| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
निगमनकथावण्णना
Nigamanakathāvaṇṇanā
४७३-५. अधिसीलअधिचित्तानं अधिपञ्ञाय च सिक्खना उत्तरि भिक्खुकिच्चं नाम नत्थि यस्मा, अतो अयं खुद्दसिक्खा समुदाहटा।
473-5. Adhisīlaadhicittānaṃ adhipaññāya ca sikkhanā uttari bhikkhukiccaṃ nāma natthi yasmā, ato ayaṃ khuddasikkhā samudāhaṭā.
केनाति चे? यस्स थेरस्स लोकविचारिनो लोके विचरन्तस्स महतो कित्तिसद्दस्स परिस्समो न सम्भोति न होति, किं विय? मालुतस्सेव निच्चसो, यथा निच्चं विचरन्तस्स मालुतस्स परिस्समो नत्थि, एवं विचरन्तस्स कित्तिसद्दस्स परिस्समो नत्थि, तेन धम्मसिरिकेन समुदाहटाति सम्बन्धो।
Kenāti ce? Yassa therassa lokavicārino loke vicarantassa mahato kittisaddassa parissamo na sambhoti na hoti, kiṃ viya? Mālutasseva niccaso, yathā niccaṃ vicarantassa mālutassa parissamo natthi, evaṃ vicarantassa kittisaddassa parissamo natthi, tena dhammasirikena samudāhaṭāti sambandho.
एत्तावता च –
Ettāvatā ca –
निट्ठितो खुद्दसिक्खाय, समासेन विनिच्छयो।
Niṭṭhito khuddasikkhāya, samāsena vinicchayo;
वित्थारो पन एतिस्सा, सब्बम्पि पिटकत्तयं॥
Vitthāro pana etissā, sabbampi piṭakattayaṃ.
तस्मा वित्थारकामेन, सकले पिटकत्तये।
Tasmā vitthārakāmena, sakale piṭakattaye;
कत्तब्बो सादरो एत्थ, इतरेन विसेसतोति॥
Kattabbo sādaro ettha, itarena visesatoti.
खुद्दसिक्खाविनिच्छयो।
Khuddasikkhāvinicchayo.
खुद्दसिक्खा-पुराणटीका निट्ठिता।
Khuddasikkhā-purāṇaṭīkā niṭṭhitā.
