| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
និគមនកថាវណ្ណនា
Nigamanakathāvaṇṇanā
សកលរូបារូបសម្មសនេ សណ្ហសុខុមវិសយញាណតាយ វិបស្សនាចារនិបុណពុទ្ធីនំ សុសំយតកាយវចីសមាចារតាយ សមថវិបស្សនាសុ សម្មទេវ យតនតោ ច យតីនំ ភិក្ខូនំ ខន្ធាយតនធាតុសច្ចិន្ទ្រិយបដិច្ចសមុប្បាទភេទេ បរមត្ថធម្មេ នានានយេហិ ញាណវិភាគស្ស សន្និស្សយេន ពហុការស្ស សំយុត្តាគមវរស្ស អត្ថសំវណ្ណនំ កាតុំ សារត្ថប្បកាសនតោ ឯវ និបុណា យា មយា អដ្ឋកថា អារទ្ធាតិ សម្ពន្ធោ។ សវិសេសំ បញ្ញាវហគុណត្តា ឯវ ហិស្ស គន្ថារម្ភេ អាទិតោបិ ‘‘បញ្ញាបភេទជននស្សា’’តិ វុត្តំ។ មហាអដ្ឋកថាយ សារន្តិ សំយុត្តមហាអដ្ឋកថាយ សារំ។ ឯកូនសដ្ឋិមត្តោតិ ថោកំ ឩនភាវតោ មត្ត-សទ្ទគ្គហណំ។
Sakalarūpārūpasammasane saṇhasukhumavisayañāṇatāya vipassanācāranipuṇabuddhīnaṃ susaṃyatakāyavacīsamācāratāya samathavipassanāsu sammadeva yatanato ca yatīnaṃ bhikkhūnaṃ khandhāyatanadhātusaccindriyapaṭiccasamuppādabhede paramatthadhamme nānānayehi ñāṇavibhāgassa sannissayena bahukārassa saṃyuttāgamavarassa atthasaṃvaṇṇanaṃ kātuṃ sāratthappakāsanato eva nipuṇā yā mayā aṭṭhakathā āraddhāti sambandho. Savisesaṃ paññāvahaguṇattā eva hissa ganthārambhe āditopi ‘‘paññāpabhedajananassā’’ti vuttaṃ. Mahāaṭṭhakathāya sāranti saṃyuttamahāaṭṭhakathāya sāraṃ. Ekūnasaṭṭhimattoti thokaṃ ūnabhāvato matta-saddaggahaṇaṃ.
មូលដ្ឋកថាយ សារន្តិ បុព្ពេ វុត្តសំយុត្តមហាអដ្ឋកថាយ សារមេវ បុន និគមនវសេន វុត្តន្តិ។ អថ វា មូលដ្ឋកថាយ សារន្តិ បោរាណដ្ឋកថាសុ អត្ថសារំ។ តេន ឯតំ ទស្សេតិ ‘‘សំយុត្តមហាអដ្ឋកថាយ អត្ថសារំ អាទាយ ឥមំ សារត្ថប្បកាសិនិំ ករោន្តេន សេសមហានិកាយានម្បិ មូលដ្ឋកថាសុ ឥធ វិយោគក្ខមំ អត្ថសារំ អាទាយ អកាសិ’’ន្តិ។ ‘‘មហាវិហារាធិវាសីន’’ន្តិ ច ឥទំ បុរិមបច្ឆិមបទេហិ សទ្ធិំ សម្ពន្ធិតព្ពំ ‘‘មហាវិហារាធិវាសីនំ សមយំ បកាសយន្តិំ មហាវិហារាធិវាសីនំ មូលដ្ឋកថាយ សារំ អាទាយា’’តិ ច។ តេន បុញ្ញេន។ ហោតុ សព្ពោ សុខី លោកោតិ កាមាវចរាទិវិភាគោ សព្ពោ សត្តលោកោ យថារហំ ពោធិត្តយាធិគមវសេន សម្បយុត្តេន និព្ពានសុខេន សុខិតោ ហោតូតិ សទេវកស្ស លោកស្ស អច្ចន្តំ សុខាធិគមាយ អត្តនោ បុញ្ញំ បរិណាមេតិ។
Mūlaṭṭhakathāya sāranti pubbe vuttasaṃyuttamahāaṭṭhakathāya sārameva puna nigamanavasena vuttanti. Atha vā mūlaṭṭhakathāya sāranti porāṇaṭṭhakathāsu atthasāraṃ. Tena etaṃ dasseti ‘‘saṃyuttamahāaṭṭhakathāya atthasāraṃ ādāya imaṃ sāratthappakāsiniṃ karontena sesamahānikāyānampi mūlaṭṭhakathāsu idha viyogakkhamaṃ atthasāraṃ ādāya akāsi’’nti. ‘‘Mahāvihārādhivāsīna’’nti ca idaṃ purimapacchimapadehi saddhiṃ sambandhitabbaṃ ‘‘mahāvihārādhivāsīnaṃ samayaṃ pakāsayantiṃ mahāvihārādhivāsīnaṃ mūlaṭṭhakathāya sāraṃ ādāyā’’ti ca. Tena puññena. Hotu sabbo sukhī lokoti kāmāvacarādivibhāgo sabbo sattaloko yathārahaṃ bodhittayādhigamavasena sampayuttena nibbānasukhena sukhito hotūti sadevakassa lokassa accantaṃ sukhādhigamāya attano puññaṃ pariṇāmeti.
ឯត្តាវតា សារត្ថប្បកាសិនិយា
Ettāvatā sāratthappakāsiniyā
សំយុត្តនិកាយ-អដ្ឋកថាយ លីនត្ថប្បកាសនា និដ្ឋិតា។
Saṃyuttanikāya-aṭṭhakathāya līnatthappakāsanā niṭṭhitā.
សំយុត្តដីកា សមត្តា។
Saṃyuttaṭīkā samattā.
