| Library / Tipiṭaka / ತಿಪಿಟಕ • Tipiṭaka / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā |
ನಿಗಮನಕಥಾವಣ್ಣನಾ
Nigamanakathāvaṇṇanā
ಅವಸಾನಗಾಥಾಸು ಪನ ಅಯಮತ್ಥೋ। ವಿಭತ್ತದೇಸನನ್ತಿ ಉಭತೋವಿಭಙ್ಗಖನ್ಧಕಪರಿವಾರೇಹಿ ವಿಭತ್ತದೇಸನಂ ವಿನಯಪಿಟಕನ್ತಿ ಯೋಜೇತಬ್ಬಂ। ತಸ್ಸಾತಿ ತಸ್ಸ ವಿನಯಸ್ಸ।
Avasānagāthāsu pana ayamattho. Vibhattadesananti ubhatovibhaṅgakhandhakaparivārehi vibhattadesanaṃ vinayapiṭakanti yojetabbaṃ. Tassāti tassa vinayassa.
ತತ್ರಿದನ್ತಿಆದಿ ಪಠಮಪಾರಾಜಿಕವಣ್ಣನಾಯಂ ವುತ್ತನಯಮೇವ।
Tatridantiādi paṭhamapārājikavaṇṇanāyaṃ vuttanayameva.
ಸತ್ಥುಮಹಾಬೋಧಿವಿಭೂಸಿತೋತಿ ಸತ್ಥುನಾ ಪರಿಭುತ್ತಮಹಾಬೋಧಿವಿಭೂಸಿತೋ ಮಣ್ಡಿತೋ, ತಸ್ಸ ಮಹಾವಿಹಾರಸ್ಸ ದಕ್ಖಿಣಭಾಗೇ ಉತ್ತಮಂ ಯಂ ಪಧಾನಘರನ್ತಿ ಸಮ್ಬನ್ಧೋ। ತತ್ಥ ಪಧಾನಘರನ್ತಿ ತಂನಾಮಕಂ ಪರಿವೇಣಂ। ಸುಚಿಚಾರಿತ್ತಸೀಲೇನ, ಭಿಕ್ಖುಸಙ್ಘೇನ ಸೇವಿತನ್ತಿ ಇದಮ್ಪಿ ಪಧಾನಘರವಿಸೇಸನಂ।
Satthumahābodhivibhūsitoti satthunā paribhuttamahābodhivibhūsito maṇḍito, tassa mahāvihārassa dakkhiṇabhāge uttamaṃ yaṃ padhānagharanti sambandho. Tattha padhānagharanti taṃnāmakaṃ pariveṇaṃ. Sucicārittasīlena, bhikkhusaṅghena sevitanti idampi padhānagharavisesanaṃ.
ತತ್ಥಾತಿ ತಸ್ಮಿಂ ಪಧಾನಘರೇ। ಚಾರುಪಾಕಾರಸಞ್ಚಿತನ್ತಿ ಮನಾಪೇನ ಪಾಕಾರೇನ ಪರಿಕ್ಖಿತ್ತಂ। ಸೀತಚ್ಛಾಯತರೂಪೇತನ್ತಿ ಘನನಿಚಿತಪತ್ತಸಞ್ಛನ್ನಸಾಖಾಪಸಾಖತಾಯ ಸೀತಚ್ಛಾಯೇಹಿ ರುಕ್ಖೇಹಿ ಉಪೇತಂ। ವಿಕಸಿತಕಮಲಕುವಲಯಪುಣ್ಡರೀಕಸೋಗನ್ಧಿಕಾದಿಪುಪ್ಫಸಞ್ಛನ್ನಮಧುರಸೀತಲುದಕಪುಣ್ಣತಾಯ ಸಮ್ಪನ್ನಾ ಸಲಿಲಾಸಯಾ ಅಸ್ಸಾತಿ ಸಮ್ಪನ್ನಸಲಿಲಾಸಯೋ। ಉದ್ದಿಸಿತ್ವಾತಿ ಬುದ್ಧಸಿರಿಂ ನಾಮ ಥೇರಂ ನಿಸ್ಸಾಯ, ತಸ್ಸ ಅಜ್ಝೇಸನಂ ನಿಸ್ಸಾಯಾತಿ ವುತ್ತಂ ಹೋತಿ। ಇದ್ಧಾತಿ ಅತ್ಥವಿನಿಚ್ಛಯಾದೀಹಿ ಇದ್ಧಾ ಫೀತಾ ಪರಿಪುಣ್ಣಾ।
Tatthāti tasmiṃ padhānaghare. Cārupākārasañcitanti manāpena pākārena parikkhittaṃ. Sītacchāyatarūpetanti ghananicitapattasañchannasākhāpasākhatāya sītacchāyehi rukkhehi upetaṃ. Vikasitakamalakuvalayapuṇḍarīkasogandhikādipupphasañchannamadhurasītaludakapuṇṇatāya sampannā salilāsayā assāti sampannasalilāsayo. Uddisitvāti buddhasiriṃ nāma theraṃ nissāya, tassa ajjhesanaṃ nissāyāti vuttaṃ hoti. Iddhāti atthavinicchayādīhi iddhā phītā paripuṇṇā.
ಸಿರಿನಿವಾಸಸ್ಸಾತಿ ಸಿರಿಯಾ ನಿವಾಸಟ್ಠಾನಭೂತಸ್ಸ। ಜಯಸಂವಚ್ಛರೇತಿ ಜಯಪ್ಪತ್ತಸಂವಚ್ಛರೇ। ಅಯನ್ತಿ ಥೇರಂ ಬುದ್ಧಸಿರಿಂ ಉದ್ದಿಸ್ಸ ಯಾ ವಿನಯವಣ್ಣನಾ ಆರದ್ಧಾ, ಅಯಂ। ಧಮ್ಮೂಪಸಂಹಿತಾತಿ ಕುಸಲಸನ್ನಿಸ್ಸಿತಾ। ಇದಾನಿ ಸದೇವಕಸ್ಸ ಲೋಕಸ್ಸ ಅಚ್ಚನ್ತಸುಖಾಧಿಗಮಾಯ ಅತ್ತನೋ ಪುಞ್ಞಂ ಪರಿಣಾಮೇನ್ತೋ ‘‘ಚಿರಟ್ಠಿತತ್ಥ ಧಮ್ಮಸ್ಸಾ’’ತಿಆದಿಮಾಹ । ತತ್ಥ ಸಮಾಚಿತನ್ತಿ ಉಪಚಿತಂ। ಸಬ್ಬಸ್ಸ ಆನುಭಾವೇನಾತಿ ಸಬ್ಬಸ್ಸ ತಸ್ಸ ಪುಞ್ಞಸ್ಸ ತೇಜೇನ। ಸಬ್ಬೇಪಿ ಪಾಣಿನೋತಿ ಕಾಮಾವಚರಾದಿಭೇದಾ ಸಬ್ಬೇ ಸತ್ತಾ। ಸದ್ಧಮ್ಮರಸಸೇವಿನೋತಿ ಯಥಾರಹಂ ಬೋಧಿತ್ತಯಾಧಿಗಮವಸೇನ ಸದ್ಧಮ್ಮರಸಸೇವಿನೋ ಭವನ್ತು। ಸೇಸಮೇತ್ಥ ಸುವಿಞ್ಞೇಯ್ಯಮೇವ।
Sirinivāsassāti siriyā nivāsaṭṭhānabhūtassa. Jayasaṃvacchareti jayappattasaṃvacchare. Ayanti theraṃ buddhasiriṃ uddissa yā vinayavaṇṇanā āraddhā, ayaṃ. Dhammūpasaṃhitāti kusalasannissitā. Idāni sadevakassa lokassa accantasukhādhigamāya attano puññaṃ pariṇāmento ‘‘ciraṭṭhitattha dhammassā’’tiādimāha . Tattha samācitanti upacitaṃ. Sabbassa ānubhāvenāti sabbassa tassa puññassa tejena. Sabbepi pāṇinoti kāmāvacarādibhedā sabbe sattā. Saddhammarasasevinoti yathārahaṃ bodhittayādhigamavasena saddhammarasasevino bhavantu. Sesamettha suviññeyyameva.
ನಿಗಮನಕಥಾವಣ್ಣನಾ ನಿಟ್ಠಿತಾ।
Nigamanakathāvaṇṇanā niṭṭhitā.
