| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
နိဂမနကထာဝဏ္ဏနာ
Nigamanakathāvaṇṇanā
ယံ ပာတိမောက္ခသ္သ ဝဏ္ဏနံ အာရဘိန္တိ သမ္ဗန္ဓော။ ‘‘မဟာဝိဟာရဝာသီန’’န္တိ ဣဒံ ပုရိမပစ္ဆိမပဒေဟိ သဒ္ဓိံ သမ္ဗန္ဓိတဗ္ဗံ, မဟာဝိဟာရဝာသီနံ ပောရာဏဋ္ဌကထာဟိ ဝာတိ စ။ ပာဠိယတ္ထဉ္စ ကေဝလန္တိ သကလံ ပာဠိအတ္ထဉ္စ, ဥဘတောဝိဘင္ဂဉ္စာတိ ဝုတ္တံ ဟောတိ။ ဧတ္ထာတိ ဧတိသ္သံ ကင္ခာဝိတရဏိယံ။ ယသ္မာ န ဟိ အတ္ထီတိ သမ္ဗန္ဓော။ ယန္တိ ယံ ပဒံ။ သီဟဠဋ္ဌကထာနယန္တိ သီဟဠမာတိကဋ္ဌကထာနယံ။ အဋ္ဌကထာသာရန္တိ သီဟဠမာတိကဋ္ဌကထာယံ အတ္ထသာရံ, အထ ဝာ ဝိနယဋ္ဌကထာသု အတ္ထသာရံ။ တေနေတံ ဒသ္သေတိ – သီဟဠမာတိကဋ္ဌကထာယံ အတ္ထသာရံ အာဒာယ ဣမံ ကင္ခာဝိတရဏိံ ကရောန္တော ဝိနယဋ္ဌကထာသုပိ ဣဓ ဝိနိစ္ဆယေ ယောဂက္ခမံ အတ္ထသာရံ အာဒာယေဝ အကာသိန္တိ။
Yaṃ pātimokkhassa vaṇṇanaṃ ārabhinti sambandho. ‘‘Mahāvihāravāsīna’’nti idaṃ purimapacchimapadehi saddhiṃ sambandhitabbaṃ, mahāvihāravāsīnaṃ porāṇaṭṭhakathāhi vāti ca. Pāḷiyatthañca kevalanti sakalaṃ pāḷiatthañca, ubhatovibhaṅgañcāti vuttaṃ hoti. Etthāti etissaṃ kaṅkhāvitaraṇiyaṃ. Yasmā na hi atthīti sambandho. Yanti yaṃ padaṃ. Sīhaḷaṭṭhakathānayanti sīhaḷamātikaṭṭhakathānayaṃ. Aṭṭhakathāsāranti sīhaḷamātikaṭṭhakathāyaṃ atthasāraṃ, atha vā vinayaṭṭhakathāsu atthasāraṃ. Tenetaṃ dasseti – sīhaḷamātikaṭṭhakathāyaṃ atthasāraṃ ādāya imaṃ kaṅkhāvitaraṇiṃ karonto vinayaṭṭhakathāsupi idha vinicchaye yogakkhamaṃ atthasāraṃ ādāyeva akāsinti.
ဣဒာနိ သဒေဝကသ္သ လောကသ္သ အစ္စန္တသုခာဓိဂမာယ အတ္တနော ပုညံ ပရိဏာမေန္တော ‘‘ယထာ စ နိဋ္ဌံ သမ္ပတ္တာ’’တိအာဒိဂာထာဒ္ဝယမာဟ။ ကလ္ယာဏနိသ္သိတာတိ ကုသလနိသ္သိတာ။ သဗ္ဗသတ္တာနန္တိ ကာမာဝစရာဒိဘေဒာနံ သဗ္ဗေသံ သတ္တာနံ။
Idāni sadevakassa lokassa accantasukhādhigamāya attano puññaṃ pariṇāmento ‘‘yathā ca niṭṭhaṃ sampattā’’tiādigāthādvayamāha. Kalyāṇanissitāti kusalanissitā. Sabbasattānanti kāmāvacarādibhedānaṃ sabbesaṃ sattānaṃ.
နိဂမနကထာဝဏ္ဏနာ နိဋ္ဌိတာ။
Nigamanakathāvaṇṇanā niṭṭhitā.
