| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. নিগণ্ঠনাটপুত্তসুত্তৰণ্ণনা
8. Nigaṇṭhanāṭaputtasuttavaṇṇanā
৩৫০. আগতাগমোতি ৰাচুগ্গতপরিযত্তিধম্মো। ৰিঞ্ঞাতসাসনোতি পটিৰিদ্ধসত্থুসাসনো। তেনাহ ‘‘অনাগামী’’তিআদি। নগ্গভোগ্গন্তি অৰসনভাৰেন নগ্গং, কুটিলজ্ঝাসযতায ভোগ্গং, ততো এৰ নিস্সিরিকং। নগ্গতায হি সো রূপেন নিস্সিরিকো, ভোগ্গতায চিত্তেন। ভগৰতো সদ্ধাযাতি ভগৰতি সদ্ধায। তস্মিং সদ্দহনা ওকপ্পনা তস্স সদ্ধাতিপি ৰত্তব্বতং লভতি। গচ্ছামীতি আগচ্ছামি, বুজ্ঝামীতি অত্থো। এতং নিগণ্ঠেন পুচ্ছিতমত্থমাহ।
350.Āgatāgamoti vācuggatapariyattidhammo. Viññātasāsanoti paṭividdhasatthusāsano. Tenāha ‘‘anāgāmī’’tiādi. Naggabhogganti avasanabhāvena naggaṃ, kuṭilajjhāsayatāya bhoggaṃ, tato eva nissirikaṃ. Naggatāya hi so rūpena nissiriko, bhoggatāya cittena. Bhagavato saddhāyāti bhagavati saddhāya. Tasmiṃ saddahanā okappanā tassa saddhātipi vattabbataṃ labhati. Gacchāmīti āgacchāmi, bujjhāmīti attho. Etaṃ nigaṇṭhena pucchitamatthamāha.
কাযং উন্নামেত্ৰাতি কাযং অব্ভুন্নামেত্ৰা। কুচ্ছিং নীহরিত্ৰাতি পিট্ঠিযা নিন্নমনেন কুচ্ছিং পুরতো নীহরিত্ৰা। গীৰং পসারণৰসেন পগ্গয্হ পগ্গহেত্ৰা সব্বং দিসং পেক্খমানো। সব্বমিদং নিগণ্ঠস্স পহট্ঠাকারদস্সনত্থং ‘‘ইদানি সমণস্স গোতমস্স উপরি ৰাদং আরোপেতুং লব্ভতী’’তি। তেনাহ ‘‘ৰাতং ৰা সো’’তিআদি। সকারণাতি যুত্তিসহিতা। পঞ্হমগ্গোতি পঞ্হসঙ্খাতো ৰীমংসা, এৰং ভৰিতব্বন্তি চিত্তেনেৰ পরিৰীমংসা পঞ্হা। একো উদ্দেসোতি একং উদ্দিসনং অত্থস্স সংখিত্তৰচনং। ৰেয্যাকরণন্তি নিদ্দিসনং অত্থস্স ৰিচারেত্ৰা কথনং। এৰন্তি ইমিনা নযেন। সব্বত্থাতি সব্বেসু পঞ্হুদ্দেসৰেয্যাকরণেসু অত্থো ৰিত্থারতো ৰেদিতব্বো।
Kāyaṃunnāmetvāti kāyaṃ abbhunnāmetvā. Kucchiṃ nīharitvāti piṭṭhiyā ninnamanena kucchiṃ purato nīharitvā. Gīvaṃ pasāraṇavasena paggayha paggahetvā sabbaṃ disaṃ pekkhamāno. Sabbamidaṃ nigaṇṭhassa pahaṭṭhākāradassanatthaṃ ‘‘idāni samaṇassa gotamassa upari vādaṃ āropetuṃ labbhatī’’ti. Tenāha ‘‘vātaṃ vā so’’tiādi. Sakāraṇāti yuttisahitā. Pañhamaggoti pañhasaṅkhāto vīmaṃsā, evaṃ bhavitabbanti citteneva parivīmaṃsā pañhā. Eko uddesoti ekaṃ uddisanaṃ atthassa saṃkhittavacanaṃ. Veyyākaraṇanti niddisanaṃ atthassa vicāretvā kathanaṃ. Evanti iminā nayena. Sabbatthāti sabbesu pañhuddesaveyyākaraṇesu attho vitthārato veditabbo.
নিগণ্ঠনাটপুত্তসুত্তৰণ্ণনা নিট্ঠিতা।
Nigaṇṭhanāṭaputtasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. নিগণ্ঠনাটপুত্তসুত্তং • 8. Nigaṇṭhanāṭaputtasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. নিগণ্ঠনাটপুত্তসুত্তৰণ্ণনা • 8. Nigaṇṭhanāṭaputtasuttavaṇṇanā
