| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
ਨਿਗਮਨਕਥਾવਣ੍ਣਨਾ
Nigamanakathāvaṇṇanā
ਮਹਾਅਟ੍ਠਕਥਾਯ ਸਾਰਨ੍ਤਿ ਅਙ੍ਗੁਤ੍ਤਰਮਹਾਅਟ੍ਠਕਥਾਯ ਸਾਰਂ। ਏਕੂਨਸਟ੍ਠਿਮਤ੍ਤੋਤਿ ਥੋਕਂ ਊਨਭਾવਤੋ ਮਤ੍ਤਸਦ੍ਦਗ੍ਗਹਣਂ। ਮੂਲਟ੍ਠਕਥਾਸਾਰਨ੍ਤਿ ਪੁਬ੍ਬੇ વੁਤ੍ਤਅਙ੍ਗੁਤ੍ਤਰਮਹਾਅਟ੍ਠਕਥਾਯ ਸਾਰਮੇવ ਅਨੁਨਿਗਮવਸੇਨ વਦਤਿ। ਅਥ વਾ ਮੂਲਟ੍ਠਕਥਾਸਾਰਨ੍ਤਿ ਪੋਰਾਣਟ੍ਠਕਥਾਸੁ ਅਤ੍ਥਸਾਰਂ। ਤੇਨੇਦਂ ਦਸ੍ਸੇਤਿ – ਅਙ੍ਗੁਤ੍ਤਰਮਹਾਅਟ੍ਠਕਥਾਯ ਅਤ੍ਥਸਾਰਂ ਆਦਾਯ ਇਮਂ ਮਨੋਰਥਪੂਰਣਿਂ ਕਰੋਨ੍ਤੋ ਸੇਸਮਹਾਨਿਕਾਯਾਨਮ੍ਪਿ ਮੂਲਟ੍ਠਕਥਾਸੁ ਇਧ વਿਨਿਯੋਗਕ੍ਖਮਂ ਅਤ੍ਥਸਾਰਂ ਆਦਾਯ ਏવਮਕਾਸਿਨ੍ਤਿ। ਮਹਾવਿਹਾਰਾਧਿવਾਸੀਨਨ੍ਤਿ ਚ ਇਦਂ ਪੁਰਿਮਪਚ੍ਛਿਮਪਦੇਹਿ ਸਦ੍ਧਿਂ ਸਮ੍ਬਨ੍ਧਿਤਬ੍ਬਂ ‘‘ਮਹਾવਿਹਾਰਾਧਿવਾਸੀਨਂ ਸਮਯਂ ਪਕਾਸਯਨ੍ਤੀ, ਮਹਾવਿਹਾਰਾਧਿવਾਸੀਨਂ ਮੂਲਟ੍ਠਕਥਾਸਾਰਂ ਆਦਾਯਾ’’ਤਿ। ਤੇਨਾਤਿ ਪੁਞ੍ਞੇਨ। ਹੋਤੁ ਸਬ੍ਬੋ ਸੁਖੀ ਲੋਕੋਤਿ ਕਾਮਾવਚਰਾਦਿવਿਭਾਗੋ ਸਬ੍ਬੋ ਸਤ੍ਤਲੋਕੋ ਯਥਾਰਹਂ ਬੋਧਿਤ੍ਤਯਾਧਿਗਮવਸੇਨ ਸਮ੍ਪਤ੍ਤੇਨ ਨਿਬ੍ਬਾਨਸੁਖੇਨ ਸੁਖੀ ਸੁਖਿਤੋ ਹੋਤੂਤਿ ਸਦੇવਕਸ੍ਸ ਲੋਕਸ੍ਸ ਅਚ੍ਚਨ੍ਤਂ ਸੁਖਾਧਿਗਮਾਯ ਅਤ੍ਤਨੋ ਪੁਞ੍ਞਂ ਪਰਿਣਾਮੇਤਿ।
Mahāaṭṭhakathāyasāranti aṅguttaramahāaṭṭhakathāya sāraṃ. Ekūnasaṭṭhimattoti thokaṃ ūnabhāvato mattasaddaggahaṇaṃ. Mūlaṭṭhakathāsāranti pubbe vuttaaṅguttaramahāaṭṭhakathāya sārameva anunigamavasena vadati. Atha vā mūlaṭṭhakathāsāranti porāṇaṭṭhakathāsu atthasāraṃ. Tenedaṃ dasseti – aṅguttaramahāaṭṭhakathāya atthasāraṃ ādāya imaṃ manorathapūraṇiṃ karonto sesamahānikāyānampi mūlaṭṭhakathāsu idha viniyogakkhamaṃ atthasāraṃ ādāya evamakāsinti. Mahāvihārādhivāsīnanti ca idaṃ purimapacchimapadehi saddhiṃ sambandhitabbaṃ ‘‘mahāvihārādhivāsīnaṃ samayaṃ pakāsayantī, mahāvihārādhivāsīnaṃ mūlaṭṭhakathāsāraṃ ādāyā’’ti. Tenāti puññena. Hotu sabbo sukhī lokoti kāmāvacarādivibhāgo sabbo sattaloko yathārahaṃ bodhittayādhigamavasena sampattena nibbānasukhena sukhī sukhito hotūti sadevakassa lokassa accantaṃ sukhādhigamāya attano puññaṃ pariṇāmeti.
ਏਤ੍ਤਾવਤਾ ਸਮਤ੍ਤਾવ, ਸਬ੍ਬਸੋ વਣ੍ਣਨਾ ਅਯਂ।
Ettāvatā samattāva, sabbaso vaṇṇanā ayaṃ;
વੀਸਤਿਯਾ ਸਹਸ੍ਸੇਹਿ, ਗਨ੍ਥੇਹਿ ਪਰਿਮਾਣਤੋ॥
Vīsatiyā sahassehi, ganthehi parimāṇato.
ਪੋਰਾਣਾਨਂ ਕਥਾਮਗ੍ਗ-ਸਾਰਮੇਤ੍ਥ ਯਤੋ ਠਿਤਂ।
Porāṇānaṃ kathāmagga-sāramettha yato ṭhitaṃ;
ਤਸ੍ਮਾ ਸਾਰਤ੍ਥਮਞ੍ਜੂਸਾ, ਇਤਿ ਨਾਮੇਨ વਿਸ੍ਸੁਤਾ॥
Tasmā sāratthamañjūsā, iti nāmena vissutā.
ਅਜ੍ਝੇਸਿਤੋ ਨਰਿਨ੍ਦੇਨ, ਸੋਹਂ ਪਰਕ੍ਕਮਬਾਹੁਨਾ।
Ajjhesito narindena, sohaṃ parakkamabāhunā;
ਸਦ੍ਧਮ੍ਮਟ੍ਠਿਤਿਕਾਮੇਨ, ਸਾਸਨੁਜ੍ਜੋਤਕਾਰਿਨਾ॥
Saddhammaṭṭhitikāmena, sāsanujjotakārinā.
ਤੇਨੇવ ਕਾਰਿਤੇ ਰਮ੍ਮੇ, ਪਾਸਾਦਸਤਮਣ੍ਡਿਤੇ।
Teneva kārite ramme, pāsādasatamaṇḍite;
ਨਾਨਾਦੁਮਗਣਾਕਿਣ੍ਣੇ, ਭਾવਨਾਭਿਰਤਾਲਯੇ॥
Nānādumagaṇākiṇṇe, bhāvanābhiratālaye.
ਸੀਤਲੂਦਕਸਮ੍ਪਨ੍ਨੇ , વਸਂ ਜੇਤવਨੇ ਇਮਂ।
Sītalūdakasampanne , vasaṃ jetavane imaṃ;
ਅਤ੍ਥਬ੍ਯਞ੍ਜਨਸਮ੍ਪਨ੍ਨਂ, ਅਕਾਸਿਂ ਸਾਧੁਸਮ੍ਮਤਂ॥
Atthabyañjanasampannaṃ, akāsiṃ sādhusammataṃ.
ਯਂ ਸਿਦ੍ਧਂ ਇਮਿਨਾ ਪੁਞ੍ਞਂ, ਯਂ ਚਞ੍ਞਂ ਪਸੁਤਂ ਮਯਾ।
Yaṃ siddhaṃ iminā puññaṃ, yaṃ caññaṃ pasutaṃ mayā;
ਏਤੇਨ ਪੁਞ੍ਞਕਮ੍ਮੇਨ, ਦੁਤਿਯੇ ਅਤ੍ਤਸਮ੍ਭવੇ॥
Etena puññakammena, dutiye attasambhave.
ਤਾવਤਿਂਸੇ ਪਮੋਦੇਨ੍ਤੋ, ਸੀਲਾਚਾਰਗੁਣੇ ਰਤੋ।
Tāvatiṃse pamodento, sīlācāraguṇe rato;
ਅਲਗ੍ਗੋ ਪਞ੍ਚਕਾਮੇਸੁ, ਪਤ੍વਾਨ ਪਠਮਂ ਫਲਂ॥
Alaggo pañcakāmesu, patvāna paṭhamaṃ phalaṃ.
ਅਨ੍ਤਿਮੇ ਅਤ੍ਤਭਾવਮ੍ਹਿ, ਮੇਤ੍ਤੇਯ੍ਯਂ ਮੁਨਿਪੁਙ੍ਗવਂ।
Antime attabhāvamhi, metteyyaṃ munipuṅgavaṃ;
ਲੋਕਗ੍ਗਪੁਗ੍ਗਲਂ ਨਾਥਂ, ਸਬ੍ਬਸਤ੍ਤਹਿਤੇ ਰਤਂ॥
Lokaggapuggalaṃ nāthaṃ, sabbasattahite rataṃ.
ਦਿਸ੍વਾਨ ਤਸ੍ਸ ਧੀਰਸ੍ਸ, ਸੁਤ੍વਾ ਸਦ੍ਧਮ੍ਮਦੇਸਨਂ।
Disvāna tassa dhīrassa, sutvā saddhammadesanaṃ;
ਅਧਿਗਨ੍ਤ੍વਾ ਫਲਂ ਅਗ੍ਗਂ, ਸੋਭੇਯ੍ਯਂ ਜਿਨਸਾਸਨਂ॥
Adhigantvā phalaṃ aggaṃ, sobheyyaṃ jinasāsanaṃ.
ਸਦਾ ਰਕ੍ਖਨ੍ਤੁ ਰਾਜਾਨੋ, ਧਮ੍ਮੇਨੇવ ਇਮਂ ਪਜਂ।
Sadā rakkhantu rājāno, dhammeneva imaṃ pajaṃ;
ਨਿਰਤਾ ਪੁਞ੍ਞਕਮ੍ਮੇਸੁ, ਜੋਤੇਨ੍ਤੁ ਜਿਨਸਾਸਨਂ॥
Niratā puññakammesu, jotentu jinasāsanaṃ.
ਇਮੇ ਚ ਪਾਣਿਨੋ ਸਬ੍ਬੇ, ਸਬ੍ਬਦਾ ਨਿਰੁਪਦ੍ਦવਾ।
Ime ca pāṇino sabbe, sabbadā nirupaddavā;
ਨਿਚ੍ਚਂ ਕਲ੍ਯਾਣਸਙ੍ਕਪ੍ਪਾ, ਪਪ੍ਪੋਨ੍ਤੁ ਅਮਤਂ ਪਦਨ੍ਤਿ॥
Niccaṃ kalyāṇasaṅkappā, pappontu amataṃ padanti.
ਅਙ੍ਗੁਤ੍ਤਰਟੀਕਾ ਸਮਤ੍ਤਾ।
Aṅguttaraṭīkā samattā.
