘‘seṭṭhassā’’tiādi.
д̇ад̇т̇а сздтассаад̇и д̇ханад̇хан̃н̃авад̇т̇аалан̇гаараад̣̇иубабхог̇абарибхог̇асамбад̇д̇ияаа жзва г̇аамарааж̇ад̇хааникзд̇д̇авад̇т̇унад̣̇ид̇ал̣аагаараамаад̣̇исамбад̇д̇ияаа жа басад̇т̇ад̇арасса. наабхибхууд̇зд̇и маж̇жхавад̇д̇ид̇ааяа наабхисад̣̇исз. нираагулзд̇и маж̇жхавад̇д̇ид̇ааязва бариман̣д̣алаад̣̇исамбхавад̇о вилобаад̣̇иаагуларахид̇з. саб̣б̣асса бана логасса рааман̣ийяагз самбин̣д̣ид̇з вияа раман̣ийяад̇арз бхууд̇аман̇г̇алз г̇аамзд̇и самб̣анд̇хо.
Tattha seṭṭhassāti dhanadhaññavatthālaṅkārādiupabhogaparibhogasampattiyā ceva gāmarājadhānikhettavatthunaditaḷākārāmādisampattiyā ca pasatthatarassa. Nābhibhūteti majjhavattitāya nābhisadise. Nirākuleti majjhavattitāyeva parimaṇḍalādisambhavato vilopādiākularahite. Sabbassa pana lokassa rāmaṇīyake sampiṇḍite viya ramaṇīyatare bhūtamaṅgale gāmeti sambandho.
бунаби гим̣висидтзд̇и ааха ‘‘гад̣̇алий’’д̇иаад̣̇и. гад̣̇алий жа саалан̃жа д̇аалан̃жа ужчу жа наал̣игзраа жа гад̣̇алий…бз… наал̣игзраа, д̇зсам̣ ванаани гад̣̇алий…бз… наал̣игзраванаани, д̇зхи аагулз аагин̣н̣зд̇и ад̇т̇о. гамалаани жа уббалаани жа гамалуббалаани, д̇зхи сан̃чаннаа гамалуббаласан̃чаннаа, салиласса аасаяаа салилаасаяаа, гамалуббаласан̃чаннаа жа д̇з салилаасаяаа жаад̇и гамала…бз… салилаасаяаа, д̇зхи собхид̇о гамалуббаласан̃чаннасалилаасаяасобхид̇о, д̇асмим̣.
Punapi kiṃvisiṭṭheti āha ‘‘kadalī’’tiādi. Kadalī ca sālañca tālañca ucchu ca nāḷikerā ca kadalī…pe… nāḷikerā, tesaṃ vanāni kadalī…pe… nāḷikeravanāni, tehi ākule ākiṇṇeti attho. Kamalāni ca uppalāni ca kamaluppalāni, tehi sañchannā kamaluppalasañchannā, salilassa āsayā salilāsayā, kamaluppalasañchannā ca te salilāsayā cāti kamala…pe… salilāsayā, tehi sobhito kamaluppalasañchannasalilāsayasobhito, tasmiṃ.
гаавзрияаа ж̇алам̣ гаавзриж̇алам̣, гаавзриж̇аласса самбаад̇о бавад̇д̇анам̣ гаавзриж̇аласамбаад̇о, д̇зна бари саманд̇ад̇о бхууд̇ам̣ бавад̇д̇ид̇ам̣ махийд̇алам̣ зд̇ассаад̇и гаавзриж̇аласамбаад̇абарибхууд̇амахийд̇ало, д̇асмим̣. ид̣̇д̇хзд̇и наанаасамбад̇д̇ияаа самид̣̇д̇хз. саб̣б̣ан̇г̇асамбаннзд̇и саб̣б̣асукобагаран̣асамбаннз. ман̇г̇алзд̇и ж̇анаанам̣ ид̣̇д̇хивуд̣̇д̇хигааран̣абхууд̇з. бхууд̇аман̇г̇алзд̇и звам̣наамагз г̇аамз.
Kāveriyā jalaṃ kāverijalaṃ, kāverijalassa sampāto pavattanaṃ kāverijalasampāto, tena pari samantato bhūtaṃ pavattitaṃ mahītalaṃ etassāti kāverijalasampātaparibhūtamahītalo, tasmiṃ. Iddheti nānāsampattiyā samiddhe. Sabbaṅgasampanneti sabbasukhopakaraṇasampanne. Maṅgaleti janānaṃ iddhivuddhikāraṇabhūte. Bhūtamaṅgaleti evaṃnāmake gāme.
баваро д̇ирад̇аарийн̣ад̇алаад̣̇иг̇ан̣зхи гулаажалажаггабхог̇инаа бхог̇авалаяасийд̣̇анд̇арасааг̇араад̣̇и аагааро зд̇аасанд̇и бавараагаараа, баагаараа жа барикаа жа баагаарабарикаа, бавараагаараа жа д̇аа баагаарабарикаа жаад̇и бавараагаарабаагаарабарикаа, д̇аахи бариваарид̇о бавараагаарабаагаарабарикаабариваарид̇о, д̇асмим̣. д̣̇ассанийязд̇и д̣̇ассанаарахз. мано рамад̇и зд̇т̇аад̇и манорамо, д̇асмим̣.
Pavaro tiratārīṇatalādigaṇehi kulācalacakkabhoginā bhogavalayasīdantarasāgarādi ākāro etāsanti pavarākārā, pākārā ca parikhā ca pākāraparikhā, pavarākārā ca tā pākāraparikhā cāti pavarākārapākāraparikhā, tāhi parivārito pavarākārapākāraparikhāparivārito, tasmiṃ. Dassanīyeti dassanārahe. Mano ramati etthāti manoramo, tasmiṃ.
д̇ийрасса анд̇о д̇ийранд̇о, д̇ийрамзва ваа анд̇о д̇ийранд̇о, богкаран̣исоб̣бхауд̣̇агаваахагабарикаад̣̇ийнам̣ гуулаббад̣̇зсо, д̇ийранд̇з рухим̣су ж̇ааяим̣сууд̇и д̇ийранд̇арухаа, д̇ийранд̇арухаа жа д̇з б̣ахуд̇д̇аа ад̇ийраа абарижчзд̣̇аа жаад̇и д̇ийранд̇арухаваад̇ийраа. ва-гааро санд̇хиж̇о, д̇аруунам̣ рааж̇аано д̇арурааж̇аано, д̇ийранд̇арухаваад̇ийраа жа д̇з д̇арурааж̇аано жаад̇и д̇ийранд̇арухаваад̇ийрад̇арурааж̇аано, д̇зхи вирааж̇ид̇о д̇ийранд̇а…бз… вирааж̇ид̇о, д̇асмим̣, бубпуубаг̇апалуубаг̇ачааяуубаг̇зхи махааругкзхи бадиман̣д̣ид̇зд̇и ад̇т̇о. ‘‘д̇ийранд̇арухаваанад̇арурааж̇ивирааж̇ид̇з’’д̇и ваа баато, д̇ийранд̇арухаанам̣ ваанад̇аруунам̣ взд̇аруубаругкаанам̣ рааж̇ийхи банд̇ийхи бадиман̣д̣ид̇зд̇и ад̇т̇о. д̣̇иж̇аанам̣ г̇ан̣аа д̣̇иж̇аг̇ан̣аа, наанаа жа д̇з д̣̇иж̇аг̇ан̣аа жаад̇и наанаад̣̇иж̇аг̇ан̣аа, д̇з д̇ад̇о д̇ад̇о ааг̇анд̇ваа раманд̇и зд̇т̇аад̇и наанаад̣̇иж̇аг̇ан̣аараамо, д̇асмим̣, сугагогиламаяуураад̣̇исагун̣аанам̣ ааг̇анд̇ваа раманадтаанабхууд̇зд̇и ад̇т̇о. наанаараамаманорамзд̇и наанаа анзгз аараамаа бубпапалаараамаа наанаараамаа, д̇зхи манорамод̇и наанаараамаманорамо, д̇асмим̣.
Tīrassa anto tīranto, tīrameva vā anto tīranto, pokkharaṇisobbhaudakavāhakaparikhādīnaṃ kūlappadeso, tīrante ruhiṃsu jāyiṃsūti tīrantaruhā, tīrantaruhā ca te bahuttā atīrā aparicchedā cāti tīrantaruhavātīrā. Va-kāro sandhijo, tarūnaṃ rājāno tarurājāno, tīrantaruhavātīrā ca te tarurājāno cāti tīrantaruhavātīratarurājāno, tehi virājito tīranta…pe… virājito, tasmiṃ, pupphūpagaphalūpagachāyūpagehi mahārukkhehi paṭimaṇḍiteti attho. ‘‘Tīrantaruhavānatarurājivirājite’’ti vā pāṭho, tīrantaruhānaṃ vānatarūnaṃ vetarūparukkhānaṃ rājīhi pantīhi paṭimaṇḍiteti attho. Dijānaṃ gaṇā dijagaṇā, nānā ca te dijagaṇā cāti nānādijagaṇā, te tato tato āgantvā ramanti etthāti nānādijagaṇārāmo, tasmiṃ, sukakokilamayūrādisakuṇānaṃ āgantvā ramanaṭṭhānabhūteti attho. Nānārāmamanorameti nānā aneke ārāmā pupphaphalārāmā nānārāmā, tehi manoramoti nānārāmamanoramo, tasmiṃ.
жааруу жа д̇з бан̇гаж̇аа жаад̇и жаарубан̇гаж̇аа, гамалуббалагумуд̣̇аад̣̇аяо, жаарубан̇гаж̇зхи сам̣гин̣н̣аа сан̃чаннаа жаарубан̇гаж̇асам̣гин̣н̣аа, жаарубан̇гаж̇асам̣гин̣н̣аа жа д̇з д̇ал̣аагаа жзд̇и жаарубан̇гаж̇асам̣гин̣н̣ад̇ал̣аагаа, д̇зхи самалан̇гад̇о вибхуусид̇о жаару…бз… самалан̇гад̇о, д̇асмим̣. сунд̣̇аро мад̇хуро расо ассаад̇и сурасам̣, сурасан̃жа д̇ам̣ уд̣̇аган̃жаад̇и сурасод̣̇агам̣, сурасод̣̇агзна самбун̣н̣аа сурасод̣̇агасамбун̣н̣аа, вараа жа д̇з гуубаа жаад̇и варагуубаа, сурасод̣̇агасамбун̣н̣аа жа д̇з варагуубаа жзд̇и сурасод̣̇агасамбун̣н̣аварагуубаа, д̇зхи убасобхид̇о сурасо…бз… гуубасобхид̇о, д̇асмим̣.
Cārū ca te paṅkajā cāti cārupaṅkajā, kamaluppalakumudādayo, cārupaṅkajehi saṃkiṇṇā sañchannā cārupaṅkajasaṃkiṇṇā, cārupaṅkajasaṃkiṇṇā ca te taḷākā ceti cārupaṅkajasaṃkiṇṇataḷākā, tehi samalaṅkato vibhūsito cāru…pe… samalaṅkato, tasmiṃ. Sundaro madhuro raso assāti surasaṃ, surasañca taṃ udakañcāti surasodakaṃ, surasodakena sampuṇṇā surasodakasampuṇṇā, varā ca te kūpā cāti varakūpā, surasodakasampuṇṇā ca te varakūpā ceti surasodakasampuṇṇavarakūpā, tehi upasobhito suraso…pe… kūpasobhito, tasmiṃ.
висзсзна жид̇раад̇и вижид̇раа, вижид̇раа жа д̇з вибулаа жаад̇и вижид̇равибулаа, вижид̇равибулаа жа д̇з ман̣д̣абаа жаад̇и…бз… ман̣д̣абаа, ад̇исаязна уг̇г̇ад̇аа ажжуг̇г̇ад̇аа, ажжуг̇г̇ад̇аа жа д̇з вараман̣д̣абаа жаад̇и ажжуг̇г̇авараман̣д̣абаа, г̇аат̇ааб̣анд̇хавасзна ван̣н̣алобо, вижид̇равибулаа жа д̇з ажжуг̇г̇авараман̣д̣абаа жаад̇и вижид̇равибулаажжуг̇г̇авараман̣д̣абаа, д̇зхи ман̣д̣ид̇о вибхуусид̇о вижид̇ра…бз… ман̣д̣ид̇о, д̇асмим̣. ман̣д̣ам̣ суурияарасмим̣ баад̇и рагкад̇ийд̇и ман̣д̣або. д̇ад̇о д̇ад̇о ааг̇амма васанд̇и зд̇т̇аад̇и ааваасо, баасаад̣̇ахаммияамаал̣аад̣̇аяо. анзгзхийд̇и б̣ахуухи. ажжанд̇анд̇и ад̇исаязна.
Visesena citrāti vicitrā, vicitrā ca te vipulā cāti vicitravipulā, vicitravipulā ca te maṇḍapā cāti…pe… maṇḍapā, atisayena uggatā accuggatā, accuggatā ca te varamaṇḍapā cāti accuggavaramaṇḍapā, gāthābandhavasena vaṇṇalopo, vicitravipulā ca te accuggavaramaṇḍapā cāti vicitravipulaaccuggavaramaṇḍapā, tehi maṇḍito vibhūsito vicitra…pe… maṇḍito, tasmiṃ. Maṇḍaṃ sūriyarasmiṃ pāti rakkhatīti maṇḍapo. Tato tato āgamma vasanti etthāti āvāso, pāsādahammiyamāḷādayo. Anekehīti bahūhi. Accantanti atisayena.
д̇харан̣ийд̇алам̣ бхзд̇ваа уг̇г̇ад̇зна вияа, карам̣ парусам̣ гзлаасасикарам̣ ж̇ид̇ваа авахасанд̇зна вияа т̇уубзна жа убасобхид̇з вихаарзд̇и яож̇анаа.
Dharaṇītalaṃ bhetvā uggatena viya, kharaṃ pharusaṃ kelāsasikharaṃ jitvā avahasantena viya thūpena ca upasobhite vihāreti yojanā.
амб̣ум̣ д̣̇ад̣̇аад̇ийд̇и амб̣уд̣̇о, сарад̣̇з амб̣уд̣̇о сарад̣̇амб̣уд̣̇о, т̇улланад̇амаханд̇абхаавасааман̃н̃зна сарад̣̇амб̣уд̣̇зна сан̇гаасо сарад̣̇амб̣уд̣̇асан̇гаасо, д̇асмим̣. саммаа уссид̇о уг̇г̇ад̇од̇и самуссид̇о, д̇асмим̣. ологзнд̇аанам̣, васанд̇аанан̃жа басаад̣̇ам̣ жид̇д̇асса д̇осам̣ ж̇анзд̇ийд̇и басаад̣̇аж̇ананам̣, д̇асмим̣. зд̇д̇аавад̇аа винаяавинижчаяагат̇ааяа бавад̇д̇ид̇ад̣̇зсам̣ д̣̇ассзд̇и, ‘‘васад̇аа маяаа’’д̇и гад̇д̇аарам̣.
Ambuṃ dadātīti ambudo, sarade ambudo saradambudo, thullanatamahantabhāvasāmaññena saradambudena saṅkāso saradambudasaṅkāso, tasmiṃ. Sammā ussito uggatoti samussito, tasmiṃ. Olokentānaṃ, vasantānañca pasādaṃ cittassa tosaṃ janetīti pasādajananaṃ, tasmiṃ. Ettāvatā vinayavinicchayakathāya pavattitadesaṃ dasseti, ‘‘vasatā mayā’’ti kattāraṃ.
д̣̇звад̣̇ад̇д̇ажин̃жамаан̣авигаад̣̇ийхи гад̇аабараад̇хасса, сийд̇ун̣хаад̣̇ибариссаяасса жа саханад̇о, сасанд̇аанаг̇ад̇агилзсаад̣̇ийнам̣ хананад̇о жа сийхо вияаад̇и сийхо, б̣уд̣̇д̇хо жа со сийхо жаад̇и б̣уд̣̇д̇хасийхо. сздтабарияааяо ваа сийха-сад̣̇д̣̇о, б̣уд̣̇д̇хасздтзнаад̇и ад̇т̇о. вуд̇д̇ассаад̇и д̣̇зсид̇асса. винаяасса винаяабидагасса. винижчаяод̇и баатааг̇ад̇о жзва адтагат̇ааг̇ад̇о жа аажарияабарамбараабхад̇о жа винижчаяо. б̣уд̣̇д̇хасийханд̇и звам̣наамагам̣ махаат̇зрам̣. самуд̣̇д̣̇иссаад̇и уд̣̇д̣̇исид̇ваа, д̇зна гад̇аааяаажанам̣ бадижжаад̇и вуд̇д̇ам̣ ход̇и. иминаа б̣аахиранимид̇д̇ам̣ д̣̇ассид̇ам̣.
Devadattaciñcamāṇavikādīhi katāparādhassa, sītuṇhādiparissayassa ca sahanato, sasantānagatakilesādīnaṃ hananato ca sīho viyāti sīho, buddho ca so sīho cāti buddhasīho. Seṭṭhapariyāyo vā sīha-saddo, buddhaseṭṭhenāti attho. Vuttassāti desitassa. Vinayassa vinayapiṭakassa. Vinicchayoti pāṭhāgato ceva aṭṭhakathāgato ca ācariyaparamparābhato ca vinicchayo. Buddhasīhanti evaṃnāmakaṃ mahātheraṃ. Samuddissāti uddisitvā, tena kataāyācanaṃ paṭiccāti vuttaṃ hoti. Iminā bāhiranimittaṃ dassitaṃ.
аяам̣ винижчаяо мама сад̣̇д̇хивихааригам̣ б̣уд̣̇д̇хасийхам̣ самуд̣̇д̣̇исса бхигкуунам̣ хид̇ад̇т̇ааяа самаасад̇о варабаасаад̣̇з васад̇аа маяаа гад̇од̇и яож̇анаа.
Ayaṃ vinicchayo mama saddhivihārikaṃ buddhasīhaṃ samuddissa bhikkhūnaṃ hitatthāya samāsato varapāsāde vasatā mayā katoti yojanā.
гимад̇т̇ааяаад̇и ааха ‘‘винаяассааваб̣од̇хад̇т̇ам̣, сукзнзваажирзна жаа’’д̇и, анубаад̣̇исзсзна ниб̣б̣аанабарияанд̇аанисам̣сасса винаяабидагасса багаран̣асса г̇ант̇авасзна самаасзд̇ваа ад̇т̇авасзна судту винижчид̇ад̇д̇аа сукзна жзва ажирзна жа аваб̣од̇ханад̇т̇анд̇и вуд̇д̇ам̣ ход̇и. бхигкуунанд̇и бад̇хаананид̣̇ассанам̣, згасзсанид̣̇д̣̇зсо ваа хздтаа –
Kimatthāyāti āha ‘‘vinayassāvabodhatthaṃ, sukhenevācirena cā’’ti, anupādisesena nibbānapariyantānisaṃsassa vinayapiṭakassa pakaraṇassa ganthavasena samāsetvā atthavasena suṭṭhu vinicchitattā sukhena ceva acirena ca avabodhanatthanti vuttaṃ hoti. Bhikkhūnanti padhānanidassanaṃ, ekasesaniddeso vā heṭṭhā –
‘‘бхигкуунам̣ бхигкунийнан̃жа хид̇ад̇т̇ааяа самаахид̇о. бавагкаамий’’д̇и (ви. ви. г̇ант̇аарамбхагат̇аа 2) –
‘‘Bhikkhūnaṃ bhikkhunīnañca hitatthāya samāhito. Pavakkhāmī’’ti (vi. vi. ganthārambhakathā 2) –
аарад̣̇д̇хад̇д̇аа. иминаа баяож̇анам̣ д̣̇ассид̇ам̣.
Āraddhattā. Iminā payojanaṃ dassitaṃ.
3179. звам̣ д̣̇зсагад̇д̇унимид̇д̇абаяож̇анаани д̣̇ассзд̇ваа гааланияамам̣ д̣̇ассзд̇умааха ‘‘ажжуд̇аа’’д̇иаад̣̇и. виггаманам̣ вигганд̇о, виггамод̇и ад̇т̇о. ажжуд̇ам̣ гзнажи анабхибхууд̇ам̣, д̇ан̃жа д̇ам̣ вигганд̇ан̃жаад̇и ажжуд̇авигганд̇ам̣, ажжуд̇асса наарааяанасса вияа ажжуд̇авигганд̇ам̣ зд̇ассаад̇и ажжуд̇ажжуд̇авигганд̇о. го со? рааж̇аа, д̇асмим̣. галамбхагулам̣ нанд̣̇аяад̇ийд̇и галамбхагулананд̣̇ано, д̇асмим̣. иминаа д̇асса гулавам̣со нид̣̇ассид̇о. галамбхагулавам̣саж̇аад̇з ажжуд̇ажжуд̇авигганд̇анаамз жол̣арааж̇ини махим̣ жол̣арадтам̣ саманусаасанд̇з саммаа анусаасанд̇з сад̇и д̇асмим̣ жол̣арааж̇ини раж̇ж̇ам̣ гаарзнд̇з сад̇и аяам̣ винижчаяо маяаа аарад̣̇д̇хо жзва самаабид̇о жаад̇и. иминаа гаалам̣ нид̣̇ассзд̇и.
3179. Evaṃ desakattunimittapayojanāni dassetvā kālaniyamaṃ dassetumāha ‘‘accutā’’tiādi. Vikkamanaṃ vikkanto, vikkamoti attho. Accutaṃ kenaci anabhibhūtaṃ, tañca taṃ vikkantañcāti accutavikkantaṃ, accutassa nārāyanassa viya accutavikkantaṃ etassāti accutaccutavikkanto. Ko so? Rājā, tasmiṃ. Kalambhakulaṃ nandayatīti kalambhakulanandano, tasmiṃ. Iminā tassa kulavaṃso nidassito. Kalambhakulavaṃsajāte accutaccutavikkantanāme coḷarājini mahiṃ coḷaraṭṭhaṃ samanusāsante sammā anusāsante sati tasmiṃ coḷarājini rajjaṃ kārente sati ayaṃ vinicchayo mayā āraddho ceva samāpito cāti. Iminā kālaṃ nidasseti.
3180. ид̣̇аани имам̣ винаяавинижчаяаббагаран̣ам̣ гаронд̇зна ад̇д̇ано бун̃н̃асамбад̣̇ам̣ сагалалогахид̇ад̇т̇ааяа барин̣аамзнд̇о ааха ‘‘яат̇аа’’д̇иаад̣̇и. аяам̣ винаяавинижчаяо анд̇арааяам̣ винаа яат̇аа сид̣̇д̇хим̣ нибпад̇д̇им̣ бад̇д̇о, д̇ат̇аа сад̇д̇аанам̣ д̇хаммасам̣яуд̇аа гусаланиссид̇аа сан̇габбаа жид̇д̇уббаад̣̇аа, ад̇хиббзд̇ад̇т̇аа ваа саб̣б̣з анд̇арааяам̣ винаа сиж̇жханд̇у ниббаж̇ж̇анд̇ууд̇и яож̇анаа.
3180. Idāni imaṃ vinayavinicchayappakaraṇaṃ karontena attano puññasampadaṃ sakalalokahitatthāya pariṇāmento āha ‘‘yathā’’tiādi. Ayaṃ vinayavinicchayo antarāyaṃ vinā yathā siddhiṃ nipphattiṃ patto, tathā sattānaṃ dhammasaṃyutā kusalanissitā saṅkappā cittuppādā, adhippetatthā vā sabbe antarāyaṃ vinā sijjhantu nippajjantūti yojanā.
3181. д̇знзва бун̃н̃абпалабхаавзна сагалалогахид̇згахзд̇уно бхаг̇авад̇о саасанасса жирадтид̇имаасийсанд̇о ааха ‘‘яаава д̇идтад̇ий’’д̇иаад̣̇и. ‘‘манд̣̇ааро’’д̇и вужжад̇и сийд̇асинид̣̇д̇хазгабаб̣б̣ад̇арааж̇аа. гам̣ вужжад̇и уд̣̇агам̣, д̇зна д̣̇аарид̇о ниг̇г̇амаббад̣̇зсо ‘‘ганд̣̇аро’’д̇и вужжад̇и. сийд̇асинид̣̇д̇хавибулабулинад̇алзхи, санд̣̇амаанасаад̇асийд̇алабасаннасалилзхи, гийл̣амаананаанаббагаарамажчаг̇умб̣зхи, убхаяад̇ийрабубпапалабаллаваалан̇гад̇ад̇арулад̇ааванзхи, гууж̇амаанасугасаалигагаогиламаяуурахам̣саад̣̇исагунд̇аабхируд̇зхи, д̇ад̇т̇а д̇ад̇т̇а барибхаманд̇абхамараамаваж̇ж̇аахи жа жаару манун̃н̃аа ганд̣̇араа зд̇ассаад̇и жааруганд̣̇аро. гали вужжад̇и абараад̇хо, д̇ам̣ саасад̇и хим̣сад̇и абанзд̇ийд̇и галисаасанам̣. ‘‘галусаасана’’нд̇и ваа баато. галусам̣ вужжад̇и баабам̣, д̇ам̣ асад̇и вигкибад̇и д̣̇уурамуссаараяад̇ийд̇и галусаасанам̣, барияад̇д̇ибадибад̇д̇ибадивзд̇хасан̇каад̇ам̣ д̇ивид̇хасаасанам̣.
3181. Teneva puññapphalabhāvena sakalalokahitekahetuno bhagavato sāsanassa ciraṭṭhitimāsīsanto āha ‘‘yāva tiṭṭhatī’’tiādi. ‘‘Mandāro’’ti vuccati sītasiniddhaekapabbatarājā. Kaṃ vuccati udakaṃ, tena dārito niggamappadeso ‘‘kandaro’’ti vuccati. Sītasiniddhavipulapulinatalehi, sandamānasātasītalapasannasalilehi, kīḷamānanānappakāramacchagumbehi, ubhayatīrapupphaphalapallavālaṅkatatarulatāvanehi, kūjamānasukasālikakaokilamayūrahaṃsādisakuntābhirutehi, tattha tattha paribhamantabhamarāmavajjāhi ca cāru manuññā kandarā etassāti cārukandaro. Kali vuccati aparādho, taṃ sāsati hiṃsati apanetīti kalisāsanaṃ. ‘‘Kalusāsana’’nti vā pāṭho. Kalusaṃ vuccati pāpaṃ, taṃ asati vikkhipati dūramussārayatīti kalusāsanaṃ, pariyattipaṭipattipaṭivedhasaṅkhātaṃ tividhasāsanaṃ.
3182. звам̣ огасса д̣̇идтад̇хаммигасамбарааяигабарамад̇т̇ахид̇асаад̇хагасса саасанасса жирадтид̇им̣ бад̇т̇зд̇ваа д̇знзва бун̃н̃агаммаанубхаавзна логасса д̣̇идтад̇хаммигад̇т̇ахзд̇умаасийсанд̇о ааха ‘‘гаалз’’д̇иаад̣̇и. гаалзд̇и сассасамид̣̇д̇хийнам̣ ануруубз гаалз. саммаа бавассанд̇ууд̇и авудтиад̇ивудтид̣̇осарахид̇аа яат̇аа сассаад̣̇ийни самбаж̇ж̇анд̇и, д̇ат̇аа вассам̣ вудтид̇хаарам̣ бавассанд̇ууд̇и ад̇т̇о. вассавалаахагаад̇и вассавалаахагаад̇хидтид̇аа баж̇ж̇уннад̣̇звабуд̇д̇аа. махийбаалаад̇и рааж̇аано. д̇хаммад̇од̇и д̣̇асарааж̇ад̇хаммад̇о. сагалам̣ махинд̇и бат̇авиниссид̇асаб̣б̣аж̇анагааяам̣.
3182. Evaṃ okassa diṭṭhadhammikasamparāyikaparamatthahitasādhakassa sāsanassa ciraṭṭhitiṃ patthetvā teneva puññakammānubhāvena lokassa diṭṭhadhammikatthahetumāsīsanto āha ‘‘kāle’’tiādi. Kāleti sassasamiddhīnaṃ anurūpe kāle. Sammā pavassantūti avuṭṭhiativuṭṭhidosarahitā yathā sassādīni sampajjanti, tathā vassaṃ vuṭṭhidhāraṃ pavassantūti attho. Vassavalāhakāti vassavalāhakādhiṭṭhitā pajjunnadevaputtā. Mahīpālāti rājāno. Dhammatoti dasarājadhammato. Sakalaṃ mahinti pathavinissitasabbajanakāyaṃ.
3183. звам̣ саб̣б̣алогасса логияалогуд̇д̇арасамбад̇д̇исаад̇ханад̇т̇ааяа ад̇д̇ано бун̃н̃абарин̣аамам̣ гад̇ваа ид̣̇аани вид̣̇ид̇алогуд̇д̇арасамбад̇д̇инибпаад̣̇анавасзнзва бун̃н̃абарин̣аамам̣ гаронд̇о ааха ‘‘има’’нд̇иаад̣̇и. иминаа ад̇д̇ано виражид̇ам̣ бажжагкам̣ винижчаяамааха. саарабхууд̇анд̇и сийласаараад̣̇ид̇ивид̇хасигкаасаарасса багаасанад̇о хад̇т̇асаарамива бхууд̇ам̣. хид̇анд̇и д̇ад̣̇ад̇т̇з бадибаж̇ж̇анд̇аанам̣ анубаад̣̇исзсаниб̣б̣аанаавасаанасса хид̇асса ааваханад̇о, сам̣саарад̣̇угкасса жа вуубасаманад̇о амад̇осад̇хам̣ вияа хид̇ам̣. ад̇т̇аяуд̇д̇анд̇и д̣̇идтад̇хаммигасамбарааяигабарамад̇т̇аанам̣ винаяанаад̣̇ийхи яуд̇д̇ад̇д̇аа ад̇т̇аяуд̇д̇ам̣. гаронд̇знаад̇и ражаяанд̇зна маяаа. яам̣ бун̃н̃ам̣ бад̇д̇анд̇и гаарагам̣ бунаад̇ийд̇и бун̃н̃ам̣, буж̇ж̇абхавапаланибпаад̣̇анад̇о ваа ‘‘бун̃н̃а’’нд̇и сан̇кам̣ г̇ад̇ам̣ яам̣ гусалагаммам̣ абаримзяяабхавабарияанд̇ам̣ басуд̇ам̣ ад̇хиг̇ад̇ам̣. д̇зна бун̃н̃зна хзд̇убхууд̇зна. аяам̣ логод̇и аяам̣ сагалоби сад̇д̇алого. мунинд̣̇аббаяаад̇анд̇и мунинд̣̇зна саммаасамб̣уд̣̇д̇хзна самбад̇д̇ам̣. вийд̇асоганд̇и виг̇ад̇асогам̣. согабарид̣̇звад̣̇угкад̣̇оманассаубааяаасаад̣̇ийхи виг̇ад̇ад̇д̇аа, д̇зсам̣ ниггамананимид̇д̇ад̇д̇аа жа абаг̇ад̇асогаад̣̇исам̣саарад̣̇угкам̣. сивам̣ бурам̣ ниб̣б̣аанабурам̣ баабун̣аад̇у сажчигарод̇у, гилзсабариниб̣б̣аанзна, анубаад̣̇исзсааяа ниб̣б̣аанад̇хаад̇уяаа жа бариниб̣б̣аад̇ууд̇и вуд̇д̇ам̣ ход̇и.
3183. Evaṃ sabbalokassa lokiyalokuttarasampattisādhanatthāya attano puññapariṇāmaṃ katvā idāni viditalokuttarasampattinipphādanavaseneva puññapariṇāmaṃ karonto āha ‘‘ima’’ntiādi. Iminā attano viracitaṃ paccakkhaṃ vinicchayamāha. Sārabhūtanti sīlasārāditividhasikkhāsārassa pakāsanato hatthasāramiva bhūtaṃ. Hitanti tadatthe paṭipajjantānaṃ anupādisesanibbānāvasānassa hitassa āvahanato, saṃsāradukkhassa ca vūpasamanato amatosadhaṃ viya hitaṃ. Atthayuttanti diṭṭhadhammikasamparāyikaparamatthānaṃ vinayanādīhi yuttattā atthayuttaṃ. Karontenāti racayantena mayā. Yaṃ puññaṃ pattanti kārakaṃ punātīti puññaṃ, pujjabhavaphalanipphādanato vā ‘‘puñña’’nti saṅkhaṃ gataṃ yaṃ kusalakammaṃ aparimeyyabhavapariyantaṃ pasutaṃ adhigataṃ. Tena puññena hetubhūtena. Ayaṃ lokoti ayaṃ sakalopi sattaloko. Munindappayātanti munindena sammāsambuddhena sampattaṃ. Vītasokanti vigatasokaṃ. Sokaparidevadukkhadomanassaupāyāsādīhi vigatattā, tesaṃ nikkamananimittattā ca apagatasokādisaṃsāradukkhaṃ. Sivaṃ puraṃ nibbānapuraṃ pāpuṇātu sacchikarotu, kilesaparinibbānena, anupādisesāya nibbānadhātuyā ca parinibbātūti vuttaṃ hoti.
ид̇и д̇амб̣абан̣н̣иязнаад̇иаад̣̇и багаран̣агаарагасса бабхавасуд̣̇д̇хиб̣аахусажжаад̣̇иг̇ун̣амукзна багаран̣з г̇ааравам̣ ж̇анзд̇угаамзна зд̇асса сиссзна табид̇ам̣ ваагяам̣.
Iti tambapaṇṇiyenātiādi pakaraṇakārakassa pabhavasuddhibāhusaccādiguṇamukhena pakaraṇe gāravaṃ janetukāmena etassa sissena ṭhapitaṃ vākyaṃ.
д̇ад̇т̇а д̇амб̣абан̣н̣иязнаад̇и д̇амб̣абан̣н̣имхи ж̇аад̇о, д̇ад̇т̇а вид̣̇ид̇о, д̇ад̇о ааг̇ад̇од̇и ваа д̇амб̣абан̣н̣ияо, д̇зна. б̣яаагаран̣амавзжжа ад̇хийд̇аваад̇и взяяаагаран̣о, барамо жа уд̇д̇амо жа со взяяаагаран̣о жаад̇и барамавзяяаагаран̣о, д̇зна. д̇ийн̣и бидагаани самаахадаани, д̇ин̣н̣ам̣ бидагаанам̣ самаахааро ваа д̇ибидагам̣, нийяанд̇и б̣уж̇жхийяанд̇и сзяяад̇т̇игзхийд̇и наяаа, наяанд̇и ваа зд̇зхи логияалогуд̇д̇арасамбад̇д̇им̣ висзсзнаад̇и наяаа, баал̣инаяаад̇т̇анаяазгад̇д̇анаяаад̣̇аяова, д̇ибидагз ааг̇ад̇аа наяаа д̇ибидаганаяаа, вид̇хаанам̣ басаасанам̣, бавад̇д̇анам̣ ваа вид̇хи, д̇ибидаганаяаанам̣ вид̇хи д̇ибидаганаяавид̇хи, д̇ибидаганаяавид̇химхи гусало д̇ибидаганаяавид̇хигусало, д̇зна.
Tattha tambapaṇṇiyenāti tambapaṇṇimhi jāto, tattha vidito, tato āgatoti vā tambapaṇṇiyo, tena. Byākaraṇamavecca adhītavāti veyyākaraṇo, paramo ca uttamo ca so veyyākaraṇo cāti paramaveyyākaraṇo, tena. Tīṇi piṭakāni samāhaṭāni, tiṇṇaṃ piṭakānaṃ samāhāro vā tipiṭakaṃ, nīyanti bujjhīyanti seyyatthikehīti nayā, nayanti vā etehi lokiyalokuttarasampattiṃ visesenāti nayā, pāḷinayaatthanayaekattanayādayova, tipiṭake āgatā nayā tipiṭakanayā, vidhānaṃ pasāsanaṃ, pavattanaṃ vā vidhi, tipiṭakanayānaṃ vidhi tipiṭakanayavidhi, tipiṭakanayavidhimhi kusalo tipiṭakanayavidhikusalo, tena.
барамаа жа д̇з гавиж̇анаа жаад̇и барамагавиж̇анаа, барамагавиж̇анаанам̣ хад̣̇аяаани барамагавиж̇анахад̣̇аяаани, бад̣̇умаанам̣ ванаани бад̣̇умаванаани, барамагавиж̇анахад̣̇аяаани жа д̇аани бад̣̇умаванаани жаад̇и барамагавиж̇анахад̣̇аяабад̣̇умаванаани, д̇зсам̣ вигасанам̣ б̣од̇хам̣ суурияо вияа гарод̇ийд̇и барамагавиж̇анахад̣̇аяабад̣̇умаванавигасанагаро, д̇зна. гавий жа д̇з вараа жаад̇и гавивараа, гавийнам̣ вараад̇и ваа гавивараа, гавивараанам̣ васабхо уд̇д̇амо гавиваравасабхо, д̇зна, гавирааж̇арааж̇знаад̇и ад̇т̇о.
Paramā ca te kavijanā cāti paramakavijanā, paramakavijanānaṃ hadayāni paramakavijanahadayāni, padumānaṃ vanāni padumavanāni, paramakavijanahadayāni ca tāni padumavanāni cāti paramakavijanahadayapadumavanāni, tesaṃ vikasanaṃ bodhaṃ sūriyo viya karotīti paramakavijanahadayapadumavanavikasanakaro, tena. Kavī ca te varā cāti kavivarā, kavīnaṃ varāti vā kavivarā, kavivarānaṃ vasabho uttamo kavivaravasabho, tena, kavirājarājenāti attho.
барамаа жа саа рад̇и жаад̇и барамарад̇и, барамарад̇им̣ гаронд̇ийд̇и барамарад̇игараани, вараани жа д̇аани мад̇хураани жаад̇и варамад̇хураани, варамад̇хураани жа д̇аани важанаани жаад̇и варамад̇хураважанаани, барамарад̇игараани жа д̇аани варамад̇хураважанаани жаад̇и барамарад̇игараварамад̇хураважанаани, уг̇г̇иран̣ам̣ гат̇анам̣ уг̇г̇ааро, барамарад̇игараварамад̇хураважанаанам̣ уг̇г̇ааро зд̇ассаад̇и барама…бз… важануг̇г̇ааро, д̇зна. ураг̇абурам̣ барамабавзн̣иг̇аамо асса ниваасод̇и ураг̇абуро, д̇зна. б̣уд̣̇д̇хад̣̇ад̇д̇знаад̇и звам̣наамагзна т̇зрзна, аажарияаб̣уд̣̇д̇хад̣̇ад̇д̇ад̇т̇зрзнаад̇и ад̇т̇о. аяам̣ винаяавинижчаяо ражид̇од̇и самб̣анд̇хо.
Paramā ca sā rati cāti paramarati, paramaratiṃ karontīti paramaratikarāni, varāni ca tāni madhurāni cāti varamadhurāni, varamadhurāni ca tāni vacanāni cāti varamadhuravacanāni, paramaratikarāni ca tāni varamadhuravacanāni cāti paramaratikaravaramadhuravacanāni, uggiraṇaṃ kathanaṃ uggāro, paramaratikaravaramadhuravacanānaṃ uggāro etassāti parama…pe… vacanuggāro, tena. Uragapuraṃ paramapaveṇigāmo assa nivāsoti uragapuro, tena. Buddhadattenāti evaṃnāmakena therena, ācariyabuddhadattattherenāti attho. Ayaṃ vinayavinicchayo racitoti sambandho.
нидтид̇аа жааяам̣ винаяад̇т̇асаарасанд̣̇ийбаний наама
Niṭṭhitā cāyaṃ vinayatthasārasandīpanī nāma
винаяавинижчаяаван̣н̣анаа.
Vinayavinicchayavaṇṇanā.
винаяавинижчаяа-дийгаа самад̇д̇аа.
Vinayavinicchaya-ṭīkā samattā.
