| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
නිගමනකථාවණ්‌ණනා
Nigamanakathāvaṇṇanā
අවසානගාථාසු උභතොවිභඞ්‌ග-ඛන්‌ධක-පරිවාරෙහි විභත්‌තත්‌තා විභාගපටිදෙසනා යස්‌මිං විනයපිටකෙ. සො උභතොවිභඞ්‌ග-ඛන්‌ධක-පරිවාරවිභත්‌තදෙසනො ආහාති යොජනා. තස්‌සාති විනයපිටකස්‌ස.
Avasānagāthāsu ubhatovibhaṅga-khandhaka-parivārehi vibhattattā vibhāgapaṭidesanā yasmiṃ vinayapiṭake. So ubhatovibhaṅga-khandhaka-parivāravibhattadesano āhāti yojanā. Tassāti vinayapiṭakassa.
සත්‌ථු මහාබොධීති දක්‌ඛිණසාඛං සන්‌ධාය වදති. යං පධානඝරං නාම පරිවෙණං, තත්‌ථ චාරුපාකාරෙන සඤ්‌චිතං පරික්‌ඛිත්‌තං යං පාසාදං කාරයි, තත්‍ර තස්‌මිං මහානිගමසාමිනො පාසාදෙ වසතාති යොජෙතබ්‌බා.
Satthu mahābodhīti dakkhiṇasākhaṃ sandhāya vadati. Yaṃ padhānagharaṃ nāma pariveṇaṃ, tattha cārupākārena sañcitaṃ parikkhittaṃ yaṃ pāsādaṃ kārayi, tatra tasmiṃ mahānigamasāmino pāsāde vasatāti yojetabbā.
බුද්‌ධසිරිං උද්‌දිසිත්‌වා නිස්‌සාය, තස්‌ස වා අජ්‌ඣෙසනම්‌පි පටිච්‌ච යා ඉද්‌ධා පරිපුණ්‌ණවිනිච්‌ඡයතාය සමිද්‌ධා විනයසංවණ්‌ණනා ආරද්‌ධාති යොජනා.
Buddhasiriṃ uddisitvā nissāya, tassa vā ajjhesanampi paṭicca yā iddhā paripuṇṇavinicchayatāya samiddhā vinayasaṃvaṇṇanā āraddhāti yojanā.
සිරිනිවාසස්‌සාති සිරියා නිවාසනට්‌ඨානභූතස්‌ස සිරිපාලනාමකස්‌ස රඤ්‌ඤො. ජයසංවච්‌ඡරෙති විජයයුත්‌තෙ සංවච්‌ඡරෙ. ආරද්‌ධකාලදස්‌සනත්‌ථං පුන ‘‘ජයසංවච්‌ඡරෙ අයං ආරද්‌ධා’’ති වුත්‌තං.
Sirinivāsassāti siriyā nivāsanaṭṭhānabhūtassa siripālanāmakassa rañño. Jayasaṃvacchareti vijayayutte saṃvacchare. Āraddhakāladassanatthaṃ puna ‘‘jayasaṃvacchare ayaṃ āraddhā’’ti vuttaṃ.
කාලෙ වස්‌සන්‌ති යුත්‌තකාලෙ වස්‌සනසීලො. දෙවොති මෙඝො.
Kālevassanti yuttakāle vassanasīlo. Devoti megho.
නිගමනකථාවණ්‌ණනා නිට්‌ඨිතා.
Nigamanakathāvaṇṇanā niṭṭhitā.
