| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
நிக³மனவண்ணனா
Nigamanavaṇṇanā
‘‘நாமமத்தவஸேனா’’தி பாடோ². ‘‘நாமகொ³த்தவஸேனா’’தி லிகி²தங். இத³ங் வுத்தங் ஹோதி – ‘‘அயங் கிரியா பி⁴க்கூ²னங் காதுங் ந வட்டதீ’’தி ஜானித்வா ஸசே சா²தே³தி, ச²ன்னாவ ஹோதீதி அத்தோ². ஸபா⁴க³மத்தமேவாதி அவேரிஸபா⁴க³மத்தமேவாதி அதி⁴ப்பாயோ.
‘‘Nāmamattavasenā’’ti pāṭho. ‘‘Nāmagottavasenā’’ti likhitaṃ. Idaṃ vuttaṃ hoti – ‘‘ayaṃ kiriyā bhikkhūnaṃ kātuṃ na vaṭṭatī’’ti jānitvā sace chādeti, channāva hotīti attho. Sabhāgamattamevāti averisabhāgamattamevāti adhippāyo.
வத்து² சேவ கொ³த்தஞ்சாதி எத்த² வத்தூ²தி வீதிக்கமனங் அஸுசிமுச்சனங். கொ³த்தந்தி க³ங் தாயதீதி கொ³த்தங், ஸஜாதிதோ அஞ்ஞத்த² க³ந்துங் அத³த்வா க³ங் பு³த்³தி⁴ங், வசனஞ்ச தாயதீதி அத்தோ². வத்து² ச ஸஜாதிமேவ க³ச்ச²தி. ஸஜாதி நாமெத்த² அஞ்ஞேஹி விஸிட்டா²விஸிட்ட²பூ⁴தா கிரியா, ந காயஸங்ஸக்³கா³தி³. நாமஞ்சேவ ஆபத்தி சாதி எத்த² ஆபத்தீதி வீதிக்கமேனாபன்னாபத்தியா நாமங்.
Vatthu ceva gottañcāti ettha vatthūti vītikkamanaṃ asucimuccanaṃ. Gottanti gaṃ tāyatīti gottaṃ, sajātito aññattha gantuṃ adatvā gaṃ buddhiṃ, vacanañca tāyatīti attho. Vatthu ca sajātimeva gacchati. Sajāti nāmettha aññehi visiṭṭhāvisiṭṭhabhūtā kiriyā, na kāyasaṃsaggādi. Nāmañceva āpatti cāti ettha āpattīti vītikkamenāpannāpattiyā nāmaṃ.
புன ஆக³தாக³தானங் பி⁴க்கூ²னங் ஆரோசெந்தேனாதி எத்த² த்³வின்னங் ஆரோசெந்தேன ‘‘ஆயஸ்மந்தா தா⁴ரெந்து’’திண்ணங் வா அதிரேகானங் வா ஆரோசெந்தேன ‘‘ஆயஸ்மந்தோ தா⁴ரெந்தூ’’தி ஏவங் ஆரோசனவிதா⁴னங் வேதி³தப்³ப³ங். வத்தபே⁴த³ஞ்ச ரத்திச்சே²த³ஞ்ச அகத்வாதி எத்த² ட²பெத்வா நவகதரங் பாரிவாஸிகங் அவஸேஸானங் அந்தமஸோ மூலாயபடிகஸ்ஸனாரஹாதீ³னம்பி அபி⁴வாத³னாதி³ஸாதி³யனே, படிபாடியா நிஸீத³னே, ஓவத³னே, கம்மிகானங் க³ரஹணே சாதிஆதீ³ஸு வத்தபே⁴தோ³ ஹோதி. த³ஸ்ஸனஸவனவிஸயேஸு அனாரோசனே ச பி⁴க்கூ²ஹி ஏகச்ச²ன்னே வஸனே ச அஜானந்தஸ்ஸேவ விஹாரே பி⁴க்கூ²னங் ஆக³ந்த்வா க³மனே சாதிஆதீ³ஸு ரத்திச்சே²தோ³ ஹோதி. நானாஸங்வாஸகேஹி வினயகம்மாபா⁴வதோ தேஸங் அனாரோசனே ரத்திச்சே²தோ³ ந ஹோதி. ‘‘த்³வே லெட்³டு³பாதே அதிக்கமித்வா’’தி வசனதோ அந்தோ ந வட்டதி. நிக்கி²த்தவத்தேனேவ ஹுத்வா விசரந்தேன யஸ்ஸ ஸந்திகே புப்³பே³ ஸமாதி³யித்வா ஆரோசிதங், தஸ்ஸாபி ஸந்திகே பச்சா² நிக்கி²பனகாலே ஆரோசெத்வாவ நிக்கி²பிதப்³ப³ங். தஸ்மா புன ஸமாதா³னகாலேபி ஸோ சே ததோ க³ச்ச²தி, தங் தி³வஸங் அக³ந்த்வா தி³வா ஆரோசெத்வாபி யதி³ ஏவங் அதீததி³வஸங் ஹோதி, ‘‘அருணே உட்டி²தே தஸ்ஸ ஸந்திகே ஆரோசெத்வா வத்தங் நிக்கி²பித்வா விஹாரங் க³ந்தப்³ப³ந்தி தஸ்ஸ ஸந்திகே ஆரோசெத்வா வத்தங் நிக்கி²பிதப்³ப³’’ந்தி வுத்தங். அபிச ‘‘விஹாரங் க³ந்த்வா யங் ஸப்³ப³பட²மங் பி⁴க்கு²ங் பஸ்ஸதி, தஸ்ஸ ஆரோசெத்வா நிக்கி²பிதப்³ப³’’ந்தி வுத்தங். ஸசே ரத்திச்சே²தோ³ ஹோதி, விஹாரஸீமாபரியாபன்னானங் ஸப்³பே³ஸங் ஆரோசேதப்³ப³ங் ஸியா. ‘‘தஸ்ஸ ஆரோசெத்வா’’தி இத³ங் பன புப்³பே³ அனாரோசிதங் ஸந்தா⁴ய வத்தபே⁴த³ரக்க²ணத்த²ங் வுத்தங். தஸ்மா ஏவ ஸமந்தபாஸாதி³காயங் (சூளவ॰ அட்ட²॰ 97) ஏவங் வுத்தங் ‘‘அஞ்ஞங் விஹாரதோ நிக்க²ந்தங் வா ஆக³ந்துகங் வா’’தி.
Punaāgatāgatānaṃ bhikkhūnaṃ ārocentenāti ettha dvinnaṃ ārocentena ‘‘āyasmantā dhārentu’’tiṇṇaṃ vā atirekānaṃ vā ārocentena ‘‘āyasmanto dhārentū’’ti evaṃ ārocanavidhānaṃ veditabbaṃ. Vattabhedañca ratticchedañca akatvāti ettha ṭhapetvā navakataraṃ pārivāsikaṃ avasesānaṃ antamaso mūlāyapaṭikassanārahādīnampi abhivādanādisādiyane, paṭipāṭiyā nisīdane, ovadane, kammikānaṃ garahaṇe cātiādīsu vattabhedo hoti. Dassanasavanavisayesu anārocane ca bhikkhūhi ekacchanne vasane ca ajānantasseva vihāre bhikkhūnaṃ āgantvā gamane cātiādīsu ratticchedo hoti. Nānāsaṃvāsakehi vinayakammābhāvato tesaṃ anārocane ratticchedo na hoti. ‘‘Dve leḍḍupāte atikkamitvā’’ti vacanato anto na vaṭṭati. Nikkhittavatteneva hutvā vicarantena yassa santike pubbe samādiyitvā ārocitaṃ, tassāpi santike pacchā nikkhipanakāle ārocetvāva nikkhipitabbaṃ. Tasmā puna samādānakālepi so ce tato gacchati, taṃ divasaṃ agantvā divā ārocetvāpi yadi evaṃ atītadivasaṃ hoti, ‘‘aruṇe uṭṭhite tassa santike ārocetvā vattaṃ nikkhipitvā vihāraṃ gantabbanti tassa santike ārocetvā vattaṃ nikkhipitabba’’nti vuttaṃ. Apica ‘‘vihāraṃ gantvā yaṃ sabbapaṭhamaṃ bhikkhuṃ passati, tassa ārocetvā nikkhipitabba’’nti vuttaṃ. Sace ratticchedo hoti, vihārasīmāpariyāpannānaṃ sabbesaṃ ārocetabbaṃ siyā. ‘‘Tassa ārocetvā’’ti idaṃ pana pubbe anārocitaṃ sandhāya vattabhedarakkhaṇatthaṃ vuttaṃ. Tasmā eva samantapāsādikāyaṃ (cūḷava. aṭṭha. 97) evaṃ vuttaṃ ‘‘aññaṃ vihārato nikkhantaṃ vā āgantukaṃ vā’’ti.
ஸுத்³த⁴ந்தபரிவாஸே பன ஸசே ‘‘மாஸமத்தங் அஸுத்³தொ⁴ம்ஹீ’’தி அக்³க³ஹேஸி, பரிவஸந்தோ புன ஊனங் வா அதி⁴கங் வா ஸன்னிட்டா²னங் கரோதி, தத்தகம்பி பரிவஸிதப்³ப³மேவ, பரிவாஸதா³னகிச்சங் நத்தி². அயஞ்ஹி ஸுத்³த⁴ந்தபரிவாஸோ நாம உத்³த⁴ம்பி ஆரோஹதி, ஹெட்டா²பி ஓரோஹதி. இத³மஸ்ஸ லக்க²ணங்.
Suddhantaparivāse pana sace ‘‘māsamattaṃ asuddhomhī’’ti aggahesi, parivasanto puna ūnaṃ vā adhikaṃ vā sanniṭṭhānaṃ karoti, tattakampi parivasitabbameva, parivāsadānakiccaṃ natthi. Ayañhi suddhantaparivāso nāma uddhampi ārohati, heṭṭhāpi orohati. Idamassa lakkhaṇaṃ.
ஸமோத³ஹித்வாதி மூலாபத்திட்டா²னே ட²பெத்வா, பக்கி²பித்வாதி அத்தோ². அப்படிச்ச²ன்னா சே அந்தராபத்தி, மூலாய படிகஸ்ஸனங் அகத்வா புப்³பே³ க³ஹிதபரிவாஸேனேவ பரிவஸிதப்³ப³ங். யோ பன ஆபத்திங் ஆபஜ்ஜித்வா விப்³ப⁴மித்வா புன உபஸம்பன்னோ ஹுத்வாபி படிச்சா²தே³தி, யோ ச புப்³பே³ படிச்சா²தெ³த்வா பச்சா² ந படிச்சா²தே³தி, யோ ச உப⁴யத்த² படிச்சா²தே³தி, ஸப்³பே³ஸங் படிச்ச²ன்னதி³வஸவஸேன பரிவாஸோ தா³தப்³போ³. ‘‘புரிமஸ்மிங் ஆபத்திக்க²ந்தே⁴ வா’’தி ச ‘‘பச்சி²மஸ்மிங் ஆபத்திக்க²ந்தே⁴ வா’’தி (சூளவ॰ 166 ஆத³யோ) ச பாளியங் வுத்தத்தா த்³வே பி⁴க்கூ² விஸுத்³தி⁴கங் ஆபன்னா ஹொந்தி, தே ஸுத்³தி⁴கதி³ட்டி²னோ ஹொந்தி. ஏகோ சா²தே³தி, ஏகோ ந சா²தே³தி. யோ சா²தே³தி, ஸோ து³க்கடங் தே³ஸாபேதப்³போ³. ‘‘உபோ⁴பி யதா²த⁴ம்மங் காராபேதப்³பா³’’தி (சூளவ॰ 181) வசனதோ யங் கஞ்சி ஆபத்திங் சா²தெ³த்வா து³க்கடங் ஆபஜ்ஜதீதி வேதி³தப்³போ³.
Samodahitvāti mūlāpattiṭṭhāne ṭhapetvā, pakkhipitvāti attho. Appaṭicchannā ce antarāpatti, mūlāya paṭikassanaṃ akatvā pubbe gahitaparivāseneva parivasitabbaṃ. Yo pana āpattiṃ āpajjitvā vibbhamitvā puna upasampanno hutvāpi paṭicchādeti, yo ca pubbe paṭicchādetvā pacchā na paṭicchādeti, yo ca ubhayattha paṭicchādeti, sabbesaṃ paṭicchannadivasavasena parivāso dātabbo. ‘‘Purimasmiṃ āpattikkhandhe vā’’ti ca ‘‘pacchimasmiṃ āpattikkhandhe vā’’ti (cūḷava. 166 ādayo) ca pāḷiyaṃ vuttattā dve bhikkhū visuddhikaṃ āpannā honti, te suddhikadiṭṭhino honti. Eko chādeti, eko na chādeti. Yo chādeti, so dukkaṭaṃ desāpetabbo. ‘‘Ubhopi yathādhammaṃ kārāpetabbā’’ti (cūḷava. 181) vacanato yaṃ kañci āpattiṃ chādetvā dukkaṭaṃ āpajjatīti veditabbo.
தேஸு க³தேஸு வா அக³தேஸு வா புரிமனயேனேவ படிபஜ்ஜிதப்³ப³ந்தி எத்த² ஊனே க³ணே சரணங், அனுட்ட²ஹனங் ஏகரத்தம்பி க³ணேன விப்பவாஸங், ஸசே ரத்தியா ஏகக்க²ணேன ஸங்கோ⁴ வஸதி, ஸசே ஸோ புரே அருணமேவ கேனசி கரணீயேன க³தோதி எத்த²பி மானத்தேபி ஏவங் ஜாதே. ‘‘அயஞ்ச யஸ்மா க³ணஸ்ஸ ஆரோசெத்வா, பி⁴க்கூ²னஞ்ச அத்தி²பா⁴வங் ஸல்லக்கெ²த்வாவ வஸி, தேனஸ்ஸ ஊனே க³ணே சரணதோ³ஸோ வா விப்பவாஸோ வா ந ஹோதீ’’தி (சூளவ॰ அட்ட²॰ 97) ஸமந்தபாஸாதி³காயங் வுத்தங். தஸ்மா தேன ஆரோசிதே முஹுத்தம்பி நிஸீதி³த்வா க³தேபி விப்பவாஸோ நத்தி². பாரிவாஸிகஸ்ஸ, உக்கி²த்தகஸ்ஸ ச பகதத்தேன தஸ்மிங் வஸனங் உத³கபாதேன வாரிதங், தஸ்மா நானூபசாரேபி ஏகச்ச²ன்னே ந வட்டதி.
Tesu gatesu vā agatesu vā purimanayeneva paṭipajjitabbanti ettha ūne gaṇe caraṇaṃ, anuṭṭhahanaṃ ekarattampi gaṇena vippavāsaṃ, sace rattiyā ekakkhaṇena saṅgho vasati, sace so pure aruṇameva kenaci karaṇīyena gatoti etthapi mānattepi evaṃ jāte. ‘‘Ayañca yasmā gaṇassa ārocetvā, bhikkhūnañca atthibhāvaṃ sallakkhetvāva vasi, tenassa ūne gaṇe caraṇadoso vā vippavāso vā na hotī’’ti (cūḷava. aṭṭha. 97) samantapāsādikāyaṃ vuttaṃ. Tasmā tena ārocite muhuttampi nisīditvā gatepi vippavāso natthi. Pārivāsikassa, ukkhittakassa ca pakatattena tasmiṃ vasanaṃ udakapātena vāritaṃ, tasmā nānūpacārepi ekacchanne na vaṭṭati.
இதா³னி பாட²விசாரணா வேதி³தப்³பா³ – ‘‘நவ பட²மாபத்திகா சத்தாரோ யாவததியகா’’தி இத³ங் ஸபா⁴வனியமவசனங். தேன வுட்டா²னங் அனியமந்தி த³ஸ்ஸேதி. ஏகச்சாபத்திவுட்டா²னஞ்ஹி கம்மதோபி ஹோதி அகம்மதோபி, ந ஏவங் ஆபஜ்ஜனந்தி வுத்தங் ஹோதி. அஞ்ஞதரங் வா அஞ்ஞதரங் வாதி தேஸங் த்³விதா⁴ பி⁴ன்னானம்பி வுட்டா²னக்கமபே⁴தா³பா⁴வதீ³பகவசனங். யாவதீஹங், தாவதீஹந்தி எத்த² அஹபரிச்சே²தோ³ அருணவஸேன. ‘‘ஜான’’ந்தி இமினா ஜானநப்படிச்ச²ன்னஸ்ஸ அகாமா பரிவத்த²ப்³ப³ந்தி த³ஸ்ஸேதி. தேன பி⁴க்கு²னா அகாமா பரிவத்த²ப்³ப³ந்தி தேன பி⁴க்கு²னா வஸதா அகாமா பரிவத்த²ப்³ப³ங், ந பரிவத்திதலிங்கே³னாதி த³ஸ்ஸனத்த²ங் வுத்தங். பரிவுத்த²பரிவாஸேனாதி ஆதி³ம்ஹி பரிவுத்த²பரிவாஸேனேவ பரிவாஸதோ உத்தரி இதிவாரேன ஆதி³தோ பி⁴க்கு²னாவ சா²ரத்தங், பரிவத்திதலிங்கே³ன உத்³த⁴ம்பி பி⁴க்கு²மானத்தாய படிபஜ்ஜிதப்³ப³ங், ந பரிவாஸே விய தப்பச்சயா அசிண்ணமானத்தோ. சிண்ணமானத்தோவ அப்³பே⁴தப்³போ³, ந இதரோ, ந பரிவாஸே விய மானத்தாரஹே, பக்க²மானத்தஞ்ச சரந்தியா பி⁴க்கு²னியா லிங்க³ங் பரிவத்தாதிக்கமே ஸதி சிண்ணமானத்தோ பி⁴க்கு² ஹோதி, புன பி⁴க்கு²மானத்தங் க³ஹெத்வா சிண்ணமானத்தோவ பி⁴க்கு² அப்³பே⁴தப்³போ³தி த³ஸ்ஸேதி.
Idāni pāṭhavicāraṇā veditabbā – ‘‘nava paṭhamāpattikā cattāro yāvatatiyakā’’ti idaṃ sabhāvaniyamavacanaṃ. Tena vuṭṭhānaṃ aniyamanti dasseti. Ekaccāpattivuṭṭhānañhi kammatopi hoti akammatopi, na evaṃ āpajjananti vuttaṃ hoti. Aññataraṃ vā aññataraṃ vāti tesaṃ dvidhā bhinnānampi vuṭṭhānakkamabhedābhāvadīpakavacanaṃ. Yāvatīhaṃ, tāvatīhanti ettha ahaparicchedo aruṇavasena. ‘‘Jāna’’nti iminā jānanappaṭicchannassa akāmā parivatthabbanti dasseti. Tena bhikkhunā akāmā parivatthabbanti tena bhikkhunā vasatā akāmā parivatthabbaṃ, na parivattitaliṅgenāti dassanatthaṃ vuttaṃ. Parivutthaparivāsenāti ādimhi parivutthaparivāseneva parivāsato uttari itivārena ādito bhikkhunāva chārattaṃ, parivattitaliṅgena uddhampi bhikkhumānattāya paṭipajjitabbaṃ, na parivāse viya tappaccayā aciṇṇamānatto. Ciṇṇamānattova abbhetabbo, na itaro, na parivāse viya mānattārahe, pakkhamānattañca carantiyā bhikkhuniyā liṅgaṃ parivattātikkame sati ciṇṇamānatto bhikkhu hoti, puna bhikkhumānattaṃ gahetvā ciṇṇamānattova bhikkhu abbhetabboti dasseti.
யத்த² ஸியாதி யஸ்ஸங் ஸமானஸங்வாஸகஸீமாயம்பி வீஸதிக³ணோ பி⁴க்கு²ஸங்கோ⁴ அத்தி². ஏகேனபி சே ஊனோ வீஸதிக³ணோதி ந யுஜ்ஜதி, ஊனோ சே. ந ஹி வீஸதிக³ணோ, ஸங்கோ⁴ சே ஊனோ. தஸ்மா ‘‘ஏகேனபி சே ஊனோ ஸங்கோ⁴’’தி எத்தகமேவ வத்தப்³ப³ந்தி சே? ந, சதுவக்³க³பஞ்சவக்³க³த³ஸவக்³க³ப்பஸங்க³னிவாரணப்பயோஜனதோ. தஸ்மா வீஸதிவக்³கோ³ பி⁴க்கு²ஸங்கோ⁴ சே பி⁴க்கு²னா ஏகேனபி ஊனோ, நட்டோ² த³ட்ட²ப்³போ³. கேசி பன வினயே அப்பகதஞ்ஞுனோ ‘‘யதா² அதிரேகசதுவக்³கோ³பி ஸங்கோ⁴ சதுவக்³க³கரணீயே கம்மே ‘சதுவக்³கோ³’தி வுச்சதி, ததா² பஞ்சவக்³க³த³ஸவக்³க³கரணீயே கம்மே அதிரேகபஞ்சவக்³க³த³ஸவக்³கோ³பி ‘பஞ்சவக்³க³த³ஸவக்³கோ³’தி வுச்சதி. தஸ்மா ஊனோபி சதுவக்³க³பஞ்சவக்³க³த³ஸவக்³க³வீஸதிவக்³கோ³வா’’தி மஞ்ஞெய்யுங், தேஸங் மஞ்ஞனானிவாரணத்த²ங் ‘‘ஏகேனபி சே ஊனோ’’திஆதி³ வுத்தங். அத² வா வீஸதி பி⁴க்கு²ஸங்கோ⁴ சே, ட²பெத்வா ஏகேனபி சே ஊனோ அப்பகதத்தோ, தங் ட²பெத்வா ஏகேனபி சேதி ஏவமெத்த² அத்தோ² த³ட்ட²ப்³போ³. அயங் தத்த² ஸாமீசீதி வசனங் யங் வுத்தங் ஸப்³ப³த்த² ‘‘தஸ்ஸ ஆபத்தியா பரிவாஸங் தே³தி, மூலாய படிகஸ்ஸதி, மானத்தங் தே³தி, அப்³பே⁴தீ’’தி, தஸ்ஸ ஆவிபா⁴வகரணத்த²ங் வுத்தந்தி வேதி³தப்³ப³ங். தேன தேஸு அயங் யதா²வுத்தா ஸாமீசி நியதா இச்சி²தப்³பா³, ந ராஜஸிக்கா²பதா³தீ³ஸு விய அனியதா. தத்த² ஹி கேனசி அந்தராயேன தங் ஸாமீசிமகரொந்தேபி அனாபத்தீதி தீ³பிதங் ஹோதி.
Yattha siyāti yassaṃ samānasaṃvāsakasīmāyampi vīsatigaṇo bhikkhusaṅgho atthi. Ekenapi ce ūno vīsatigaṇoti na yujjati, ūno ce. Na hi vīsatigaṇo, saṅgho ce ūno. Tasmā ‘‘ekenapi ce ūno saṅgho’’ti ettakameva vattabbanti ce? Na, catuvaggapañcavaggadasavaggappasaṅganivāraṇappayojanato. Tasmā vīsativaggo bhikkhusaṅgho ce bhikkhunā ekenapi ūno, naṭṭho daṭṭhabbo. Keci pana vinaye appakataññuno ‘‘yathā atirekacatuvaggopi saṅgho catuvaggakaraṇīye kamme ‘catuvaggo’ti vuccati, tathā pañcavaggadasavaggakaraṇīye kamme atirekapañcavaggadasavaggopi ‘pañcavaggadasavaggo’ti vuccati. Tasmā ūnopi catuvaggapañcavaggadasavaggavīsativaggovā’’ti maññeyyuṃ, tesaṃ maññanānivāraṇatthaṃ ‘‘ekenapi ce ūno’’tiādi vuttaṃ. Atha vā vīsati bhikkhusaṅgho ce, ṭhapetvā ekenapi ce ūno appakatatto, taṃ ṭhapetvā ekenapi ceti evamettha attho daṭṭhabbo. Ayaṃ tattha sāmīcīti vacanaṃ yaṃ vuttaṃ sabbattha ‘‘tassa āpattiyā parivāsaṃ deti, mūlāya paṭikassati, mānattaṃ deti, abbhetī’’ti, tassa āvibhāvakaraṇatthaṃ vuttanti veditabbaṃ. Tena tesu ayaṃ yathāvuttā sāmīci niyatā icchitabbā, na rājasikkhāpadādīsu viya aniyatā. Tattha hi kenaci antarāyena taṃ sāmīcimakarontepi anāpattīti dīpitaṃ hoti.
ஸங்கா⁴தி³ஸேஸவண்ணனா நிட்டி²தா.
Saṅghādisesavaṇṇanā niṭṭhitā.
