| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. நிக³ண்ட²னாடபுத்தஸுத்தங்
8. Nigaṇṭhanāṭaputtasuttaṃ
350. தேன கோ² பன ஸமயேன நிக³ண்டோ² நாடபுத்தோ 1 மச்சி²காஸண்ட³ங் அனுப்பத்தோ ஹோதி மஹதியா நிக³ண்ட²பரிஸாய ஸத்³தி⁴ங். அஸ்ஸோஸி கோ² சித்தோ க³ஹபதி – ‘‘நிக³ண்டோ² கிர நாடபுத்தோ மச்சி²காஸண்ட³ங் அனுப்பத்தோ மஹதியா நிக³ண்ட²பரிஸாய ஸத்³தி⁴’’ந்தி. அத² கோ² சித்தோ க³ஹபதி ஸம்ப³ஹுலேஹி உபாஸகேஹி ஸத்³தி⁴ங் யேன நிக³ண்டோ² நாடபுத்தோ தேனுபஸங்கமி; உபஸங்கமித்வா நிக³ண்டே²ன நாடபுத்தேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னங் கோ² சித்தங் க³ஹபதிங் நிக³ண்டோ² நாடபுத்தோ ஏதத³வோச – ‘‘ஸத்³த³ஹஸி த்வங், க³ஹபதி, ஸமணஸ்ஸ கோ³தமஸ்ஸ – அத்தி² அவிதக்கோ அவிசாரோ ஸமாதி⁴, அத்தி² விதக்கவிசாரானங் நிரோதோ⁴’’தி?
350. Tena kho pana samayena nigaṇṭho nāṭaputto 2 macchikāsaṇḍaṃ anuppatto hoti mahatiyā nigaṇṭhaparisāya saddhiṃ. Assosi kho citto gahapati – ‘‘nigaṇṭho kira nāṭaputto macchikāsaṇḍaṃ anuppatto mahatiyā nigaṇṭhaparisāya saddhi’’nti. Atha kho citto gahapati sambahulehi upāsakehi saddhiṃ yena nigaṇṭho nāṭaputto tenupasaṅkami; upasaṅkamitvā nigaṇṭhena nāṭaputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho cittaṃ gahapatiṃ nigaṇṭho nāṭaputto etadavoca – ‘‘saddahasi tvaṃ, gahapati, samaṇassa gotamassa – atthi avitakko avicāro samādhi, atthi vitakkavicārānaṃ nirodho’’ti?
‘‘ந க்²வாஹங் எத்த², ப⁴ந்தே, ப⁴க³வதோ ஸத்³தா⁴ய க³ச்சா²மி. அத்தி² அவிதக்கோ அவிசாரோ ஸமாதி⁴, அத்தி² விதக்கவிசாரானங் நிரோதோ⁴’’தி. ஏவங் வுத்தே, நிக³ண்டோ² நாடபுத்தோ உல்லோகெத்வா 3 ஏதத³வோச – ‘‘இத³ங் ப⁴வந்தோ பஸ்ஸந்து, யாவ உஜுகோ சாயங் சித்தோ க³ஹபதி, யாவ அஸடோ² சாயங் சித்தோ க³ஹபதி, யாவ அமாயாவீ சாயங் சித்தோ க³ஹபதி, வாதங் வா ஸோ ஜாலேன பா³தே⁴தப்³ப³ங் மஞ்ஞெய்ய, யோ விதக்கவிசாரே நிரோதே⁴தப்³ப³ங் மஞ்ஞெய்ய , ஸகமுட்டி²னா வா ஸோ க³ங்கா³ய ஸோதங் ஆவாரேதப்³ப³ங் மஞ்ஞெய்ய, யோ விதக்கவிசாரே நிரோதே⁴தப்³ப³ங் மஞ்ஞெய்யா’’தி.
‘‘Na khvāhaṃ ettha, bhante, bhagavato saddhāya gacchāmi. Atthi avitakko avicāro samādhi, atthi vitakkavicārānaṃ nirodho’’ti. Evaṃ vutte, nigaṇṭho nāṭaputto ulloketvā 4 etadavoca – ‘‘idaṃ bhavanto passantu, yāva ujuko cāyaṃ citto gahapati, yāva asaṭho cāyaṃ citto gahapati, yāva amāyāvī cāyaṃ citto gahapati, vātaṃ vā so jālena bādhetabbaṃ maññeyya, yo vitakkavicāre nirodhetabbaṃ maññeyya , sakamuṭṭhinā vā so gaṅgāya sotaṃ āvāretabbaṃ maññeyya, yo vitakkavicāre nirodhetabbaṃ maññeyyā’’ti.
‘‘தங் கிங் மஞ்ஞஸி, ப⁴ந்தே, கதமங் நு கோ² பணீததரங் – ஞாணங் வா ஸத்³தா⁴ வா’’தி? ‘‘ஸத்³தா⁴ய கோ², க³ஹபதி, ஞாணங்யேவ பணீததர’’ந்தி. ‘‘அஹங் கோ², ப⁴ந்தே, யாவதே³வ ஆகங்கா²மி, விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹராமி . அஹங் கோ², ப⁴ந்தே, யாவதே³வ ஆகங்கா²மி, விதக்கவிசாரானங் வூபஸமா…பே॰… து³தியங் ஜா²னங் உபஸம்பஜ்ஜ விஹராமி. அஹங் கோ², ப⁴ந்தே, யாவதே³வ ஆகங்கா²மி, பீதியா ச விராகா³…பே॰… ததியங் ஜா²னங் உபஸம்பஜ்ஜ விஹராமி. அஹங் கோ², ப⁴ந்தே, யாவதே³வ ஆகங்கா²மி, ஸுக²ஸ்ஸ ச பஹானா…பே॰… சதுத்த²ங் ஜா²னங் உபஸம்பஜ்ஜ விஹராமி. ந ஸோ க்²வாஹங், ப⁴ந்தே, ஏவங் ஜானந்தோ ஏவங் பஸ்ஸந்தோ கஸ்ஸ அஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா ஸத்³தா⁴ய க³மிஸ்ஸாமி? அத்தி² அவிதக்கோ அவிசாரோ ஸமாதி⁴, அத்தி² விதக்கவிசாரானங் நிரோதோ⁴’’தி.
‘‘Taṃ kiṃ maññasi, bhante, katamaṃ nu kho paṇītataraṃ – ñāṇaṃ vā saddhā vā’’ti? ‘‘Saddhāya kho, gahapati, ñāṇaṃyeva paṇītatara’’nti. ‘‘Ahaṃ kho, bhante, yāvadeva ākaṅkhāmi, vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi . Ahaṃ kho, bhante, yāvadeva ākaṅkhāmi, vitakkavicārānaṃ vūpasamā…pe… dutiyaṃ jhānaṃ upasampajja viharāmi. Ahaṃ kho, bhante, yāvadeva ākaṅkhāmi, pītiyā ca virāgā…pe… tatiyaṃ jhānaṃ upasampajja viharāmi. Ahaṃ kho, bhante, yāvadeva ākaṅkhāmi, sukhassa ca pahānā…pe… catutthaṃ jhānaṃ upasampajja viharāmi. Na so khvāhaṃ, bhante, evaṃ jānanto evaṃ passanto kassa aññassa samaṇassa vā brāhmaṇassa vā saddhāya gamissāmi? Atthi avitakko avicāro samādhi, atthi vitakkavicārānaṃ nirodho’’ti.
ஏவங் வுத்தே, நிக³ண்டோ² நாடபுத்தோ ஸகங் பரிஸங் அபலோகெத்வா ஏதத³வோச – ‘‘இத³ங் ப⁴வந்தோ பஸ்ஸந்து, யாவ அனுஜுகோ சாயங் சித்தோ க³ஹபதி, யாவ ஸடோ² சாயங் சித்தோ க³ஹபதி, யாவ மாயாவீ சாயங் சித்தோ க³ஹபதீ’’தி.
Evaṃ vutte, nigaṇṭho nāṭaputto sakaṃ parisaṃ apaloketvā etadavoca – ‘‘idaṃ bhavanto passantu, yāva anujuko cāyaṃ citto gahapati, yāva saṭho cāyaṃ citto gahapati, yāva māyāvī cāyaṃ citto gahapatī’’ti.
‘‘இதா³னேவ கோ² தே 5 மயங், ப⁴ந்தே, பா⁴ஸிதங் – ‘ஏவங் ஆஜானாம இத³ங் ப⁴வந்தோ பஸ்ஸந்து, யாவ உஜுகோ சாயங் சித்தோ க³ஹபதி, யாவ அஸடோ² சாயங் சித்தோ க³ஹபதி, யாவ அமாயாவீ சாயங் சித்தோ க³ஹபதீ’தி. இதா³னேவ ச பன மயங், ப⁴ந்தே, பா⁴ஸிதங் – ‘ஏவங் ஆஜானாம இத³ங் ப⁴வந்தோ பஸ்ஸந்து, யாவ அனுஜுகோ சாயங் சித்தோ க³ஹபதி, யாவ ஸடோ² சாயங் சித்தோ க³ஹபதி, யாவ மாயாவீ சாயங் சித்தோ க³ஹபதீ’தி. ஸசே தே, ப⁴ந்தே, புரிமங் ஸச்சங், பச்சி²மங் தே மிச்சா². ஸசே பன தே, ப⁴ந்தே, புரிமங் மிச்சா², பச்சி²மங் தே ஸச்சங். இமே கோ² பன, ப⁴ந்தே, த³ஸ ஸஹத⁴ம்மிகா பஞ்ஹா ஆக³ச்ச²ந்தி. யதா³ நேஸங் அத்த²ங் ஆஜானெய்யாஸி, அத² மங் படிஹரெய்யாஸி ஸத்³தி⁴ங் நிக³ண்ட²பரிஸாய. ஏகோ பஞ்ஹோ, ஏகோ உத்³தே³ஸோ, ஏகங் வெய்யாகரணங். த்³வே பஞ்ஹா, த்³வே உத்³தே³ஸா, த்³வே வெய்யாகரணானி. தயோ பஞ்ஹா, தயோ உத்³தே³ஸா, தீணி வெய்யாகரணானி. சத்தாரோ பஞ்ஹா, சத்தாரோ உத்³தே³ஸா, சத்தாரி வெய்யாகரணானி. பஞ்ச பஞ்ஹா, பஞ்ச உத்³தே³ஸா, பஞ்ச வெய்யாகரணானி. ச² பஞ்ஹா, ச² உத்³தே³ஸா, ச² வெய்யாகரணானி. ஸத்த பஞ்ஹா, ஸத்த உத்³தே³ஸா, ஸத்த வெய்யாகரணானி . அட்ட² பஞ்ஹா, அட்ட² உத்³தே³ஸா, அட்ட² வெய்யாகரணானி. நவ பஞ்ஹா, நவ உத்³தே³ஸா, நவ வெய்யாகரணானி. த³ஸ பஞ்ஹா, த³ஸ உத்³தே³ஸா, த³ஸ வெய்யாகரணானீ’’தி. அத² கோ² சித்தோ க³ஹபதி நிக³ண்ட²ங் நாடபுத்தங் இமே த³ஸ ஸஹத⁴ம்மிகே பஞ்ஹே ஆபுச்சி²த்வா உட்டா²யாஸனா பக்காமீதி. அட்ட²மங்.
‘‘Idāneva kho te 6 mayaṃ, bhante, bhāsitaṃ – ‘evaṃ ājānāma idaṃ bhavanto passantu, yāva ujuko cāyaṃ citto gahapati, yāva asaṭho cāyaṃ citto gahapati, yāva amāyāvī cāyaṃ citto gahapatī’ti. Idāneva ca pana mayaṃ, bhante, bhāsitaṃ – ‘evaṃ ājānāma idaṃ bhavanto passantu, yāva anujuko cāyaṃ citto gahapati, yāva saṭho cāyaṃ citto gahapati, yāva māyāvī cāyaṃ citto gahapatī’ti. Sace te, bhante, purimaṃ saccaṃ, pacchimaṃ te micchā. Sace pana te, bhante, purimaṃ micchā, pacchimaṃ te saccaṃ. Ime kho pana, bhante, dasa sahadhammikā pañhā āgacchanti. Yadā nesaṃ atthaṃ ājāneyyāsi, atha maṃ paṭihareyyāsi saddhiṃ nigaṇṭhaparisāya. Eko pañho, eko uddeso, ekaṃ veyyākaraṇaṃ. Dve pañhā, dve uddesā, dve veyyākaraṇāni. Tayo pañhā, tayo uddesā, tīṇi veyyākaraṇāni. Cattāro pañhā, cattāro uddesā, cattāri veyyākaraṇāni. Pañca pañhā, pañca uddesā, pañca veyyākaraṇāni. Cha pañhā, cha uddesā, cha veyyākaraṇāni. Satta pañhā, satta uddesā, satta veyyākaraṇāni . Aṭṭha pañhā, aṭṭha uddesā, aṭṭha veyyākaraṇāni. Nava pañhā, nava uddesā, nava veyyākaraṇāni. Dasa pañhā, dasa uddesā, dasa veyyākaraṇānī’’ti. Atha kho citto gahapati nigaṇṭhaṃ nāṭaputtaṃ ime dasa sahadhammike pañhe āpucchitvā uṭṭhāyāsanā pakkāmīti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. நிக³ண்ட²னாடபுத்தஸுத்தவண்ணனா • 8. Nigaṇṭhanāṭaputtasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. நிக³ண்ட²னாடபுத்தஸுத்தவண்ணனா • 8. Nigaṇṭhanāṭaputtasuttavaṇṇanā
