| Library / Tipiṭaka / തിപിടക • Tipiṭaka / വിനയവിനിച്ഛയ-ടീകാ • Vinayavinicchaya-ṭīkā |
നിഗമനകഥാവണ്ണനാ
Nigamanakathāvaṇṇanā
൯൬൧-൩. മഹേസിനോ തിവിധസ്സാപി സാസനസ്സ സുചിരട്ഠിതികാമേന അതിചിരകാലപ്പവത്തിം ഇച്ഛന്തേന ധീമതാ പസത്ഥതരഞാണേന സുദ്ധചിത്തേന ലാഭസക്കാരനിരപേക്ഖതായ പരിസുദ്ധജ്ഝാസയേന ബുദ്ധദത്തേന ബുദ്ധദത്താഭിധാനേന ആചരിയവരേന രചിതോ.
961-3. Mahesino tividhassāpi sāsanassa suciraṭṭhitikāmena aticirakālappavattiṃ icchantena dhīmatā pasatthatarañāṇena suddhacittena lābhasakkāranirapekkhatāya parisuddhajjhāsayena buddhadattena buddhadattābhidhānena ācariyavarena racito.
പജ്ജവസേന ഗന്ഥതോ, അത്ഥതോ ചേവ പരമുത്തരോ ഉത്തരോ വിനിച്ഛയോ അന്തരായം അന്തരേന അജ്ഝത്തികം, ബാഹിരം വാ അന്തരായം വിനാ യഥാ സിദ്ധിം ഉപാഗതോ പരിനിട്ഠാനം പത്തോ, തഥാ സത്താനം ധമ്മസംയുതാ കുസലൂപസംഹിതാ സങ്കപ്പാ മനോരഥാ സിജ്ഝന്തു അന്തരായം വിനാ നിപ്പജ്ജന്തു, ഏതേന ഉത്തരവിനിച്ഛയരചനാമയേന മഹതാ പുഞ്ഞോദയേന ചതൂഹി സങ്ഗഹവത്ഥൂഹി ജനം രഞ്ജേതീതി ‘‘രാജാ’’തി സങ്ഖം ഗതോ മഹീപാലോ മഹിം പഥവിസന്നിസ്സിതം ജനകായം സമ്മാ ഞായേന ദസ രാജധമ്മേ അകോപേന്തോ പാലേതു. ദേവോ പജ്ജുന്നോ കാലേ ഥാവരജങ്ഗമാനം ഉപയോഗാരഹകാലേ സമ്മാ പവസ്സതു അവുട്ഠിഅതിവുട്ഠികം അകത്വാ സമ്മാ പവച്ഛതു.
Pajjavasena ganthato, atthato ceva paramuttaro uttaro vinicchayo antarāyaṃ antarena ajjhattikaṃ, bāhiraṃ vā antarāyaṃ vinā yathā siddhiṃ upāgato pariniṭṭhānaṃ patto, tathā sattānaṃ dhammasaṃyutā kusalūpasaṃhitā saṅkappā manorathā sijjhantu antarāyaṃ vinā nippajjantu, etena uttaravinicchayaracanāmayena mahatā puññodayena catūhi saṅgahavatthūhi janaṃ rañjetīti ‘‘rājā’’ti saṅkhaṃ gato mahīpālo mahiṃ pathavisannissitaṃ janakāyaṃ sammā ñāyena dasa rājadhamme akopento pāletu. Devo pajjunno kāle thāvarajaṅgamānaṃ upayogārahakāle sammā pavassatu avuṭṭhiativuṭṭhikaṃ akatvā sammā pavacchatu.
൯൬൪. സേലിന്ദോ സിനേരുപബ്ബതരാജാ യാവ തിട്ഠതി യാവ ലോകേ പവത്തതി, ചന്ദോ സകലജനപദനയനസായനോ യാവ വിരോചതി യാവ അത്തനോ സഭാവം ജോതേതി, താവ യസസ്സിനോ ഗോതമസ്സ അരഹതോ സമ്മാസമ്ബുദ്ധസ്സ സദ്ധമ്മോ പരിയത്തിപടിപത്തിപടിവേധവസേന തിവിധോ സദ്ധമ്മോ തിട്ഠതു പവത്തതു.
964.Selindo sinerupabbatarājā yāva tiṭṭhati yāva loke pavattati, cando sakalajanapadanayanasāyano yāva virocati yāva attano sabhāvaṃ joteti, tāva yasassino gotamassa arahato sammāsambuddhassa saddhammo pariyattipaṭipattipaṭivedhavasena tividho saddhammo tiṭṭhatu pavattatu.
൯൬൫. സീഹാദീനം, ദാഹാദീനഞ്ച ബാഹിരജ്ഝത്തികാനം പരിസ്സയാനം ഖമനം സഹനം അഭിഭവിത്വാ പവത്തനം ഖന്തി. സോരച്ചന്തി സോഭനേ രതോതി സുരതോ, സുരതസ്സ ഭാവോ സോരച്ചം. സുന്ദരം അഖണ്ഡതാദിഗുണസമന്നാഗതം സീലം അസ്സാതി സുസീലോ. സുസീലസ്സ ഭാവോ.
965. Sīhādīnaṃ, dāhādīnañca bāhirajjhattikānaṃ parissayānaṃ khamanaṃ sahanaṃ abhibhavitvā pavattanaṃ khanti. Soraccanti sobhane ratoti surato, suratassa bhāvo soraccaṃ. Sundaraṃ akhaṇḍatādiguṇasamannāgataṃ sīlaṃ assāti susīlo. Susīlassa bhāvo.
നിഗമനകഥാവണ്ണനാ നിട്ഠിതാ.
Nigamanakathāvaṇṇanā niṭṭhitā.
ഉത്തരവിനിച്ഛയടീകാ നിട്ഠിതാ.
Uttaravinicchayaṭīkā niṭṭhitā.
ഇതി വിനയത്ഥസാരസന്ദീപനീ നാമ വിനയവിനിച്ഛയവണ്ണനാ,
Iti vinayatthasārasandīpanī nāma vinayavinicchayavaṇṇanā,
ലീനത്ഥപകാസനീ നാമ ഉത്തരവിനിച്ഛയവണ്ണനാ ച
Līnatthapakāsanī nāma uttaravinicchayavaṇṇanā ca
സമത്താ.
Samattā.
പച്ഛാ ഠപിതഗാഥായോ
Pacchā ṭhapitagāthāyo
ഥേരേന ഥിരചിത്തേന, സാസനുജ്ജോതനത്ഥിനാ;
Therena thiracittena, sāsanujjotanatthinā;
പുഞ്ഞവാ ഞാണവാ സീലീ, സുഹജ്ജോ മുദുകോ തഥാ.
Puññavā ñāṇavā sīlī, suhajjo muduko tathā.
യോ സീഹളാരിമദ്ദേസു, ചന്ദിമാ സൂരിയോ വിയ;
Yo sīhaḷārimaddesu, candimā sūriyo viya;
പാകടോ സീവലിത്ഥേരോ, മഹാതേജോ മഹായസോ.
Pākaṭo sīvalitthero, mahātejo mahāyaso.
തേന നീതാ സീഹളാ യാ, ഇധ പത്താ സുധീമതാ;
Tena nītā sīhaḷā yā, idha pattā sudhīmatā;
ഏസാ സംവണ്ണനാ സീഹ-ളക്ഖരേന സുലിക്ഖിതാ.
Esā saṃvaṇṇanā sīha-ḷakkharena sulikkhitā.
രേവതോ ഇതി നാമേന, ഥേരേന ഥിരചേതസാ;
Revato iti nāmena, therena thiracetasā;
അരിമദ്ദികേ രക്ഖന്തേന, പരിവത്തേത്വാന സാധുകം.
Arimaddike rakkhantena, parivattetvāna sādhukaṃ.
ലിഖാപിതാ ഹിതത്ഥായ, ഭിക്ഖൂനം അരിമദ്ദികേ;
Likhāpitā hitatthāya, bhikkhūnaṃ arimaddike;
ഏസാ സംവണ്ണനാ സുട്ഠു, സന്നിട്ഠാനമുപാഗതാ;
Esā saṃvaṇṇanā suṭṭhu, sanniṭṭhānamupāgatā;
തഥേവ സബ്ബസത്താനം, സബ്ബത്ഥോ ച സമിജ്ഝതൂതി.
Tatheva sabbasattānaṃ, sabbattho ca samijjhatūti.
