| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
နိဂမနံ
Nigamanaṃ
ဣတိ ဆသု ကဏ္ဍေသု ဗာဝီသတိဝဂ္ဂပတိမဏ္ဍိတေသု ဒ္ဝာသဋ္ဌိအဓိကာ ဒ္ဝေသတာ ဣမသ္မိံ ပောတ္ထကေ အာဂတာ မိလိန္ဒပဉ္ဟာ သမတ္တာ, အနာဂတာ စ ပန ဒ္ဝာစတ္တာလီသာ ဟောန္တိ, အာဂတာ စ အနာဂတာ စ သဗ္ဗာ သမောဓာနေတ္ဝာ စတူဟိ အဓိကာ တိသတပဉ္ဟာ ဟောန္တိ, သဗ္ဗာဝ မိလိန္ဒပဉ္ဟာတိ သင္ခံ ဂစ္ဆန္တိ။
Iti chasu kaṇḍesu bāvīsativaggapatimaṇḍitesu dvāsaṭṭhiadhikā dvesatā imasmiṃ potthake āgatā milindapañhā samattā, anāgatā ca pana dvācattālīsā honti, āgatā ca anāgatā ca sabbā samodhānetvā catūhi adhikā tisatapañhā honti, sabbāva milindapañhāti saṅkhaṃ gacchanti.
ရညော စ ထေရသ္သ စ ပုစ္ဆာဝိသဇ္ဇနာဝသာနေ စတုရာသီတိသတသဟသ္သယောဇနဗဟလာ ဥဒကပရိယန္တံ ကတ္ဝာ အယံ မဟာပထဝီ ဆဓာ ကမ္ပိတ္ထ, ဝိဇ္ဇုလ္လတာ နိစ္ဆရိံသု, ဒေဝတာ ဒိဗ္ဗပုပ္ဖဝသ္သံ ပဝသ္သိံသု, မဟာဗ္ရဟ္မာ သာဓုကာရမဒာသိ, မဟာသမုဒ္ဒကုစ္ဆိယံ မေဃတ္ထနိတနိဂ္ဃောသော ဝိယ မဟာဃောသော အဟောသိ, ဣတိ သော မိလိန္ဒော ရာဇာ စ ဩရောဓဂဏာ စ သိရသာ အဉ္ဇလိံ ပဏာမေတ္ဝာ ဝန္ဒိံသု။
Rañño ca therassa ca pucchāvisajjanāvasāne caturāsītisatasahassayojanabahalā udakapariyantaṃ katvā ayaṃ mahāpathavī chadhā kampittha, vijjullatā nicchariṃsu, devatā dibbapupphavassaṃ pavassiṃsu, mahābrahmā sādhukāramadāsi, mahāsamuddakucchiyaṃ meghatthanitanigghoso viya mahāghoso ahosi, iti so milindo rājā ca orodhagaṇā ca sirasā añjaliṃ paṇāmetvā vandiṃsu.
မိလိန္ဒော ရာဇာ အတိဝိယ ပမုဒိတဟဒယော သုမထိတမာနဟဒယော ဗုဒ္ဓသာသနေ သာရမတိနော ရတနတ္တယေ သုနိက္ကင္ခော နိဂ္ဂုမ္ဗော နိတ္ထဒ္ဓော ဟုတ္ဝာ ထေရသ္သ ဂုဏေသု ပဗ္ဗဇ္ဇာသု ပဋိပဒာဣရိယာပထေသု စ အတိဝိယ ပသန္နော ဝိသ္သတ္ထော နိရာလယော နိဟတမာနတ္ထမ္ဘော ဥဒ္ဓဋဒာဌော ဝိယ ဘုဇဂိန္ဒော ဧဝမာဟ ‘‘သာဓု, ဘန္တေ နာဂသေန, ဗုဒ္ဓဝိသယော ပဉ္ဟော တယာ ဝိသဇ္ဇိတော, ဣမသ္မိံ ဗုဒ္ဓသာသနေ ဌပေတ္ဝာ ဓမ္မသေနာပတိံ သာရိပုတ္တတ္ထေရံ အညော တယာ သဒိသော ပဉ္ဟဝိသဇ္ဇနေ နတ္ထိ, ခမထ, ဘန္တေ နာဂသေန, မမ အစ္စယံ, ဥပာသကံ မံ, ဘန္တေ နာဂသေန, ဓာရေထ အဇ္ဇတဂ္ဂေ ပာဏုပေတံ သရဏံ ဂတ’’န္တိ။
Milindo rājā ativiya pamuditahadayo sumathitamānahadayo buddhasāsane sāramatino ratanattaye sunikkaṅkho niggumbo nitthaddho hutvā therassa guṇesu pabbajjāsu paṭipadāiriyāpathesu ca ativiya pasanno vissattho nirālayo nihatamānatthambho uddhaṭadāṭho viya bhujagindo evamāha ‘‘sādhu, bhante nāgasena, buddhavisayo pañho tayā visajjito, imasmiṃ buddhasāsane ṭhapetvā dhammasenāpatiṃ sāriputtattheraṃ añño tayā sadiso pañhavisajjane natthi, khamatha, bhante nāgasena, mama accayaṃ, upāsakaṃ maṃ, bhante nāgasena, dhāretha ajjatagge pāṇupetaṃ saraṇaṃ gata’’nti.
တဒာ ရာဇာ သဟ ဗလကာယေဟိ နာဂသေနတ္ထေရံ ပယိရုပာသိတ္ဝာ မိလိန္ဒံ နာမ ဝိဟာရံ ကာရေတ္ဝာ ထေရသ္သ နိယ္ယာတေတ္ဝာ စတူဟိ ပစ္စယေဟိ နာဂသေနံ ကောဋိသတေဟိ ဘိက္ခူဟိ သဒ္ဓိံ ပရိစရိ, ပုနပိ ထေရသ္သ ပညာယ ပသီဒိတ္ဝာ ပုတ္တသ္သ ရဇ္ဇံ နိယ္ယာတေတ္ဝာ အဂာရသ္မာ အနဂာရိယံ ပဗ္ဗဇိတ္ဝာ ဝိပသ္သနံ ဝဍ္ဎေတ္ဝာ အရဟတ္တံ ပာပုဏိ, တေန ဝုတ္တံ –
Tadā rājā saha balakāyehi nāgasenattheraṃ payirupāsitvā milindaṃ nāma vihāraṃ kāretvā therassa niyyātetvā catūhi paccayehi nāgasenaṃ koṭisatehi bhikkhūhi saddhiṃ paricari, punapi therassa paññāya pasīditvā puttassa rajjaṃ niyyātetvā agārasmā anagāriyaṃ pabbajitvā vipassanaṃ vaḍḍhetvā arahattaṃ pāpuṇi, tena vuttaṃ –
‘‘ပညာ ပသတ္ထာ လောကသ္မိံ၊ ကတာ သဒ္ဓမ္မဋ္ဌိတိယာ။
‘‘Paññā pasatthā lokasmiṃ, katā saddhammaṭṭhitiyā;
ပညာယ ဝိမတိံ ဟန္တ္ဝာ၊ သန္တိံ ပပ္ပောန္တိ ပဏ္ဍိတာ။
Paññāya vimatiṃ hantvā, santiṃ papponti paṇḍitā.
ယသ္မိံ ခန္ဓေ ဌိတာ ပညာ၊ သတိ တတ္ထ အနူနကာ။
Yasmiṃ khandhe ṭhitā paññā, sati tattha anūnakā;
လင္ကာယံ ဒောဏိနဂရေ၊ ဝသတာ ဒောဏိနာမိနာ။
Laṅkāyaṃ doṇinagare, vasatā doṇināminā;
မဟာထေရေန လေခိတ္ဝာ၊ သုဋ္ဌပိတံ ယထာသုတံ။
Mahātherena lekhitvā, suṭṭhapitaṃ yathāsutaṃ;
မိလိန္ဒရာဇပဉ္ဟော စ၊ နာဂသေနဝိသဇ္ဇနံ။
Milindarājapañho ca, nāgasenavisajjanaṃ;
မိလိန္ဒော ဟိ မဟာပညော၊ နာဂသေနော သုပဏ္ဍိတော။
Milindo hi mahāpañño, nāgaseno supaṇḍito;
ဣမိနာ ပုညကမ္မေန၊ ဣတော ဂစ္ဆာမိ တုသ္သိတံ။
Iminā puññakammena, ito gacchāmi tussitaṃ;
မေတ္တေယ္ယံနာဂတေ ပသ္သေ၊ သုဏေယ္ယံ ဓမ္မမုတ္တမန္တိ။
Metteyyaṃnāgate passe, suṇeyyaṃ dhammamuttamanti.
မိလိန္ဒပဉ္ဟော နိဋ္ဌိတော။
Milindapañho niṭṭhito.
Footnotes:
