| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. নিগণ্ঠনাটপুত্তসুত্তং
8. Nigaṇṭhanāṭaputtasuttaṃ
৩৫০. তেন খো পন সমযেন নিগণ্ঠো নাটপুত্তো 1 মচ্ছিকাসণ্ডং অনুপ্পত্তো হোতি মহতিযা নিগণ্ঠপরিসায সদ্ধিং। অস্সোসি খো চিত্তো গহপতি – ‘‘নিগণ্ঠো কির নাটপুত্তো মচ্ছিকাসণ্ডং অনুপ্পত্তো মহতিযা নিগণ্ঠপরিসায সদ্ধি’’ন্তি। অথ খো চিত্তো গহপতি সম্বহুলেহি উপাসকেহি সদ্ধিং যেন নিগণ্ঠো নাটপুত্তো তেনুপসঙ্কমি; উপসঙ্কমিত্ৰা নিগণ্ঠেন নাটপুত্তেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নং খো চিত্তং গহপতিং নিগণ্ঠো নাটপুত্তো এতদৰোচ – ‘‘সদ্দহসি ত্ৰং, গহপতি, সমণস্স গোতমস্স – অত্থি অৰিতক্কো অৰিচারো সমাধি, অত্থি ৰিতক্কৰিচারানং নিরোধো’’তি?
350. Tena kho pana samayena nigaṇṭho nāṭaputto 2 macchikāsaṇḍaṃ anuppatto hoti mahatiyā nigaṇṭhaparisāya saddhiṃ. Assosi kho citto gahapati – ‘‘nigaṇṭho kira nāṭaputto macchikāsaṇḍaṃ anuppatto mahatiyā nigaṇṭhaparisāya saddhi’’nti. Atha kho citto gahapati sambahulehi upāsakehi saddhiṃ yena nigaṇṭho nāṭaputto tenupasaṅkami; upasaṅkamitvā nigaṇṭhena nāṭaputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho cittaṃ gahapatiṃ nigaṇṭho nāṭaputto etadavoca – ‘‘saddahasi tvaṃ, gahapati, samaṇassa gotamassa – atthi avitakko avicāro samādhi, atthi vitakkavicārānaṃ nirodho’’ti?
‘‘ন খ্ৰাহং এত্থ, ভন্তে, ভগৰতো সদ্ধায গচ্ছামি। অত্থি অৰিতক্কো অৰিচারো সমাধি, অত্থি ৰিতক্কৰিচারানং নিরোধো’’তি। এৰং ৰুত্তে, নিগণ্ঠো নাটপুত্তো উল্লোকেত্ৰা 3 এতদৰোচ – ‘‘ইদং ভৰন্তো পস্সন্তু, যাৰ উজুকো চাযং চিত্তো গহপতি, যাৰ অসঠো চাযং চিত্তো গহপতি, যাৰ অমাযাৰী চাযং চিত্তো গহপতি, ৰাতং ৰা সো জালেন বাধেতব্বং মঞ্ঞেয্য, যো ৰিতক্কৰিচারে নিরোধেতব্বং মঞ্ঞেয্য , সকমুট্ঠিনা ৰা সো গঙ্গায সোতং আৰারেতব্বং মঞ্ঞেয্য, যো ৰিতক্কৰিচারে নিরোধেতব্বং মঞ্ঞেয্যা’’তি।
‘‘Na khvāhaṃ ettha, bhante, bhagavato saddhāya gacchāmi. Atthi avitakko avicāro samādhi, atthi vitakkavicārānaṃ nirodho’’ti. Evaṃ vutte, nigaṇṭho nāṭaputto ulloketvā 4 etadavoca – ‘‘idaṃ bhavanto passantu, yāva ujuko cāyaṃ citto gahapati, yāva asaṭho cāyaṃ citto gahapati, yāva amāyāvī cāyaṃ citto gahapati, vātaṃ vā so jālena bādhetabbaṃ maññeyya, yo vitakkavicāre nirodhetabbaṃ maññeyya , sakamuṭṭhinā vā so gaṅgāya sotaṃ āvāretabbaṃ maññeyya, yo vitakkavicāre nirodhetabbaṃ maññeyyā’’ti.
‘‘তং কিং মঞ্ঞসি, ভন্তে, কতমং নু খো পণীততরং – ঞাণং ৰা সদ্ধা ৰা’’তি? ‘‘সদ্ধায খো, গহপতি, ঞাণংযেৰ পণীততর’’ন্তি। ‘‘অহং খো, ভন্তে, যাৰদেৰ আকঙ্খামি, ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি । অহং খো, ভন্তে, যাৰদেৰ আকঙ্খামি, ৰিতক্কৰিচারানং ৰূপসমা…পে॰… দুতিযং ঝানং উপসম্পজ্জ ৰিহরামি। অহং খো, ভন্তে, যাৰদেৰ আকঙ্খামি, পীতিযা চ ৰিরাগা…পে॰… ততিযং ঝানং উপসম্পজ্জ ৰিহরামি। অহং খো, ভন্তে, যাৰদেৰ আকঙ্খামি, সুখস্স চ পহানা…পে॰… চতুত্থং ঝানং উপসম্পজ্জ ৰিহরামি। ন সো খ্ৰাহং, ভন্তে, এৰং জানন্তো এৰং পস্সন্তো কস্স অঞ্ঞস্স সমণস্স ৰা ব্রাহ্মণস্স ৰা সদ্ধায গমিস্সামি? অত্থি অৰিতক্কো অৰিচারো সমাধি, অত্থি ৰিতক্কৰিচারানং নিরোধো’’তি।
‘‘Taṃ kiṃ maññasi, bhante, katamaṃ nu kho paṇītataraṃ – ñāṇaṃ vā saddhā vā’’ti? ‘‘Saddhāya kho, gahapati, ñāṇaṃyeva paṇītatara’’nti. ‘‘Ahaṃ kho, bhante, yāvadeva ākaṅkhāmi, vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi . Ahaṃ kho, bhante, yāvadeva ākaṅkhāmi, vitakkavicārānaṃ vūpasamā…pe… dutiyaṃ jhānaṃ upasampajja viharāmi. Ahaṃ kho, bhante, yāvadeva ākaṅkhāmi, pītiyā ca virāgā…pe… tatiyaṃ jhānaṃ upasampajja viharāmi. Ahaṃ kho, bhante, yāvadeva ākaṅkhāmi, sukhassa ca pahānā…pe… catutthaṃ jhānaṃ upasampajja viharāmi. Na so khvāhaṃ, bhante, evaṃ jānanto evaṃ passanto kassa aññassa samaṇassa vā brāhmaṇassa vā saddhāya gamissāmi? Atthi avitakko avicāro samādhi, atthi vitakkavicārānaṃ nirodho’’ti.
এৰং ৰুত্তে, নিগণ্ঠো নাটপুত্তো সকং পরিসং অপলোকেত্ৰা এতদৰোচ – ‘‘ইদং ভৰন্তো পস্সন্তু, যাৰ অনুজুকো চাযং চিত্তো গহপতি, যাৰ সঠো চাযং চিত্তো গহপতি, যাৰ মাযাৰী চাযং চিত্তো গহপতী’’তি।
Evaṃ vutte, nigaṇṭho nāṭaputto sakaṃ parisaṃ apaloketvā etadavoca – ‘‘idaṃ bhavanto passantu, yāva anujuko cāyaṃ citto gahapati, yāva saṭho cāyaṃ citto gahapati, yāva māyāvī cāyaṃ citto gahapatī’’ti.
‘‘ইদানেৰ খো তে 5 মযং, ভন্তে, ভাসিতং – ‘এৰং আজানাম ইদং ভৰন্তো পস্সন্তু, যাৰ উজুকো চাযং চিত্তো গহপতি, যাৰ অসঠো চাযং চিত্তো গহপতি, যাৰ অমাযাৰী চাযং চিত্তো গহপতী’তি। ইদানেৰ চ পন মযং, ভন্তে, ভাসিতং – ‘এৰং আজানাম ইদং ভৰন্তো পস্সন্তু, যাৰ অনুজুকো চাযং চিত্তো গহপতি, যাৰ সঠো চাযং চিত্তো গহপতি, যাৰ মাযাৰী চাযং চিত্তো গহপতী’তি। সচে তে, ভন্তে, পুরিমং সচ্চং, পচ্ছিমং তে মিচ্ছা। সচে পন তে, ভন্তে, পুরিমং মিচ্ছা, পচ্ছিমং তে সচ্চং। ইমে খো পন, ভন্তে, দস সহধম্মিকা পঞ্হা আগচ্ছন্তি। যদা নেসং অত্থং আজানেয্যাসি, অথ মং পটিহরেয্যাসি সদ্ধিং নিগণ্ঠপরিসায। একো পঞ্হো, একো উদ্দেসো, একং ৰেয্যাকরণং। দ্ৰে পঞ্হা, দ্ৰে উদ্দেসা, দ্ৰে ৰেয্যাকরণানি। তযো পঞ্হা, তযো উদ্দেসা, তীণি ৰেয্যাকরণানি। চত্তারো পঞ্হা, চত্তারো উদ্দেসা, চত্তারি ৰেয্যাকরণানি। পঞ্চ পঞ্হা, পঞ্চ উদ্দেসা, পঞ্চ ৰেয্যাকরণানি। ছ পঞ্হা, ছ উদ্দেসা, ছ ৰেয্যাকরণানি। সত্ত পঞ্হা, সত্ত উদ্দেসা, সত্ত ৰেয্যাকরণানি । অট্ঠ পঞ্হা, অট্ঠ উদ্দেসা, অট্ঠ ৰেয্যাকরণানি। নৰ পঞ্হা, নৰ উদ্দেসা, নৰ ৰেয্যাকরণানি। দস পঞ্হা, দস উদ্দেসা, দস ৰেয্যাকরণানী’’তি। অথ খো চিত্তো গহপতি নিগণ্ঠং নাটপুত্তং ইমে দস সহধম্মিকে পঞ্হে আপুচ্ছিত্ৰা উট্ঠাযাসনা পক্কামীতি। অট্ঠমং।
‘‘Idāneva kho te 6 mayaṃ, bhante, bhāsitaṃ – ‘evaṃ ājānāma idaṃ bhavanto passantu, yāva ujuko cāyaṃ citto gahapati, yāva asaṭho cāyaṃ citto gahapati, yāva amāyāvī cāyaṃ citto gahapatī’ti. Idāneva ca pana mayaṃ, bhante, bhāsitaṃ – ‘evaṃ ājānāma idaṃ bhavanto passantu, yāva anujuko cāyaṃ citto gahapati, yāva saṭho cāyaṃ citto gahapati, yāva māyāvī cāyaṃ citto gahapatī’ti. Sace te, bhante, purimaṃ saccaṃ, pacchimaṃ te micchā. Sace pana te, bhante, purimaṃ micchā, pacchimaṃ te saccaṃ. Ime kho pana, bhante, dasa sahadhammikā pañhā āgacchanti. Yadā nesaṃ atthaṃ ājāneyyāsi, atha maṃ paṭihareyyāsi saddhiṃ nigaṇṭhaparisāya. Eko pañho, eko uddeso, ekaṃ veyyākaraṇaṃ. Dve pañhā, dve uddesā, dve veyyākaraṇāni. Tayo pañhā, tayo uddesā, tīṇi veyyākaraṇāni. Cattāro pañhā, cattāro uddesā, cattāri veyyākaraṇāni. Pañca pañhā, pañca uddesā, pañca veyyākaraṇāni. Cha pañhā, cha uddesā, cha veyyākaraṇāni. Satta pañhā, satta uddesā, satta veyyākaraṇāni . Aṭṭha pañhā, aṭṭha uddesā, aṭṭha veyyākaraṇāni. Nava pañhā, nava uddesā, nava veyyākaraṇāni. Dasa pañhā, dasa uddesā, dasa veyyākaraṇānī’’ti. Atha kho citto gahapati nigaṇṭhaṃ nāṭaputtaṃ ime dasa sahadhammike pañhe āpucchitvā uṭṭhāyāsanā pakkāmīti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. নিগণ্ঠনাটপুত্তসুত্তৰণ্ণনা • 8. Nigaṇṭhanāṭaputtasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. নিগণ্ঠনাটপুত্তসুত্তৰণ্ণনা • 8. Nigaṇṭhanāṭaputtasuttavaṇṇanā
