| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
निगमनकथावण्णना
Nigamanakathāvaṇṇanā
अवसानगाथासु उभतोविभङ्ग-खन्धक-परिवारेहि विभत्तत्ता विभागपटिदेसना यस्मिं विनयपिटके। सो उभतोविभङ्ग-खन्धक-परिवारविभत्तदेसनो आहाति योजना। तस्साति विनयपिटकस्स।
Avasānagāthāsu ubhatovibhaṅga-khandhaka-parivārehi vibhattattā vibhāgapaṭidesanā yasmiṃ vinayapiṭake. So ubhatovibhaṅga-khandhaka-parivāravibhattadesano āhāti yojanā. Tassāti vinayapiṭakassa.
सत्थु महाबोधीति दक्खिणसाखं सन्धाय वदति। यं पधानघरं नाम परिवेणं, तत्थ चारुपाकारेन सञ्चितं परिक्खित्तं यं पासादं कारयि, तत्र तस्मिं महानिगमसामिनो पासादे वसताति योजेतब्बा।
Satthu mahābodhīti dakkhiṇasākhaṃ sandhāya vadati. Yaṃ padhānagharaṃ nāma pariveṇaṃ, tattha cārupākārena sañcitaṃ parikkhittaṃ yaṃ pāsādaṃ kārayi, tatra tasmiṃ mahānigamasāmino pāsāde vasatāti yojetabbā.
बुद्धसिरिं उद्दिसित्वा निस्साय, तस्स वा अज्झेसनम्पि पटिच्च या इद्धा परिपुण्णविनिच्छयताय समिद्धा विनयसंवण्णना आरद्धाति योजना।
Buddhasiriṃ uddisitvā nissāya, tassa vā ajjhesanampi paṭicca yā iddhā paripuṇṇavinicchayatāya samiddhā vinayasaṃvaṇṇanā āraddhāti yojanā.
सिरिनिवासस्साति सिरिया निवासनट्ठानभूतस्स सिरिपालनामकस्स रञ्ञो। जयसंवच्छरेति विजययुत्ते संवच्छरे। आरद्धकालदस्सनत्थं पुन ‘‘जयसंवच्छरे अयं आरद्धा’’ति वुत्तं।
Sirinivāsassāti siriyā nivāsanaṭṭhānabhūtassa siripālanāmakassa rañño. Jayasaṃvacchareti vijayayutte saṃvacchare. Āraddhakāladassanatthaṃ puna ‘‘jayasaṃvacchare ayaṃ āraddhā’’ti vuttaṃ.
काले वस्सन्ति युत्तकाले वस्सनसीलो। देवोति मेघो।
Kālevassanti yuttakāle vassanasīlo. Devoti megho.
निगमनकथावण्णना निट्ठिता।
Nigamanakathāvaṇṇanā niṭṭhitā.
