| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
ਨਿਗਮਨਂ
Nigamanaṃ
ਇਤਿ ਛਸੁ ਕਣ੍ਡੇਸੁ ਬਾવੀਸਤਿવਗ੍ਗਪਤਿਮਣ੍ਡਿਤੇਸੁ ਦ੍વਾਸਟ੍ਠਿਅਧਿਕਾ ਦ੍વੇਸਤਾ ਇਮਸ੍ਮਿਂ ਪੋਤ੍ਥਕੇ ਆਗਤਾ ਮਿਲਿਨ੍ਦਪਞ੍ਹਾ ਸਮਤ੍ਤਾ, ਅਨਾਗਤਾ ਚ ਪਨ ਦ੍વਾਚਤ੍ਤਾਲੀਸਾ ਹੋਨ੍ਤਿ, ਆਗਤਾ ਚ ਅਨਾਗਤਾ ਚ ਸਬ੍ਬਾ ਸਮੋਧਾਨੇਤ੍વਾ ਚਤੂਹਿ ਅਧਿਕਾ ਤਿਸਤਪਞ੍ਹਾ ਹੋਨ੍ਤਿ, ਸਬ੍ਬਾવ ਮਿਲਿਨ੍ਦਪਞ੍ਹਾਤਿ ਸਙ੍ਖਂ ਗਚ੍ਛਨ੍ਤਿ।
Iti chasu kaṇḍesu bāvīsativaggapatimaṇḍitesu dvāsaṭṭhiadhikā dvesatā imasmiṃ potthake āgatā milindapañhā samattā, anāgatā ca pana dvācattālīsā honti, āgatā ca anāgatā ca sabbā samodhānetvā catūhi adhikā tisatapañhā honti, sabbāva milindapañhāti saṅkhaṃ gacchanti.
ਰਞ੍ਞੋ ਚ ਥੇਰਸ੍ਸ ਚ ਪੁਚ੍ਛਾવਿਸਜ੍ਜਨਾવਸਾਨੇ ਚਤੁਰਾਸੀਤਿਸਤਸਹਸ੍ਸਯੋਜਨਬਹਲਾ ਉਦਕਪਰਿਯਨ੍ਤਂ ਕਤ੍વਾ ਅਯਂ ਮਹਾਪਥવੀ ਛਧਾ ਕਮ੍ਪਿਤ੍ਥ, વਿਜ੍ਜੁਲ੍ਲਤਾ ਨਿਚ੍ਛਰਿਂਸੁ, ਦੇવਤਾ ਦਿਬ੍ਬਪੁਪ੍ਫવਸ੍ਸਂ ਪવਸ੍ਸਿਂਸੁ, ਮਹਾਬ੍ਰਹ੍ਮਾ ਸਾਧੁਕਾਰਮਦਾਸਿ, ਮਹਾਸਮੁਦ੍ਦਕੁਚ੍ਛਿਯਂ ਮੇਘਤ੍ਥਨਿਤਨਿਗ੍ਘੋਸੋ વਿਯ ਮਹਾਘੋਸੋ ਅਹੋਸਿ, ਇਤਿ ਸੋ ਮਿਲਿਨ੍ਦੋ ਰਾਜਾ ਚ ਓਰੋਧਗਣਾ ਚ ਸਿਰਸਾ ਅਞ੍ਜਲਿਂ ਪਣਾਮੇਤ੍વਾ વਨ੍ਦਿਂਸੁ।
Rañño ca therassa ca pucchāvisajjanāvasāne caturāsītisatasahassayojanabahalā udakapariyantaṃ katvā ayaṃ mahāpathavī chadhā kampittha, vijjullatā nicchariṃsu, devatā dibbapupphavassaṃ pavassiṃsu, mahābrahmā sādhukāramadāsi, mahāsamuddakucchiyaṃ meghatthanitanigghoso viya mahāghoso ahosi, iti so milindo rājā ca orodhagaṇā ca sirasā añjaliṃ paṇāmetvā vandiṃsu.
ਮਿਲਿਨ੍ਦੋ ਰਾਜਾ ਅਤਿવਿਯ ਪਮੁਦਿਤਹਦਯੋ ਸੁਮਥਿਤਮਾਨਹਦਯੋ ਬੁਦ੍ਧਸਾਸਨੇ ਸਾਰਮਤਿਨੋ ਰਤਨਤ੍ਤਯੇ ਸੁਨਿਕ੍ਕਙ੍ਖੋ ਨਿਗ੍ਗੁਮ੍ਬੋ ਨਿਤ੍ਥਦ੍ਧੋ ਹੁਤ੍વਾ ਥੇਰਸ੍ਸ ਗੁਣੇਸੁ ਪਬ੍ਬਜ੍ਜਾਸੁ ਪਟਿਪਦਾਇਰਿਯਾਪਥੇਸੁ ਚ ਅਤਿવਿਯ ਪਸਨ੍ਨੋ વਿਸ੍ਸਤ੍ਥੋ ਨਿਰਾਲਯੋ ਨਿਹਤਮਾਨਤ੍ਥਮ੍ਭੋ ਉਦ੍ਧਟਦਾਠੋ વਿਯ ਭੁਜਗਿਨ੍ਦੋ ਏવਮਾਹ ‘‘ਸਾਧੁ, ਭਨ੍ਤੇ ਨਾਗਸੇਨ, ਬੁਦ੍ਧવਿਸਯੋ ਪਞ੍ਹੋ ਤਯਾ વਿਸਜ੍ਜਿਤੋ, ਇਮਸ੍ਮਿਂ ਬੁਦ੍ਧਸਾਸਨੇ ਠਪੇਤ੍વਾ ਧਮ੍ਮਸੇਨਾਪਤਿਂ ਸਾਰਿਪੁਤ੍ਤਤ੍ਥੇਰਂ ਅਞ੍ਞੋ ਤਯਾ ਸਦਿਸੋ ਪਞ੍ਹવਿਸਜ੍ਜਨੇ ਨਤ੍ਥਿ, ਖਮਥ, ਭਨ੍ਤੇ ਨਾਗਸੇਨ, ਮਮ ਅਚ੍ਚਯਂ, ਉਪਾਸਕਂ ਮਂ, ਭਨ੍ਤੇ ਨਾਗਸੇਨ, ਧਾਰੇਥ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ।
Milindo rājā ativiya pamuditahadayo sumathitamānahadayo buddhasāsane sāramatino ratanattaye sunikkaṅkho niggumbo nitthaddho hutvā therassa guṇesu pabbajjāsu paṭipadāiriyāpathesu ca ativiya pasanno vissattho nirālayo nihatamānatthambho uddhaṭadāṭho viya bhujagindo evamāha ‘‘sādhu, bhante nāgasena, buddhavisayo pañho tayā visajjito, imasmiṃ buddhasāsane ṭhapetvā dhammasenāpatiṃ sāriputtattheraṃ añño tayā sadiso pañhavisajjane natthi, khamatha, bhante nāgasena, mama accayaṃ, upāsakaṃ maṃ, bhante nāgasena, dhāretha ajjatagge pāṇupetaṃ saraṇaṃ gata’’nti.
ਤਦਾ ਰਾਜਾ ਸਹ ਬਲਕਾਯੇਹਿ ਨਾਗਸੇਨਤ੍ਥੇਰਂ ਪਯਿਰੁਪਾਸਿਤ੍વਾ ਮਿਲਿਨ੍ਦਂ ਨਾਮ વਿਹਾਰਂ ਕਾਰੇਤ੍વਾ ਥੇਰਸ੍ਸ ਨਿਯ੍ਯਾਤੇਤ੍વਾ ਚਤੂਹਿ ਪਚ੍ਚਯੇਹਿ ਨਾਗਸੇਨਂ ਕੋਟਿਸਤੇਹਿ ਭਿਕ੍ਖੂਹਿ ਸਦ੍ਧਿਂ ਪਰਿਚਰਿ, ਪੁਨਪਿ ਥੇਰਸ੍ਸ ਪਞ੍ਞਾਯ ਪਸੀਦਿਤ੍વਾ ਪੁਤ੍ਤਸ੍ਸ ਰਜ੍ਜਂ ਨਿਯ੍ਯਾਤੇਤ੍વਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤ੍વਾ વਿਪਸ੍ਸਨਂ વਡ੍ਢੇਤ੍વਾ ਅਰਹਤ੍ਤਂ ਪਾਪੁਣਿ, ਤੇਨ વੁਤ੍ਤਂ –
Tadā rājā saha balakāyehi nāgasenattheraṃ payirupāsitvā milindaṃ nāma vihāraṃ kāretvā therassa niyyātetvā catūhi paccayehi nāgasenaṃ koṭisatehi bhikkhūhi saddhiṃ paricari, punapi therassa paññāya pasīditvā puttassa rajjaṃ niyyātetvā agārasmā anagāriyaṃ pabbajitvā vipassanaṃ vaḍḍhetvā arahattaṃ pāpuṇi, tena vuttaṃ –
‘‘ਪਞ੍ਞਾ ਪਸਤ੍ਥਾ ਲੋਕਸ੍ਮਿਂ, ਕਤਾ ਸਦ੍ਧਮ੍ਮਟ੍ਠਿਤਿਯਾ।
‘‘Paññā pasatthā lokasmiṃ, katā saddhammaṭṭhitiyā;
ਪਞ੍ਞਾਯ વਿਮਤਿਂ ਹਨ੍ਤ੍વਾ, ਸਨ੍ਤਿਂ ਪਪ੍ਪੋਨ੍ਤਿ ਪਣ੍ਡਿਤਾ॥
Paññāya vimatiṃ hantvā, santiṃ papponti paṇḍitā.
ਯਸ੍ਮਿਂ ਖਨ੍ਧੇ ਠਿਤਾ ਪਞ੍ਞਾ, ਸਤਿ ਤਤ੍ਥ ਅਨੂਨਕਾ।
Yasmiṃ khandhe ṭhitā paññā, sati tattha anūnakā;
ਲਙ੍ਕਾਯਂ ਦੋਣਿਨਗਰੇ, વਸਤਾ ਦੋਣਿਨਾਮਿਨਾ।
Laṅkāyaṃ doṇinagare, vasatā doṇināminā;
ਮਹਾਥੇਰੇਨ ਲੇਖਿਤ੍વਾ, ਸੁਟ੍ਠਪਿਤਂ ਯਥਾਸੁਤਂ।
Mahātherena lekhitvā, suṭṭhapitaṃ yathāsutaṃ;
ਮਿਲਿਨ੍ਦਰਾਜਪਞ੍ਹੋ ਚ, ਨਾਗਸੇਨવਿਸਜ੍ਜਨਂ।
Milindarājapañho ca, nāgasenavisajjanaṃ;
ਮਿਲਿਨ੍ਦੋ ਹਿ ਮਹਾਪਞ੍ਞੋ, ਨਾਗਸੇਨੋ ਸੁਪਣ੍ਡਿਤੋ।
Milindo hi mahāpañño, nāgaseno supaṇḍito;
ਇਮਿਨਾ ਪੁਞ੍ਞਕਮ੍ਮੇਨ, ਇਤੋ ਗਚ੍ਛਾਮਿ ਤੁਸ੍ਸਿਤਂ।
Iminā puññakammena, ito gacchāmi tussitaṃ;
ਮੇਤ੍ਤੇਯ੍ਯਂਨਾਗਤੇ ਪਸ੍ਸੇ, ਸੁਣੇਯ੍ਯਂ ਧਮ੍ਮਮੁਤ੍ਤਮਨ੍ਤਿ॥
Metteyyaṃnāgate passe, suṇeyyaṃ dhammamuttamanti.
ਮਿਲਿਨ੍ਦਪਞ੍ਹੋ ਨਿਟ੍ਠਿਤੋ।
Milindapañho niṭṭhito.
Footnotes:
