| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. நிக³ண்ட²னாடபுத்தஸுத்தவண்ணனா
8. Nigaṇṭhanāṭaputtasuttavaṇṇanā
350. அட்ட²மே தேனுபஸங்கமீதி ஸயங் ஆக³தாக³மோ விஞ்ஞாதஸாஸனோ அனாகா³மீ அரியஸாவகோ ஸமானோ கஸ்மா நக்³க³பொ⁴க்³க³ங் நிஸ்ஸிரிகங் நிக³ண்ட²ங் உபஸங்கமீதி? உபவாத³மோசனத்த²ஞ்சேவ வாதா³ரோபனத்த²ஞ்ச. நிக³ண்டா² கிர ‘‘ஸமணஸ்ஸ கோ³தமஸ்ஸ ஸாவகா த²த்³த⁴க²தி³ரகா²ணுகஸதி³ஸா, கேனசி ஸத்³தி⁴ங் படிஸந்தா²ரம்பி ந கரொந்தீ’’தி உபவத³ந்தி, தஸ்ஸ உபவாத³ஸ்ஸ மோசனத்த²ஞ்ச, ‘‘வாத³ஞ்சஸ்ஸ ஆரோபெஸ்ஸாமீ’’தி உபஸங்கமி. ந க்²வாஹங் எத்த² ப⁴ந்தே ப⁴க³வதோ ஸத்³தா⁴ய க³ச்சா²மீதி யஸ்ஸ ஞாணேன அஸச்சி²கதங் ஹோதி. ஸோ ‘‘ஏவங் கிரேத’’ந்தி அஞ்ஞஸ்ஸ ஸத்³தா⁴ய க³ச்செ²ய்ய, மயா பன ஞாணேனேதங் ஸச்சி²கதங், தஸ்மா நாஹங் எத்த² ப⁴க³வதோ ஸத்³தா⁴ய க³ச்சா²மீதி தீ³பெந்தோ ஏவமாஹ.
350. Aṭṭhame tenupasaṅkamīti sayaṃ āgatāgamo viññātasāsano anāgāmī ariyasāvako samāno kasmā naggabhoggaṃ nissirikaṃ nigaṇṭhaṃ upasaṅkamīti? Upavādamocanatthañceva vādāropanatthañca. Nigaṇṭhā kira ‘‘samaṇassa gotamassa sāvakā thaddhakhadirakhāṇukasadisā, kenaci saddhiṃ paṭisanthārampi na karontī’’ti upavadanti, tassa upavādassa mocanatthañca, ‘‘vādañcassa āropessāmī’’ti upasaṅkami. Na khvāhaṃ ettha bhante bhagavato saddhāya gacchāmīti yassa ñāṇena asacchikataṃ hoti. So ‘‘evaṃ kireta’’nti aññassa saddhāya gaccheyya, mayā pana ñāṇenetaṃ sacchikataṃ, tasmā nāhaṃ ettha bhagavato saddhāya gacchāmīti dīpento evamāha.
உல்லோகெத்வாதி காயங் உன்னாமெத்வா குச்சி²ங் நீஹரித்வா கீ³வங் பக்³க³ய்ஹ ஸப்³ப³ங் தி³ஸங் பெக்க²மானோ உல்லோகெத்வா. பா³தே⁴தப்³ப³ங் மஞ்ஞெய்யாதி யதா² வினிவிஜ்ஜி²த்வா ந நிக்க²மதி, ஏவங் படிபா³ஹிதப்³ப³ங் மஞ்ஞெய்ய ப³ந்தி⁴தப்³ப³ங் வா. ஸஹத⁴ம்மிகாதி ஸகாரணா. அத² மங் படிஹரெய்யாஸி ஸத்³தி⁴ங் நிக³ண்ட²பரிஸாயாதி ஏதேஸங் அத்தே² ஞாதே அத² மே நிக³ண்ட²பரிஸாய ஸத்³தி⁴ங் அபி⁴க³ச்செ²ய்யாஸி, பதீஹாரஸ்ஸ மே ஸந்திகங் ஆக³ந்த்வா அத்தனோ ஆக³தபா⁴வங் ஜானாபெய்யாஸீதி அத்தோ². ஏகோ பஞ்ஹோதி ஏகோ பஞ்ஹமக்³கோ³, ஏகங் பஞ்ஹக³வேஸனந்தி அத்தோ². ஏகோ உத்³தே³ஸோதி ஏகங் நாம கிந்தி? அயங் ஏகோ உத்³தே³ஸோ. ஏகங் வெய்யாகரணந்தி ‘‘ஸப்³பே³ ஸத்தா ஆஹாரட்டி²திகா’’தி (கு²॰ பா॰ 4.1; அ॰ நி॰ 10.27) இத³ங் ஏகங் வெய்யாகரணங். ஏவங் ஸப்³ப³த்த² அத்தோ² வேதி³தப்³போ³.
Ulloketvāti kāyaṃ unnāmetvā kucchiṃ nīharitvā gīvaṃ paggayha sabbaṃ disaṃ pekkhamāno ulloketvā. Bādhetabbaṃ maññeyyāti yathā vinivijjhitvā na nikkhamati, evaṃ paṭibāhitabbaṃ maññeyya bandhitabbaṃ vā. Sahadhammikāti sakāraṇā. Atha maṃ paṭihareyyāsi saddhiṃ nigaṇṭhaparisāyāti etesaṃ atthe ñāte atha me nigaṇṭhaparisāya saddhiṃ abhigaccheyyāsi, patīhārassa me santikaṃ āgantvā attano āgatabhāvaṃ jānāpeyyāsīti attho. Eko pañhoti eko pañhamaggo, ekaṃ pañhagavesananti attho. Eko uddesoti ekaṃ nāma kinti? Ayaṃ eko uddeso. Ekaṃ veyyākaraṇanti ‘‘sabbe sattā āhāraṭṭhitikā’’ti (khu. pā. 4.1; a. ni. 10.27) idaṃ ekaṃ veyyākaraṇaṃ. Evaṃ sabbattha attho veditabbo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. நிக³ண்ட²னாடபுத்தஸுத்தங் • 8. Nigaṇṭhanāṭaputtasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. நிக³ண்ட²னாடபுத்தஸுத்தவண்ணனா • 8. Nigaṇṭhanāṭaputtasuttavaṇṇanā
