| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
நிக³மனவண்ணனா
Nigamanavaṇṇanā
233. இதா⁴தி இமஸ்மிங் பி⁴க்கு²விப⁴ங்கே³. உத்³தி³ட்டா²தி இத⁴ பாதிமொக்க²வஸேன அனோஸாரிதத்தா சத்தாரோ பாராஜிகாவ உத்³தி³ட்டா² கதி²தாதி அத்தோ² க³ஹேதப்³போ³. யதி³ ஏவங் ஹெட்டா² து²ல்லச்சயது³க்கடானம்பி வுத்தத்தா பாராஜிகாவ உத்³தி³ட்டா²தி கஸ்மா வுத்தாதி? பாராஜிகாதி⁴காரத்தா ஸந்தேஸுபி து²ல்லச்சயது³க்கடேஸு இத⁴ பாராஜிகாவ வுத்தா. யேஸங்…பே॰… அஸங்வாஸோதி இமமத்த²ங் வா தீ³பேதுகாமோ தங்ஸம்ப³ந்தே⁴ன ‘‘உத்³தி³ட்டா² சத்தாரோ பாராஜிகா’’தி ஆஹ. தத்தா²யஸ்மந்தேதிஆதி³கங் பன அனுஞ்ஞாதபாதிமொக்கு²த்³தே³ஸக்கமோபி அயமேவ, நாஞ்ஞோதி த³ஸ்ஸனத்த²ங் வுத்தங். பி⁴க்கு²னீனங் அஸாதா⁴ரணானி சத்தாரீதி உப்³ப⁴ஜாணுமண்ட³லிகா வஜ்ஜபடிச்சா²தி³கா உக்கி²த்தானுவத்திகா அட்ட²வத்து²காதி இமானி சத்தாரி பி⁴க்கு²னீனங் பி⁴க்கூ²ஹி அஸாதா⁴ரணானி நாம. ஏதேஸு உப்³ப⁴ஜாணுமண்ட³லிகா நாம யா காயஸங்ஸக்³க³ராகே³ன அவஸ்ஸுதா தேனேவ ராகே³ன அவஸ்ஸுதஸ்ஸ மனுஸ்ஸபுரிஸஸ்ஸ அக்க²கானங் அதோ⁴ ஜாணுமண்ட³லானங் கப்பரானஞ்ச உபரி யேன கேனசி ஸரீராவயவேன ஆமஸனாதி³ங் ஸாதி³யதி, தஸ்ஸா அதி⁴வசனங். யா பன பி⁴க்கு²னீ அஞ்ஞிஸ்ஸா பி⁴க்கு²னியா பாராஜிகஸங்கா²தங் வஜ்ஜங் ஜானங் படிச்சா²தே³தி, ஸா வஜ்ஜபடிச்சா²தி³கா நாம. ஸமக்³கே³ன பன ஸங்கே⁴ன உக்கி²த்தங் பி⁴க்கு²ங் யா பி⁴க்கு²னீ யங்தி³ட்டி²கோ ஸோ ஹோதி, தஸ்ஸா தி³ட்டி²யா க³ஹணவஸேன அனுவத்ததி, ஸா உக்கி²த்தானுவத்திகா நாம. யா பன காயஸங்ஸக்³க³ராகே³ன திந்தா ததா²வித⁴ஸ்ஸேவ புரிஸஸ்ஸ ஹத்த²க்³க³ஹணங் வா ஸங்கா⁴டிகண்ணக்³க³ஹணங் வா ஸாதி³யதி, காயஸங்ஸக்³க³ஸங்கா²தஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே ஸந்திட்ட²தி வா, தத்த² ட²த்வா ஸல்லபதி வா, ஸங்கேதங் வா க³ச்ச²தி, புரிஸஸ்ஸ ஆக³மனங் வா ஸாதி³யதி, கேனசி வா படிச்ச²ன்னோகாஸங் பவிஸதி, ஹத்த²பாஸே வா ட²த்வா காயங் உபஸங்ஹரதி, அயங் அட்ட²வத்து²கா நாமாதி வேதி³தப்³ப³ங்.
233.Idhāti imasmiṃ bhikkhuvibhaṅge. Uddiṭṭhāti idha pātimokkhavasena anosāritattā cattāro pārājikāva uddiṭṭhā kathitāti attho gahetabbo. Yadi evaṃ heṭṭhā thullaccayadukkaṭānampi vuttattā pārājikāva uddiṭṭhāti kasmā vuttāti? Pārājikādhikārattā santesupi thullaccayadukkaṭesu idha pārājikāva vuttā. Yesaṃ…pe… asaṃvāsoti imamatthaṃ vā dīpetukāmo taṃsambandhena ‘‘uddiṭṭhā cattāro pārājikā’’ti āha. Tatthāyasmantetiādikaṃ pana anuññātapātimokkhuddesakkamopi ayameva, nāññoti dassanatthaṃ vuttaṃ. Bhikkhunīnaṃ asādhāraṇāni cattārīti ubbhajāṇumaṇḍalikā vajjapaṭicchādikā ukkhittānuvattikā aṭṭhavatthukāti imāni cattāri bhikkhunīnaṃ bhikkhūhi asādhāraṇāni nāma. Etesu ubbhajāṇumaṇḍalikā nāma yā kāyasaṃsaggarāgena avassutā teneva rāgena avassutassa manussapurisassa akkhakānaṃ adho jāṇumaṇḍalānaṃ kapparānañca upari yena kenaci sarīrāvayavena āmasanādiṃ sādiyati, tassā adhivacanaṃ. Yā pana bhikkhunī aññissā bhikkhuniyā pārājikasaṅkhātaṃ vajjaṃ jānaṃ paṭicchādeti, sā vajjapaṭicchādikā nāma. Samaggena pana saṅghena ukkhittaṃ bhikkhuṃ yā bhikkhunī yaṃdiṭṭhiko so hoti, tassā diṭṭhiyā gahaṇavasena anuvattati, sā ukkhittānuvattikā nāma. Yā pana kāyasaṃsaggarāgena tintā tathāvidhasseva purisassa hatthaggahaṇaṃ vā saṅghāṭikaṇṇaggahaṇaṃ vā sādiyati, kāyasaṃsaggasaṅkhātassa asaddhammassa paṭisevanatthāya purisassa hatthapāse santiṭṭhati vā, tattha ṭhatvā sallapati vā, saṅketaṃ vā gacchati, purisassa āgamanaṃ vā sādiyati, kenaci vā paṭicchannokāsaṃ pavisati, hatthapāse vā ṭhatvā kāyaṃ upasaṃharati, ayaṃ aṭṭhavatthukā nāmāti veditabbaṃ.
வத்து²விபன்னாதி பப்³ப³ஜ்ஜுபஸம்பதா³ய அவத்து²பா⁴வதோ வத்து²விபன்னா. நேஸஞ்ஹி ‘‘ந, பி⁴க்க²வே, பண்ட³கோ பப்³பா³ஜேதப்³போ³, யோ பப்³பா³ஜெய்ய, ஆபத்தி து³க்கடஸ்ஸா’’திஆதி³னா பப்³ப³ஜ்ஜா உபஸம்பதா³ ச படிக்கி²த்தா. தஸ்மா தே பி⁴க்கு²பா⁴வாய அப⁴ப்³ப³த்தா பாராஜிகாபன்னஸதி³ஸதாய ‘‘பாராஜிகா’’தி வுத்தா. தப்³பா⁴வபா⁴விதாய பி⁴க்கு²பா⁴வோ வஸதி எத்தா²தி வத்து², புக்³க³லானங் பி⁴க்கு²பா⁴வாரஹதா. ஸா பன பப்³ப³ஜ்ஜக்க²ந்த⁴காக³தஸப்³ப³தோ³ஸவிரஹிதஸம்பத்தியுத்ததா. தங் விபன்னங் பண்ட³கபா⁴வாதி³யோகே³ன யேஸங் தே வத்து²விபன்னா. அஹேதுகபடிஸந்தி⁴காதி இமினா தேஸங் விபாகாவரணேன ஸமன்னாக³தபா⁴வங் த³ஸ்ஸெந்தோ மக்³கா³வரணே காரணமாஹ. பாராஜிகாபன்னஸதி³ஸத்தா பாராஜிகா. தெ²ய்யஸங்வாஸகாதி³கம்மங் மாதுகா⁴தாதி³கங் விய ஆனந்தரியங் ந ஹோதீதி ஆஹ ‘‘இமேஸங் திண்ணங் ஸக்³கோ³ அவாரிதோ’’தி.
Vatthuvipannāti pabbajjupasampadāya avatthubhāvato vatthuvipannā. Nesañhi ‘‘na, bhikkhave, paṇḍako pabbājetabbo, yo pabbājeyya, āpatti dukkaṭassā’’tiādinā pabbajjā upasampadā ca paṭikkhittā. Tasmā te bhikkhubhāvāya abhabbattā pārājikāpannasadisatāya ‘‘pārājikā’’ti vuttā. Tabbhāvabhāvitāya bhikkhubhāvo vasati etthāti vatthu, puggalānaṃ bhikkhubhāvārahatā. Sā pana pabbajjakkhandhakāgatasabbadosavirahitasampattiyuttatā. Taṃ vipannaṃ paṇḍakabhāvādiyogena yesaṃ te vatthuvipannā. Ahetukapaṭisandhikāti iminā tesaṃ vipākāvaraṇena samannāgatabhāvaṃ dassento maggāvaraṇe kāraṇamāha. Pārājikāpannasadisattā pārājikā. Theyyasaṃvāsakādikammaṃ mātughātādikaṃ viya ānantariyaṃ na hotīti āha ‘‘imesaṃ tiṇṇaṃ saggo avārito’’ti.
தீ³க⁴தாய லம்ப³மானங் அங்க³ஜாதமேதஸ்ஸாதி லம்பீ³. ஸோ எத்தாவதா ந பாராஜிகோ, அத² கோ² யதா³ அனபி⁴ரதியா பீளிதோ அத்தனோ அங்க³ஜாதங் முகே² வா வச்சமக்³கே³ வா பவேஸேதி, ததா³ பாராஜிகோ ஹோதி. முது³ பிட்டி² ஏதஸ்ஸாதி முது³பிட்டி²கோ, கதபரிகம்மாய முது³காய பிட்டி²யா ஸமன்னாக³தோ. ஸோபி யதா³ அனபி⁴ரதியா பீளிதோ அத்தனோ அங்க³ஜாதங் அத்தனோ முக²வச்சமக்³கே³ஸு அஞ்ஞதரங் பவேஸேதி, ததா³ பாராஜிகோ ஹோதி. பரஸ்ஸ அங்க³ஜாதங் அத்தனோ முகே²ன க³ண்ஹாதீதி யோ அனபி⁴ரதியா பீளிதோ பரஸ்ஸ ஸுத்தஸ்ஸ வா பமத்தஸ்ஸ வா அங்க³ஜாதங் அத்தனோ முகே²ன க³ண்ஹாதி. பரஸ்ஸ அங்க³ஜாதே அபி⁴னிஸீத³தீதி யோ அனபி⁴ரதியா பீளிதோ பரஸ்ஸ அங்க³ஜாதங் கம்மனியங் தி³ஸ்வா அத்தனோ வச்சமக்³கே³ன தஸ்ஸூபரி நிஸீத³தி, தங் அத்தனோ வச்சமக்³க³ங் பவேஸேதீதி அத்தோ².
Dīghatāya lambamānaṃ aṅgajātametassāti lambī. So ettāvatā na pārājiko, atha kho yadā anabhiratiyā pīḷito attano aṅgajātaṃ mukhe vā vaccamagge vā paveseti, tadā pārājiko hoti. Mudu piṭṭhi etassāti mudupiṭṭhiko, kataparikammāya mudukāya piṭṭhiyā samannāgato. Sopi yadā anabhiratiyā pīḷito attano aṅgajātaṃ attano mukhavaccamaggesu aññataraṃ paveseti, tadā pārājiko hoti. Parassa aṅgajātaṃ attano mukhena gaṇhātīti yo anabhiratiyā pīḷito parassa suttassa vā pamattassa vā aṅgajātaṃ attano mukhena gaṇhāti. Parassa aṅgajāte abhinisīdatīti yo anabhiratiyā pīḷito parassa aṅgajātaṃ kammaniyaṃ disvā attano vaccamaggena tassūpari nisīdati, taṃ attano vaccamaggaṃ pavesetīti attho.
எத்தா²ஹ – மாதுகா⁴தகபிதுகா⁴தகஅரஹந்தகா⁴தகா ததியபாராஜிகங் ஆபன்னா, பி⁴க்கு²னீதூ³ஸகோ லம்பீ³ஆத³யோ சத்தாரோ பட²மபாராஜிகங் ஆபன்னா ஏவாதி கத²ங் சதுவீஸதீதி? வுச்சதே – மாதுகா⁴தகாத³யோ ஹி சத்தாரோ இத⁴ அனுபஸம்பன்னா ஏவ அதி⁴ப்பேதா, லம்பீ³ஆத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா பன ஏதேன பரியாயேன மேது²னங் த⁴ம்மங் அப்படிஸேவினோ ஹொந்தி, தஸ்மா விஸுங் வுத்தாதி. ஏதேன பரியாயேனாதி உபி⁴ன்னங் ராக³பரியுட்டா²னஸங்கா²தேன பரியாயேன. து³தியவிகப்பே கச்சித்தா²தி எத்த² கச்சி அத்தா²தி பத³ச்சே²தோ³ வேதி³தப்³போ³.
Etthāha – mātughātakapitughātakaarahantaghātakā tatiyapārājikaṃ āpannā, bhikkhunīdūsako lambīādayo cattāro paṭhamapārājikaṃ āpannā evāti kathaṃ catuvīsatīti? Vuccate – mātughātakādayo hi cattāro idha anupasampannā eva adhippetā, lambīādayo cattāro kiñcāpi paṭhamapārājikena saṅgahitā, yasmā pana etena pariyāyena methunaṃ dhammaṃ appaṭisevino honti, tasmā visuṃ vuttāti. Etena pariyāyenāti ubhinnaṃ rāgapariyuṭṭhānasaṅkhātena pariyāyena. Dutiyavikappe kaccitthāti ettha kacci atthāti padacchedo veditabbo.
நிக³மனவண்ணனா நிட்டி²தா.
Nigamanavaṇṇanā niṭṭhitā.
இதி ஸமந்தபாஸாதி³காய வினயஸங்வண்ணனாய ஸாரத்த²தீ³பனியங்
Iti samantapāsādikāya vinayasaṃvaṇṇanāya sāratthadīpaniyaṃ
சதுத்த²பாராஜிகவண்ணனா நிட்டி²தா.
Catutthapārājikavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / நிக³மனவண்ணனா • Nigamanavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / நிக³மனவண்ணனா • Nigamanavaṇṇanā
