| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
८. निगण्ठनाटपुत्तसुत्तवण्णना
8. Nigaṇṭhanāṭaputtasuttavaṇṇanā
३५०. अट्ठमे तेनुपसङ्कमीति सयं आगतागमो विञ्ञातसासनो अनागामी अरियसावको समानो कस्मा नग्गभोग्गं निस्सिरिकं निगण्ठं उपसङ्कमीति? उपवादमोचनत्थञ्चेव वादारोपनत्थञ्च। निगण्ठा किर ‘‘समणस्स गोतमस्स सावका थद्धखदिरखाणुकसदिसा, केनचि सद्धिं पटिसन्थारम्पि न करोन्ती’’ति उपवदन्ति, तस्स उपवादस्स मोचनत्थञ्च, ‘‘वादञ्चस्स आरोपेस्सामी’’ति उपसङ्कमि। न ख्वाहं एत्थ भन्ते भगवतो सद्धाय गच्छामीति यस्स ञाणेन असच्छिकतं होति। सो ‘‘एवं किरेत’’न्ति अञ्ञस्स सद्धाय गच्छेय्य, मया पन ञाणेनेतं सच्छिकतं, तस्मा नाहं एत्थ भगवतो सद्धाय गच्छामीति दीपेन्तो एवमाह।
350. Aṭṭhame tenupasaṅkamīti sayaṃ āgatāgamo viññātasāsano anāgāmī ariyasāvako samāno kasmā naggabhoggaṃ nissirikaṃ nigaṇṭhaṃ upasaṅkamīti? Upavādamocanatthañceva vādāropanatthañca. Nigaṇṭhā kira ‘‘samaṇassa gotamassa sāvakā thaddhakhadirakhāṇukasadisā, kenaci saddhiṃ paṭisanthārampi na karontī’’ti upavadanti, tassa upavādassa mocanatthañca, ‘‘vādañcassa āropessāmī’’ti upasaṅkami. Na khvāhaṃ ettha bhante bhagavato saddhāya gacchāmīti yassa ñāṇena asacchikataṃ hoti. So ‘‘evaṃ kireta’’nti aññassa saddhāya gaccheyya, mayā pana ñāṇenetaṃ sacchikataṃ, tasmā nāhaṃ ettha bhagavato saddhāya gacchāmīti dīpento evamāha.
उल्लोकेत्वाति कायं उन्नामेत्वा कुच्छिं नीहरित्वा गीवं पग्गय्ह सब्बं दिसं पेक्खमानो उल्लोकेत्वा। बाधेतब्बं मञ्ञेय्याति यथा विनिविज्झित्वा न निक्खमति, एवं पटिबाहितब्बं मञ्ञेय्य बन्धितब्बं वा। सहधम्मिकाति सकारणा। अथ मं पटिहरेय्यासि सद्धिं निगण्ठपरिसायाति एतेसं अत्थे ञाते अथ मे निगण्ठपरिसाय सद्धिं अभिगच्छेय्यासि, पतीहारस्स मे सन्तिकं आगन्त्वा अत्तनो आगतभावं जानापेय्यासीति अत्थो। एको पञ्होति एको पञ्हमग्गो, एकं पञ्हगवेसनन्ति अत्थो। एको उद्देसोति एकं नाम किन्ति? अयं एको उद्देसो। एकं वेय्याकरणन्ति ‘‘सब्बे सत्ता आहारट्ठितिका’’ति (खु॰ पा॰ ४.१; अ॰ नि॰ १०.२७) इदं एकं वेय्याकरणं। एवं सब्बत्थ अत्थो वेदितब्बो।
Ulloketvāti kāyaṃ unnāmetvā kucchiṃ nīharitvā gīvaṃ paggayha sabbaṃ disaṃ pekkhamāno ulloketvā. Bādhetabbaṃ maññeyyāti yathā vinivijjhitvā na nikkhamati, evaṃ paṭibāhitabbaṃ maññeyya bandhitabbaṃ vā. Sahadhammikāti sakāraṇā. Atha maṃ paṭihareyyāsi saddhiṃ nigaṇṭhaparisāyāti etesaṃ atthe ñāte atha me nigaṇṭhaparisāya saddhiṃ abhigaccheyyāsi, patīhārassa me santikaṃ āgantvā attano āgatabhāvaṃ jānāpeyyāsīti attho. Eko pañhoti eko pañhamaggo, ekaṃ pañhagavesananti attho. Eko uddesoti ekaṃ nāma kinti? Ayaṃ eko uddeso. Ekaṃ veyyākaraṇanti ‘‘sabbe sattā āhāraṭṭhitikā’’ti (khu. pā. 4.1; a. ni. 10.27) idaṃ ekaṃ veyyākaraṇaṃ. Evaṃ sabbattha attho veditabbo.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ८. निगण्ठनाटपुत्तसुत्तं • 8. Nigaṇṭhanāṭaputtasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ८. निगण्ठनाटपुत्तसुत्तवण्णना • 8. Nigaṇṭhanāṭaputtasuttavaṇṇanā
