| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೮. ನಿಗಣ್ಠನಾಟಪುತ್ತಸುತ್ತವಣ್ಣನಾ
8. Nigaṇṭhanāṭaputtasuttavaṇṇanā
೩೫೦. ಅಟ್ಠಮೇ ತೇನುಪಸಙ್ಕಮೀತಿ ಸಯಂ ಆಗತಾಗಮೋ ವಿಞ್ಞಾತಸಾಸನೋ ಅನಾಗಾಮೀ ಅರಿಯಸಾವಕೋ ಸಮಾನೋ ಕಸ್ಮಾ ನಗ್ಗಭೋಗ್ಗಂ ನಿಸ್ಸಿರಿಕಂ ನಿಗಣ್ಠಂ ಉಪಸಙ್ಕಮೀತಿ? ಉಪವಾದಮೋಚನತ್ಥಞ್ಚೇವ ವಾದಾರೋಪನತ್ಥಞ್ಚ। ನಿಗಣ್ಠಾ ಕಿರ ‘‘ಸಮಣಸ್ಸ ಗೋತಮಸ್ಸ ಸಾವಕಾ ಥದ್ಧಖದಿರಖಾಣುಕಸದಿಸಾ, ಕೇನಚಿ ಸದ್ಧಿಂ ಪಟಿಸನ್ಥಾರಮ್ಪಿ ನ ಕರೋನ್ತೀ’’ತಿ ಉಪವದನ್ತಿ, ತಸ್ಸ ಉಪವಾದಸ್ಸ ಮೋಚನತ್ಥಞ್ಚ, ‘‘ವಾದಞ್ಚಸ್ಸ ಆರೋಪೇಸ್ಸಾಮೀ’’ತಿ ಉಪಸಙ್ಕಮಿ। ನ ಖ್ವಾಹಂ ಏತ್ಥ ಭನ್ತೇ ಭಗವತೋ ಸದ್ಧಾಯ ಗಚ್ಛಾಮೀತಿ ಯಸ್ಸ ಞಾಣೇನ ಅಸಚ್ಛಿಕತಂ ಹೋತಿ। ಸೋ ‘‘ಏವಂ ಕಿರೇತ’’ನ್ತಿ ಅಞ್ಞಸ್ಸ ಸದ್ಧಾಯ ಗಚ್ಛೇಯ್ಯ, ಮಯಾ ಪನ ಞಾಣೇನೇತಂ ಸಚ್ಛಿಕತಂ, ತಸ್ಮಾ ನಾಹಂ ಏತ್ಥ ಭಗವತೋ ಸದ್ಧಾಯ ಗಚ್ಛಾಮೀತಿ ದೀಪೇನ್ತೋ ಏವಮಾಹ।
350. Aṭṭhame tenupasaṅkamīti sayaṃ āgatāgamo viññātasāsano anāgāmī ariyasāvako samāno kasmā naggabhoggaṃ nissirikaṃ nigaṇṭhaṃ upasaṅkamīti? Upavādamocanatthañceva vādāropanatthañca. Nigaṇṭhā kira ‘‘samaṇassa gotamassa sāvakā thaddhakhadirakhāṇukasadisā, kenaci saddhiṃ paṭisanthārampi na karontī’’ti upavadanti, tassa upavādassa mocanatthañca, ‘‘vādañcassa āropessāmī’’ti upasaṅkami. Na khvāhaṃ ettha bhante bhagavato saddhāya gacchāmīti yassa ñāṇena asacchikataṃ hoti. So ‘‘evaṃ kireta’’nti aññassa saddhāya gaccheyya, mayā pana ñāṇenetaṃ sacchikataṃ, tasmā nāhaṃ ettha bhagavato saddhāya gacchāmīti dīpento evamāha.
ಉಲ್ಲೋಕೇತ್ವಾತಿ ಕಾಯಂ ಉನ್ನಾಮೇತ್ವಾ ಕುಚ್ಛಿಂ ನೀಹರಿತ್ವಾ ಗೀವಂ ಪಗ್ಗಯ್ಹ ಸಬ್ಬಂ ದಿಸಂ ಪೇಕ್ಖಮಾನೋ ಉಲ್ಲೋಕೇತ್ವಾ। ಬಾಧೇತಬ್ಬಂ ಮಞ್ಞೇಯ್ಯಾತಿ ಯಥಾ ವಿನಿವಿಜ್ಝಿತ್ವಾ ನ ನಿಕ್ಖಮತಿ, ಏವಂ ಪಟಿಬಾಹಿತಬ್ಬಂ ಮಞ್ಞೇಯ್ಯ ಬನ್ಧಿತಬ್ಬಂ ವಾ। ಸಹಧಮ್ಮಿಕಾತಿ ಸಕಾರಣಾ। ಅಥ ಮಂ ಪಟಿಹರೇಯ್ಯಾಸಿ ಸದ್ಧಿಂ ನಿಗಣ್ಠಪರಿಸಾಯಾತಿ ಏತೇಸಂ ಅತ್ಥೇ ಞಾತೇ ಅಥ ಮೇ ನಿಗಣ್ಠಪರಿಸಾಯ ಸದ್ಧಿಂ ಅಭಿಗಚ್ಛೇಯ್ಯಾಸಿ, ಪತೀಹಾರಸ್ಸ ಮೇ ಸನ್ತಿಕಂ ಆಗನ್ತ್ವಾ ಅತ್ತನೋ ಆಗತಭಾವಂ ಜಾನಾಪೇಯ್ಯಾಸೀತಿ ಅತ್ಥೋ। ಏಕೋ ಪಞ್ಹೋತಿ ಏಕೋ ಪಞ್ಹಮಗ್ಗೋ, ಏಕಂ ಪಞ್ಹಗವೇಸನನ್ತಿ ಅತ್ಥೋ। ಏಕೋ ಉದ್ದೇಸೋತಿ ಏಕಂ ನಾಮ ಕಿನ್ತಿ? ಅಯಂ ಏಕೋ ಉದ್ದೇಸೋ। ಏಕಂ ವೇಯ್ಯಾಕರಣನ್ತಿ ‘‘ಸಬ್ಬೇ ಸತ್ತಾ ಆಹಾರಟ್ಠಿತಿಕಾ’’ತಿ (ಖು॰ ಪಾ॰ ೪.೧; ಅ॰ ನಿ॰ ೧೦.೨೭) ಇದಂ ಏಕಂ ವೇಯ್ಯಾಕರಣಂ। ಏವಂ ಸಬ್ಬತ್ಥ ಅತ್ಥೋ ವೇದಿತಬ್ಬೋ।
Ulloketvāti kāyaṃ unnāmetvā kucchiṃ nīharitvā gīvaṃ paggayha sabbaṃ disaṃ pekkhamāno ulloketvā. Bādhetabbaṃ maññeyyāti yathā vinivijjhitvā na nikkhamati, evaṃ paṭibāhitabbaṃ maññeyya bandhitabbaṃ vā. Sahadhammikāti sakāraṇā. Atha maṃ paṭihareyyāsi saddhiṃ nigaṇṭhaparisāyāti etesaṃ atthe ñāte atha me nigaṇṭhaparisāya saddhiṃ abhigaccheyyāsi, patīhārassa me santikaṃ āgantvā attano āgatabhāvaṃ jānāpeyyāsīti attho. Eko pañhoti eko pañhamaggo, ekaṃ pañhagavesananti attho. Eko uddesoti ekaṃ nāma kinti? Ayaṃ eko uddeso. Ekaṃ veyyākaraṇanti ‘‘sabbe sattā āhāraṭṭhitikā’’ti (khu. pā. 4.1; a. ni. 10.27) idaṃ ekaṃ veyyākaraṇaṃ. Evaṃ sabbattha attho veditabbo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ನಿಗಣ್ಠನಾಟಪುತ್ತಸುತ್ತಂ • 8. Nigaṇṭhanāṭaputtasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೮. ನಿಗಣ್ಠನಾಟಪುತ್ತಸುತ್ತವಣ್ಣನಾ • 8. Nigaṇṭhanāṭaputtasuttavaṇṇanā
