| Library / Tipiṭaka / तिपिटक • Tipiṭaka / विनयविनिच्छय-टीका • Vinayavinicchaya-ṭīkā |
निगमनकथावण्णना
Nigamanakathāvaṇṇanā
९६१-३. महेसिनो तिविधस्सापि सासनस्स सुचिरट्ठितिकामेन अतिचिरकालप्पवत्तिं इच्छन्तेन धीमता पसत्थतरञाणेन सुद्धचित्तेन लाभसक्कारनिरपेक्खताय परिसुद्धज्झासयेन बुद्धदत्तेन बुद्धदत्ताभिधानेन आचरियवरेन रचितो।
961-3. Mahesino tividhassāpi sāsanassa suciraṭṭhitikāmena aticirakālappavattiṃ icchantena dhīmatā pasatthatarañāṇena suddhacittena lābhasakkāranirapekkhatāya parisuddhajjhāsayena buddhadattena buddhadattābhidhānena ācariyavarena racito.
पज्जवसेन गन्थतो, अत्थतो चेव परमुत्तरो उत्तरो विनिच्छयो अन्तरायं अन्तरेन अज्झत्तिकं, बाहिरं वा अन्तरायं विना यथा सिद्धिं उपागतो परिनिट्ठानं पत्तो, तथा सत्तानं धम्मसंयुता कुसलूपसंहिता सङ्कप्पा मनोरथा सिज्झन्तु अन्तरायं विना निप्पज्जन्तु, एतेन उत्तरविनिच्छयरचनामयेन महता पुञ्ञोदयेन चतूहि सङ्गहवत्थूहि जनं रञ्जेतीति ‘‘राजा’’ति सङ्खं गतो महीपालो महिं पथविसन्निस्सितं जनकायं सम्मा ञायेन दस राजधम्मे अकोपेन्तो पालेतु। देवो पज्जुन्नो काले थावरजङ्गमानं उपयोगारहकाले सम्मा पवस्सतु अवुट्ठिअतिवुट्ठिकं अकत्वा सम्मा पवच्छतु।
Pajjavasena ganthato, atthato ceva paramuttaro uttaro vinicchayo antarāyaṃ antarena ajjhattikaṃ, bāhiraṃ vā antarāyaṃ vinā yathā siddhiṃ upāgato pariniṭṭhānaṃ patto, tathā sattānaṃ dhammasaṃyutā kusalūpasaṃhitā saṅkappā manorathā sijjhantu antarāyaṃ vinā nippajjantu, etena uttaravinicchayaracanāmayena mahatā puññodayena catūhi saṅgahavatthūhi janaṃ rañjetīti ‘‘rājā’’ti saṅkhaṃ gato mahīpālo mahiṃ pathavisannissitaṃ janakāyaṃ sammā ñāyena dasa rājadhamme akopento pāletu. Devo pajjunno kāle thāvarajaṅgamānaṃ upayogārahakāle sammā pavassatu avuṭṭhiativuṭṭhikaṃ akatvā sammā pavacchatu.
९६४. सेलिन्दो सिनेरुपब्बतराजा याव तिट्ठति याव लोके पवत्तति, चन्दो सकलजनपदनयनसायनो याव विरोचति याव अत्तनो सभावं जोतेति, ताव यसस्सिनो गोतमस्स अरहतो सम्मासम्बुद्धस्स सद्धम्मो परियत्तिपटिपत्तिपटिवेधवसेन तिविधो सद्धम्मो तिट्ठतु पवत्ततु।
964.Selindo sinerupabbatarājā yāva tiṭṭhati yāva loke pavattati, cando sakalajanapadanayanasāyano yāva virocati yāva attano sabhāvaṃ joteti, tāva yasassino gotamassa arahato sammāsambuddhassa saddhammo pariyattipaṭipattipaṭivedhavasena tividho saddhammo tiṭṭhatu pavattatu.
९६५. सीहादीनं, दाहादीनञ्च बाहिरज्झत्तिकानं परिस्सयानं खमनं सहनं अभिभवित्वा पवत्तनं खन्ति। सोरच्चन्ति सोभने रतोति सुरतो, सुरतस्स भावो सोरच्चं। सुन्दरं अखण्डतादिगुणसमन्नागतं सीलं अस्साति सुसीलो। सुसीलस्स भावो।
965. Sīhādīnaṃ, dāhādīnañca bāhirajjhattikānaṃ parissayānaṃ khamanaṃ sahanaṃ abhibhavitvā pavattanaṃ khanti. Soraccanti sobhane ratoti surato, suratassa bhāvo soraccaṃ. Sundaraṃ akhaṇḍatādiguṇasamannāgataṃ sīlaṃ assāti susīlo. Susīlassa bhāvo.
निगमनकथावण्णना निट्ठिता।
Nigamanakathāvaṇṇanā niṭṭhitā.
उत्तरविनिच्छयटीका निट्ठिता।
Uttaravinicchayaṭīkā niṭṭhitā.
इति विनयत्थसारसन्दीपनी नाम विनयविनिच्छयवण्णना,
Iti vinayatthasārasandīpanī nāma vinayavinicchayavaṇṇanā,
लीनत्थपकासनी नाम उत्तरविनिच्छयवण्णना च
Līnatthapakāsanī nāma uttaravinicchayavaṇṇanā ca
समत्ता।
Samattā.
पच्छा ठपितगाथायो
Pacchā ṭhapitagāthāyo
थेरेन थिरचित्तेन, सासनुज्जोतनत्थिना।
Therena thiracittena, sāsanujjotanatthinā;
पुञ्ञवा ञाणवा सीली, सुहज्जो मुदुको तथा॥
Puññavā ñāṇavā sīlī, suhajjo muduko tathā.
यो सीहळारिमद्देसु, चन्दिमा सूरियो विय।
Yo sīhaḷārimaddesu, candimā sūriyo viya;
पाकटो सीवलित्थेरो, महातेजो महायसो॥
Pākaṭo sīvalitthero, mahātejo mahāyaso.
तेन नीता सीहळा या, इध पत्ता सुधीमता।
Tena nītā sīhaḷā yā, idha pattā sudhīmatā;
एसा संवण्णना सीह-ळक्खरेन सुलिक्खिता॥
Esā saṃvaṇṇanā sīha-ḷakkharena sulikkhitā.
रेवतो इति नामेन, थेरेन थिरचेतसा।
Revato iti nāmena, therena thiracetasā;
अरिमद्दिके रक्खन्तेन, परिवत्तेत्वान साधुकं॥
Arimaddike rakkhantena, parivattetvāna sādhukaṃ.
लिखापिता हितत्थाय, भिक्खूनं अरिमद्दिके।
Likhāpitā hitatthāya, bhikkhūnaṃ arimaddike;
एसा संवण्णना सुट्ठु, सन्निट्ठानमुपागता।
Esā saṃvaṇṇanā suṭṭhu, sanniṭṭhānamupāgatā;
तथेव सब्बसत्तानं, सब्बत्थो च समिज्झतूति॥
Tatheva sabbasattānaṃ, sabbattho ca samijjhatūti.
