| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
നിഗമനകഥാവണ്ണനാ
Nigamanakathāvaṇṇanā
യം പാതിമോക്ഖസ്സ വണ്ണനം ആരഭിന്തി സമ്ബന്ധോ. ‘‘മഹാവിഹാരവാസീന’’ന്തി ഇദം പുരിമപച്ഛിമപദേഹി സദ്ധിം സമ്ബന്ധിതബ്ബം, മഹാവിഹാരവാസീനം പോരാണട്ഠകഥാഹി വാതി ച. പാളിയത്ഥഞ്ച കേവലന്തി സകലം പാളിഅത്ഥഞ്ച, ഉഭതോവിഭങ്ഗഞ്ചാതി വുത്തം ഹോതി. ഏത്ഥാതി ഏതിസ്സം കങ്ഖാവിതരണിയം. യസ്മാ ന ഹി അത്ഥീതി സമ്ബന്ധോ. യന്തി യം പദം. സീഹളട്ഠകഥാനയന്തി സീഹളമാതികട്ഠകഥാനയം. അട്ഠകഥാസാരന്തി സീഹളമാതികട്ഠകഥായം അത്ഥസാരം, അഥ വാ വിനയട്ഠകഥാസു അത്ഥസാരം. തേനേതം ദസ്സേതി – സീഹളമാതികട്ഠകഥായം അത്ഥസാരം ആദായ ഇമം കങ്ഖാവിതരണിം കരോന്തോ വിനയട്ഠകഥാസുപി ഇധ വിനിച്ഛയേ യോഗക്ഖമം അത്ഥസാരം ആദായേവ അകാസിന്തി.
Yaṃ pātimokkhassa vaṇṇanaṃ ārabhinti sambandho. ‘‘Mahāvihāravāsīna’’nti idaṃ purimapacchimapadehi saddhiṃ sambandhitabbaṃ, mahāvihāravāsīnaṃ porāṇaṭṭhakathāhi vāti ca. Pāḷiyatthañca kevalanti sakalaṃ pāḷiatthañca, ubhatovibhaṅgañcāti vuttaṃ hoti. Etthāti etissaṃ kaṅkhāvitaraṇiyaṃ. Yasmā na hi atthīti sambandho. Yanti yaṃ padaṃ. Sīhaḷaṭṭhakathānayanti sīhaḷamātikaṭṭhakathānayaṃ. Aṭṭhakathāsāranti sīhaḷamātikaṭṭhakathāyaṃ atthasāraṃ, atha vā vinayaṭṭhakathāsu atthasāraṃ. Tenetaṃ dasseti – sīhaḷamātikaṭṭhakathāyaṃ atthasāraṃ ādāya imaṃ kaṅkhāvitaraṇiṃ karonto vinayaṭṭhakathāsupi idha vinicchaye yogakkhamaṃ atthasāraṃ ādāyeva akāsinti.
ഇദാനി സദേവകസ്സ ലോകസ്സ അച്ചന്തസുഖാധിഗമായ അത്തനോ പുഞ്ഞം പരിണാമേന്തോ ‘‘യഥാ ച നിട്ഠം സമ്പത്താ’’തിആദിഗാഥാദ്വയമാഹ. കല്യാണനിസ്സിതാതി കുസലനിസ്സിതാ. സബ്ബസത്താനന്തി കാമാവചരാദിഭേദാനം സബ്ബേസം സത്താനം.
Idāni sadevakassa lokassa accantasukhādhigamāya attano puññaṃ pariṇāmento ‘‘yathā ca niṭṭhaṃ sampattā’’tiādigāthādvayamāha. Kalyāṇanissitāti kusalanissitā. Sabbasattānanti kāmāvacarādibhedānaṃ sabbesaṃ sattānaṃ.
നിഗമനകഥാവണ്ണനാ നിട്ഠിതാ.
Nigamanakathāvaṇṇanā niṭṭhitā.
