| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
นิคมนกถาวณฺณนา
Nigamanakathāvaṇṇanā
อวสานคาถาสุ อุภโตวิภงฺค-ขนฺธก-ปริวาเรหิ วิภตฺตตฺตา วิภาคปฎิเทสนา ยสฺมิํ วินยปิฎเกฯ โส อุภโตวิภงฺค-ขนฺธก-ปริวารวิภตฺตเทสโน อาหาติ โยชนาฯ ตสฺสาติ วินยปิฎกสฺสฯ
Avasānagāthāsu ubhatovibhaṅga-khandhaka-parivārehi vibhattattā vibhāgapaṭidesanā yasmiṃ vinayapiṭake. So ubhatovibhaṅga-khandhaka-parivāravibhattadesano āhāti yojanā. Tassāti vinayapiṭakassa.
สตฺถุ มหาโพธีติ ทกฺขิณสาขํ สนฺธาย วทติฯ ยํ ปธานฆรํ นาม ปริเวณํ, ตตฺถ จารุปากาเรน สญฺจิตํ ปริกฺขิตฺตํ ยํ ปาสาทํ การยิ, ตตฺร ตสฺมิํ มหานิคมสามิโน ปาสาเท วสตาติ โยเชตพฺพาฯ
Satthu mahābodhīti dakkhiṇasākhaṃ sandhāya vadati. Yaṃ padhānagharaṃ nāma pariveṇaṃ, tattha cārupākārena sañcitaṃ parikkhittaṃ yaṃ pāsādaṃ kārayi, tatra tasmiṃ mahānigamasāmino pāsāde vasatāti yojetabbā.
พุทฺธสิริํ อุทฺทิสิตฺวา นิสฺสาย, ตสฺส วา อเชฺฌสนมฺปิ ปฎิจฺจ ยา อิทฺธา ปริปุณฺณวินิจฺฉยตาย สมิทฺธา วินยสํวณฺณนา อารทฺธาติ โยชนาฯ
Buddhasiriṃ uddisitvā nissāya, tassa vā ajjhesanampi paṭicca yā iddhā paripuṇṇavinicchayatāya samiddhā vinayasaṃvaṇṇanā āraddhāti yojanā.
สิรินิวาสสฺสาติ สิริยา นิวาสนฎฺฐานภูตสฺส สิริปาลนามกสฺส รโญฺญฯ ชยสํวจฺฉเรติ วิชยยุเตฺต สํวจฺฉเรฯ อารทฺธกาลทสฺสนตฺถํ ปุน ‘‘ชยสํวจฺฉเร อยํ อารทฺธา’’ติ วุตฺตํฯ
Sirinivāsassāti siriyā nivāsanaṭṭhānabhūtassa siripālanāmakassa rañño. Jayasaṃvacchareti vijayayutte saṃvacchare. Āraddhakāladassanatthaṃ puna ‘‘jayasaṃvacchare ayaṃ āraddhā’’ti vuttaṃ.
กาเล วสฺสนฺติ ยุตฺตกาเล วสฺสนสีโลฯ เทโวติ เมโฆฯ
Kālevassanti yuttakāle vassanasīlo. Devoti megho.
นิคมนกถาวณฺณนา นิฎฺฐิตาฯ
Nigamanakathāvaṇṇanā niṭṭhitā.
